1993-yil 1-yanvardan boshlab mehnatga haq toʻlashning yagona tarif setkasini joriy etish toʻgʻrisida (590-son)

26.12.1992

Oʻzbekiston Respublikasi Prezidenti huzuridagi Vazirlar Mahkamasining

qarori

Ish haqining ragʻbatlantiruvchi rolini kuchaytirish, turli toifalardagi xodimlar mehnatiga mehnatning murakkabligi va xodimlarning malakasiga bogʻliq holda haq toʻlashning asoslangan darajalarini belgilash, bu darajalarni bundan buyon saqlab turish vositasini vujudga keltirish maqsadida Vazirlar Mahkamasi qaror qiladi:

1. Mehnatga haq toʻlashning yagona tarif setkasi tasdiqlansin. Xalq xoʻjaligining ishlab chiqarish va noishlab chiqarish tarmoqlaridagi xodimlar uchun qoʻllanish sohasidan qatʼi nazar, mehnatga haq toʻlashga xolisona yondashishni taʼminlovchi turli toifalardagi xodimlar mehnatiga haq toʻlash darajalarini yagona uslubiy negizda tabaqalashtirish Yagona tarif setkasiga asos qilib olinsin.

2. Eng kam ish haqi (oyiga 2000 soʻm) miqdoridagi boshlangʻich razryadning tarif stavkasi va razryadlararo tarif koeffitsiyentlari 1-ilovaga muvofiq Yagona tarif setkasiga asos qilib belgilansin.

3. Ishchi va xizmatchilarning umumtarmoq lavozimlari boʻyicha mehnatga haq toʻlash Yagona tarif setkasining 28 razryadi 2-ilovaga* muvofiq tasdiqlansin.

* 2-ilova berilmaydi.

4. Yagona tarif setkasi asosida hisoblangan, tarif stavkalariga rayon koeffitsiyentlari boʻyicha toʻlovlar ham kiritilgan holda, amaldagi imtiyozlar, qoʻshimcha toʻlovlar va ustama haqlar saqlanib qolinsin.

5. Oʻzbekiston Respublikasi Mehnat vazirligi:

bir hafta muddat ichida vazirliklar, idoralar, birlashmalar, korxonalar va tashkilotlar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda Yagona tarif setkasining joriy qilinishi bilan bogʻliq metodik ishlarni amalga oshirsin;

xalq xoʻjaligi ishchi va xizmatchilarining mehnatiga haq toʻlashning Yagona tarif setkasini joriy qilishga doir Tavsiyalarni ishlab chiqsin va 1993-yil 15-yanvargacha tasdiqlasin.

6. Belgilab qoʻyilsinki, Yagona tarif setkasini qoʻllash budjetdan mablagʻ bilan taʼminlanadigan barcha muassasalar, tashkilotlar va korxonalar uchun majburiydir.

7. Oʻzbekiston Respublikasi vazirliklari va idoralari Oʻzbekiston Respublikasi Mehnat vazirligi va Moliya vazirligi bilan kelishgan holda ikki hafta muddat ichida amaldagi stavkalar hamda okladlarni Yagona tarif setkasi talablariga muvofiq qayta koʻrib chiqsinlar.

8. Mulkchilik shaklidan qatʼi nazar, xoʻjalik hisobidagi birlashmalar, korxonalar va tashkilotlarga ularning tayyorligi hamda zarur miqdorda moliyaviy mablagʻlari mavjudligiga qarab 1993-yilning 1 yarmida Yagona tarif setkasini joriy etishga oʻtish tavsiya qilinsin.

9. Ushbu qarorga muvofiq xodimlar uchun tarif koeffitsiyentlarini, ustama va qoʻshimcha toʻlovlarni hisobga olib joriy etiladigan stavka (oklad)lar amaldagi stavka (oklad)lardan kam boʻlgan taqdirda mazkur xodimlarga ularning ushbu muassasada, tashkilotda shu vazifada ishlagan vaqti uchun ish haqidagi tegishli farq toʻlanadi.

10. Mehnat vazirligiga kasblarning Tarif-malaka maʼlumotnomasida oʻz aksini topmagan kasblar (lavozimlar)ni Yagona tarif setkasining tegishli razryadlariga kiritish huquqi berilsin.

11. Mehnat vazirligi, mahalliy hokimiyat va boshqaruv organlari Yagona tarif setkasiga muvofiq budjetdagi tashkilotlarning xodimlari mehnatiga haq toʻlash shartlariga rioya etilishini nazorat qilsinlar.

12. Belgilansinki, ushbu qaror bilan tasdiqlangan Yagona tarif setkasiga muvofiq mehnatga haq toʻlashning yangi shartlari mehnatga haq toʻlash uchun mavjud boʻlgan mablagʻlar, shuningdek, boshqaruv tuzilmasini takomillashtirish va xoʻjalik faoliyatini kengaytirish tadbirlarini oʻtkazishdan tushgan qoʻshimcha mablagʻlar hisobiga va shuning doirasida joriy qilinadi.

13. Oʻzbekiston Respublikasi Mehnat vazirligi, Adliya vazirligi bilan birgalikda 20 kun muddat ichida ushbu qaror qabul qilinishi munosabati bilan amaldagi meʼyoriy hujjatlarga oʻzgartishlar kiritish toʻgʻrisidagi takliflarni tayyorlasin va Vazirlar Mahkamasi taqdim etsin.

14. Ushbu qarorning bajarilishini nazorat qilish Bosh vazirning oʻrinbosarlari zimmmasiga yuklatilsin. Qarorning qanday bajarilayotganligi 1993-yil fevral oyida koʻrib chiqilsin.

Vazirlar Mahkamasining Raisi I. KARIMOV

Toshkent sh.,

1992-yil 26-dekabr,

590-son

Vazirlar Mahkamasining 1992-yil 26-dekabrdagi 590-son qaroriga 1-ILOVA

Mehnatga haq toʻlashning Yagona tarif setkasi