Maxsus iqtisodiy va kichik sanoat zonalari muhandislik-kommunikatsiya infratuzilmasini yanada rivojlantirish chora-tadbirlari toʻgʻrisida (PQ-5101-son)
30.04.2021
Oʻzbekiston Respublikasi Prezidentining
Qarori
Maxsus iqtisodiy va kichik sanoat zonalarida tadbirkorlarning toʻliq va uzluksiz faoliyat olib borishini taʼminlash, ular uchun zarur muhandislik-kommunikatsiya infratuzilmasini yaratish, xorijiy va mahalliy investorlarning faoliyatini qoʻllab-quvvatlash, shuningdek, 2017 — 2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasini “Yoshlarni qoʻllab-quvvatlash va aholi salomatligini mustahkamlash yili”da amalga oshirishga oid davlat dasturida belgilangan vazifalarning ijrosini taʼminlash maqsadida:
1. Quyidagilar:
2021-2022-yillarda maxsus iqtisodiy va kichik sanoat zonalari, hududlarni ijtimoiy-iqtisodiy rivojlantirishga turtki beradigan loyihalar hamda toʻgʻridan-toʻgʻri xorijiy va mahalliy investitsiyalar ishtirokidagi yirik ishlab chiqarish loyihalarini tashqi muhandislik-kommunikatsiya tarmoqlari bilan taʼminlash tadbirlari parametrlari 1-ilovaga muvofiq;
2021-yilda maxsus iqtisodiy va kichik sanoat zonalarini tashqi muhandislik-kommunikatsiya tarmoqlari bilan taʼminlash boʻyicha amalga oshiriladigan chora-tadbirlarning manzilli roʻyxatlari (keyingi oʻrinlarda — manzilli roʻyxatlar) 2 va 2a-ilovalarga muvofiq tasdiqlansin.
2. Quyidagilar maxsus iqtisodiy va kichik sanoat zonalari hamda toʻgʻridan-toʻgʻri xorijiy va mahalliy investitsiyalar ishtirokidagi yirik ishlab chiqarish loyihalarining tashqi infratuzilmasini qurish-taʼmirlash ishlari boʻyicha:
ichimlik suvi va oqova suv tarmoqlarini qurish, rekonstruksiya qilish va taʼmirlash ishlari boʻyicha — “Suv taʼminoti va kanalizatsiya obyektlarini qurish boʻyicha injiniring kompaniyasi” unitar korxonasi;
avtomobil yoʻllarini qurish, rekonstruksiya qilish va taʼmirlash ishlari boʻyicha — Avtomobil yoʻllari qoʻmitasi huzuridagi “Mintaqaviy yoʻllarga buyurtmachi xizmati” davlat unitar korxonasi;
elektr energiyasi bilan taʼminlash ishlari boʻyicha — “Hududiy elektr tarmoqlari” AJ va “Oʻzbekiston milliy elektr tarmoqlari” AJning hududiy filiallari;
tabiiy gaz yetkazib berish ishlari boʻyicha — “Hududgaztaʼminot” AJ va “Oʻztransgaz” AJning hududiy filiallari;
hududlarni ijtimoiy-iqtisodiy rivojlantirishga turtki beradigan loyihalarning muhandislik-kommunikatsiya tarmoqlarini qurish (taʼmirlash) ishlari boʻyicha — Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari huzuridagi “Yagona buyurtmachi xizmati” injiniring kompaniyalari buyurtmachi etib belgilansin.
3. Belgilab qoʻyilsinki:
manzilli roʻyxatlarga ajratilgan mablagʻlar doirasida Vazirlar Mahkamasi tomonidan qoʻshimcha loyihalar (obyektlar)ni kiritish, shuningdek, tegishli loyihalarni chiqarib tashlash boʻyicha oʻzgartirish va (yoki) qoʻshimchalar kiritilishi mumkin;
Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari huzuridagi “Yagona buyurtmachi xizmati” injiniring kompaniyalarining 2020-yilda tugallanmagan va yildan yilga oʻtuvchi kichik sanoat zonalarini tashqi muhandislik-kommunikatsiya tarmoqlari bilan taʼminlash ishlari va kreditor qarzdorliklarni qoplash boʻyicha buyurtmachi funksiyasi saqlanib qolinadi;
manzilli roʻyxatlarda nazarda tutilmagan loyihalar (obyektlar) hamda manzilli roʻyxatlarga kiritilib, loyiha-smeta hujjatlariga asosan mablagʻlar yetishmagan loyihalar boʻyicha ularni qurish-taʼmirlash bilan bogʻliq qoʻshimcha xarajatlar Qoraqalpogʻiston Respublikasi Joʻqorgʻi Kengesi, xalq deputatlari viloyatlar va Toshkent shahar Kengashlarining qarorlariga asosan tegishlilik boʻyicha Qoraqalpogʻiston Respublikasi budjeti, viloyatlar va Toshkent shahar mahalliy budjetlarining qoʻshimcha manbalari hisobidan qoplanadi.
4. Oʻzbekiston Respublikasi Prezidentining 2020-yil 18-dekabrdagi “Hududlarda muhandislik-kommunikatsiya infratuzilmasini yanada rivojlantirish chora-tadbirlari toʻgʻrisida“gi PQ-4929-son qaroriga muvofiq budjet ssudasi mablagʻlari respublika budjeti mablagʻlari hisobidan 5 foiz stavkada uch yil muddatda qaytarish sharti bilan ajratilishi koʻzda tutilganligi maʼlumot uchun qabul qilinsin.
Moliya vazirligi 2021-yilda maxsus iqtisodiy va kichik sanoat zonalari hamda toʻgʻridan-toʻgʻri xorijiy va mahalliy investitsiyalar ishtirokidagi yirik ishlab chiqarish loyihalarining tashqi elektr va tabiiy gaz tarmoqlarini tortish ishlari uchun Davlat budjetini qoʻllab-quvvatlash maqsadida jalb qilingan xalqaro moliya institutlarining qarz mablagʻlari hisobidan “Hududiy elektr tarmoqlari” AJ, “Hududgaztaʼminot” AJ va “Oʻztransgaz” AJlarning talabnomalariga muvofiq 600 mlrd soʻmgacha budjet ssudasi ajratilishini taʼminlasin.
Bunda, ajratilgan budjet ssudasi hamda xalqaro moliya institutlariga soʻndiriladigan qarz mablagʻlarining foiz toʻlovlari oʻrtasidagi salbiy farq Davlat budjeti mablagʻlari hisobidan qoplanadi.
5. Moliya vazirligi markaziy apparatida uning boshqaruv xodimlari cheklangan soni doirasida 3 ta shtat birligidan iborat Maxsus iqtisodiy va kichik sanoat zonalari hamda yirik xorijiy va mahalliy investitsiya loyihalarining infratuzilmasini moliyalashtirish boʻlimi tashkil etilsin.
6. Investitsiyalar va tashqi savdo vazirligi Moliya vazirligi bilan birgalikda 2021-yil 1-sentabrga qadar 2022-yilda maxsus iqtisodiy va kichik sanoat zonalari hamda toʻgʻridan-toʻgʻri xorijiy va mahalliy investitsiyalar ishtirokidagi yirik ishlab chiqarish loyihalarini tashqi muhandislik-kommunikatsiya tarmoqlari bilan taʼminlash uchun 150,0 mln AQSH dollari ekvivalentidagi mablagʻlarning xalqaro moliya institutlari hisobidan jalb etilishini taʼminlasin.
7. Iqtisodiy taraqqiyot va kambagʻallikni qisqartirish vazirligi ikki hafta muddatda mahalliy ijro etuvchi hokimiyat organlari bilan birgalikda manzilli roʻyxatlarda nazarda tutilayotgan yangidan tashkil etilishi rejalashtirilayotgan kichik sanoat zonalarini qonunchilikda belgilangan tartibda rasmiylashtirish choralarini koʻrsin.
8. Qoraqalpogʻiston Respublikasi, viloyatlar va Toshkent shahar maxsus iqtisodiy zonalari maʼmuriy kengashlariga quyidagi tadbirlarni muvofiqlashtirish vazifasi yuklatilsin:
taʼminotchi va buyurtmachi korxonalar tomonidan maxsus iqtisodiy va kichik sanoat zonalari, hududlarni ijtimoiy-iqtisodiy rivojlantirishga turtki beradigan loyihalar hamda toʻgʻridan-toʻgʻri xorijiy va mahalliy investitsiyalar ishtirokidagi yirik ishlab chiqarish loyihalariga tashqi muhandislik-kommunikatsiya infratuzilmasini yaratish uchun markazlashgan tarmoqlarga ulanishda eng yaqin (markazlashgan tarmoqlar) hududni tanlash;
tashqi muhandislik-kommunikatsiya infratuzilmasini yaratish bilan bogʻliq tadbirlarga zarur mablagʻlar boʻyicha loyiha-smeta hujjatlarining ishlab chiqilishi va ekspertizadan oʻtkazilishini nazorat qilish;
har oy yakuni bilan talab etiladigan mablagʻlarning manbalari va miqdorini hisob-kitob qilgan holda Iqtisodiy taraqqiyot va kambagʻallikni qisqartirish vazirligi hamda Maxsus iqtisodiy va kichik sanoat zonalari, hududlarni ijtimoiy-iqtisodiy rivojlantirishga turtki beradigan loyihalar hamda toʻgʻridan-toʻgʻri xorijiy va mahalliy investitsiyalar ishtirokidagi yirik ishlab chiqarish loyihalarini tashqi muhandislik-kommunikatsiya infratuzilmasi bilan taʼminlashga Davlat budjetidan mablagʻlar ajratilishining maqsadga muvofiqligini aniqlash boʻyicha maxsus komissiyaga (T. Ishmetov) (keyingi oʻrinlarda — Maxsus komissiya) aniq asoslangan maʼlumotlarni taqdim etib borish;
kelgusida maxsus iqtisodiy va kichik sanoat zonalari, hududlarni ijtimoiy-iqtisodiy rivojlantirishga turtki beradigan loyihalar hamda toʻgʻridan-toʻgʻri xorijiy va mahalliy investitsiyalar ishtirokidagi yirik ishlab chiqarish loyihalari bilan bir qatorda aholi punktlarini tashqi muhandislik-kommunikatsiya tarmoqlari bilan taʼminlash darajasini ham inobatga olish.
9. Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlari maxsus iqtisodiy va kichik sanoat zonalarining bosh rejalari loyihalarini ishlab chiqish, loyiha hujjatlarini ekspertizadan oʻtkazish xarajatlari Qoraqalpogʻiston Respublikasi budjeti, viloyatlar va Toshkent shahar mahalliy budjetlarining qoʻshimcha manbalari hisobidan qoplanishini taʼminlasin.
10. Qurilish vazirligi obyektlarda qurilish, rekonstruksiya ishlarini amalga oshirishda loyiha-smeta hujjatlarini belgilangan tartibda davlat ekspertizasidan oʻtkazish va qurilish-montaj ishlarining sifatli bajarilishi ustidan davlat nazoratini oʻrnatsin.
11. Axborot texnologiyalari va kommunikatsiyalarini rivojlantirish vazirligi maxsus iqtisodiy va kichik sanoat zonalari hamda toʻgʻridan-toʻgʻri xorijiy va mahalliy investitsiyalar ishtirokidagi yirik ishlab chiqarish korxonalarining murojaatiga asosan belgilangan tartibda zarur aloqa xizmatlari bilan taʼminlash choralarini koʻrsin.
12. Maxsus komissiya (T. Ishmetov) har chorakda mavjud va yangidan tashkil etiladigan maxsus iqtisodiy va kichik sanoat zonalarining zarur tashqi muhandislik-kommunikatsiya tarmoqlari bilan taʼminlanishi boʻyicha amalga oshirilgan chora-tadbirlarning natijadorligi toʻgʻrisida Vazirlar Mahkamasiga hisobot kiritsin.
13. Vazirlar Mahkamasi har chorakda ushbu qarorda belgilangan chora-tadbirlar boʻyicha amalga oshirilgan ishlarni Vazirlar Mahkamasi Rayosati majlislarida tanqidiy muhokama qilsin hamda oʻz vaqtida va toʻliq bajarilmagan tadbirlar yuzasidan masʼul vazirlik va idoralar rahbarlariga nisbatan tegishli choralarni koʻrsin.
14. Mazkur qarorning ijrosini nazorat qilish Oʻzbekiston Respublikasi Bosh vazirining oʻrinbosarlari J.A. Qoʻchqorov va S.U. Umurzakov zimmalariga yuklansin.
Oʻzbekiston Respublikasi Prezidenti Sh. MIRZIYOYEV
Toshkent sh.,
2021-yil 30-aprel,
PQ-5101-son
Oʻzbekiston Respublikasi Prezidentining 2021-yil 30-apreldagi PQ-5101-son qaroriga 1-ILOVA
2021-2022-yillarda maxsus iqtisodiy va kichik sanoat zonalari, hududlarni ijtimoiy-iqtisodiy rivojlantirishga turtki beradigan loyihalar hamda toʻgʻridan-toʻgʻri xorijiy va mahalliy investitsiyalar ishtirokidagi yirik ishlab chiqarish loyihalarini tashqi muhandislik-kommunikatsiya tarmoqlari bilan taʼminlash tadbirlari
PARAMETRLARI
* Mablagʻlar taqsimoti va loyihalar roʻyxatini tasdiqlash Iqtisodiy taraqqiyot va kambagʻallikni qisqartirish vazirligi hamda Moliya vazirligi xulosalari asosida Vazirlar Mahkamasining tegishli hujjatlariga muvofiq belgilangan tartibda amalga oshiriladi.
Oʻzbekiston Respublikasi Prezidentining 2021-yil 30-apreldagi PQ-5101-son qaroriga 2-ILOVA
2021-yilda maxsus iqtisodiy zonalarni tashqi muhandislik-kommunikatsiya tarmoqlari bilan taʼminlash boʻyicha amalga oshiriladigan chora-tadbirlarning manzilli
ROʻYXATI
* Limitlar loyixa-smeta hujjatlari va tender (tanlov) savdolari natijalari boʻyicha aniqlashtiriladi.
Oʻzbekiston Respublikasi Prezidentining 2021-yil 30-apreldagi PQ-5101-son qaroriga 2a-ILOVA
2021-yilda kichik sanoat zonalarini tashqi muhandislik-kommunikatsiya tarmoqlari bilan taʼminlash boʻyicha amalga oshiriladigan chora-tadbirlarning manzilli
ROʻYXATI
* Yangi tashkil etilishi rejalashtirilgan kichik sanoat zonalari
** Limitlar loyiha-smeta hujjatlari va tender (tanlov) savdolari natijalari boʻyicha aniqlashtiriladi.