Paxtani qayta ishlovchi korxonalarni qurishga doir takliflarni koʻrib chiqish tartibi toʻgʻrisida (203-son)
21.04.1997
Oʻzbekiston Respublikasi Vazirlar Mahkamasining
qarori
Oʻzbekiston Respublikasi Prezidentining “Paxtaning kompleks qayta ishlanishini taʼminlash borasidagi chora-tadbirlar toʻgʻrisida” 1996-yil 30-dekabrdagi PF-1691-son Farmonini bajarish yuzasidan Vazirlar Mahkamasi qaror qiladi:
1. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining paxta va paxta tolasini qayta ishlovchi korxonalarni qurish va ularni qayta ixtisoslashtirishga doir takliflarini koʻrib chiqish boʻyicha Vazirlar Mahkamasining Komissiyasi 1-ilovaga* muvofiq tarkibda tashkil etilsin.
* 1-ilova berilmaydi.
Koʻrsatib oʻtilgan Komissiyaga Komissiyaning koʻrib chiqishi uchun kiritiladigan loyihalar boʻyicha ekspert xulosalar tayyorlash va berish uchun mutaxassislardan ishchi guruhlar tashkil etish huquqi berilsin.
Komissiyaga paxta tolasi ishlab chiqarish va uni taqsimlash balansi boʻyicha takliflar ishlab chiqish va Vazirlar Mahkamasiga kiritish vazifasi yuklansin.
2. Paxta va paxta tolasini kompleks qayta ishlovchi korxonalarni qurishga va ularni qayta ixtisoslashtirishga doir takliflar kiritish tartibi 2-ilovaga muvofiq tasdiqlansin.
3. Paxtani qayta ishlash sanoatida yagona texnika va texnologiya siyosatini oʻtkazish, paxta tolasini kompleks va chuqur qayta ishlash taʼminlanishiga doir chora-tadbirlarni muvofiqlashtirish, shuningdek, paxtani qayta ishlovchi korxonalar qurilishi va rekonstruksiyasi loyihalarini mustaqil ekspertizadan oʻtkazish boʻyicha bosh tashkilotchi funksiyasi “Oʻzengsanloyiha” (4-DLI) loyiha institutiga yuklansin.
4. Belgilab qoʻyilsinki:
yangi ishlab chiqarishlar qurilishi va boshqa tarmoqlar obyektlarini paxta tolasini qayta ishlashga qayta ixtisoslashtirish eksportga yoʻnaltirilgan, jahon bozorida raqobatga bardoshli mahsulot ishlab chiqarilishi ustun darajada taʼminlangan taqdirda va koʻrsatib oʻtilgan Komissiyaning qaroridan kelib chiqqan holda Oʻzbekiston Respublikasi Vazirlar Mahkamasining farmoyishi asosida amalga oshirilishi mumkin;
paxta va paxta tolasini qayta ishlaydigan korxonalar qurilishini va ularni qayta ixtisoslashtirishni mablagʻ bilan taʼminlash banklar tomonidan Oʻzbekiston Respublikasi Vazirlar Mahkamasining farmoyishi va obyekt qurilishi yoki uni qayta ixtisoslashtirishning texnik-iqtisodiy maqsadga muvofiqligi toʻgʻrisida bosh tashkilot — “Oʻzengsanloyiha” (4-DLI) loyiha instituti tomonidan beriladigan ekspert xulosasi asosida amalga oshiriladi.
Obyektlarni loyihalashtirish, qurish va qayta ixtisoslashtirishning belgilangan tartibi buzilgan taqdirda koʻrsatib oʻtilgan korxonalarni qurish toʻgʻrisida qaror qabul qilgan aybdor mansabdor shaxslar amaldagi qonunchilikka muvofiq javobgarlikka, shu jumladan, jinoiy javobgarlikka tortiladi.
5. “Oʻzistiqbolstat” davlat qoʻmitasi “Oʻzengsanloyiha” (4-DLI) loyiha instituti va boshqa manfaatdor tashkilotlar bilan birgalikda shu yil avgust oyiga qadar, mavjudlarini rekonstruksiya qilish, texnika bilan qayta jihozlashni hamda eksportga yoʻnaltirilgan mahsulot ishlab chiqaradigan, paxta chuqur va kompleks qayta ishlanishini taʼminlaydigan yangi korxonalarni qurishni hisobga olgan holda, paxtani qayta ishlovchi korxonalarni joylashtirish sxemasini ishlab chiqsin.
6. Oʻzbekiston Respublikasi Vazirlar Mahkamasining “Paxta tolasi resurslaridan kompleks foydalanish chora-tadbirlari toʻgʻrisida” 1994-yil 25-avgustdagi 435-son qarori oʻz kuchini yoʻqotgan deb hisoblansin.
7. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ.T. Sultonov zimmasiga yuklansin.
Vazirlar Mahkamasining Raisi I. KARIMOV
Toshkent sh.,
1997-yil 21-aprel,
203-son
Vazirlar Mahkamasining 1997-yil 21-apreldagi 203-son qaroriga 2-ILOVA
Paxta va paxta tolasini kompleks qayta ishlovchi korxonalarni qurishga va ularni qayta ixtisoslashtirishga doir takliflar kiritish
TARTIBI
Paxta va paxta tolasini kompleks qayta ishlovchi korxonalarni qurishga va ularni qayta ixtisoslashtirishga doir takliflar kiritishning mazkur tartibi Oʻzbekiston Respublikasi Prezidentining “Paxtani kompleks qayta ishlashni taʼminlash chora-tadbirlari toʻgʻrisida” 1996-yil 30-dekabrdagi PF-1691-son farmoniga muvofiq ishlab chiqilgan va tasdiqlangan.
1. Paxta va paxta tolasini kompleks qayta ishlovchi korxonalarni qurishga va ularni qayta ixtisoslashtirishga doir takliflar, korxonalarning quvvatidan, ularning idoraviy boʻysunishi va mulkchilik shakllaridan qatʼi nazar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan “Oʻzistiqbolstat” davlat qoʻmitasi quyidagilar asosida kiritiladi:
manfaatdor vazirliklar va idoralarning, investor korxonalarning iltimosnomalari;
ishlab chiqarish kuchlarini joylashtirish hududiy komissiyaning ijobiy qarori;
investor (buyurtmachi) tomonidan taqdim etilgan mablagʻ bilan taʼminlash manbalari mavjudligini, mahsulot tashqi bozorda sotilishini tasdiqlovchi hujjatlar (mablagʻ bilan taʼminlovchi bankning buyurtmachida investitsiya resurslari mavjudligi toʻgʻrisidagi xulosasi, obyekt qurilishi kredit berish uchun qabul qilinganligi, xorijiy hamkorning mahsulotning sotilishi toʻgʻrisidagi belgilangan tartibda legallashtirilgan yoki apostil qoʻygan holda majburiyatlari va kafolatlari va boshqalar).
2. “Oʻzistiqbolstat” davlat qoʻmitasi Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining paxta va paxta tolasini qayta ishlaydigan korxonalarni qurish va ularni qayta ixtisoslashtirish toʻgʻrisidagi takliflarini koʻrib chiqishda ishlab chiqarish moʻljallanayotgan mahsulotning eksportga yoʻnaltirilganligini va jahon bozorida raqobatbardoshliligini, toʻqimachilik sanoati mavjud boʻlmagan yoki sust rivojlangan tumanlar va shaharlarda toʻqimachilik korxonalari tashkil etilishiga ustunlik bergan holda mintaqalarda bunday korxonalar va boʻsh mehnat resurslari mavjudligini eʼtiborga olsin.
“Oʻzistiqbolstat” davlat qoʻmitasi tomonidan Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining takliflari oʻn kun muddatda “Oʻzengsanloyiha” (4-DLI) loyiha institutiga yuboriladi.
3. “Oʻzengsanloyiha” (4-DLI) loyiha instituti bir oy muddatda loyiha buyurtmachisi bilan birgalikda shartnoma asosida investitsiya oldi tadqiqotlari oʻtkazadi hamda “Oʻzistiqbolstat” davlat qoʻmitasiga yigʻma ekspert xulosasi beradi, unda quyidagi masalalar har tomonlama yoritiladi:
paxta kompleks, chuqur qayta ishlanishi, yuqori sifatli tayyor mahsulot ishlab chiqarishni tashkil etish taʼminlanishi;
tashkil etilayotgan korxona zamonaviy texnika va texnologiyalar bilan jihozlanishi;
ustun darajada eksportga yoʻnaltirilgan, raqobatbardoshli mahsulot ishlab chiqarish imkonini beradigan ixcham, tez qayta sozlanadigan korxonalar tashkil etilishi, tashkil etilayotgan korxonaning “Oʻzistiqbolstat” davlat qoʻmitasi tomonidan belgilangan roʻyxat boʻyicha texnik-iqtisodiy va boshqa koʻrsatkichlari.
4. “Oʻzengsanloyiha” (4-DLI) loyiha instituti korxona qurilishi yoki uni qayta ixtisoslashtirish maqsadga muvofiqligi toʻgʻrisidagi yigʻma ekspert xulosani “Oʻzistiqbolstat” davlat qoʻmitasiga yuboradi, qoʻmita ikki hafta muddatda ularni manfaatdor vazirliklar va idoralar ishtirokida koʻrib chiqadi hamda quyidagi hujjatlar turkumi bilan birgalikda Vazirlar Mahkamasi Komissiyasiga taklif kiritadi:
Vazirlar Mahkamasi Komissiyaning qarori loyihasi;
Vazirlar Mahkamasi farmoyishi loyihasi;
Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining takliflari;
“Oʻzengsanloyiha” (4-DLI) loyiha institutining yigʻma ekspert xulosasi;
mablagʻ bilan taʼminlash manbalari mavjudligini tasdiqlovchi hujjatlar.
8. Buyurtmachi respublika Vazirlar Mahkamasining ijobiy qarori olingandan keyingina barcha zarur loyiha hujjatlari ishlab chiqilishini tashkil etadi.
9. “Oʻzengsanloyiha” (4-DLI) loyiha institutining ekspert xulosalariga muvofiq Respublika komissiyasi tomonidan oldin berilgan ruxsatnomalar boʻyicha paxta tolasini qayta ishlash obyektlarini qurish va ularni rekonstruksiya qilish huquqi vazirliklar, idoralar va korxonalarda saqlab qolinsin.