Boksni yanada rivojlantirish chora-tadbirlari toʻgʻrisida (PQ-5099-son)

29.04.2021

Oʻzbekiston Respublikasi Prezidentining

Qarori

Mamlakatimizda yoshlarning boksga boʻlgan ommaviy qiziqishini inobatga olib, iqtidorli sportchilarni aniqlash, tanlash va saralash (seleksiya) tizimini yanada takomillashtirish, soha mutaxassislarini tayyorlash va ularning moddiy ragʻbatlantirilishini yaxshilash, shuningdek, oʻzbek boksining dunyodagi yetakchiligini saqlab qolish va davom ettirish maqsadida:

1. Quyidagilar boksni rivojlantirishning asosiy yoʻnalishlari etib belgilansin:

boksni aholi oʻrtasida eng ommaviy sport turlaridan biriga aylantirish, iqtidorli sportchilarni aniqlash, tanlash va saralash (seleksiya) hamda ularni professional sportchilar sifatida tayyorlashning yangi tizimini yoʻlga qoʻyish;

boks infratuzilmasini yanada rivojlantirish hamda xalqaro talablarga moslashtirish, boks maktablarini, shu jumladan davlat-xususiy sheriklik shartlari asosida koʻpaytirish;

boks boʻyicha professional trenerlar va hakamlarni tayyorlash tizimini rivojlantirish, oʻquv-uslubiy qoʻllanmalar ishlab chiqish, ilmiy-metodologik bazani yanada kuchaytirish;

Qurolli Kuchlar va huquqni muhofaza qiluvchi organlarning jismoniy tayyorgarlik mashgʻulotlariga boksni bosqichma-bosqich kiritish;

oʻzbek boksining dunyodagi yetakchiligini saqlab qolish va davom ettirish yuzasidan zarur choralarni koʻrish;

ayollar boksini rivojlantirish yuzasidan uzoq yillarga moʻljallangan istiqbolli rejalarni ishlab chiqish va amalga oshirish;

sport taʼlim muassasalarida boks boʻyicha davlat buyurtmasi parametrlarini oshirish.

6. Quyidagilar:

Boksni 2025-yilgacha rivojlantirish konsepsiyasi (keyingi oʻrinlarda — Konsepsiya) 1-ilovaga muvofiq;

Boksni 2025-yilgacha rivojlantirish konsepsiyasini 2021-2022-yillarda amalga oshirish boʻyicha “Yoʻl xaritasi” (keyingi oʻrinlarda — “Yoʻl xaritasi”) 2-ilovaga muvofiq;

Boksni 2025-yilgacha rivojlantirish konsepsiyasining maqsadli koʻrsatkichlari 3-ilovaga muvofiq tasdiqlansin.

7. Belgilansinki:

a) Konsepsiya erishilgan natijalar, maqsadli koʻrsatkichlar va boksni rivojlantirish boʻyicha tegishli davrga moʻljallangan asosiy yoʻnalishlardan kelib chiqqan holda Vazirlar Mahkamasi tomonidan har yili alohida tasdiqlanadigan “yoʻl xaritasi” asosida bosqichma-bosqich amalga oshiriladi;

b) “Yoʻl xaritasi” 2021-yilda bajarilishi moʻljallangan quyidagi choralarni qamrab oladi:

Oʻzbekiston davlat jismoniy tarbiya va sport universiteti hamda uning filiallarida boks boʻyicha davlat buyurtmasi parametrlarini oshirish;

oʻquv-mashgʻulotlar jarayoniga axborot-kommunikatsiya texnologiyalarini, shu jumladan virtual raqiblar bilan jang olib borish imkoniyatini beruvchi kompyuterlashtirilgan xonalarni tashkil qilish;

bokschilar toʻgʻrisida maʼlumotlarni tezkor olish imkonini beruvchi elektron bazani yaratish;

v) Boksni 2025-yilgacha rivojlantirish konsepsiyasining maqsadli koʻrsatkichlari, shu jumladan quyidagilarni nazarda tutadi:

2025-yilgacha sport taʼlim muassasalaridagi boks bilan muntazam shugʻullanadigan oʻquvchilar sonini 27 minggacha yetkazish;

kelgusi 5 yil ichida davlat-xususiy sheriklik shartlari asosida 7 ta boks zallarini tashkil etish;

boks boʻyicha terma jamoalarning 46 ga yaqin xalqaro sport musobaqalarida ishtirokini taʼminlash.

8. 2021-yil 1-maydan boshlab boks boʻyicha hududlarda iqtidorli yoshlarni aniqlash, tanlash va saralash (seleksiya) uchun uch bosqichli tizim joriy etilsin:

birinchi bosqichda — taʼlim muassasalari, sport maktablaridan saralangan sportchilar oʻrtasida tuman (shahar) musobaqalari;

ikkinchi bosqichda — boksga ixtisoslashgan sport maktablari, taʼlim muassasalari va sport klublaridan saralangan sportchilar oʻrtasida hududiy musobaqalar;

uchinchi bosqichda — klublararo hamda hududiy oʻquv-mashgʻulot yigʻinlari gʻoliblari va sovrindorlari oʻrtasida respublika musobaqalari (“World Series Boxing” misolida).

9. Turizm va sport vazirligi, Oliy va oʻrta maxsus taʼlim vazirligining 2021/2022 oʻquv yilidan boshlab Oʻzbekiston davlat jismoniy tarbiya va sport universiteti, ixtisoslashtirilgan olimpiya zaxiralari maktab-internatlari, ixtisoslashtirilgan bolalar-oʻsmirlar sport maktablari va bolalar-oʻsmirlar sport maktablarida boks boʻyicha amaldagi oʻqishga qabul qilishning davlat buyurtmasi parametrlarini ikki baravarga oshirish toʻgʻrisidagi taklifi qabul qilinsin.

11. Boks boʻyicha milliy terma jamoalar uchun oʻquv-mashgʻulotlar bazasini yaratish maqsadida Turizm va sport vazirligi va Toshkent viloyati hokimligining Toshkent viloyati, Angren shahri, Yangiobod qoʻrgʻoni hududida joylashgan Respublika olimpiya zaxiralari sport kolleji balansidagi 1,5 gektar maydonga ega boʻlgan sobiq stadion, suzish havzasi, shuningdek, oshxonani 2039-yil 31-dekabrga qadar Oʻzbekiston boks federatsiyasiga maqsadli tekin foydalanish huquqi asosida berish toʻgʻrisidagi taklifi maʼqullansin. Bunda, mazkur hudud atrofida sport zal, yotoqxona, oshxona hamda boshqa maishiy-xizmat bino va inshootlarni qurish uchun kamida boʻsh turgan 1 gektar yer maydoni ajratilishi taʼminlansin.

12. Toshkent viloyati, Chirchiq shahri, Zakovat koʻchasi, 2-uyda joylashgan sobiq Sanoat-iqtisodiyot kasb-hunar kolleji binosi, shuningdek, sport inshooti va yonidagi sport maydoni Oʻzbekiston boks federatsiyasi tomonidan investitsiya majburiyati asosida sotib olinishiga rozilik berilsin.

13. Iqtisodiy taraqqiyot va kambagʻallikni qisqartirish vazirligi Yoshlar siyosati va sport vazirligi bilan birgalikda 2022-2023-yillardagi investitsiya dasturlarini shakllantirishda ishlab chiqilgan loyiha-smeta hujjatlariga asosan boks boʻyicha milliy terma jamoalar uchun oʻquv-mashgʻulotlar bazasini va boks maktablarini qurish, rekonstruksiya qilish va kapital taʼmirlash ishlari uchun markazlashgan kapital qoʻyilmalar limitlari ajratilishini taʼminlasin.

14. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari mahalliy budjet mablagʻlari hisobidan olis hududlarda joylashgan sport maktablari hamda boks maktablariga jalb qilinayotgan trenerlar va boshqa mutaxassislarni 2025-yil 1-yanvargacha uy-joy bilan taʼminlash choralarini koʻrsin.

15. Yoshlar siyosati va sport vazirligi hamda Oʻzbekiston boks federatsiyasi Toshkent shahrida 2023-yilda rejalashtirilgan boks boʻyicha Jahon chempionati yuqori darajada oʻtkazilishini taʼminlasin va shu bilan bogʻliq boʻlgan “yoʻl xaritasi”ni ishlab chiqsin.

Belgilansinki:

jahon chempionatini oʻtkazish uchun aʼzolik badali va mukofot puli bilan bogʻliq sarf-xarajatlarni qoplash Davlat budjetining 2022 va 2023-yillardagi parametrlarida koʻzda tutilgan mablagʻlar doirasida bosqichma-bosqich 18 oy davomida, lekin 2023-yil 1-maygacha boʻlgan davrda amalga oshiriladi;

jahon chempionatini oʻtkazish bilan bogʻliq boʻlgan sarf-xarajatlar homiylar va Oʻzbekiston boks federatsiyasi tomonidan qoplanadi, olinadigan foyda Oʻzbekiston boks federatsiyasi tasarrufida qolib, boksni yanada rivojlantirishga va federatsiya faoliyatini moliyalashtirishga yoʻnaltiriladi.

16. Boks boʻyicha milliy terma jamoalar uchun oʻquv-mashgʻulotlar bazasini va boks maktablarini qurish, rekonstruksiya qilish, kapital taʼmirlash, jihozlash hamda ular faoliyatini taʼminlash maqsadida belgilangan tartibda shakllantiriladigan roʻyxatlar boʻyicha chetdan olib kiriladigan, Oʻzbekiston Respublikasida ishlab chiqarilmaydigan maxsus sport anjomlari va jihozlari, oʻquv uskunalari, kompyuter texnikasi, dasturiy mahsulotlar, inventar, qurilish materiallari va moddiy-texnik resurslar 2023-yil 1-martga qadar bojxona toʻlovlaridan (qoʻshilgan qiymat soligʻi va bojxona yigʻimlaridan tashqari) ozod etilsin.

17. Iqtisodiyot va moliya vazirligi mazkur qarorga asosan joriy yilda koʻzda tutilgan chora-tadbirlar va kelgusi yillarda amalga oshirilishi belgilangan vazifalar uchun zarur mablagʻlarni 2021-yil Davlat budjetida Yoshlar siyosati va sport vazirligi uchun koʻzda tutilgan mablagʻlar doirasida, 2022-yildan boshlab esa Davlat budjeti parametrlarida nazarda tutishni taʼminlasin.

18. Mazkur qarorning ijrosi quyidagi tartibda amalga oshirilsin:

yoshlar siyosati va sport vaziri A.I. Ikramov — Konsepsiyaning maqsadli koʻrsatkichlariga erishish, Konsepsiya va “Yoʻl xaritasi”ni ijro etish yuzasidan barcha zarur choralar koʻrilishini taʼminlasin, mazkur qarorda belgilangan vazifalarni oʻz vaqtida va sifatli amalga oshirishda masʼul tashkilotlarga uslubiy va amaliy yordam koʻrsatsin hamda uning ijrosi boʻyicha har oyda Vazirlar Mahkamasiga axborot kiritib borsin;

masʼul vazirlik, idora va tashkilotlar rahbarlari — Konsepsiya va “Yoʻl xaritasi”da nazarda tutilgan tadbirlarni oʻz vaqtida, sifatli va toʻliq bajarish yuzasidan barcha choralarni amalga oshirsin;

Oʻzbekiston Milliy axborot agentligi bosh direktori A.K. Koʻchimov hamda Oʻzbekiston Milliy teleradiokompaniyasi raisi A.D. Xadjayev — mazkur qarorning mazmun-mohiyati va amaliy ahamiyatini yoritishga oid maqolalar, brifinglar, tematik telekoʻrsatuvlar tashkil etsin.

19. Turizm va sport vazirligi manfaatdor vazirlik va idoralar bilan birgalikda ikki oy muddatda qonunchilik hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

20. Mazkur qarorning ijrosini nazorat qilish Oʻzbekiston Respublikasi Prezidentining maslahatchisi K.K. Kuranbayev va Oʻzbekiston Respublikasi yoshlar siyosati va sport vaziri A.I. Ikramov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2021-yil 29-aprel

PQ-5099-son

Oʻzbekiston Respublikasi Prezidentining 2021-yil 29-apreldagi PQ-5099-son qaroriga 1-ILOVA

Boksni 2025-yilgacha rivojlantirish

KONSEPSIYASI

1-bob. Umumiy qoidalar

Boksni 2025-yilgacha rivojlantirish konsepsiyasi (keyingi oʻrinlarda — Konsepsiya) boksni yanada ommalashtirish hamda tizimli rivojlantirish maqsadida ishlab chiqilgan kompleks chora-tadbirlarni oʻz ichiga oladi.

Konsepsiya boksni tizimli rivojlantirishning maqsadi, vazifalari, ustuvor yoʻnalishlari, istiqboldagi bosqichlarini belgilaydi hamda boksni rivojlantirish dasturlari va kompleks chora-tadbirlarni ishlab chiqish uchun asos boʻlib xizmat qiladi.

2-bob. Boksning rivojlanish holati va sohadagi mavjud muammolar

Oʻzbekiston boks terma jamoasi mustaqil jamoa sifatida ilk bor 1993-yildan Jahon chempionatlarida, 1996-yildan Olimpiya oʻyinlarida, 1994-yildan esa Osiyo oʻyinlarida ishtirok etishni boshladi. 2016-yil Oʻzbekiston bokschilari dunyo reytingida birinchi oʻrinni qoʻlga kiritdi. 2019-yil 6 — 22-sentabr kunlari Rossiyaning Yekaterinburg shahrida boʻlib oʻtgan boks boʻyicha jahon chempionati sportchilarimiz uchun yanada muvaffaqiyatli kechdi. Dunyoning 80 ga yaqin mamlakatidan eng kuchli charm qoʻlqop ustalari ishtirok etgan va gʻoyat keskin kurashlar ostida oʻtgan musobaqada terma jamoamiz eng yuqori pogʻonaga koʻtarilib, oʻzbek boks maktabi jahon boksining eng kuchli mamlakati sifatida dunyo hamjamiyati tomonidan tan olindi.

Jumladan, 2016-yilgi Olimpiya oʻyinlarida 3 ta oltin, 2 ta kumush, 2 ta bronza medallari, 2019-yilgi jahon chempionatida 3 ta oltin, 1 ta kumush, 1 ta bronza medallarini qoʻlga kiritib, mamlakatimiz boks boʻyicha dunyoning eng kuchli mamlakati maqomiga koʻtarildi, bokschilarimiz esa jahon chempionatining eng yaxshi bokschi nominatsiyasi gʻolibi boʻldi.

Bunday yutuqlar tasodifiy emasligini, Oʻzbekiston tom maʼnoda boks mamlakatiga aylanib borayotganini milliy terma jamoamiz aʼzolari yana bir bor butun dunyoga yaqqol namoyon etdi. Mazkur gʻalabalar “Oʻzbekiston boks maktabi”, “Oʻzbekiston bokschilari” degan soʻzlarni jahon sporti tarixiga oltin harflar bilan muhrlab qoʻydi. Bu gʻalabalarning yana bir muhim tomoni shundaki, u mamlakatimizda boshqa sport turlarining rivojiga ham qudratli turtki beradi, oʻz navbatida, yoshlarni barcha sohalarda marrani baland olib, doimo gʻalaba sari intilib yashashga oʻrgatadi.

Bugungi kunda boksni rivojlantirishga yoʻnaltirilgan 263 ta sport taʼlim muassasalarining seksiyalari va boʻlimlari faoliyat yuritmoqda, ulardan:

227 tasi sport maktablari;

13 tasi sportning yakkakurashga ixtisoslashtirilgan bolalar-oʻsmirlar sport maktablari;

15 tasi olimpiya va paralimpiya sport turlariga tayyorlash markazlari;

8 tasi olimpiya va milliy sport turlari boʻyicha maktab-internatlar.

Mazkur muassasalarda boks boʻyicha oʻquv-mashgʻulotlarni tashkil etish mumkin. Toshkent shahrida joylashgan 3 ta sport majmuasida xalqaro miqyosdagi boks musobaqalarini oʻtkazish imkoniyati mavjud.

Boks boʻyicha trenerlik faoliyati bilan shugʻullanuvchilar soni 1 215 nafarni tashkil etadi.

Shu bilan birga, boks boʻyicha yetakchilikni saqlab qolish va davom ettirish hamda sifatini oshirish, boksni zamon talablariga muvofiq yanada rivojlantirish yoʻlida toʻsiq boʻluvchi ayrim muammolar mavjud. Jumladan:

birinchidan, hududlarda malakali trenerlar va tegishli mutaxassislar yetishmasligi sababli, iqtidorli yoshlarni aniqlash, tanlash va saralash (seleksiya) ishlari talab darajasida emas;

ikkinchidan, boks uchun sifatli sport anjomlari va jihozlarining yetishmasligi hamda respublikada ishlab chiqarilayotgan sport anjomlari va jihozlarning sifat darajasi xalqaro standartlarga javob bermaydi;

uchinchidan, Oʻzbekiston milliy terma jamoasi zaxirasini tayyorlash hamda trenerlar tarkibining sifat darajasini koʻtarishga qaratilgan boks boʻyicha oliy sport mahorati maktablari mavjud emas;

toʻrtinchidan, oliy mahoratli bokschilarning markazlashgan oʻquv-mashgʻulot yigʻinlarini samarali oʻtkazishlari uchun yagona oʻquv-mashgʻulot bazasiga ehtiyoj mavjud;

beshinchidan, sportga zamonaviy innovatsion texnologiyalar talab darajasida joriy qilinmaganligi mashgʻulotlar samaradorligiga salbiy taʼsir koʻrsatmoqda;

oltinchidan, oliy mahoratli bokschilarning tibbiy xizmatdan toʻlaqonli foydalanish imkoniyati cheklangan hamda hududlarda bokschilar uchun maxsus tibbiy xizmat mavjud emas;

yettinchidan, boksni ommaviy axborot vositalarida yoritish va targʻib qilish talab darajasida tashkil qilinmagan;

sakkizinchidan, sohani ilmiy-metodik taʼminlash darajasi yetarli emas.

3-bob. Boksni rivojlantirishning asosiy maqsadlari va vazifalari

Quyidagilar boksni rivojlantirishning asosiy maqsadlari hisoblanadi:

boksni aholi oʻrtasida eng ommaviy sport turlaridan biriga aylantirish, iqtidorli sportchilarni aniqlash, tanlash va saralash (seleksiya) hamda ularni professional sportchilar sifatida tayyorlashning yangi tizimini yoʻlga qoʻyish;

yuqori malakali sportchi va kadrlarni tayyorlash sifatini oshirish;

respublikada xalqaro standartlar asosida boks boʻyicha sport jihozlari va anjomlarini ishlab chiqarishni yoʻlga qoʻyish;

oʻquv-mashgʻulotlar jarayoniga zamonaviy ilmiy-innovatsion texnologiyalarni keng joriy qilish;

sport tibbiyoti boʻlimlarida hududlardagi bokschilarga koʻrsatilayotgan tibbiy diagnostika va profilaktika sifatini oshirish;

boksni ommaviy axborot vositalarida keng yoritish;

oliy mahoratli bokschilar markazlashgan oʻquv-mashgʻulot yigʻinlarini samarali oʻtkazishlari uchun boks sport bazasini yaratish;

boks boʻyicha oliy sport mahorati maktablarini tashkil etish;

boks boʻyicha ilmiy tadqiqot va metodik ishlarini olib borish.

Koʻrsatib oʻtilgan maqsadlarga erishish uchun quyidagi vazifalar amalga oshiriladi:

a) birinchidan:

taʼlim muassasalarida oʻquv reja va dasturlarini takomillashtirish orqali xalqaro standartlar asosida yuqori malakali, kreativ va tizimli fikrlaydigan, mustaqil qaror qabul qila oladigan kadrlarni tayyorlash;

ayollar boksini rivojlantirish maqsadida ayol trenerlarni tayyorlash tizimini shakllantirish;

malaka oshirish va qayta tayyorlash tizimida xorijiy davlatlar bilan hamkorlik asosida innovatsion texnologiyalardan foydalangan holda masofaviy taʼlimni tashkil etish;

oʻquv-mashq jarayoniga jahonning yetakchi mutaxassislarini tizimli asosda jalb etish hamda kadrlarni tajriba almashish maqsadida boks rivojlangan yetakchi xorijiy davlatlarga yuborish;

respublikaning boks boʻyicha mahoratli trenerlari tomonidan yaratilgan sportchilarni tayyorlash metodikasini chuqur oʻrganib, ilmiy jihatdan samarasini isbotlagan holda, barcha sport taʼlim muassasa va tashkilotlarga keng joriy etish;

b) ikkinchidan:

yosh tadqiqotchilarni boks boʻyicha ilmiy faoliyatga keng jalb etish;

boks bilan shugʻullanishga qiziqishni oshirishga yoʻnaltirilgan oʻquv adabiyotlar yaratish;

boks boʻyicha elektron taʼlim resurslarida mashq jarayonini tashkil etish va oʻtkazish boʻyicha metodik tavsiyalarning respublika ochiq maʼlumotlar bazasini yaratish;

axborot texnologiyalari va multimedia mahsulotlarini rivojlantirishda zamonaviy tendensiyalarni hisobga olgan holda oʻquv-mashq jarayonining kompyuterlashtirish darajasini oshirish;

v) uchinchidan:

boks rivojlanmayotgan hududlarda ushbu sport turini rivojlantirish boʻyicha choralar koʻrish;

trenerlarni va tegishli mutaxassislarni Oʻzbekiston boks federatsiyasi tavsiyanomasi asosida Turizm va sport vazirligi tomonidan maʼlum bir muddatga tajribani joriy etish maqsadida hududlarga yuborish (rotatsiya);

boks boʻyicha tuman (shahar) miqyosida musobaqalar oʻtkazilishi, tahlil qilinishi va monitoringi olib borilishi;

boksga ixtisoslashgan sport maktablari, taʼlim muassasalari va sport klublaridan saralangan sportchilar oʻrtasida mintaqaviy oʻquv-mashq yigʻinlari va musobaqalar oʻtkazilishi;

oʻtkazilgan musobaqalarning gʻolib va sovrindorlaridan tarkib topgan jamoaviy klublar tashkil etilib, respublika darajasida klublararo musobaqalar oʻtkazilishi (“World Series Boxing” musobaqalar misolida);

oʻtkazilgan musobaqalar natijalari asosida boks boʻyicha oliy sport mahorati maktablarini iqtidorli sportchilar bilan butlash taʼminlanadi;

g) toʻrtinchidan:

boks boʻyicha xalqaro standart talablariga javob beruvchi sport jihozlari va anjomlari bilan taʼminlanganlik darajasini tahlil qilish;

mahalliy ishlab chiqaruvchilar tomonidan davlat standartlari va xalqaro talablarga toʻliq javob beradigan sport anjomi va jihozlarini ishlab chiqarishni taʼminlash;

d) beshinchidan:

oʻquv-mashgʻulot samaradorligini oshirish maqsadida, mashgʻulotlar jarayoniga axborot-kommunikatsiya texnologiyalarini keng joriy etish;

oʻquv-mashgʻulotlar jarayonida zamonaviy sport anjomlari (sensor qoplar va “yassi” qoʻlqoplar), maxsus dasturlardan foydalanishni tashkil etish;

virtual raqiblar bilan jang olib borish imkoniyatini beruvchi kompyuterlashtirilgan xonalarda maxsus oʻquv-mashgʻulotlarini tashkil etishni yoʻlga qoʻyish;

e) oltinchidan:

hududiy tibbiyot muassasalariga bokschilarni biriktirish;

bokschilar jismoniy holatining muntazam monitoringini olib borish;

bokschilarga tibbiy profilaktika ishlarini takomillashtirish;

harakatlanuvchi (mobil) ilmiy-tibbiyot laboratoriyalarini tashkil etish;

j) yettinchidan:

“Oʻzbek boksi” ommabop jurnalini taʼsis etish;

boksga bagʻishlangan “Ikki avlod uchrashuvi”, “Yurtimiz oʻgʻlonlari” mavzularida turkum koʻrsatuv va radioeshittirishlarni tashkil etish;

sportga boʻlgan qiziqishni orttirish maqsadida taniqli bokschilar ishtirokida ijtimoiy reklama roliklarini ishlab chiqish va yoritib borish;

sport jurnalistlarining boks yutuqlarini tahlil qilgan efirlarini ommaviy axborot vositalarida doimiy yoritib borish;

mashhur bokschilar ishtirokida sport tadbirlarini, davra suhbatlarini oʻtkazish, yoshlar va barcha xohlovchilar uchun master-klass mashgʻulotlari va dastxat-sessiyalarni tashkil etish;

taniqli bokschilar hayoti haqida badiiy va videofilmlar yaratish;

z) sakkizinchidan:

hududlardagi bokschilar toʻgʻrisida maʼlumotlarni tezkor olish imkonini beruvchi elektron bazani yaratish va monitoringini olib borish;

hududlarga boks boʻyicha oʻquv-metodik adabiyotlarni yetkazib berishni yoʻlga qoʻyish;

i) toʻqqizinchidan:

boks boʻyicha milliy terma jamoalari uchun xalqaro andozalarga mos keladigan yagona oʻquv-mashgʻulot bazasini tashkil etish;

sport bazasini zamonaviy uskunalar, sport inventar va jihozlar bilan bosqichma-bosqich jihozlash;

hududlarning iqlim xususiyatlarini hisobga olgan holda, xorijiy kompaniyalarning ilgʻor tajribasi asosida qurilish materiallaridan, energiya va resurslarni tejaydigan zamonaviy texnologiyalardan foydalangan holda boks sport markazlari loyihasini ishlab chiqish;

k) oʻninchidan:

hududlarda (Andijon, Buxoro, Qashqadaryo, Toshkent viloyatlari markazlarida) boks boʻyicha oliy sport mahorati maktablarini tashkil etish. Bunda boks boʻyicha oliy sport mahorati maktablarini:

malakali kadrlar bilan taʼminlash;

nufuzini olimpiya va paralimpiya sport turlariga tayyorlash markazlariga tenglashtirish;

qabul qilish tartibini ishlab chiqish;

zamon talablariga javob beradigan oʻquv reja va dasturlarini ishlab chiqishni nazarda tutish.

Shuningdek, ushbu maqsad va vazifalarni amalga oshirish uchun hamda Respublikada boks sohasining tizimli va samarali faoliyat olib borishi uchun uzluksiz moliyalashtirishni takomillashtirish.

4-bob. Konsepsiyani amalga oshirishdan kutilayotgan natijalar

Konsepsiya doirasida belgilangan vazifalarni bajarish orqali 2025-yilgacha boʻlgan davrda Oʻzbekistonda boksni rivojlantirishda quyidagi natijalarga erishish kutilmoqda:

boksda erishilgan xalqaro miqyosidagi yetakchilik saqlab qolinadi;

boks boʻyicha yuqori malakali kadrlarni tayyorlash tizimi yoʻlga qoʻyiladi;

boks boʻyicha ilmiy tadqiqot va metodik ishlarni takomillashtirish orqali yuqori malakali sportchilarni tayyorlash tizimi shakllantiriladi;

boks rivojlanmayotgan hududlarga trenerlar va tegishli mutaxassislarni yuborish (rotatsiya) orqali hududlarda boksda iqtidorga ega boʻlgan yoshlarni aniqlash, tanlash va saralash (seleksiya) ishlari samaradorligi taʼminlanadi;

mahalliy ishlab chiqaruvchilarga keng imkoniyat yaratib berish natijasida respublikada xalqaro standartlar asosida sport jihozlari va anjomlarini ishlab chiqarish yoʻlga qoʻyiladi;

oʻquv-mashgʻulotlar jarayoniga zamonaviy innovatsion texnologiyalarni keng joriy qilish orqali sifat koʻrsatkichlarining oʻsishiga erishiladi;

sport tibbiyoti boʻlimlarida hududlardagi bokschilarga koʻrsatilayotgan tibbiy diagnostika va profilaktika sifatining oshirilishi milliy terma jamoa zaxirasini sifatli sportchilar bilan toʻldirishga sharoit yaratiladi;

boksni ommaviy axborot vositalarida keng yoritilishi orqali aholi orasida boksga boʻlgan qiziqishni yanada kuchaytirish va ommaviylik darajasi ortishiga erishiladi;

hududlardagi bokschilar toʻgʻrisida maʼlumotlar elektron bazasini yaratish orqali ular toʻgʻrisidagi maʼlumotlarni tezkor va sifatli olish imkoni yaratiladi;

oliy mahoratli bokschilarni markazlashgan oʻquv-mashgʻulot yigʻinlarini samarali oʻtkazishlari uchun boks sport bazasini tashkil etish orqali bokschilarning tayyorgarlik darajasida barqarorlik taʼminlanadi, natijada xalqaro maydondagi oʻrni saqlab qolinishiga erishiladi;

hududlarda boks boʻyicha oliy sport mahorati maktablarini tashkil etish orqali kadrlar zaxirasini shakllantirish boʻyicha uzluksiz tizim yoʻlga qoʻyiladi.

Oʻzbekiston Respublikasi Prezidentining 2021-yil 29-apreldagi PQ-5099-son qaroriga 2-ILOVA

Boksni 2025-yilgacha rivojlantirish konsepsiyasini 2021-2022-yillarda amalga oshirish boʻyicha

“Yoʻl xaritasi”

T/r Tadbirlar nomi Amalga oshirish mexanizmi Amalga oshirish muddati Masʼul ijrochilar I. Boksni aholi oʻrtasida eng ommaviy sport turlaridan biriga aylantirish, iqtidorli sportchilarni aniqlash, tanlash va saralash (seleksiya) hamda ularni professional sportchilar sifatida tayyorlashning yangi tizimini yoʻlga qoʻyish 1. Respublikada “Sport ustasi” unvoniga sazovor boʻlish huquqini beradigan xalqaro musobaqalarni tashkil qilish. “Sport ustasi” unvonini beruvchi xalqaro musobaqalar tashkil qilinadi hamda iqtidorli sportchilar aniqlanadi. 2022-yil davomida Oʻzbekiston boks federatsiyasi (S. Polatov), Turizm va sport vazirligi (A. Karimov), Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari 2. Qoraqalpogʻiston Respublikasi, Jizzax, Navoiy, Sirdaryo va Surxondaryo viloyatlarida boksni rivojlantirish. 1. Hududlarda boks rivojlanmasligining sabablarini oʻrganish. 2. Tahlil natijalariga koʻra hududlarda boksni rivojlantirish chora-tadbirlarini ishlab chiqish. 2021-yil avgust Oʻzbekiston boks federatsiyasi (S. Polatov), Turizm va sport vazirligi (A. Karimov), Qoraqalpogʻiston Respublikasi Vazirlar Kengashi, Jizzax, Navoiy, Sirdaryo va Surxondaryo viloyatlari hokimliklari 3. Oʻzbekiston boks federatsiyasi yoʻllanmasi asosida hududlarga trenerlarni va tegishli mutaxassislarni maʼlum bir muddatga ilgʻor tajribani joriy etish maqsadida yuborish (rotatsiya). 1. Boks rivojlanmayotgan hududlarga trenerlarni yuborish (rotatsiya) va tegishli mutaxassislarni biriktirish reja va shartlarini ishlab chiqish. 2. Tajriba sifatida Jizzax va Sirdaryo viloyatlarini tanlash va mutaxassislarni yuborish. 2021-yil avgust Oʻzbekiston boks federatsiyasi (S. Polatov), Turizm va sport vazirligi (A. Karimov), Jizzax va Sirdaryo viloyatlari hokimliklari 4. Hududlarda boks boʻyicha iqtidorli yoshlarni aniqlash, tanlash va saralash (seleksiya) ishlarini takomillashtirish. 1. Iqtidorli yoshlarni hududlardagi seleksionerlarni jalb qilgan holda aniqlash. 2. Saralab olish (seleksiya) yoʻli bilan aniqlangan iqtidorli yoshlarni kelajakda oliy mahoratli bokschi boʻlib shakllanishi uchun ixtisoslashtirilgan sport taʼlim muassasalariga yoʻnaltirish. 3. Taʼlim muassasalarida ushbu yoshlarning oʻqish va shugʻullanish jarayonini doimiy nazoratga olgan holda monitoring olib borish. 2021-yil maydan boshlab Oʻzbekiston boks federatsiyasi (S. Polatov), Yoshlar siyosati va sport vazirligi (Sh. Maxmudov), Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari 5. Iqtidorli sportchilarni aniqlash uchun boks boʻyicha tuman (shahar) miqyosida musobaqalar oʻtkazilishini tahlil qilishni va monitoring olib borishni joriy etish. 1. Tuman saralash bosqichlarini uzluksiz oʻtkazilishini joriy etish. 2. Hududlardagi seleksionerlar tomonidan tuman jismoniy tarbiya va ommaviy sport tadbirlari kalendar rejasi asosida oʻtkazilayotgan musobaqalarda iqtidorli yoshlar roʻyxatini shakllantirish hamda ularning harakatlanish monitoringini yuritishini yoʻlga qoʻyish. 2021-yil sentabr Oʻzbekiston boks federatsiyasi (S. Polatov), Turizm va sport vazirligi (A. Karimov) 6. Boksga ixtisoslashgan sport maktablari, taʼlim muassasalari va sport klublaridan saralangan sportchilar oʻrtasida mintaqaviy oʻquv-mashq yigʻinlarini oʻtkazish. 1. Boks boʻyicha viloyat oʻquv-mashq yigʻinlarini uzluksiz oʻtkazilishini taʼminlash. 2. Hududlardagi iqtidorli yoshlar oʻrtasida viloyat jismoniy tarbiya va ommaviy sport tadbirlari kalendar rejasi asosida oʻtkazilayotgan oʻquv-mashq yigʻinlari natijalarining doimiy tahlili va monitoringini yuritish. 2021-yil sentabrdan boshlab doimiy Oʻzbekiston boks federatsiyasi (S. Polatov), Yoshlar siyosati va sport vazirligi (Sh. Maxmudov) 7. Hududlarda oʻtkazilgan musobaqalarning gʻolib va sovrindorlaridan tarkib topgan jamoaviy klublar tashkil etish, klublararo musobaqalar oʻtkazilishini yoʻlga qoʻyish (“World Series Boxing” musobaqalar misolida). 1. Musobaqalar gʻolib va sovrindorlaridan tarkib topgan jamoaviy klublarni tashkil etish. 2. Klublarni hudud nomidan Respublika musobaqalari bosqichlarida ishtirok etishini taʼminlash. 2021-yil noyabrdan boshlab doimiy Oʻzbekiston boks federatsiyasi (S. Polatov), Yoshlar siyosati va sport vazirligi (Sh. Maxmudov), Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari 8. Chekka joylarda (shu jumladan, togʻlik tumanlarda) joylashgan sport muassasalari boks boʻlimlarini qoʻllab-quvvatlash. 1. Chekka joylarda sport muassasalari boks boʻlimlarini qoʻllab-quvvatlashni nazarda tutuvchi chora-tadbirlar rejasini ishlab chiqish. 2021-yil sentabr Yoshlar siyosati va sport vazirligi (Sh. Maxmudov), Oʻzbekiston boks federatsiyasi (S. Polatov), Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari 2. Chora-tadbirlar rejasi ijrosini amalga oshirish. Chora-tadbirlar rejasida belgilangan muddatlarda 9. Mashhur bokschilar ishtirokida sport tadbirlarini, davra suhbatlarini oʻtkazish, yoshlar va barcha xohlovchilar uchun master-klass mashgʻulotlari va dastxat-sessiyalarni tashkil etish. 1. Turizm va sport vazirligining hududiy boshqarmalari Oʻzbekiston boks federatsiyasi boʻlimlari bilan birgalikda qoʻshma chora-tadbirlar rejalarini ishlab chiqish. 2021-yil iyul Oʻzbekiston boks federatsiyasi (S. Polatov), Yoshlar siyosati va sport vazirligi (Sh. Maxmudov), Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari 2. Chora-tadbirlar rejalari ijrosini taʼminlash va ularning ommaviy axborot vositalarida keng yoritilishini tashkil etish. Chora-tadbirlar rejalarida belgilangan muddatlarda 10. Bokschilar toʻgʻrisida maʼlumotlarni tezkor olish imkonini beruvchi elektron bazani yaratish. 1. Elektron bazani yaratish boʻyicha tanlov eʼlon qilish. 2021-yil iyul Oʻzbekiston boks federatsiyasi (S. Polatov), Turizm va sport vazirligi (A. Karimov) 2. Elektron bazani joriy etish va uning monitoringini yuritish. 2021-yil noyabr II. Yuqori malakali sportchi va kadrlarni tayyorlash sifatini oshirish 11. Oʻzbekiston davlat jismoniy tarbiya va sport universiteti hamda uning filiallarida boks boʻyicha davlat buyurtmasi parametrlarini oshirish. 1. Hududlarda boks boʻyicha trenerlarga boʻlgan real ehtiyojni aniqlash. 2. Real ehtiyojdan kelib chiqib, qabul kvotalarini oshirish boʻyicha respublikadagi taʼlim muassasalariga oʻqishga qabul qilish boʻyicha Davlat komissiyasiga taklif kiritish. 2021-yil iyun Turizm va sport vazirligi (A. Karimov), Iqtisodiy taraqqiyot va kambagʻallikni qisqartirish vazirligi (A. Boboyev) 12. Sport taʼlim muassasalarida oʻquv reja va dasturlarini takomillashtirish va jahon tajribasi asosida boksni rivojlantirishning ilmiy-metodik taʼminotini yoʻlga qoʻyish. 1. Oʻquv reja va taʼlim dasturlarini xorijiy tajriba asosida qayta koʻrib chiqish. 2021-yil sentabr Yoshlar siyosati va sport vazirligi (Sh. Maxmudov), Iqtisodiyot va moliya vazirligi (Sh. Kudbiyev) 2. Xalqaro standartlarga javob beradigan oʻquv rejalari va taʼlim dasturlari, maxsus taʼlim dasturlarini ishlab chiqish. 2022-yil davomida 3. Ishlab chiqilgan oʻquv rejalari va taʼlim dasturlarini bosqichma-bosqich chop etish va sport taʼlim muassasalariga yetkazish. 2022/2023 oʻquv yilida 13. Boks boʻyicha elektron taʼlim resurslarida mashq jarayonini tashkil etish va oʻtkazish boʻyicha metodik tavsiyalarning respublika ochiq maʼlumotlar bazasini yaratish. 1. Boks boʻyicha elektron darsliklar, mashq jarayonlarini videolavhalarda aks ettiruvchi elektron metodik qoʻllanmalar yaratish. 2. Elektron darslik va qoʻllanmalarning yagona respublika ochiq maʼlumotlar bazasini yaratish. 2021-yil sentabr Oʻzbekiston boks federatsiyasi (S. Polatov), Turizm va sport vazirligi (A. Karimov) 14. Hududlarga boks boʻyicha oʻquv-metodik adabiyotlarni yetkazib berishni yoʻlga qoʻyish. 1. Boks boʻyicha mavjud oʻquv va uslubiy qoʻllanmalar roʻyxatini shakllantirish. 2021-yil avgust Oʻzbekiston boks federatsiyasi (S. Polatov), Yoshlar siyosati va sport vazirligi (Sh. Maxmudov) 2. Har yili ehtiyoj mavjud boʻlgan adabiyotlar (psixolog tayyorgarlik, farmakologiya, diyetologiya, fiziologiya kabi) roʻyxatini shakllantirish va buyurtma berish. 2021-yil sentabr 3. Hududlarga adabiyotlarni, shu jumladan elektron shaklda yetkazib berish rejasini ishlab chiqish va ijrosini taʼminlash. Rejada belgilangan muddatlarda 15. Boks boʻyicha malakali mutaxassislarni tayyorlash, qayta tayyorlash va ularning malakasini oshirish tizimini yanada takomillashtirish. 1. Zamon talablaridan kelib chiqib, masofaviy taʼlim tizimini joriy etish maqsadida malaka oshirish va qayta tayyorlash tizimidagi oʻquv reja va taʼlim dasturlarini xorijiy tajriba asosida qayta koʻrib chiqish. 2. Xalqaro standartlarga javob beradigan malaka oshirish va qayta tayyorlash oʻquv rejalari va taʼlim dasturlari, maxsus taʼlim dasturla?ini ishlab chiqish. 2021/2022 oʻquv yili Turizm va sport vazirligi (A. Karimov) 16. Oʻquv-mashq jarayoniga jahonning yetakchi mutaxassislarini tizimli asosda jalb etish hamda kadrlarni tajriba almashish maqsadida boks rivojlangan yetakchi xorijiy davlatlarga yuborish. 1. Boks boʻyicha yetakchi xorijiy davlatlarni oʻrganib chiqish. 2021-yil iyul Oʻzbekiston boks federatsiyasi (S. Polatov), Turizm va sport vazirligi (A. Karimov) 2. Mutaxassislarni xorijiy davlatlarga tajriba almashishga yuborish hamda ularning yurtimizga tajriba almashish maqsadida kelish rejasini ishlab chiqish va tegishli tartibda tasdiqlash. 3. Tasdiqlangan reja asosida tajriba almashish ishlarini tashkil etish. 2021-yil sentabr III. Boks boʻyicha ilmiy-tadqiqot ishlarini takomillashtirish, oʻquv jarayoniga zamonaviy innovatsion texnologiyalarni keng joriy etish 17. Boks bilan shugʻullanishga qiziqishni oshirishga yoʻnaltirilgan adabiyotlarni yaratish. 1. Sport qahramonlari hayotini jozibali bayon etish orqali badiiy adabiyotlarni yaratish. 2. Mashhur sportchilar tajribasini koʻrsatib beruvchi oʻquv adabiyotlar yaratish va mashgʻulotlarda foydalanishni yoʻlga qoʻyish. 2022-yil yanvar Oʻzbekiston boks federatsiyasi (S. Polatov), Turizm va sport vazirligi (A. Karimov) 18. Yosh tadqiqotchilarni boks boʻyicha ilmiy faoliyatga keng jalb etish. 1. Oliy taʼlimdan keyingi taʼlimda tahsil olayotgan tayanch doktorantura izlanuvchilariga boks boʻyicha zarur mavzular toʻplamini shakllantirib berish. 2. Boks boʻyicha taʼlim grantlarini joriy etish va eʼlon qilish. 2021-yil sentabr Innovatsion rivojlanish vazirligi (I. Abduraxmonov), Turizm va sport vazirligi (A. Karimov), Oʻzbekiston boks federatsiyasi (S. Polatov) 19. Boksga ilm-fanning innovatsion yutuqlarini joriy etish. 1. Boks boʻyicha oʻtkazilgan tadqiqotlar tahlilini amalga oshirish. 2. Oʻrganilgan va saralab olingan tadqiqot natijalarini amaliyotga joriy etish. 3. Oʻquv-mashgʻulotlar jarayonida innovatsion texnologiyalarni qoʻllash. 2022-yil yanvar Oʻzbekiston boks federatsiyasi (S. Polatov), Turizm va sport vazirligi (A. Karimov) 20. Axborot texnologiyalari va multimedia mahsulotlaridan keng foydalangan holda oʻquv-mashq jarayonining kompyuterlashtirish darajasini oshirish. 1. Bokschilarni pedagogik-psixologik, texnik-taktik tayyorlash imkonini beruvchi kompyuterlashtirilgan oʻquv xonalarini tashkil etish. 2. Oʻquv-mashq jarayoniga kompyuter dasturlarini joriy etish. 2021-yil sentabr Oʻzbekiston boks federatsiyasi (S. Polatov), Turizm va sport vazirligi (A. Karimov) 21. Oʻquv-mashgʻulot samaradorligini oshirish maqsadida, mashgʻulotlar jarayoniga axborot-kommunikatsiya texnologiyalarini joriy etish. 1. Bokschilarni texnik-taktik tayyorlashda kompyuter dasturlaridan keng foydalanish. 2. Oʻquv-mashq jarayoniga kompyuter dasturlarini joriy etish. 2021-yil sentabr Oʻzbekiston boks federatsiyasi (S. Polatov), Turizm va sport vazirligi (A. Karimov), Innovatsion rivojlanish vazirligi (I. Abduraxmonov) 22. Oʻquv-mashgʻulotlar jarayoniga zamonaviy sport anjomlari (sensor qoplar, va “yassi” qoʻlqoplar), maxsus dasturlarni keng joriy qilish. 1. Bokschilarni jismoniy jihatdan hamda texnik-taktik tayyorlashda innovatsion jihoz va anjomlardan foydalanishni yoʻlga qoʻyish. 2. Bokschilarning mashgʻulot jarayonidagi kamchiliklarini tezkor tahlil qilish imkoniyatini beruvchi maxsus kompyuter dasturlarini joriy etish. 2021-yil dekabrdan boshlab doimiy Oʻzbekiston boks federatsiyasi (S. Polatov), Yoshlar siyosati va sport vazirligi (Sh. Maxmudov) 23. Virtual raqiblar bilan jang olib borish imkoniyatini beruvchi kompyuterlashtirilgan xonalarda maxsus oʻquv-mashgʻulotlarni tashkil etishni yoʻlga qoʻyish. 1. Bokschilarni texnik-taktik tayyorlash jarayoniga virtual mashgʻulot va janglarni joriy etish. 2. Virtual mashgʻulotlar, janglar olib borish imkoniyatini beruvchi maxsus jihoz va anjomlar olib kelish, ularni joylashtirish va samarali yuritish. 2021-yil sentabrdan boshlab doimiy Oʻzbekiston boks federatsiyasi (S. Polatov), Yoshlar siyosati va sport vazirligi (Sh. Maxmudov) IV. Bokschilarga koʻrsatilayotgan tibbiy xizmat sifatini oshirish 24. Hududiy tibbiyoti boʻlimlariga bokschilarni biriktirish. 1. Bokschilar sogʻligini uzluksiz nazorat qilish maqsadida tibbiy kartalar yuritilishini takomillashtirish. 2. Bokschilar sogʻligini uzluksiz nazorat qilishning monitoringini tashkil etish. 2021-yil oktabr Sogʻliqni saqlash vazirligi (A. Xadjibayev), Turizm va sport vazirligi (A. Karimov), Oʻzbekiston boks federatsiyasi (S. Polatov) 25. Bokschilarni tibbiy profilaktika qilish ishlarini takomillashtirish. 1. Bokschilar sogʻligini yilda kamida ikki marotaba diagnostika qilish va kasalliklarni oldini olish maqsadida tibbiy profilaktika ishlarini tashkil etish. 2. Harakatlanuvchi (mobil) ilmiy-tibbiyot laboratoriyalarini tashkil etish. 2022-yildan boshlab Sogʻliqni saqlash vazirligi (A. Xadjibayev), Yoshlar siyosati va sport vazirligi (Sh. Maxmudov), Oʻzbekiston boks federatsiyasi (S. Polatov) V. Boks infratuzilmasini rivojlantirish, moddiy-texnik jihatdan yanada yaxshilash hamda xalqaro talablarga moslashtirish 26. Xalqaro talablarga javob beradigan boks boʻyicha milliy terma jamoalari uchun oʻquv-mashgʻulot bazasini yaratish. 1. Boks boʻyicha milliy terma jamoalar uchun oʻquv-mashgʻulot bazasini yaratish maqsadida Turizm va sport vazirligi va Toshkent viloyati hokimligi tomonidan Toshkent viloyati, Angren shahri, Yangiobod qoʻrgʻoni hududida joylashgan Respublika olimpiya zaxiralari sport kolleji balansidagi 1,5 gektar maydonga ega boʻlgan sobiq stadion, suzish havzasi, shuningdek, oshxonani 2039-yil 31-dekabrga qadar Oʻzbekiston boks federatsiyasiga maqsadli tekin foydalanish huquqi asosida berish yuzasidan Hukumat qarori loyihasini ishlab chiqish. 2. Hukumat qarori loyihasini belgilangan tartibda Vazirlar Mahkamasiga kiritish. 2021-yil noyabr Turizm va sport vazirligi (A. Karimov), Davlat aktivlarni boshqarish agentligi (A. Ortiqov), Toshkent viloyati hokimligi (D. Xidoyatov), Oʻzbekiston boks federatsiyasi (S. Polatov) 27. Andijon viloyati (Andijon, Namangan va Fargʻona viloyatlari), Buxoro viloyati (Qoraqalpogʻiston Respublikasi, Buxoro, Navoiy va Xorazm viloyatlari), Qashqadaryo viloyati (Jizzax, Qashqadaryo, Samarqand va Surxondaryo viloyatlari) hamda Toshkent viloyatlari (Sirdaryo va Toshkent viloyatlari, Toshkent shahri) markazlarida Turizm va sport vazirli?i huzuridagi boks boʻyicha oliy sport mahorati maktablarining moddiy-texnika bazasini yaratish. 1. Boks boʻyicha oliy sport mahorati maktablarini faoliyatini tashkil etish uchun zarur bino va inshootlar ajratish. 2. Investitsiya dasturini shakllantirishda ishlab chiqilgan loyiha-smeta hujjatlariga asosan boks boʻyicha milliy terma jamoalari uchun oʻquv-mashgʻulot bazasini va boks maktablarini qurish, rekonstruksiya qilish va kapital taʼmirlash ishlari uchun 2022–2023-yillarda markazlashgan kapital qoʻyilmalar limitlarini ajratilishini taʼminlash. 2021-yil oktabr Turizm va sport vazirligi (A. Karimov), Oʻzbekiston boks federatsiyasi (S. Polatov), Iqtisodiy taraqqiyot va kambagʻallikni qisqartirish vazirligi (A. Boboyev), Andijon (Sh. Abduraxmonov), Qashqadaryo (Z. Mirzayev), Buxoro (B. Zaripov), Toshkent (D. Xidoyatov) viloyatlari hokimliklari 28. Boks boʻyicha xalqaro standart talablariga mos keluvchi sport jihozlari va anjomlari bilan taʼminlanganlik darajasini tahlil qilish va mahalliy sharoitlardan kelib chiqib, sport jihozlari va anjomlarini ishlab chiqarishni yoʻlga qoʻyish. 1. Hududlarda boksga oid boʻlgan jihoz va anjomlarga boʻlgan ehtiyojni aniqlash hamda ular bilan taʼminlanganlik darajasini tahlil qilish maqsadida hududiy ishchi guruhlarni tuzish. 2021-yil iyun Iqtisodiyot va moliya vazirligi (Sh. Kudbiyev), Oʻzbekiston boks federatsiyasi (S. Polatov), Yoshlar siyosati va sport vazirligi (Sh. Maxmudov), Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari 2. Ishchi guruhlar tahlillarini umumlashtirish va xulosa tayyorlash. 2021-yil avgust 3. Zarur boʻlgan jihoz va anjomlar roʻyxati asosida mahalliy ishlab chiqaruvchilarga buyurtma berish va hududlarni boks boʻyicha jihoz va anjomlar bilan taʼminlash. 2022-yil yanvardan boshlab 29. Sport yakkakurashlari boʻyicha Respublika oliy sport mahorati maktabi boks boʻlimining Oʻzbekiston milliy terma jamoa aʼzolari uchun Toshkent shahrida zamonaviy (boshqaruv binosi, boks zali, sauna, konferensiya zali, 100 oʻrinli yotoqxona va oshxonasiga ega) boks bazasini qurish. 1. Yoshlar siyosati va sport vazirligi huzuridagi “Sport obyektlari infratuzilmasini rivojlantirish injiniring kompaniyasi” davlat unitar korxonasi tomonidan Sport yakkakurashlari boʻyicha Respublika oliy sport mahorati maktabi boks boʻlimining Oʻzbekiston milliy terma jamoa aʼzolari uchun Toshkent shahrida zamonaviy boks bazasini qurish masalasini belgilangan tartibda 2022-yil uchun qurilishlarning manzilli dasturiga kiritish va loyiha-smeta hujjatlarini ishlab chiqib tasdiqlash uchun Vazirlar Mahkamasiga kiritish. 2021-yil oktabr Yoshlar siyosati va sport vazirligi (Sh. Maxmudov), Oʻzbekiston boks federatsiyasi (S. Polatov), Iqtisodiyot va moliya vazirligi (Sh. Kudbiyev), Toshkent shahar hokimligi (Sh. Umurzakov) 2. Toshkent shahar hokimligi tomonidan Sport yakkakurashlari boʻyicha Respublika oliy sport mahorati maktabining boks boʻlimiga Toshkent shahri markazidan zamonaviy (boshqaruv binosi, boks zali, sauna, konferensiya zali, 100 oʻrinli yotoqxona va oshxonasiga ega) boks bazasini qurish uchun yer ajratish boʻyicha Vazirlar Mahkamasiga taklif kiritish. 2021-yil avgust 30. Sportchilar (shu jumladan yosh sportchilarni) va trenerlarni moddiy ragʻbatlantirish tizimini yanada takomillashtirish. 1. Ishchi guruh tuzish. 2021-yil may Turizm va sport vazirligi (A. Karimov), Oʻzbekiston Milliy olimpiya qoʻmitasi (R. Shoabduraxmonov), Moliya vazirligi (J. Abruyev), sport federatsiyalari va assotsiatsiyalari 2. Normativ-huquqiy hujjat loyihasini vazirlik, idora va tashkilotlar bilan kelishish hamda Vazirlar Mahkamasiga belgilangan tartibda kiritish. 2021-yil avgust VI. Boksni yanada ommalashtirish 31. Boksni aholi orasida keng targʻib qilish. 1. “Oʻzbek boksi” ommabop jurnalini taʼsis etish. 2021-yil avgust Oʻzbekiston boks federatsiyasi (S. Polatov), Yoshlar siyosati va sport vazirligi (Sh. Maxmudov), Oʻzbekiston milliy teleradiokompaniyasi (A. Xadjayev) 2. Boksga bagʻishlangan “Ikki avlod uchrashuvi” va “Yurtimiz oʻgʻlonlari” mavzularida turkum koʻrsatuv va radioeshittirishlarni tashkil etish. Reja asosida 32. Mashhur bokschilar faoliyatini ommaviy axborot vositalarida yoritishni taʼminlash orqali boksni ommalashtirish. 1. Taniqli sportchilar ishtirokida ijtimoiy reklama roliklarini ishlab chiqish va yoritib borish. 2021-yil iyul Oʻzbekiston boks federatsiyasi (S. Polatov), Turizm va sport vazirligi (A. Karimov), Oʻzbekiston milliy teleradiokompaniyasi (A. Xadjayev), Kinematografiya agentligi (F. Abduxalikov) 2. Sport jurnalistlarining boks yutuqlarini tahlil qilgan efirlarini OAVda doimiy yoritib borish. 2021-yil avgust 3. Taniqli bokschilar hayoti haqida badiiy va videofilmlar yaratish. 2021-yil noyabr 33. Ayollar boksini yanada ommalashtirish. 1. Taniqli ayol sportchilar ishtirokida ijtimoiy reklama roliklarini ishlab chiqish va yoritib borish. 2021-yil iyul Oʻzbekiston boks federatsiyasi (S. Polatov), Yoshlar siyosati va sport vazirligi (Sh. Maxmudov), Oʻzbekiston milliy teleradiokompaniyasi (A. Xadjayev), Kinematografiya agentligi (F. Abduxalikov) 2. Sport jurnalistlarining ayollar boksi yutuqlarini tahlil qilgan efirlarini OAVda doimiy yoritib borish. doimiy 3. Taniqli ayol bokschilar hayoti haqida badiiy va videofilmlar yaratish. 2021-yil noyabr

Izoh: normativ-huquqiy hujjatlar tegishli huquqiy munosabatlarni tartibga solish sohasi va predmetiga qarab qayta koʻrib chiqilishi yoki bir hujjatga birlashtirilishi mumkin.

Oʻzbekiston Respublikasi Prezidentining 2021-yil 29-apreldagi PQ-5099-son qaroriga 3-ILOVA

Boksni 2025-yilgacha rivojlantirish konsepsiyasining maqsadli koʻrsatkichlari

T/r Koʻrsatkichlar Oʻlchov birligi Yillar kesimida Masʼul ijrochilar 2021 2022 2023 2024 2025 1. Boks bilan muntazam shugʻullanayotgan 13 — 17 yosh toifasidagi bolalar sonini oshirish. Jalb etiladigan bolalar soni 6 450 7 500 8 000 8 250 8 750 Yoshlar siyosati va sport vazirligi, Oʻzbekiston boks federatsiyasi 3. Sport taʼlim muassasalaridagi boks bilan muntazam shugʻullanadigan oʻquvchilar sonini oshirish. Jalb etiladigan oʻquvchilar soni 23 406 25 000 25 500 26 000 27 000 Yoshlar siyosati va sport vazirligi, Oʻzbekiston boks federatsiyasi 4. Sport taʼlim muassasalari oʻquvchilari oʻrtasida boks musobaqalarini tashkil etish. Musobaqalar soni 20 26 28 30 34 Yoshlar siyosati va sport vazirligi, Oʻzbekiston boks federatsiyasi Jalb etilganlar soni 1 800 1 950 2 100 2 250 2 550 5. Umumiy oʻrta, oʻrta maxsus, professional taʼlim va sport taʼlim muassasalari sport inshootlaridan samarali foydalanish. Foizda foydalanish darajasi) 37 40 45 50 55 Maktabgacha va maktab taʼlimi vazirligi, Oliy taʼlim, fan va innovatsiyalar vazirligi, Oʻzbekiston boks federatsiyasi, Yoshlar siyosati va sport vazirligi 6. Davlat-xususiy sheriklik shartlari asosida tashkil etiladigan boks zallari. Sport zallari soni 2 2 2 1 Andijon, Buxoro, Jizzax, Toshkent, Fargʻona, Xorazm viloyatlar va Toshkent shahar hokimliklari 7. Sport taʼlim muassasalarini boks sport jihozlari bilan taʼminlash va maʼnan eskirgan sport anjomlarini yangilab borish. Foiz hisobida 5 10 15 20 30 Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari 8. Boks boʻyicha terma jamoalarning xalqaro sport musobaqalarida ishtirokini taʼminlash. Musobaqalar soni 10 6 8 10 12 Oʻzbekiston boks federatsiyasi, Oʻzbekiston Milliy olimpiya qoʻmitasi, Yoshlar siyosati va sport vazirligi 9. Oʻzbekistonda boks boʻyicha Osiyo va Jahon chempionatlari hamda nufuzli xalqaro sport musobaqalarini oʻtkazish. Musobaqalar soni 1 2 2 3 2 Oʻzbekiston boks federatsiyas?, Oʻzbekiston Milliy olimpiya qoʻmitasi, Yoshlar siyosati va sport vazirligi 10. Xalqaro boks assotsiatsiyasi (AIBA) bilan aloqalarni yoʻlga qoʻyish, terma jamoalar bilan ishlaydigan trenerlar va boshqa mutaxassislar malakasini oshirish va amaliyot (stajirovka) oʻtashlarini tashkillashtirish. Malakasini oshirganlar soni 2 3 3 2 Oʻzbekiston boks federatsiyasi, Oʻzbekiston Milliy olimpiya qoʻmitasi, Yoshlar siyosati va sport vazirligi 11. Boks boʻyicha musobaqalarda doimiy ravishda ishtirok etuvchi sportchilarning yagona maʼlumot bazasini yaratish. Foizda sportchilar soniga nisbatan) 15 20 25 35 45 Oʻzbekiston boks federatsiyasi, Yoshlar siyosati va sport vazirligi 13. Sport taʼlimi muassasalarida boks boʻyicha trenerlarning sifat tarkibini, xususan oliy maʼlumotli trenerlar sonini bosqichma-bosqich oshirish. Foizda (jami trenerlar soniga nisbatan) 30 33 36 39 45 Yoshlar siyosati va sport vazirligi, Oʻzbekiston boks federatsiyasi 14. Sport taʼlimi muassasalarida faoliyat yuritayotgan boks boʻyicha hakamlarni tayyorlash va ularning malakasini oshirish. Foizda (jami trenerlar soniga nisbatan) 3 4 5 6 8 Yoshlar siyosati va sport vazirligi, Oʻzbekiston boks federatsiyasi 15. Oliy maʼlumotli boks boʻyicha trener kadrlarga ehtiyojni toʻldirish maqsadida Oʻzbekiston davlat jismoniy tarbiya va sport universiteti hamda uning filiallariga qabul koʻrsatkichlarini oshirish. Bakalavriat 60 60 60 60 60 Yoshlar siyosati va sportni vazirligi, Oʻzbekiston boks federatsiyasi Sirtqi 30 30 30 30 30