Xalq deputatlari Qarshi tumani Kengashining 2020-yil 12-iyuldagi “Tumanda fermer xoʻjaliklariga ajratilgan qishloq xoʻjalik yer maydonlaridan maqsadsiz foydalanish holatini monitoringdan oʻtkazilganlik natijalari toʻgʻrisida”gi 49/12-06-sonli qarorini oʻrganish natijalari haqida (SQ-253-IV-son)
12.03.2021
Oʻzbekicton Respublikasi Oliy Majlisi Senatining
Qarori
Oʻzbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish boʻyicha vakil devonining Qashqadaryo viloyati Qarshi tumanida faoliyat yurituvchi “Bobur oʻgʻli Humoyun” fermer xoʻjaligi va Qarshi tumani hokimligi oʻrtasida yerdan foydalanish boʻyicha ijara shartnomasini bekor qilish boʻyicha xalq deputatlari Qarshi tumani Kengashining 2020-yil 12-iyuldagi 49/12-06-sonli qarorini (bundan buyon matnda Qaror deb yuritiladi) bekor qilish yuzasidan xati Senatning Agrar, suv xoʻjaligi masalalari va ekologiya qoʻmitasi tomonidan oʻrganib chiqildi.
Oʻrganish koʻrsatganidek, Qaror bilan “Bobur oʻgʻli Humoyun” fermer xoʻjaligi bilan tuzilgan yer ijarasi shartnomasi fermer xoʻjaligi rahbari va hokimlik oʻrtasida kelishuvga erishilmagan boʻlsa-da, bekor qilingan.
Fuqarolik kodeksining 382-moddasiga asosan shartnoma taraflarning kelishuviga muvofiq oʻzgartirilishi va bekor qilinishi mumkin.
Yer kodeksining 24-moddasi hamda “Fermer xoʻjaligi toʻgʻrisida”gi Qonunning 13-moddasiga asosan yer uchastkalarini ijaraga olish shartnomasini muddatidan oldin bekor qilish taraflarning kelishuvi bilan, bunday kelishuvga erishilmagan taqdirda esa, sudning hal qiluv qarori bilan amalga oshiriladi.
Qonunchilikka muvofiq xalq deputatlari mahalliy Kengashlari fermer xoʻjaliklari va tuman hokimligi oʻrtasidagi shartnomaviy huquqiy munosabatlarni tartibga solish vakolatiga ega emas.
“Maʼmuriy tartib-taomillar toʻgʻrisida”gi Qonunning 9-moddasida maʼmuriy organ manfaatdor shaxsga maʼmuriy hujjatni qabul qilish uchun ahamiyatga ega boʻlgan barcha holatlar yuzasidan oʻz fikrini bildirish imkoniyatini berishi shartligi belgilangan boʻlsa-da, mazkur qarorni qabul qilish jarayonida fermer xoʻjaligi rahbarining ishtirok etishi va ushbu holat boʻyicha oʻz fikrini bildirish imkoniyati taʼminlanmagan.
Mazkur Qonunning 19-moddasiga koʻra maʼmuriy tartib-taomillar prinsiplariga nomuvofiqlik maʼmuriy hujjatlarning va maʼmuriy harakatlarning bekor qilinishiga yoki qayta koʻrib chiqilishiga olib keladi.
Yuqorida bayon etilganlarni inobatga olib, “Oʻzbekiston Respublikasi Oliy Majlisi Senatining Reglamenti toʻgʻrisida”gi Oʻzbekiston Respublikasi Qonunining 302-moddasiga muvofiq Oʻzbekiston Respublikasi Oliy Majlisining Senati qaror qiladi:
1. Xalq deputatlari Qarshi tumani Kengashining 2020-yil 12-iyuldagi “Tumanda fermer xoʻjaliklariga ajratilgan qishloq xoʻjalik yer maydonlaridan maqsadsiz foydalanish holatini monitoringdan oʻtkazilganlik natijalari toʻgʻrisida”gi 49/12-06-sonli qarori qonunchilikka zid deb topilsin va bekor qilinsin.
2. Ushbu Qarorning ijrosini nazorat qilish Senatning Agrar, suv xoʻjaligi masalalari va ekologiya qoʻmitasi (B. Tajiyev) zimmasiga yuklansin.
3. Mazkur Qaror manfaatdor tomonlarga yuborilsin.
4. Ushbu Qaror qabul qilingan kundan eʼtiboran kuchga kiradi.
Oʻzbekiston Respublikasi Oliy Majlisi Senatining Raisi T. NARBAYEVA
Toshkent sh.,
2021-yil 12-mart,
SQ-253-IV-son