Qonunlarning ijrosi holati, huquqni qoʻllash amaliyotini oʻrganish va qonunosti hujjatlarining qabul qilinishi yuzasidan amalga oshirilgan monitoring natijalari toʻgʻrisida (KQ-188-IV-son)

26.02.2021

Oʻzbekiston Respublikasi Oliy Majlisi Senati Kengashining

qarori

Oʻtgan qisqa davr ichida mamlakatimizda qonunchilik bazasini tizimlashtirish, normativ-huquqiy hujjatlarni ishlab chiqish va qabul qilish borasida muayyan ishlar amalga oshirildi.

Qabul qilinayotgan normativ-huquqiy hujjatlarning sifatini oshirish, ularni tartibga solishdagi ahamiyatini kuchaytirish, normativ-huquqiy hujjatlarni qabul qilishda jamoatchilik fikrini hisobga olish maqsadida Norma ijodkorligi faoliyatini takomillashtirish konsepsiyasi qabul qilinib, Konsepsiya norma ijodkorligi faoliyatining yangi davrini boshlab berdi.

Qonun ijodkorligi faoliyati sifatini tubdan oshirish, amalga oshirilayotgan islohotlarning huquqiy jihatdan taʼminlanishini takomillashtirish maqsadida Senat qoʻmitalari tomonidan qator qonunlarning ijrosi holati, huquqni qoʻllash amaliyoti oʻrganildi va qonunosti hujjatlarining qabul qilinishi yuzasidan monitoring amalga oshirildi.

Tahlillar ayrim qonunlarda aniq mexanizmlarning aks ettirilmaganligi, havolaki normalarning mavjudligi sababli sohaning asosan qonunosti hujjatlari bilan tartibga solinib kelinganligi, shuningdek qabul qilingan ayrim qonunlardagi normalarning amaliyotda qoʻllanilmayotganligi sababli qonunlarni bugungi kun talablari asosida qayta koʻrib chiqish hamda takomillashtirish lozimligini koʻrsatdi.

Jumladan: “Elektron tijorat toʻgʻrisida”gi Qonunda:

elektron tijorat sohasidagi qonun hujjatlari tizimlashtirilmagan, mazkur munosabatlarni toʻgʻridan toʻgʻri tartibga soluvchi norma va munosabatlar yagona qonunga birlashtirilmagan;

elektron tijoratni amalga oshirishda milliy toʻlov tizimlaridan tashqari, xalqaro toʻlov tizimlaridan foydalanish boʻyicha normalar qonunda oʻz aksini topmagan.

“Homiylik toʻgʻrisida”gi Qonunda:

qonunning nomlanishi qonun tartibga soladigan ijtimoiy munosabatlarni toʻliq yoritib bermaydi va uning tartibga solish predmetiga muvofiq emas;

homiylik tashkilotlarining huquq va manfaatlarini himoya qilish hamda faoliyat yuritishini muvofiqlashtirish boʻyicha normalar belgilanmagan;

homiylik faoliyatini amalga oshirayotgan tadbirkorlik subyektlari va NNTga ragʻbatlantirish choralarini taqdim etishning hozirgi davr talablariga mos mexanizmlari joriy etilmagan;

homiylik sohasidagi subyektlarning tarqoq holda faoliyat yuritayotganligi va ularning faoliyatini ochiqligi va hisobdorligi masalasi yaxlit tartibga solinmagan;

yakka tartibda xayriya faoliyati bilan shugʻullanayotgan jismoniy va yuridik shaxslar faoliyati hamda ularga ajratilgan mablagʻlar sarflanishi haqida ochiq va ishonchli maʼlumotga ega boʻlish imkoniyati yaratilmagan.

“Arxeologiya merosi obyektlarini muhofaza qilish va ulardan foydalanish toʻgʻrisida”gi Qonunda:

mavjud 21 ta havolaki norma sohani samarali huquqiy tartibga solish imkonini bermayapti hamda sohani asosan qonunosti hujjatlar bilan tartibga solinishiga olib kelmoqda;

arxeologiya merosi obyektlarini muhofaza qilish va ulardan foydalanish sohasini huquqiy tartibga solish uchun zarur boʻlgan asosiy tushunchalarning taʼriflari keltirilmagan;

Oʻzbekiston Respublikasi moddiy madaniy meros obyektlari davlat kadastrini yuritish tartibi anʼanaviy usulda yoʻlga qoʻyilgan boʻlib, zamonaviy raqamli texnologiyalar mazkur jarayonga jalb etilmagan;

arxeologiya ashyolari davlat katalogida roʻyxatdan oʻtkazilgan arxeologiya ashyolarining boshqa arxeologiya ashyolariga ayirboshlanishiga doir qoida belgilangan boʻlsa-da, uning tartibi, qanday ashyolar ayirboshlanishi, qaysi holatlarda ayirboshlashga yoʻl qoʻyilmasligi aniq belgilanmagan;

fan, madaniyat va taʼlim muassasalariga biriktirib qoʻyilgan arxeologiya ashyolaridan foydalanish tartibi Vazirlar Mahkamasi tomonidan belgilanishi nazarda tutilgan boʻlsa-da, mazkur tartib ishlab chiqilmagan;

arxeologiya merosi obyektlarini davlat tomonidan muhofaza qilish va ulardan foydalanishni moliyalashtirishga doir qoidalar aniq belgilanmagan.

“Axborot olish kafolatlari va erkinligi toʻgʻrisida”gi Qonunda:

axborot olish sohasidagi asosiy tushunchalarning taʼrifi keltirilmagan;

axborot tarqatish va uni olishning zamonaviy uslub va vositalari (elektron pochtadan tashqari) nazarda tutilmagan;

raqamli texnologiyalardan foydalangan holda axborotni tarqatish, olish, axborot olishga doir soʻrovlarni yuborish (qayta yuborish), ularni koʻrib chiqish, taqdim etish (qayta taqdim etish) kabi holatlarni nazarda tutuvchi normalar oʻz ifodasini topmagan;

axborot taqdim etganlik uchun toʻlovlarning aniq miqdorlari belgilanmaganligi natijasida taqdim etiladigan axborot evaziga turli miqdordagi toʻlovlar toʻlashni talab qilish holatlari yuzaga kelmoqda;

qaysi holatlarda axborot taqdim etishda cheklovlar oʻrnatilishi aniq belgilanmaganligi sababli axborotning egasi tomonidan zarur axborotni davlat siriga tegishli degan vajlar bilan taqdim etmaslik holatlari uchramoqda;

axborot olish huquqining noqonuniy cheklanishlari yuzasidan shikoyat qilish va shikoyatlarni koʻrib chiquvchi maxsus davlat organi hamda uning vakolatlariga doir normalar belgilanmagan.

“Axborot-kutubxona faoliyati toʻgʻrisida”gi Qonunda:

mavjud 10 ga yaqin havolaki normalar sohadagi munosabatlarni asosan qonunosti hujjatlaridagi normalar asosida tartibga solinishiga olib kelmoqda;

sohani huquqiy tartibga solishda ahamiyatga ega boʻlgan asosiy tushunchalarning huquqiy tariflari qonunda keltirilmagan;

axborot-kutubxona faoliyati sohasidagi davlat boshqaruvi Vazirlar Mahkamasi va u axborot-kutubxona faoliyati sohasida maxsus vakolat bergan davlat organi tomonidan amalga oshirilishi belgilangan boʻlsa-da, mazkur maxsus vakolat berilgan davlat organi aniq koʻrsatilmagan;

maxsus vakolatli davlat organining asosiy vakolatlaridan tashqari havolaki norma orqali aniqlashtirilmagan yana boshqa vakolatlar ham berilganligi sohani huquqiy tartibga solishda noaniqliklar keltirib chiqarmoqda;

axborot-kutubxona muassasalarini tashkil etish, qayta tashkil etish va tugatish tartibiga doir qoidalar belgilanmagan.

“Temir yoʻl transporti toʻgʻrisida”gi Qonunda temir yoʻl transporti faoliyatining prinsiplari, yuklarni tashish, vagonlar va konteynyerlarni yetkazib berish uchun shartnoma tuzishda asosiy talablar, yoʻlovchilarni, bagaj va yuklarni tashish qoidalari, yoʻlovchining huquq va majburiyatlari, jarima va uni toʻlash muddatlari, miqdori va mexanizmlari, transport majburiyatlarini buzganlik uchun javobgarlik nazarda tutilmagan.

“Aholini va hududlarni tabiiy hamda texnogen xususiyatli favqulodda vaziyatlardan muhofaza qilish toʻgʻrisida”gi Qonunda mavjud 10 dan ortiq havolaki normalar qonunni toʻgʻridan toʻgʻri qoʻllashda qiyinchiliklarni keltirib chiqarmoqda va favqulodda vaziyatlarni bartaraf etishga qaratilgan harakatlar toʻliq yoritilmagan.

“Gidrotexnika inshootlarining xavfsizligi toʻgʻrisida”gi Qonunda:

gidrotexnika inshootlarining himoya zonalari hamda gidrotexnika inshootlarining xavfsizlik rejimiga oid normalar belgilanmagan;

gidrotexnika inshootlarining turlari koʻrsatilmagan;

gidrotexnika inshootlarining xavfsizligini taʼminlash yuzasidan loyihachilarning majburiyatlari, gidrotexnika inshootlarining qurilishida ularning xavfsizligini taʼminlash mexanizmlari nazarda tutilmagan;

gidrotexnika inshooti avariyasi oqibatida yetkazilgan zarar uchun fuqarolik-huquqiy javobgarlikni sugʻurta qilishga oid normalar belgilanmagan.

“Chiqindilar toʻgʻrisida”gi Qonunda:

chiqindilarga boʻlgan mulkiy munosabatlarni tartibga solishda egasiz (noqonuniy yoki tartibsiz tarzda tashlab ketilgan) chiqindilar joylashgan yer uchastkalari mulkdorlari (shu jumladan yer egalari, yerdan foydalanuvchilar, ijarachilar)ning javobgarligi belgilanmagan;

qurilish, tibbiyot, biologik chiqindilar, turgʻun organik ifloslantiruvchilar bilan bogʻliq ishlarni amalga oshirish masalalari tartibga solinmagan;

maishiy chiqindilarning hosil boʻlishini kamaytirish, ulardan takroriy foydalanilishini taʼminlash, kam chiqitli va chiqitsiz texnologiyalarning joriy etilishi, ularning utilizatsiya qilinishi va qayta ishlanishini ragʻbatlantiruvchi tashkiliy va iqtisodiy mexanizmlar talab darajasida belgilanmagan;

chiqindilar bilan bogʻliq ishlarni qoʻshimcha moliyalashtirishning iqtisodiy mexanizmlari mavjud emas;

foydalanish xususiyatlarini yoʻqotgan tovarlar, qadoqlash materiallari (plastik, polietilen v.b.) hamda ulardan hosil boʻladigan chiqindilar boʻyicha ishlab chiqaruvchilarning masʼuliyati va majburiyatlari belgilanmagan;

chiqindilar bilan bogʻliq ishlarni amalga oshirish sohasida ragʻbatlantirish, shuningdek yuridik va jismoniy shaxslar tomonidan chiqindi bilan bogʻliq ishlarni amalga oshirish sohasidagi qonun hujjatlari talablarining buzilishi natijasida yetkazilgan zararning oʻrnini qoplash mexanizmlari aniq koʻrsatilmagan.

“Vasiylik va homiylik toʻgʻrisida”gi Qonunda:

davlat boshqaruvi organlarining vakolatlari bilan bogʻliq boʻlgan 30 dan ortiq havolaki normalar qonunni toʻgʻridan toʻgʻri qoʻllashda qiyinchiliklarni keltirib chiqarmoqda;

ayrim qonunosti hujjatlaridagi normalar “Vasiylik va homiylik toʻgʻrisida”gi Qonunning normalariga nomutanosib boʻlib, qonunda tuman va shahar hokimligi huzurida vasiylik va homiylik boʻyicha komissiyalar faoliyati bilan bogʻliq qoidalar mavjud emas;

vasiylik va homiylik organlari hamda ularning mansabdor shaxslari faoliyati ustidan nazorat qay tartibda va qaysi davlat organlari tomonidan amalga oshirilishi aniq koʻrsatilmagan;

soʻnggi yillardagi qonunchilikka kiritilgan oʻzgartirishlar qonunosti hujjatlarida qayd etilgan boʻlsa-da, qonunning oʻzida aks etmagan.

“Texnik jihatdan tartibga solish toʻgʻrisida”gi Qonunda xorijiy mamlakatlarda qoʻllaniladigan texnik reglamentlarni toʻgʻridan toʻgʻri qabul qilish va amaliyotga kiritish normalari koʻzda tutilmagan.

“Oʻzbekiston Respublikasining xalqaro shartnomalari toʻgʻrisida”gi Qonunda:

davlat tomonidan xorijdan mablagʻ jalb qilish va xalqaro shartnomalarda ishtiroki natijasida moliyaviy oqibatlar kelib chiqishi mumkin boʻlgan xalqaro shartnomalar loyihalariga Moliya vazirligi tomonidan majburiy xulosa berilishini nazarda tutuvchi qoida kiritilmagan;

xalqaro shartnomalarning davlat tiliga oʻgirilishi uchun masʼul organ belgilanmaganligi oqibatida ularning bajarilishi, ilmiy jihatdan tahlil qilinishi borasida amaliyotda muammolar kelib chiqmoqda;

xalqaro shartnomalar tuzilishi oqibatida davlat hokimiyati organlari oʻrtasidagi shartnomalar bajarilishi bilan bogʻliq nizolarni hal qilish qoidalari belgilanmagan;

vakillik organlarining ijro hokimiyati organlari tomonidan xalqaro shartnomalardan kelib chiqadigan majburiyatlari bajarilishi ustidan taʼsirchan nazorat oʻrnatilishini nazarda tutuvchi qoida qonunda oʻz aksini topmagan.

“Naslchilik toʻgʻrisida”gi Qonunda naslchilik sohasini davlat tomonidan ragʻbatlantirish, moliyalashtirish, ushbu sohada xalqaro hamkorlikni amalga oshirish masalalari oʻz aksini topmagan.

“Fermer xoʻjaligi toʻgʻrisida”gi Qonunda:

fermer xoʻjaligi bilan bogʻliq masalalar koʻplab qonunlar bilan tarqoq holda tartibga solinganligi oqibatida qonunlarni qoʻllashda qiyinchiliklar yuzaga kelmoqda. Jumladan:

fermer xoʻjaligi boshligʻi vafot etgan taqdirda, yer uchastkasini ijaraga olish huquqini roʻyobga chiqarish Fuqarolik kodeksi, fermer xoʻjaligini yuritish uchun yer uchastkalari berish, fermer xoʻjaligining yer uchastkasiga egalik qilish hamda undan foydalanish borasidagi huquq va majburiyatlari Yer kodeksi bilan tartibga solinsa, Oʻzbekiston Respublikasining Davlat chegarasi, katta va kichik daryolar, suv havzalari boʻylab joylashgan yer uchastkalarining fermer xoʻjaligi yuritish uchun berilishi “Oʻzbekiston Respublikasining davlat chegarasi toʻgʻrisida”gi va suv isteʼmoli masalasi “Suv va suvdan foydalanish toʻgʻrisida”gi qonunlarga asosan tartibga solinib kelinmoqda.

Shuningdek, qonunda fermer xoʻjaliklariga oid ayrim muhim masalalar oʻz aksini topmaganligi fermerlik harakatini faollashtirishga, sohaga sarmoya kirib kelishiga oʻzining salbiy taʼsirini koʻrsatmoqda.

Xususan, qonunda fermer xoʻjaliklari va davlat oʻrtasidagi munosabatlar, turli imtiyoz va preferensiyalarni joriy etish, shuningdek, fermer xoʻjaliklarining faoliyatiga davlat tomonidan aralashmaslik, buning kafolatlari kabi masalalar ochiq qoldirilgan;

fermer xoʻjaliklarining faoliyat turlari batafsil ochib berilmagan, shu jumladan, oʻz mahsulotini sotish tartibi, tijorat va notijorat tashkilotlar tuzish, moliya va kredit masalalaridagi ishtirokiga oid munosabatlar batafsil tartibga solinmagan.

Yuqoridagilardan kelib chiqib, “Oʻzbekiston Respublikasi Oliy Majlisining Senati toʻgʻrisida”gi Konstitutsiyaviy qonunning 16-moddasiga, “Oʻzbekiston Respublikasi Oliy Majlisi Senatining Reglamenti toʻgʻrisida”gi Qonunning 6-moddasiga muvofiq Oʻzbekiston Respublikasi Oliy Majlisi Senatining Kengashi qaror qiladi:

1. Senat qoʻmitalari tomonidan qonunlarning ijrosi holati, huquqni qoʻllash amaliyoti va qonunosti hujjatlarining qabul qilinishi yuzasidan amalga oshirilgan monitoring natijalari boʻyicha ishlab chiqilgan takliflar koʻrib chiqish uchun Vazirlar Mahkamasiga yuborilsin.

2. Oʻzbekiston Respublikasi Vazirlar Mahkamasi:

elektron tijorat sohasiga oid normativ-huquqiy hujjatlarni inventarizatsiyadan oʻtkazgan holda toʻgʻridan toʻgʻri amal qiluvchi yagona qonun loyihasini ishlab chiqish;

“Homiylik toʻgʻrisida”gi Qonunda homiylik tashkilotlarining huquq va manfaatlarini himoya qilish hamda faoliyat yuritishini muvofiqlashtirish boʻyicha normalarni belgilash, homiylik faoliyatini amalga oshirayotgan tadbirkorlik subyektlari va NNTga ragʻbatlantirish choralarini taqdim etishning hozirgi davr talablariga mos mexanizmlarini joriy etish;

mehnat va mehnatni muhofaza qilish toʻgʻrisidagi qonun hujjatlarini buzish homilador ayollarga yoxud uch yoshga toʻlmagan bolasi bor ayollarga nisbatan sodir etilgan taqdirda, mansabdor shaxslarga nisbatan javobgarlikni kuchaytirish;

“Xotin-qizlarni tazyiq va zoʻravonlikdan himoya qilish toʻgʻrisida”gi Qonunning normalarini qayta oʻrganib chiqqan holda tazyiq yoki zoʻravonlik sodir etishga moyil boʻlgan shaxslarning reyestri yuritilishini nazorat qilish, tazyiq oʻtkazishga va (yoki) zoʻravonlik sodir etishga moyil boʻlgan yoki ularni sodir etgan shaxs tomonidan himoya orderi talablarini bir yil ichida takroran bajarmaganlik uchun kuchaytirilgan javobgarlik choralarini belgilash masalasini koʻrib chiqish;

“Arxeologiya merosi obyektlarini muhofaza qilish va ulardan foydalanish toʻgʻrisida”gi Qonunda:

axborot olish erkinligini taʼminlash sohasidagi mavjud qonunlarni oʻrganib chiqib, ularni birlashtirgan holda yaxlit qonun shaklida ishlab chiqish, axborotni olish, tarqatish, taqdim etish va foydalanish jarayonlariga raqamli texnologiyalarni joriy etishga doir normalarni kiritish, axborotni taqdim etganlik uchun haq toʻlash tartibi va miqdorlarini aniq koʻrsatish, axborot taqdim etuvchi, saqlovchi va undan foydalanuvchilarning huquq va majburiyatlarini belgilash;

jismoniy va yuridik shaxslarning arxeologiya yodgorligi muhofazasi boʻyicha oʻtkazilayotgan chora-tadbirlardagi ishtirokini aniqlashtirish, roʻyxatdan oʻtkazilgan arxeologiya ashyolarining boshqa arxeologiya ashyolariga ayirboshlanishiga doir masalalar yuzasidan takliflar tayyorlash;

“Axborot-kutubxona faoliyati toʻgʻrisida”gi Qonunda axborot-kutubxona muassasalarini tashkil etish, qayta tashkil etish va tugatishning aniq mexanizmlarini belgilash, axborot-kutubxona muassasalarini xususiylashtirish va ijaraga berish jarayonlariga doir normalarni kiritish masalasini koʻrib chiqib, takliflar ishlab chiqish;

“Temir yoʻl transporti toʻgʻrisida”gi Qonunda talablar va daʼvolarni toʻliq yoki qisman qanoatlantirish rad etilgan hollarda yoki ularni oʻz vaqtida koʻrib chiqmaslik oqibatida sudga murojaat qilish tartibini belgilash;

“Vasiylik va homiylik toʻgʻrisida”gi Qonunni qayta koʻrib chiqib, qonun va qonunosti hujjatlarini oʻzaro muvofiqlashtirish, vasiylik va homiylik organlarining vazifa, funksiya va vakolatlarini aniq chegaralash, vasiylik va homiylik organlarining qonuniy talablarini bajarmaslik uchun maʼmuriy javobgarlikni belgilash yuzasidan takliflar tayyorlash;

“Texnik jihatdan tartibga solish toʻgʻrisida”gi Qonunda:

xorijiy mamlakatlarda qabul qilingan texnik reglamentlarning toʻgʻridan toʻgʻri amal qilishini nazarda tutuvchi qoidani aks ettirish;

muvofiqligini baholash boʻyicha umumiy talablar, ayniqsa, baholashda aniqlangan nomuvofiqliklar uchun javobgarlik masalalarini belgilash;

budjet tashkilotlari tomonidan ishlab chiqilgan normativ hujjatlarni ekspertizadan oʻtkazish bilan bogʻliq toʻlovlarni bekor qilish yoki miqdorini kamaytirish masalasini oʻrganib chiqish;

“Oʻzbekiston Respublikasining xalqaro shartnomalari toʻgʻrisida”gi Qonunda:

xalqaro shartnomalarda ishtirok etishgacha boʻlgan jarayonda ortiqcha byurokratik toʻsiqlarni bartaraf etish va bu borada samarali mexanizmlarni joriy etish maqsadida mazkur tartib-taomillarni soddalashtirish va har bir tartib-taomil amalga oshirilishi uchun muddat belgilash;

xorijdan mablagʻ jalb qilish va xalqaro shartnomalarda ishtiroki natijasida moliyaviy oqibatlar kelib chiqishi mumkin boʻlgan xalqaro shartnomalar loyihalariga Moliya vazirligi tomonidan majburiy xulosa berilishini nazarda tutadigan qoidani mustahkamlash;

Oʻzbekiston Respublikasi xalqaro shartnomalarining davlat tiliga oʻgirilishi uchun masʼul organni belgilash;

“Naslchilik toʻgʻrisida”gi Qonunga naslchilik sohasini davlat tomonidan ragʻbatlantirish, moliyalashtirish, ushbu sohada xalqaro hamkorlikni amalga oshirish masalalariga oid normalarni kiritish;

“Fermer xoʻjaligi toʻgʻrisida”gi Qonunda:

fermer xoʻjaligi faoliyatiga oid qonunlarni inventarizatsiyadan oʻtkazgan holda ularni yaxlit qonunga birlashtirish;

fermer xoʻjaliklari va davlat oʻrtasidagi munosabatlar, turli imtiyoz va preferensiyalarni joriy etish, shuningdek, fermer xoʻjaliklarining faoliyatiga davlat tomonidan aralashmaslik masalalarini nazarda tutish;

fermer xoʻjaliklarining faoliyat turlarini batafsil ochib berish, shu jumladan, oʻz mahsulotini sotish tartibi, tijorat va notijorat tashkilotlar tuzish, moliya va kredit munosabatlaridagi ishtirokiga oid normalarni belgilash;

atrof-muhitni muhofaza qilish toʻgʻrisidagi qonun hujjatlarida:

mazkur sohadagi qonunchilikda xalqaro ekologik standartlarning talablari va atrof-muhitni muhofaza qilish qoidalariga javob beradigan zamonaviy ekologik koʻrsatkichlarni belgilash;

xalqaro huquqning umumeʼtirof etilgan normalari, shuningdek Oʻzbekiston tomonidan ratifikatsiya qilingan majburiyatlarni toʻliq aks ettirish choralarini koʻrsin.

3. Oʻzbekiston Respublikasi Adliya vazirligi:

qonun hujjatlarini tubdan qayta koʻrib chiqqan holda ularni tizimlashtirish, normativ-huquqiy hujjatlarni ishlab chiqish va qabul qilish jarayonlari sifatini oshirish, ijrosi monitoringini takomillashtirish;

qabul qilingan normativ-huquqiy hujjatlarni masʼullarga yetkazish, tushuntirish, amaliyotda qoʻllashga koʻmaklashish va nazorat qilish;

ommaviy axborot vositalari, jumladan, televideniye orqali doimiy ravishda koʻrsatuv va chiqishlar tashkil etish, aholiga islohotlar mohiyati va natijalarini yetkazib borish tizimini joriy etish;

qonunchilikni tizimlashtirish orqali ortiqcha byurokratik tartib-taomillarni bartaraf etish, qonunchilik bazasidagi harakatsiz va amalda qoʻllanilmayotgan hujjatlarni tubdan qisqartirish maqsadida gilotina usulidan foydalanishni yanada kuchaytirish choralarini koʻrsin.

4. Senatning Sud-huquq masalalari va korrupsiyaga qarshi kurashish qoʻmitasi (N. Umarov) adliya vazirining davlat organlari va tashkilotlarining norma ijodkorligi faoliyati va huquqni qoʻllash amaliyotining holati toʻgʻrisidagi axborotini eshitish doirasida qabul qilingan normativ-huquqiy hujjatlarni masʼullarga yetkazish, tushuntirish, amaliyotda qoʻllashga koʻmaklashish va nazorat qilish masalalarini chuqur tahlil qilib, keng muhokama qilsin.

5. Oʻzbekiston Respublikasi Vazirlar Mahkamasi yuborilayotgan takliflar va ushbu Qaror ijrosi yuzasidan amalga oshirilgan ishlar toʻgʻrisida umumlashtirilgan maʼlumotni joriy yilning 15-iyuliga qadar taqdim etsin.

6. Oʻzbekiston Respublikasi Oliy Majlisi Senati qoʻmitalari oʻz yoʻnalishlari boʻyicha mazkur Qarorda belgilangan vazifalar ijrosini nazorat qilib borsin.

7. Ushbu Qarorning ijrosini nazorat qilish Oʻzbekiston Respublikasi Oliy Majlisi Senati Raisining birinchi oʻrinbosari S. Safoyev zimmasiga yuklansin.

Oʻzbekiston Respublikasi Oliy Majlisi Senatining Raisi T. NARBAYEVA

Toshkent sh.,

2021-yil 26-fevral,

KQ-188-IV-son