“Hunarmand” xalq hunarmandlari uyushmasini tashkil etish va uning faoliyati masalalari (282-son)

04.06.1997

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Xalq badiiy hunarmandchiliklari va amaliy sanʼatini yanada rivojlantirishni davlat yoʻli bilan qoʻllab-quvvatlash chora-tadbirlari toʻgʻrisida” 1997-yil 31-martdagi PF-1741-son Farmonini bajarish yuzasidan Vazirlar Mahkamasi qaror qiladi:

1. Quyidagilar:

“Hunarmand” uyushmasi “Musavvir” ilmiy-ishlab chiqarish markazi huzurida tashkil etilganligi va uning tarkibiga kirishi;

“Hunarmand” uyushmasining raisi lavozimiga koʻra “Musavvir” markazi bosh direktorining oʻrinbosari hisoblanishi;

muassislar tomonidan “Hunarmand” uyushmasining konferensiyasi oʻtkazilganligi, uning raisi saylanganligi va Ustavi tasdiqlanganligi maʼlumot uchun qabul qilinsin.

2. Quyidagilar:

“Hunarmand” uyushmasining ijro etuvchi apparati tuzilmasi 1-ilovaga muvofiq va uning xodimlarining cheklangan soni (xizmat koʻrsatuvchi xodimlardan tashqari) 22 kishidan iborat boʻlishi;

“Hunarmand” uyushmasining hududiy boʻlimlari ijro etuvchi apparatining namunaviy tuzilmasi 2-ilovaga muvofiq maʼqullansin.

3. Belgilansinki:

“Musavvir” ilmiy-ishlab chiqarish markazi oʻz faoliyati toʻgʻrisida Oʻzbekiston Respublikasi Vazirlar Mahkamasiga hisob beradi;

“Musavvir” markazining bosh direktori va “Hunarmand” xalq hunarmandlari uyushmasi raisi Vazirlar Mahkamasi tomonidan tasdiqlanadilar;

Qoraqalpogʻiston Respublikasi, viloyatlar va Toshkent shahar boʻlimlarining rahbarlari tegishli ravishda Qoraqalpogʻiston Respublikasi Vazirlar Kengashi viloyatlar va Toshkent shahar hokimliklari taqdimnomasiga koʻra “Hunarmand” uyushmasining raisi tomonidan tayinlanadilar;

“Hunarmand” uyushmasi va uning hududiy boʻlimlari apparatini mablagʻ bilan taʼminlash uyushmaning oʻz tadbirkorlik faoliyati va uning aʼzolari badallari hisobiga tashkil topadigan mablagʻlaridan amalga oshiriladi.

4. “Hunarmand” uyushmasi “Hunarmand” uyushmasining hududiy boʻlimlari toʻgʻrisidagi namunaviy nizomni 10 kun muddatda ishlab chiqsin va Oʻzbekiston Respublikasi Adliya vazirligi bilan kelishgan holda tasdiqlasin.

5. Oʻzbekiston Respublikasi Moliya vazirligi va Davlat soliq qoʻmitasi “Hunarmand” uyushmasi bilan birgalikda 1997-yil 31-martdagi 1741-son Farmonda nazarda tutilgan soliq va bojxona imtiyozlari berish tartibini 20 kun muddatda ishlab chiqsinlar va uni hududiy boʻlimlarga yetkazsinlar.

6. “Oʻzulgurjibirjasavdo” uyushmasi, Oʻzbekiston Respublikasi Tashqi iqtisodiy aloqalar vazirligi, “Oʻzbekyengilsanoat”, “Oʻzkimyosanoat”, “Oʻzgoʻshtsutsanoat” uyushmalari, “Oʻzqurilishmateriallari” aksiyadorlik kompaniyasi, Davlat oʻrmon qoʻmitasi “Hunarmand” uyushmasining xomashyo, moddiy va boshqa resurslar ajratish haqidagi buyurtmanomalarini bir oy muddatda koʻrib chiqsinlar. Zaruriyat boʻlganda Vazirlar Mahkamasiga taklif kiritsinlar.

7. “Hunardmand” uyushmasi, “Musavvir” ilmiy-ishlab chiqarish markazi Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda 3 oy muddatda yetakchi xalq ustalari huzurida xalq badiiy hunarmandchiliklari va amaliy sanʼati ustalarini tayyorlash boʻyicha yakka tartibdagi shogirdlar maktablarini tashkil etsinlar.

8. “Oʻzavtosanoat” uyushmasi “Musavvir” markaziga “Neksiya” rusumli 2 ta yengil avtomobil, shu jumladan bittasini “Hunarmand” uyushmasi uchun ajratsin.

9. Oʻzbekiston Respublikasi Aloqa vazirligi “Musavvir” ilmiy-ishlab chiqarish markazini va “Hunarmand” uyushmasini hukumat hamda shahar telefon aloqasi bilan taʼminlasin.

10. “Musavvir” ilmiy-ishlab chiqarish markazi va “Hunarmand” xalq hunarmandlari uyushmasi Toshkent shahar, Fani Mavlonov koʻchasidagi 18-uyga joylashtirilsin.

11 Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari M. 3. Usmonov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1997-yil 4-iyun,

282-son

Vazirlar Mahkamasining 1997-yil 4-iyundagi 282-son qaroriga 1-ILOVA

“Hunarmand” xalq hunarmandlari uyushmasi ijro etuvchi apparati

TUZILMASI

Vazirlar Mahkamasining 1997-yil 4-iyundagi 282-son-qaroriga 2-ILOVA

“Hunarmand” xalq hunarmandlari hududiy boʻlimlari ijro etuvchi apparatining

NAMUNAVIY TUZILMASI