II Xalqaro baxshichilik sanʼati festivaliga tayyorgarlik koʻrish va baxshichilik sanʼatini rivojlantirish uchun qulay shart-sharoitlar yaratishga doir qoʻshimcha chora-tadbirlar toʻgʻrisida (PQ-5070-son)

10.04.2021

Oʻzbekiston Respublikasi Prezidentining

Qarori

Baxshichilik sanʼatini respublika va xalqaro miqyosda keng targʻib qilish, Xalqaro baxshichilik sanʼati festivalini respublikaning boshqa hududlarida ham oʻtkazish, Qoraqalpogʻiston Respublikasi, Qashqadaryo, Samarqand, Surxondaryo va Xorazm viloyatlarida mavjud boʻlgan oʻziga xos ijro uslublari asosida ijodiy maktablarni “ustoz-shogird” anʼanalari asosida qayta tiklash va rivojlantirish maqsadida:

1. Madaniyat vazirligi, Fanlar akademiyasi, Yozuvchilar uyushmasi va Qoraqalpogʻiston Respublikasi Vazirlar Kengashining 2021-yilda Nukus shahrida II Xalqaro baxshichilik sanʼati festivalini (keyingi oʻrinlarda — Festival) tashkil etish va oʻtkazish toʻgʻrisidagi taklifiga rozilik berilsin.

2. Oʻzbekiston Respublikasi Prezidentining 2018-yil 1-noyabrdagi PQ-3990-son qarori bilan tasdiqlangan Xalqaro baxshichilik sanʼati festivaliga tayyorgarlik koʻrish va uni oʻtkazish boʻyicha tashkiliy qoʻmita (A.N. Aripov):

a) Festivalni Qoraqalpogʻiston Respublikasida yuqori tashkiliy daraja va badiiy saviyada oʻtkazish boʻyicha zaruriy chora-tadbirlarni amalga oshirsin;

b) Oʻzbekiston Respublikasi Prezidenti Administratsiyasi bilan kelishilgan holda:

Xalqaro baxshichilik sanʼati festivalini kelgusida bosqichma-bosqich respublikaning boshqa hududlarida oʻtkazish choralarini koʻrsin;

sanitariya-epidemiologik vaziyatni inobatga olgan holda joriy yildagi Festival hamda kelgusidagi Xalqaro baxshichilik sanʼati festivallarini oʻtkazish muddatini belgilasin.

3. Oʻzbekiston Respublikasi Prezidentining ayrim qarorlariga ilovaga muvofiq oʻzgartirish va qoʻshimchalar kiritilsin.

4. Mazkur qarorning ijrosini nazorat qilish Oʻzbekiston Respublikasining Bosh vaziri A.N. Aripov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2021-yil 10-aprel,

PQ-5070-son

Oʻzbekiston Respublikasi Prezidentining 2021-yil 10-apreldagi PQ-5070-son qaroriga ILOVA

Oʻzbekiston Respublikasi Prezidentining ayrim qarorlariga kiritilayotgan oʻzgartirish va qoʻshimchalar

1. Oʻzbekiston Respublikasi Prezidentining 2018-yil 1-noyabrdagi “Xalqaro baxshichilik sanʼati festivalini oʻtkazish toʻgʻrisida”gi PQ-3990-son qarorida:

a) 1-band quyidagi taxrirda bayon etilsin:

“1. Madaniyat vazirligi va Fanlar akademiyasining har ikki yilda bir marta Xalqaro baxshichilik sanʼati festivalini (keyingi oʻrinlarda — Festival) tashkil etish hamda ushbu festivalni birinchi marta 2019-yilning 5 — 10-aprel kunlari Termiz shahrida oʻtkazish toʻgʻrisidagi takliflari maʼqullansin”;

b) 4-band quyidagi tahrirda bayon etilsin:

“4. Madaniyat vazirligi hamda Festival oʻtkaziladigan hudud hokimligi Festivalni tashkil etish va oʻtkazish boʻyicha masʼul etib belgilansin”;

v) 8-bandning ikkinchi xatboshisidagi “Termiz shahridagi “Surxondaryo sanʼat saroyi” davlat muassasasi maydoni hududida” soʻzlari chiqarib tashlansin;

g) 9-banddagi “, Surxondaryo viloyati hokimligi” soʻzlari chiqarib tashlansin;

d) 10-band quyidagi tahrirda bayon etilsin:

“10. Belgilab qoʻyilsinki, Festivalni tayyorlash va oʻtkazish bilan bogʻliq xarajatlar Madaniyat vazirligi huzuridagi Madaniyat va sanʼatni rivojlantirish jamgʻarmasi, Festivalni oʻtkazish belgilangan hududning mahalliy budjeti mablagʻlari hisobidan teng ulushlarda hamda homiylik xayriyalari va qonun hujjatlarida taqiqlanmagan boshqa manbalar hisobidan qoplanadi”.

2. Oʻzbekiston Respublikasi Prezidentining 2020-yil 26-maydagi “Oʻzbekiston Respublikasi Madaniyat vazirligi faoliyatini takomillashtirish chora-tadbirlari toʻgʻrisida”gi PQ-4730-son qarorida:

a) 1-ilova “Oʻzbekiston davlat filarmoniyasi” davlat muassasasi” blokidan keyin “Oʻzbekiston davlat simfonik orkestri” davlat muassasasi” bloki bilan toʻldirilsin;

b) 2-ilovaning “Oʻzbekkonsert” davlat muassasasi, Oʻzbekiston davlat filarmoniyasi, Xalqaro festivallar direksiyasi, “Xalqlar doʻstligi” sanʼat saroyi, Islom Karimov nomidagi Fargʻona viloyati teatr va konsert saroyi, “Surxondaryo sanʼat saroyi” davlat muassasasi, Respublika baxshichilik sanʼati markazi, Oʻzbek milliy maqom sanʼati markazi, davlat teatrlari, teatr studiyalari, Oʻzbek davlat sirki, koʻzi ojizlar kutubxonalari, davlat muzeylari, muzey-qoʻriqxonalar, uy muzeylari” blokida “Oʻzbekiston davlat filarmoniyasi,” soʻzlaridan keyin “Oʻzbekiston davlat simfonik orkestri” davlat muassasasi” soʻzlari bilan toʻldirilsin.