Oʻzbekiston Respublikasi mintaqalarida kichik novvoyxonalar tarmogʻini rivojlantirish toʻgʻrisida (471-son)

25.12.1995

Oʻzbekiston Respublikasi Vazirlar Mahkamasining

qarori

[Koʻchirma]

Non-bulka mahsulotlarining sifatini yanada oshirish, turlarini koʻpaytirish va respublika aholisini yuqori sifatli mahsulotlar bilan taʼminlashni yaxshilash maqsadida Vazirlar Mahkamasi qaror qiladi:

1. “Oʻz-Vinkler” qoʻshma korxonasi Germaniyaning “Vinkler” firmasi bilan 1995-1996-yillarda kichik novvoyxonalar uskunalarining 78 ta komplekti yetkazib berilishiga kontrakt tuzganligi maʼlumot uchun qabul qilinsin.

2. “Vinkler” firmasining kichik novvoyxonalari komplektlari yetkazib berilishi, “Oʻz-Vinkler” qoʻshma korxonasida tayyorlanishi, yigʻilishi hamda ular boʻyicha oʻzaro hisob-kitoblar jadvaliga 1-ilovaga* muvofiq rozilik berilsin.

*1-ilova berilmaydi.

3. Non-bulka mahsulotlari yopish komplekslarini joylarda foydalanishga topshirish va “Oʻz-Vinkler” kichik novvoyxonalarining haqini toʻlash jadvali 2-ilovaga* muvofiq tasdiqlansin.

* 2-ilova berilmaydi.

4. Belgilab qoʻyilsinki:

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari “Oʻz-Vinkler” qoʻshma korxonasining 78 ta kichik novvoyxonasi sotib olinishini mablagʻ bilan taʼminlaydilar;

“Oʻzdonmahsulot” davlat korporatsiyasi loyiha-smeta hujjatlari tayyorlanishini, “Oʻz-Vinkler” qoʻshma korxonasining 78 ta kichik novvoyxonasi qurilishi, montaj qilinishi va foydalanishga topshirilishi ishlarini mablagʻ bilan taʼminlaydi va amalga oshiradi.

5. “Oʻzdonmahsulot” davlat korporatsiyasi:

bir hafta muddatda “Oʻz-Vinkler” qoʻshma korxonasi bilan “Vinkler” firmasining 78 ta kichik novvoyxonasi yetkazib berilishiga shartnoma tuzsin;

ikki hafta muddatda 1 va 2-ilovalarga muvofiq non-bulka mahsulotlari yopish komplekslarini foydalanishga topshirish muddati koʻrsatilgan holda yetkazib berilayotgan kichik novvoyxonalar haqini toʻlashga Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan shartnomalar tuzsin;

“Oʻz-Vinkler” qoʻshma korxonasi bilan hisob-kitoblarni shartnomalarda nazarda tutilgan muddatlarda oʻz vaqtida amalga oshirish uchun kichik novvoyxonalar xarid qilish maqsadida mintaqalardan tushayotgan mablagʻlar jamlanishini taʼminlasin;

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan kichik novvoyxonalar xarid qilinishiga shartnomalar tuzilayotganda ularga mablagʻlar “Oʻz-Vinkler” qoʻshma korxonasining kichik novvoyxonalari oʻrnatiladigan korxonalar oladigan foyda hisobidan foydalanishga topshirilgan paytdan boshlab uch yilda qaytarilishini nazarda tutsin.

6. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari:

ikki hafta muddatda mintaqa hududida qulay joyda joylashtirish zarurligini hisobga olgan holda non-bulka mahsulotlari yopish komplekslari koʻriladigan va kichik novvoyxonalar montaj qilinadigan uchastkalarni aniqlasinlar;

toʻlovlar va “Oʻzdonmahsulot” davlat korporatsiyasi bilan hisob-kitoblar 1 va 2-ilovalarga muvofiq jadvallarga binoan amalga oshirilishini taʼminlasinlar.

7. Oʻzbekiston Respublikasi Tashqi iqtisodiy aloqalar vazirligi ikki hafta muddatda “Vinkler” firmasi bilan kichik novvoyxonalar komplektlari 1-ilovaga muvofiq yetkazib berilishi masalasini hal etsin.

8. Oʻzbekiston Respublikasi Moliya vaziriga “Oʻz-Vinkler” qoʻshma korxonasi bilan “Vinkler” firmasi oʻrtasida kichik novvoyxonalar uchun uskunalarning 78 komplekti yetkazib berilishiga tuzilgan kontrakt yuzasidan Tashqi iqtisodiy faoliyat milliy bankiga belgilangan tartibda Oʻzbekiston Respublikasi Hukumati kafolatini berish vakolati berilsin.

9. “Oʻzmashsanoat” uyushmasi “Oʻz-Vinkler” qoʻshma korxonasi bilan birgalikda respublika korxonalarida kichik novvoyxonalarning 3-ilovaga* muvofiq butlovchi materiallarini ishlab chiqarish tashkil etilishini taʼminlasin.

*3-ilova berilmaydi.

11. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A. Mutalov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1995-yil 25-dekabr,

471-son