Qoʻqon davlat pedagogika instituti faoliyatini yanada takomillashtirish chora-tadbirlari toʻgʻrisida (212-son)

14.04.2021

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Pedagogik taʼlim sohasini yanada rivojlantirish chora-tadbirlari toʻgʻrisida” 2020-yil 27-fevraldagi PQ-4623-son qarori ijrosini taʼminlash, shuningdek, pedagogik taʼlim sohasi uchun raqobatbardosh kadrlar tayyorlash, taʼlim sifatini oshirish, sohaga ilgʻor taʼlim texnologiyalarini joriy qilish, zamonaviy bilim va pedagogik texnologiyalarni qoʻllash koʻnikmalariga ega boʻlgan yuqori malakali mutaxassislar tayyorlashning samarali tizimini yoʻlga qoʻyish maqsadida Vazirlar Mahkamasi qaror qiladi:

1. Oʻzbekiston Respublikasi Oliy va oʻrta maxsus taʼlim vazirligi, Xalq taʼlimi vazirligi hamda Qoʻqon davlat pedagogika institutining (keyingi oʻrinlarda — Institut) ushbu Institut faoliyatini yanada takomillashtirish, shu jumladan, Institutni 2025-yilgacha rivojlantirishning maqsadli koʻrsatkichlari (indikatorlari)ni belgilash toʻgʻrisidagi taklifi maʼqullansin.

2. Quyidagilar Institutning asosiy vazifalari etib belgilansin:

pedagogika sohasining rivojlanish istiqbollari hamda ustuvor vazifalarini hisobga olgan holda, pedagogika sohasi boʻyicha tarbiya va oʻqitish metodlari, axborot-kommunikatsiya texnologiyalari hamda xorijiy tillarni puxta oʻzlashtirgan, taʼlim jarayonida zamonaviy pedagogik texnologiyalarni qoʻllash koʻnikmalariga ega professional oliy maʼlumotli kadrlarni tayyorlash;

oliy maʼlumotli mutaxassislar, ilmiy-pedagogik kadrlar tayyorlash borasidagi xorijiy tajribani amaliyotda qoʻllash, bitiruvchilarning kasbiy malaka darajasi xalqaro mehnat bozorida tan olinishini taʼminlash;

taʼlim va ilmiy izlanishlar jarayoniga malakali mutaxassislarni keng jalb etish maqsadida respublika va xorijiy yetakchi oliy taʼlim muassasalari hamda ilmiy markazlari bilan hamkorlik aloqalarini rivojlantirish;

taʼlim jarayoniga raqamli texnologiyalarni joriy etish, axborot-kommunikatsiya va taʼlim texnologiyalarining integratsiyasini taʼminlash;

pedagogika taʼlim sohasini rivojlantirishning ilmiy-metodik vazifalarini hal etish, ilgʻor xorijiy pedagogik texnologiyalarni joriy qilishga yoʻnaltirilgan ilmiy tadqiqotlar olib borish va iqtidorli talaba-yoshlarni ilmiy faoliyat bilan shugʻullanishga keng jalb etish;

pedagog kadrlarning ilmiy salohiyati, kasbiy va malakaviy bilim darajasini uzluksiz rivojlantirib borish mexanizmlarini joriy etish, ularning pedagogik mahoratini rivojlantirishda xorijiy oliy taʼlim muassasalarining ilgʻor tajribalaridan keng foydalanish;

xalqaro baholash dasturlari (PISA, TIMSS, PIRLS) va STEAM standartlaridan foydalanish, aniq va tabiiy fanlarni oʻqitish va baholashning zamonaviy shakllari, metodlari va texnologiyalarini joriy etish hamda ushbu bilim va koʻnikmalarga ega boʻlgan pedagoglarini tayyorlash;

hududdagi pedagogika sohasiga qiziqishi yuqori boʻlgan yoshlarni aniqlash va ularni maqsadli tayyorlashning uzluksiz tizimini shakllantirish;

xorijiy oliy taʼlim muassasalari bilan hamkorlikda qoʻshma taʼlim dasturlari asosida kadrlar tayyorlashni rivojlantirish;

talabalar amaliyotini maqsadli tashkil etish va ishga joylashishiga har tomonlama koʻmaklashish mexanizmlarini shakllantirish;

pedagogika sohasidagi oʻquv adabiyotlari mazmuni va sifatini monitoring qilish, xorijiy adabiyotlardan qoʻshimcha yoki muqobil oʻquv adabiyotlari sifatida foydalanishni kengaytirish, kutubxona fondlarini muntazam ravishda yangilab borish.

3. Quyidagilarni nazarda tutuvchi Qoʻqon davlat pedagogika institutini 2025-yilgacha rivojlantirishning maqsadli koʻrsatkichlari (indikatorlari) ilovaga muvofiq tasdiqlansin:

taʼlim sohasida yuqori malakali kadrlar tayyorlash tizimini sifat jihatidan tubdan takomillashtirish;

ilmiy-tadqiqot faoliyati samaradorligi va natijadorligini oshirish;

Institut pedagog kadrlarining bilim va malaka, kasbiy tayyorgarlik darajasini hozirgi kun talablari asosida oshirish;

xorijiy oliy taʼlim muassasalari bilan hamkorlikni rivojlantirish, Institutning xalqaro miqyosdagi raqobatbardoshligini taʼminlash;

Institut moddiy-texnika bazasini rivojlantirish.

4. Oʻzbekiston Respublikasi Xalq taʼlimi vazirligi:

a) 2021/2022 oʻquv yilidan boshlab:

oʻquvchilarni pedagog kasbiga yoʻnaltirish maqsadida Fargʻona viloyatidagi yetakchi umumiy oʻrta taʼlim muassasalarining 5 tasida 10-11-sinf oʻquvchilari uchun “Pedagogik sinflar”ni tashkil etsin va Institut taklifi asosida dars jarayoniga taʼsir etmagan holda tegishli bakalavriat taʼlim yoʻnalishlarining oʻquv rejalariga zarur oʻzgartirishlar kiritsin;

umumiy oʻrta taʼlim muassasalarida Institut talabalari amaliyotini samarali tashkil etish uchun tegishli shart-sharoitlar yaratilishini taʼminlasin;

b) Maktabgacha taʼlim vazirligi, Oliy va oʻrta maxsus taʼlim vazirligi bilan birgalikda Institut bitiruvchilari Fargʻona viloyatidagi maktabgacha hamda umumiy oʻrta taʼlim tashkilotlarida pedagogik faoliyatini olib borishi uchun tegishli sharoitlar yaratish choralarini koʻrsin.

5. Oʻzbekiston Respublikasi Oliy va oʻrta maxsus taʼlim vazirligi:

a) uch oy muddatda:

Institutning budjetdan tashqari mablagʻlari hisobidan “Texnologik taʼlim” bakalavriat taʼlim yoʻnalishi uchun zamonaviy uskunalar, jihozlar, shuningdek, yetarli xom ashyo bilan taʼminlangan oʻquv ustaxonasi hamda oʻquv laboratoriyasini tashkil etsin;

Institutga pedagog kadrlar tayyorlovchi respublikaning boshqa oliy taʼlim muassasalari talabalarini ixtiyoriylik asosida birlashtiradigan yosh pedagoglar jamoat birlashmasini tashkil etishga koʻmaklashsin;

Institutda yangi avlod darsliklari va oʻquv qoʻllanmalari turkumini amalga oshirilayotgan taʼlim sohasidagi islohotlarni inobatga olib, xorijiy olimlar va mutaxassislarni jalb etgan holda tayyorlashni taʼminlasin;

b) “El-yurt umidi” jamgʻarmasi bilan birgalikda Institut professor-oʻqituvchilari va talabalaridan “El-yurt umidi” jamgʻarmasi stipendiya tanlovlarida ishtirok etib gʻolib boʻlgan nomzodlarni xorijiy davlatlarning yetakchi oliy taʼlim muassasalari hamda ilmiy markazlariga doktorantura va magistraturaga oʻqishga yuborish choralarini koʻrsin;

v) Alisher Navoiy nomidagi Milliy kutubxona bilan hamkorlikda 2021-yil 1-avgustga qadar Institut axborot-resurs markazining zamonaviy infratuzilmasini yaratish, yetakchi ilmiy axborot-resurs markazlari elektron bazasidan foydalanish imkoniyatlarini kengaytirish, turdosh oliy taʼlim muassasalari bilan elektron adabiyotlar almashish hamda oliy taʼlim muassasalari talabalari uchun chop etilgan darslik va oʻquv qoʻllanmalar bilan muntazam taʼminlashga amaliy yordam koʻrsatsin.

6. Oʻzbekiston Respublikasi Oliy va oʻrta maxsus taʼlim vazirligi va Institutning quyidagi takliflariga rozilik berilsin:

a) Institut huzurida tashkil etilgan Dangʻara va Oʻzbekiston tumanidagi texnikumlarda (keyingi oʻrinlarda — Texnikumlar) raqobatbardosh kadrlar tayyorlashni taʼminlash maqsadida ikki oy muddatda taʼlim jarayoni uchun zarur moddiy-texnika, oʻquv-metodik bazani yaratish va oʻquv jarayoniga yuqori ish tajribasiga ega boʻlgan amaliyotchi mutaxassislarni jalb etish;

b) Texnikumlarning tegishli taʼlim dasturlarini oliy taʼlim muassasalari professor-oʻqituvchilarini va amaliyotchilarni jalb etgan holda xorijiy davlatlar tajribalaridan kelib chiqib takomillashtirib borish;

v) 2021/2022 oʻquv yilidan boshlab Institutda oʻquv dasturlari oʻzaro yaqin boʻlgan bakalavriat taʼlim yoʻnalishlari boʻyicha asosiy va qoʻshimcha mutaxassislik (kvalifikatsiya) berish;

g) quyidagilarni Institut tomonidan mustaqil ravishda amalga oshirish:

taʼlimning uzluksizligi va izchilligini taʼminlashni hisobga olgan holda, Institut huzuridagi texnikumning oʻquv-metodik jarayonini muvofiqlashtirish, uning tuzilmasini, oʻquv rejalari va dasturlarini ishlab chiqish va tasdiqlash, toʻlov-kontrakt asosidagi qabul parametrlarini belgilash;

ish beruvchilar talablarini inobatga olgan holda, oʻquv rejalaridagi nazariy taʼlim ulushini qisqartirish hisobiga amaliy mashgʻulotlar hajmini oshirish, haftada bir kunlik amaliyot tajribasini qoʻllash;

xorijiy mutaxassislarni konsultant, maslahatchi va oʻqituvchilar sifatida jalb qilish va ularga mehnat bozorining amaldagi konyunkturasini hisobga olgan holda, Institutning budjetdan tashqari mablagʻlari hisobidan oylik maosh hamda boshqa toʻlovlarni belgilash va toʻlash.

7. Oʻzbekiston Respublikasi Oliy va oʻrta maxsus taʼlim vazirligi 2021/2022 oʻquv yilidan boshlab Fargʻona viloyati, Oʻzbekiston tumani, Koʻl Elash qishlogʻi, 1-uy manzilida joylashgan texnikum (sobiq Oʻzbekiston sanoat va iqtisodiyot kasb-hunar kolleji) binosida Institutning milliy hunarmandchilik va xalq amaliy sanʼat fakulteti faoliyatini yoʻlga qoʻysin.

Texnikum dars jarayoniga Institutning milliy hunarmandchilik va xalq amaliy sanʼat fakulteti professor-oʻqituvchilari jalb etilsin.

8. Mazkur qarorning bajarilishini nazorat qilish Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari B.A. Musayev, Oʻzbekiston Respublikasi oliy va oʻrta maxsus taʼlim vaziri A.X. Toshkulov hamda Fargʻona viloyati hokimi X.H. Bozarov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2021-yil 14-aprel,

212-son

Vazirlar Mahkamasining 2021-yil 14-apreldagi 212-son qaroriga ILOVA

Qoʻqon davlat pedagogika institutini 2025-yilgacha rivojlantirishning maqsadli koʻrsatkichlari (indikatorlari)