Transport vositalarini majburiy texnik koʻrikdan oʻtkazish tartibini takomillashtirishga doir qoʻshimcha chora-tadbirlar toʻgʻrisida (125-son)

09.03.2021

Oʻzbekiston Respublikasi Vazirlar Mahkamasining

qarori

“Yoʻl harakati xavfsizligi toʻgʻrisida”gi Oʻzbekiston Respublikasi Qonuni hamda Oʻzbekiston Respublikasi Prezidentining “2017 — 2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasini “Yoshlarni qoʻllab-quvvatlash va aholi salomatligini mustahkamlash yili”da amalga oshirishga oid davlat dasturi toʻgʻrisida” 2021-yil 3-fevraldagi PF-6155-son Farmoni ijrosini taʼminlash, shuningdek, avtomototransport vositalarini texnik koʻrikdan oʻtkazish tartibini yanada soddalashtirish, yuridik va jismoniy shaxslarga qoʻshimcha qulayliklar yaratish hamda transport vositalarini majburiy texnik koʻrikdan oʻtkazish samaradorligini oshirish maqsadida Vazirlar Mahkamasi qaror qiladi:

3. Belgilansinki:

Davlat boshqaruvi organlari hamda tashkilotlariga, xorijiy yuridik va jismoniy shaxslarga tegishli transport vositalari Davlat yoʻl harakati xavfsizligi xizmati tomonidan belgilangan tartibda majburiy texnik koʻrikdan oʻtkaziladi.

Oʻzbekiston Respublikasi Milliy gvardiyasi, Mudofaa vazirligi, Ichki ishlar vazirligi va Davlat xavfsizlik xizmati harbiy boʻlinmalarining transport vositalari mazkur idoralar tomonidan belgilangan tartibda majburiy texnik koʻrikdan oʻtkaziladi.

4. Quyidagilarni nazarda tutuvchi Transport vositalarini majburiy texnik koʻrikdan oʻtkazish tartibi toʻgʻrisidagi nizom 1-ilovaga muvofiq tasdiqlansin:

jismoniy va yuridik shaxslarga tegishli boʻlgan avtomototransport vositalari, elektromobillari va ularning tirkamalarini, shuningdek, tramvay va trolleybuslarni texnik koʻrikdan oʻtkazish tartibi;

transport vositalarini texnik koʻrikdan oʻtkazish uchun moʻljallangan ishlab chiqarish-texnika bazasi joylashtiriladigan xona va maydonlarga doir talablar;

transport vositalarini texnik koʻrikdan oʻtkazish muddatlari va davriyligi.

5. Oʻzbekiston Respublikasi Ichki ishlar vazirligi 2021-yil 1-iyulga qadar qonunchilik hujjatlarida belgilangan tartibda avtotransport vositalarini majburiy texnik koʻrikdan oʻtkazish faoliyatini amalga oshiruvchi tadbirkorlik subyektlariga axborot xavfsizligi talablarini inobatga olgan holda, Oʻzbekiston Respublikasi Ichki ishlar vazirligi Jamoat xavfsizligi departamenti Yoʻl harakati xavfsizligi xizmati Yagona avtomatlashtirilgan axborot tizimining “Texnik koʻrik” moduliga (keyingi oʻrinlarda — “Texnik koʻrik” moduli) kirish imkoniyatini yaratish choralarini koʻrsin.

6. 2021-yil 1-sentabrdan boshlab xorijiy davlatlarga chiqadigan transport vositalaridan tashqari barcha transport vositalariga texnik koʻrikdan oʻtganligi toʻgʻrisidagi talonlarni berish amaliyoti bekor qilinsin.

7. Oʻzbekiston Respublikasi Hukumatining 2-ilovaga muvofiq ayrim qarorlari oʻz kuchini yoʻqotgan deb hisoblansin.

8. Oʻzbekiston Respublikasi Ichki ishlar vazirligi manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarini bir oy muddatda ushbu qarorga muvofiqlashtirsin.

9. Mazkur qarorning bajarilishini nazorat qilish Oʻzbekiston Respublikasi ichki ishlar vaziri P.R. Bobojonov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2021-yil 9-mart,

125-son

Vazirlar Mahkamasining 2021-yil 9-martdagi 125-son qaroriga 1-ILOVA

Transport vositalarini majburiy texnik koʻrikdan oʻtkazish tartibi toʻgʻrisida

NIZOM

1-bob. Umumiy qoidalar

1. Ushbu Nizom Oʻzbekiston Respublikasining “Yoʻl harakati toʻgʻrisida”gi Qonuniga muvofiq avtomobillar, elektromobillar (gibrid avtomobillar) va ularning tirkamalarini (yarimtirkamalarini), mototsikl, elektromototsikl, moped va skuterlarni, shuningdek, tramvay va trolleybuslarni (keyingi oʻrinlarda — transport vositalari) majburiy texnik koʻrikdan oʻtkazish tartibini belgilaydi.

2. Transport vositalarining majburiy texnik koʻrigi (keyingi oʻrinlarda — texnik koʻrik) Oʻzbekiston Respublikasi Ichki ishlar vazirligining Davlat yoʻl harakati xavfsizligi xizmati (keyingi oʻrinlarda — DYHXX) organlari hamda tadbirkorlik subyektlari — yuridik shaxslar (keyingi oʻrinlarda — tadbirkorlik subyektlari) tomonidan mazkur Nizomga muvofiq oʻtkaziladi.

Transport vositalarining texnik holati va uskunalarining muvofiqligini baholash uchun DYHXX organlari tomonidan vazirliklar, idoralar va boshqa tashkilotlarning texnika bazalari, shuningdek, xususiy texnik xizmat koʻrsatish stansiyalari shartnoma asosida jalb etilishi mumkin.

Jismoniy va yuridik shaxslarga (davlat organlari va tashkilotlariga, xorijiy yuridik va jismoniy shaxslarga tegishli transport vositalari bundan mustasno) tegishli boʻlgan barcha (M, N, O, L) toifadagi transport vositalari tadbirkorlik subyektlari tomonidan texnik koʻrikdan oʻtkaziladi.

Davlat organlari va tashkilotlariga, xorijiy yuridik va jismoniy shaxslarga tegishli transport vositalari Davlat yoʻl harakati xavfsizligi xizmati tomonidan texnik koʻrikdan oʻtkaziladi.

3. Quyidagilar texnik koʻrikdan oʻtkazishning asosiy vazifalari hisoblanadi:

transport vositalarining texnik holati, ulardan foydalanish normalari va qoidalariga rioya etilishi boʻyicha samarali nazoratni tashkil etish;

transport vositalari texnik holati va uskunalarining yoʻl harakati xavfsizligining texnik reglamentlari yoki standartlari, qoidalari, normalariga muvofiqligini baholash;

transport vositalarining sonini, holatini, amalda mavjudligini, tegishliligini va roʻyxatdan oʻtkazish boʻyicha boshqa maʼlumotlarini aniqlashtirish;

yoʻl harakati xavfsizligini taʼminlash yuzasidan profilaktika ishlarini tashkil etish;

yoʻl harakati va transport vositalaridan foydalanish sohasidagi huquqbuzarliklar va jinoyatlarning oldini olish, ularni aniqlash hamda ularga barham berish.

4. Yuridik va jismoniy shaxslarga, shu jumladan, xorijiy yuridik va jismoniy shaxslarga tegishli boʻlgan, belgilangan tartibda DYHXX organlarida roʻyxatdan oʻtkazilgan transport vositalari majburiy texnik koʻrikdan oʻtkaziladi.

Oʻzbekiston Respublikasi Tashqi ishlar vazirligida akkreditatsiyadan oʻtgan xorijiy davlatlarning diplomatik vakolatxonalari va konsullik muassasalariga, xalqaro (davlatlararo, hukumatlararo) tashkilotlar va ularning vakolatxonalariga, shuningdek, ushbu vakolatxonalar va tashkilotlarning xodimlariga hamda ularning oila aʼzolariga tegishli boʻlgan transport vositalari ushbu Nizomga muvofiq umumiy asoslarda texnik koʻrikdan oʻtkaziladi.

Yuridik va jismoniy shaxslar transport vositalarini texnik koʻrikdan oʻtkazishga ariza yuborish uchun Oʻzbekiston Respublikasi Yagona interaktiv davlat xizmatlari portali (keyingi oʻrinlarda — YIDXP) yoki DYHXX dasturiy taʼminoti (mobil ilova) orqali murojaat etishlari mumkin.

YIDXP yoki DYHXXning dasturiy taʼminoti (mobil ilova) orqali shakllantirilgan murojaat Oʻzbekiston Respublikasi Ichki ishlar vazirligi Jamoat xavfsizligi departamenti Yoʻl harakati xavfsizligi xizmati Yagona avtomatlashtirilgan axborot tizimining “Texnik koʻrik” moduli (keyingi oʻrinlarda — “Texnik koʻrik” moduli) orqali tadbirkorlik subyektlariga onlayn rejimida yuboriladi.

Texnik koʻrikdan oʻtkazish joyi va vaqti haqida jismoniy va yuridik shaxslarga onlayn rejimda xabar yuboriladi.

Texnik koʻrikdan oʻtkazilgan transport vositalari toʻgʻrisidagi maʼlumotlar mazkur Nizom asosida Oʻzbekiston Respublikasi Ichki ishlar vazirligi Jamoat xavfsizligi departamenti Yoʻl harakati xavfsizligi xizmatining “Texnik koʻrik” moduliga kiritib boriladi.

5. Transport vositalari quyidagi davriylikka muvofiq texnik koʻrikdan oʻtkazilishi kerak:

a) tijorat asosida yoʻlovchilar tashish faoliyati bilan shugʻullanuvchi yengil avtomobillar, avtobuslar, trolleybuslar, tramvaylar va oʻrindiqlar soni 8 ta va undan ortiq boʻlgan (haydovchining oʻrnidan tashqari), odamlarni muntazam tashish uchun jihozlangan yuk avtomobillari, maxsus hamda yirik gabaritli, ogʻir vaznli va xavfli yuklarni tashish uchun moslashtirilgan transport vositalari va ularning tirkamalari — bir yilda ikki marta;

b) ishlab chiqarilganiga olti yildan koʻp boʻlmagan, yuridik shaxslarga tegishli barcha toifadagi hamda jismoniy shaxslarga tegishli boʻlgan M2, M3, N va O toifadagi transport vositalari (mazkur bandning “a” kichik bandida koʻrsatilgan transport vositalaridan tashqari), shuningdek, ishlab chiqarilganiga oʻn bir yildan oʻn toʻrt yilgacha (oʻn toʻrtinchi yili ham) boʻlgan, jismoniy shaxslarga tegishli M1 va L toifadagi transport vositalari (mazkur bandning “a” kichik bandida koʻrsatilgan transport vositalaridan tashqari) — ikki yilda bir marta;

v) ishlab chiqarilganiga olti yildan ortiq boʻlgan, yuridik shaxslarga tegishli barcha toifadagi hamda jismoniy shaxslarga tegishli M2, M3, N va O toifadagi transport vositalari (mazkur bandning “a” kichik bandida koʻrsatilgan transport vositalaridan tashqari), shuningdek, ishlab chiqarilganiga oʻn besh yil va undan ortiq boʻlgan, jismoniy shaxslarga tegishli M1 va L toifadagi transport vositalari (mazkur bandning “a” kichik bandida koʻrsatilgan transport vositalaridan tashqari) — bir yilda bir marta;

g) tirkamalar texnik koʻrikdan transport vositasi — shatakchi uchun belgilangan muddatlarda;

d) STG-3 turdagi gaz ballonlari oʻrnatilgan transport vositalari (mazkur bandning “a”, “b”, “v” kichik bandlarida koʻrsatilgan transport vositalaridan tashqari) — uch yilda bir marta.

Ishlab chiqarilganiga oʻn yilgacha (oʻninchi yili ham) boʻlgan, jismoniy shaxslarga tegishli M1 va L toifadagi transport vositalari (mazkur bandning “a” kichik bandida koʻrsatilgan transport vositalaridan tashqari) texnik koʻrikdan ixtiyoriy ravishda oʻtkaziladi.

6. Mazkur Nizomning 5-bandi “a” kichik bandida koʻrsatilgan transport vositalarining texnik koʻrigi:

birinchi marta — 1-mart — 30-iyunda;

ikkinchi marta — 1-sentabr — 31-oktabrda oʻtkaziladi.

Jismoniy va yuridik shaxslarga tegishli boshqa transport vositalarining texnik koʻrigi 1-yanvar — 31-dekabrda oʻtkaziladi.

7. Ishlab chiqarilganligidan qatʼi nazar transport vositalarini DYHXX organlarida roʻyxatdan oʻtkazishda (qayta roʻyxatdan oʻtkazishda), ularning agregat raqamlari texnik hujjatlarga mosligi tekshiriladi.

8. Transport vositalari texnik koʻrikka belgilangan muddatlardan oldin taqdim etilishi mumkin.

9. Transport vositalari DYHXX organlari tomonidan texnik koʻrikdan oʻtkazilganligi uchun Oʻzbekiston Respublikasi Ichki ishlar vazirligi tomonidan Iqtisodiyot va moliya vazirligi bilan kelishilgan holda tasdiqlanadigan miqdorda yigʻim undiriladi.

Birinchi (oldingi) texnik koʻrikda nosoz deb topilgan transport vositalari takroriy texnik koʻrikdan oʻtkazilganlik uchun yigʻim undiriladi.

Sud boshqaruvchisining arizasiga koʻra avtotransport vositasi oldindan toʻlovlarni amalga oshirmasdan koʻrikdan oʻtkaziladi va belgilangan toʻlovning oʻrni sud boshqaruvchisi tomonidan “Toʻlovga qobiliyatsizlik toʻgʻrisida”gi Oʻzbekiston Respublikasi Qonunining 150-moddasi birinchi qismida nazarda tutilgan tartibda toʻlanadi.

Texnik koʻrik oʻtkazilganligi uchun yigʻim summasi tegishli mahalliy budjetga oʻtkaziladi.

10. Transport vositalarini texnik koʻrikdan oʻtkazganlik uchun toʻlov miqdori tadbirkorlik subyektlari tomonidan mustaqil ravishda belgilanadi hamda kelib tushadigan mablagʻlar toʻliq hajmda uning tasarrufida qoladi.

2-bob. Transport vositalarini texnik koʻrikdan oʻtkazishni tashkil etish tartibi

11. Transport vositalari roʻyxatdan oʻtkazilgan (vaqtincha roʻyxatdan oʻtkazilgan) hududda yoki egalarining xohishiga koʻra eksterritoriallik tamoyili asosida boshqa hududlarda ham texnik koʻrikdan oʻtkaziladi.

12. Transport vositalarni navbatdagi texnik koʻrikka qoʻyish sanasi joriy texnik koʻrik paytida mazkur Nizomning 5-bandi talablaridan kelib chiqqan holda belgilanadi.

Transport vositalari egalari transport vositalarini navbatdagi texnik koʻrikka belgilangan muddatdan kechiktirmay taqdim etishlari shart.

13. Transport vositalarini texnik koʻrikdan oʻtkazish:

DYHXXning diagnostika stansiyalarida (tadbirkorlik subyektlari tomonidan texnik koʻrikdan oʻtkaziladigan transport vositalari bundan mustasno);

texnik xizmat koʻrsatish stansiyalarida (shartnoma asosida);

tadbirkorlik subyektlarining texnik bazasida (M1, M2, M3, N1, N2, N3 toifadagi transport vositalari).

14. Transport vositalarini texnik koʻrikdan oʻtkazish uchun DYHXXning diagnostika stansiyalari va tadbirkorlik subyektlari Oʻzbekiston texnik jihatdan tartibga solish agentligining Texnik jihatdan tartibga solish sohasida nazorat inspeksiyasi tomonidan belgilangan tartibda texnik jihatdan malakaliligi maʼqullashdan oʻtkazilgan, transport vositalarini texnik koʻrikdan oʻtkazish uchun zarur texnologik jihozlar bilan taʼminlangan ishlab chiqarish-texnika bazasiga (keyingi oʻrinlarda — ishlab chiqarish-texnika bazasi) ega boʻlishi zarur.

15. Transport vositalarini texnik koʻrikdan oʻtkazish uchun ishlab chiqarish-texnika bazasi:

a) quyidagilarga muvofiq boʻlishi zarur:

transport vositalarini texnik koʻrikdan oʻtkazish uchun — Vazirlar Mahkamasi tomonidan tasdiqlanadigan avtotransport vositalari konstruksiyasining foydalanish shartlari boʻyicha xavfsizligiga qoʻyiladigan talablarga;

avtotransport vositalariga oʻrnatilgan gaz balloni uskunalari ulanmalarining germetikligi va ishonchliligini sinovdan oʻtkazish hamda ularning ballonlarini tekshirish uchun — Vazirlar Mahkamasi tomonidan tasdiqlanadigan siqilgan tabiiy gazda (keyingi oʻrinlarda — STG), suyultirilgan neft gazida (keyingi oʻrinlarda — SNG) yoki dizel va gazsimon yoqilgʻi aralashmasida ishlaydigan transport vositalarining xavfsizligiga qoʻyiladigan talablarga;

b) zarur texnik diagnostika vositalariga ega boʻlishi lozim, shu jumladan:

transport vositalarining tormoz tizimini tekshirish uchun tormoz tizimining texnik diagnostika vositalari hamda ularning elektron tizimiga;

pnevmatik va pnevmogidravlik tormoz uzatmalarida siqilgan havo bosimi va germetiklikni (bosim tushishini) nazorat qilish vositalariga;

avtomatik boshqaruvga ega boʻlgan transport vositalarining tormoz tizimini tekshirish uchun tormoz yoʻlagi mavjud boʻlishiga;

tirkamalarni ulash moslamasining bosib turish qurilmasiga;

rul boshqaruvidagi umumiy lyuftni oʻlchash pribori hamda uning elektron tizimiga;

rul boshqaruvi va podveskasi detallaridagi lyuftlarni tekshirish testeriga;

chiroqlar yorugʻligini boshqarish va kuchini nazorat qilish pribori hamda uning elektron tizimiga;

shinalarni texnik diagnostika qilish vositalariga;

gaz analizatoriga — uchqundan oʻt oldirish dvigatellariga ega transport vositalarining ishlab boʻlingan gazlarida ifloslantiruvchi moddalarning mavjudligini aniqlash pribori hamda uning elektron tizimiga;

tutun oʻlchash priboriga — siqilishdan oʻt oldirish dvigatellariga ega transport vositalarining ishlab boʻlingan gazlarida tutunni aniqlash priboriga;

dvigatel aylanish chastotasi va moy haroratini oʻlchash priboriga;

shovqinni oʻlchash priboriga;

oynalarning yorugʻlik oʻtkazishini tekshirish pribori hamda uning elektron tizimiga;

kompressorga;

qinchali manometrga;

zarur kompyuter texnikasiga va davlat raqami belgilarini aniqlovchi foto-videokuzatuv kameralari tizimiga.

Ayrim texnik diagnostika vositalari xavfsiz foydalanish boʻyicha talablarga muvofiq boʻlish sharti bilan universal texnik vositalarga almashtirilishi mumkin.

Qoʻllaniladigan barcha oʻlchov vositalari tasdiqlangan tipda boʻlishi, qonunchilik hujjatlariga muvofiq tekshiruvdan oʻtgan boʻlishi shart.

Ushbu bandda koʻrsatilgan elektron tizimlar “Texnik koʻrik” moduliga majburiy integratsiya qilinadi.

17. Elektromobillarni texnik koʻrikdan oʻtkazish uchun ishlab chiqarish-texnika bazasi qoʻshimcha ravishda quyidagi texnik diagnostika vositalari bilan jihozlangan boʻlishi lozim:

akkumulyator batareyasining kuchlanishini va tok kuchini aniqlash testri;

elektr uzatgich simlarining texnik holatini aniqlash testri;

elektromobilning texnik holatini diagnostika qilish kompyuter texnikasi (dasturiy taʼminoti bilan).

18. Transport vositalarini texnik koʻrikdan oʻtkazish uchun moʻljallangan ishlab chiqarish-texnika bazasi joylashtiriladigan xona va maydonlarga doir talablar ushbu Nizomga 1-ilovaga muvofiq belgilanadi.

19. Transport vositalarini texnik koʻrikdan oʻtkazishga tegishli mutaxassislikka ega boʻlgan yoki diagnostika qilish texnologiyasi, diagnostika jihozlarining tuzilishi va ishlash prinsiplari, diagnostika vositalarini qoʻllagan holda texnik holatni tekshirish metodlari, mehnatni muhofaza qilish boʻyicha talablarni oʻrgangan shaxslar qoʻyilishi mumkin.

20. Tadbirkorlik subyektlari transport vositalarini texnik koʻrikdan oʻtkazishni boshlashdan oldin Qoraqalpogʻiston Respublikasi Ichki ishlar vazirligi, Toshkent shahar va Toshkent viloyati ichki ishlar bosh boshqarmalari hamda viloyatlar ichki ishlar boshqarmalarining jamoat xavfsizligi xizmatlari yoʻl harakati xavfsizligi boshqarmalarini (keyingi oʻrinlarda — hududiy IHXB) yaratilgan sharoitlar mazkur Nizom talablariga muvofiqligi va faoliyatni amalga oshirishga tayyor ekanligi haqida yozma ravishda xabardor qilishlari shart.

Hududiy YHXB tomonidan tadbirkorlik subyektining ustavi hamda transport vositalarini texnik koʻrikdan oʻtkazishni tashkil etish uchun tegishli texnologik jihozlar bilan taʼminlangan ishlab chiqarish-texnika bazasining Oʻzbekiston texnik jihatdan tartibga solish agentligining Texnik jihatdan tartibga solish sohasida nazorat inspeksiyasi tomonidan berilgan maʼqullash toʻgʻrisidagi guvohnomasi mustaqil ravishda olinadi.

21. Mazkur Nizomning 20-bandiga muvofiq olingan hujjatlar hududiy YHXBlar tomonidan uch kundan koʻp boʻlmagan muddatda oʻrganilib, kamchiliklar boʻlmagan taqdirda Oʻzbekiston Respublikasi Ichki ishlar vazirligi Jamoat xavfsizligi departamenti Yoʻl harakati xavfsizligi xizmatiga (keyingi oʻrinlarda — YHXX) taqdim etiladi.

YHXX taqdim etilgan hujjatlar asosida tadbirkorlik subyektini transport vositalarini texnik koʻrikdan oʻtkazish uchun zarur sharoitlarga ega boʻlgan tadbirkorlik subyektlari hisobini yuritish reyestriga kiritib, Ichki ishlar vazirligining Internet jahon axborot tarmogʻidagi rasmiy veb-saytiga joylashtiradi hamda bu haqda tadbirkorlik subyektini xabardor qiladi.

Reyestr aholini transport vositalarini texnik koʻrikdan oʻtkazish uchun zarur sharoitlarga ega boʻlgan tadbirkorlik subyektlari haqida xabardor qilish maqsadida yuritiladi.

22. Nizomning 20-bandida koʻrsatilgan hujjatlar tegishli davlat organlarining elektron tizimlarida mavjud boʻlmagan taqdirda, hududiy YHXB ikki ish kuni ichida tadbirkorlik subyektlariga bu haqda xabar beradi.

Tadbirkorlik subyektlari mazkur Nizomning 20-bandiga muvofiq hududiy YHXBga takroran xabarnoma yuborish huquqiga ega”;

24. Transport vositalarini texnik koʻrikdan oʻtkazish uchun transport vositasining egasi yoki uning vakolatli vakili tadbirkorlik subyektlari xodimiga (operatoriga) murojaat qiladi va quyidagi hujjatlarni koʻrsatadi:

tegishli toifadagi transport vositasini boshqarish huquqini beruvchi haydovchilik guvohnomasi;

transport vositasining roʻyxatdan oʻtkazilganligi toʻgʻrisidagi guvohnoma (texnik pasport, texnik talon);

gaz yonilgʻisida ishlashga qayta jihozlangan transport vositasiga oʻrnatilgan gaz ballonining sertifikatlashtirish organi tomonidan berilgan muvofiqlik sertifikati nusxasi.

Transport vositasining taqdim etilgan hujjatlarda koʻrsatilgan maʼlumotlarga muvofiqligi “Texnik koʻrik” moduli orqali tekshiriladi va maʼlumotlar mos kelgan taqdirda, belgilangan tartibda texnik koʻrikdan oʻtkazishga ruxsat etiladi.

25. Transport vositasini texnik koʻrikdan oʻtkazish tadbirkorlik subyektlari xodimi (operatori) tomonidan mazkur Nizomning 5-bobida nazarda tutilgan tartibda tekshiriladi.

Transport vositalariga oʻrnatilgan STG va SNG tizimlarining germetikligi hamda agregatlari va uzellari ulangan joylarining ishonchliligi tadbirkorlik subyektlari tomonidan Vazirlar Mahkamasi tomonidan tasdiqlangan Siqilgan tabiiy gazda, suyultirilgan neft gazida yoki dizel va gazsimon yoqilgʻi aralashmasida ishlaydigan transport vositalarining xavfsizligi toʻgʻrisidagi umumiy texnik reglamentga muvofiq sinovdan (opressovka) oʻtkaziladi.

26. Texnik koʻrikka taqdim etilgan transport vositasining egasi tomonidan qonunchilik hujjatlarining talablarini buzish (koʻrsatilgan hujjatlarni, agregatlarning identifikatsiya raqamlarini soxtalashtirish va boshqalar), transport vositasi qidiruvdaligi holatlari aniqlangan taqdirda hamda agregat raqamlari texnik hujjatlarga mos kelmasa, transport vositasi yoʻl-transport hodisasi ishtirokchisi boʻlganligiga shubha uygʻonsa, tadbirkorlik subyektining vakili bu haqda darhol ichki ishlar organlariga xabar berishi shart.

27. Tadbirkorlik subyektlari qayta roʻyxatdan oʻtkazilganda, nomi yoki joylashgan yeri (pochta manzili) oʻzgarganda bu haqida yetti ish kunida hududiy YHXBlarni xabardor qilishi shart.

3-bob. Davlat organlari va tashkilotlariga, xorijiy yuridik va jismoniy shaxslarga tegishli, shuningdek, xavfli yuklarni tashish uchun moslashtirilgan transport vositalarini texnik koʻrikdan oʻtkazishni tashkil etish tartibi

29. Davlat organlari va tashkilotlariga, xorijiy yuridik va jismoniy shaxslarga tegishli, shuningdek, maxsus va xavfli yuklarni tashish uchun moslashtirilgan transport vositalarining texnik koʻrigi transport vositalari roʻyxatdan oʻtkazilgan (vaqtincha roʻyxatdan oʻtkazilgan) joyda yoki ularning murojaatlariga koʻra eksterritoriallik tamoyili asosida quyidagi joylarda texnik koʻrikdan oʻtkaziladi:

zarur shart-sharoitlarga (texnik diagnostika uskunalariga, koʻtarish moslamalariga yoki qarab chiqish uchun xandaq (yama)larga, nazorat-oʻlchash asboblariga, asfalt yoki beton bilan qoplangan bir tekis shrizontal maydonchaga) va malakali mutaxassislarga ega boʻlgan tashkilotlarda;

texnik xizmat koʻrsatish stansiyalarida;

DYHXXning diagnostika stansiyalarida.

Transport vositalarini texnik koʻrikdan oʻtkazish joylari DYHXXning hududiy boʻlinmalari tomonidan belgilanadi.

Tashkilotlarda texnik koʻrik boshlangunga qadar barcha diagnostika asbob-uskunalari tekshirilishi va ish holatiga keltirilishi zarur.

30. Texnik koʻrikni tashkil etish davlat organlari va tashkilotlari hamda boshqalarning murojaatlari asosida rejalashtiriladi.

31. Texnik koʻrikka qoʻyiladigan transport vositalari soni mavjud diagnostika va nazorat-oʻlchash uskunalarining kunlik unumdorligidan kelib chiqib belgilanadi.

33. DYHXX hududiy organi tomonidan davlat organlari va tashkilotlari hamda boshqalarga elektron pochta (elektron tizim) orqali texnik koʻrik muddatlari toʻgʻrisida xabarnoma yuboriladi.

Transport vositalari toʻgʻrisidagi maʼlumotlar DYHXX xodimlari tomonidan elektron tizim orqali olinadi.

34. Texnik koʻrik tashkilotlarda, diagnostika stansiyalarida va texnik xizmat koʻrsatish stansiyalarida oʻtkaziladi.

4-bob. Trolleybuslar va tramvaylarni texnik koʻrikdan oʻtkazishni tashkil etish

37. Trolleybuslar va tramvaylarning texnik holati foydalanish qoidalariga, standartlariga, yoʻl harakati va texnika xavfsizligiga mosligini tekshirish maqsadida texnik koʻrikdan DYHXX xodimlari tomonidan trolleybus va tramvay depolarida oʻtkaziladi.

38. Yoʻl harakati xavfsizligi talablaridan hech boʻlmaganda bittasiga javob bermaydigan trolleybus va tramvaylar nosoz deb topiladi.

39. Texnik koʻrikka qoʻyilgan, biroq texnik nosozlik tufayli koʻrikdan oʻtmagan tramvaylar va trolleybuslardan foydalanishga yoʻl qoʻyilmaydi.

40. Oʻtkazilgan texnik koʻrik natijalari boʻyicha mazkur Nizomda belgilangan tartibda hujjatlar tuziladi va rasmiylashtiriladi.

5-bob. Texnik koʻrikni oʻtkazishning umumiy tartibi

41. Har qaysi transport vositasining texnik koʻrigi roʻyxatdan oʻtkazish toʻgʻrisidagi guvohnomada (texnik pasportda, texnik talonda) koʻrsatilgan maʼlumotlarga transport vositasi turi, markasi, modeli, davlat roʻyxatidan oʻtkazish raqami belgilari, shassi (rama), kuzov va dvigatelning identifikatsiyalash raqamlarining muvofiqligini tekshirishdan boshlanadi.

42. Har qaysi transport vositasining texnik holati va jihozlari texnik reglamentlar, standartlar talablariga, yoʻl harakati xavfsizligi qoidalari va normalariga muvofiqligi jihatidan tekshiriladi.

Gaz yonilgʻisida ishlash uchun qayta jihozlangan transport vositalarini texnik koʻrikdan oʻtkazishda gaz ballonlarining foydalanish muddati, ishlab chiqarilgan yili, zavod raqami, gaz ballonlarini sinovdan oʻtkazish muddatlari, gaz balloni anjomlarining belgilangan talablarga muvofiqligi ham tekshiriladi.

43. Tirkamalar va yarim tirkamalar texnik koʻrikdan avtopoyezd tarkibida ham, alohida turgan holatida ham oʻtkaziladi.

44. Texnik koʻrikdan oʻtkazilgan transport vositalari toʻgʻrisidagi maʼlumotlar “Texnik koʻrik” moduliga kiritiladi va ushbu Nizomga 3 yoki 4-ilovalarda keltirilgan dalolatnoma elektron shakllantiriladi.

Xorijiy davlatlarga chiqadigan transport vositalariga ushbu Nizomga 5-ilovada keltirilgan shakldagi “Transport vositasi texnik koʻrikdan oʻtkazilganligi toʻgʻrisida”gi talon elektron shaklda beriladi.

Texnik koʻrikdan oʻtkazilganligi toʻgʻrisidagi talonni (yoki dublikatni) berganlik uchun yigim undirilmaydi.

Texnik koʻrikdan oʻtkazilganligi toʻgʻrisidagi talon navbatdagi texnik koʻrik oʻtkazilgungacha saqlanadi.

45. Transport vositasini texnik koʻrikdan oʻtkazish joyiga olib borish imkoni boʻlmagan taqdirda, jismoniy va yuridik shaxslar belgilangan muddatlarda DYHXXning hududiy organiga murojaat qiladi va ushbu Nizomning 24-bandida koʻrsatilgan hujjatlarni taqdim etadi (haydovchi guvohnomasi, texnik koʻrikdan oʻtkazish uchun yigʻim toʻlanganligi toʻgʻrisidagi hujjat bundan mustasno).

Bunda DYHXXning hududiy organi xodimi joyiga chiqqan holda, nosozliklar toʻgʻrisida Nizomga 3-ilovada keltirilgan namunadagi alohida transport vositasining texnik koʻrik dalolatnomasini elektron shaklda rasmiylashtiradi va barcha nosozliklar toʻgʻrisidagi maʼlumotlarni “Texnik koʻrik” moduliga kiritadi.

Nosozlik bartaraf etilgandan keyin transport vositasi egasi uni mazkur Nizom talablari asosida texnik koʻrikka qoʻyadi.

47. Oʻzbekiston Respublikasi Raqamli texnologiyalar vazirligining ruxsatnomasini olish talab qilinadigan radioelektron vositalar va yuqori chastotali qurilmalarga ega boʻlgan transport vositalarida tegishli ruxsatnomaning mavjudligi tekshiriladi.

48. Maxsus va tezkor xizmatlarning transport vositalarida maxsus rangli va ovozli signallar qurilmalarining mavjudligi, sozligi va qonuniyligi, shuningdek, transport vositasining rang-grafik boʻyash sxemalarining texnik reglamentlar yoki standartlar talablariga muvofiqligi DYHXX xodimlari tomonidan tekshiriladi.

49. Konservatsiyaga qoʻyilgan transport vositalarini texnik koʻrikdan oʻtkazishda ularning butligi tekshiriladi. Transport vositasining soz holatdaligiga shubha tugʻdiradigan sabablar mavjud boʻlganda, transport vositasining gʻildiraklarini yuksizlantirish uchun tagliklardan qoʻzgʻatmagan holda uning dvigateli va transmissiyasining ishlashi tekshiriladi.

50. Jismoniy shaxsning transport vositasini (nosozligi yoki boshqa sabablar tufayli) texnik koʻrikdan oʻtkazish joyiga olib borish imkoniyati boʻlmagan taqdirda, roʻyxatdan oʻtkazish, qayta roʻyxatdan oʻtkazish, hisobdan chiqarish uchun yoki boshqa holatlarda transport vositasi egasining yozma shakldagi arizasiga koʻra DYHXXning hududiy organi xodimi tomonidan transport vositasi turgan joyda alohida transportni koʻrikdan oʻtkazish dalolatnomasi tuzilgan holda texnik koʻrikdan oʻtkazilishi mumkin.

Dalolatnoma berilgan vaqtidan boshlab 30 kun mobaynida haqiqiy hisoblanadi.

51. Texnik holati va jihozlari yoʻl harakati xavfsizligi talablaridan hatto bittasiga javob bermaydigan transport vositasi nosoz hisoblanadi va undan foydalanish man etiladi.

Aniqlangan texnik nosozliklar toʻgʻrisidagi maʼlumotlar “Texnik koʻrik” moduliga kiritiladi va texnik nosozlik toʻgʻrisida belgi qoʻyiladi.

Bunday transport vositasi oldingi texnik koʻrikdan oʻtkazilgan vaqtdan boshlab yigirma kundan kechikmay, ushbu Nizomda belgilangan tartibda takroriy texnik koʻrikdan oʻtkaziladi. Bunday holatda texnik holatni tekshirish faqat oldingi koʻrikdan oʻtkazishda yoʻl harakati xavfsizligi talablariga muvofiq boʻlmagan koʻrsatkichlar boʻyicha oʻtkaziladi.

Transport vositasi oldingi koʻrikdan oʻtkazish vaqtidan boshlab 20 kundan ortiq boʻlgan muddatda takroriy koʻrikdan oʻtkazishga qoʻyilgan taqdirda, texnik holatni tekshirish toʻliq hajmda oʻtkaziladi.

511. Davlat nazoratini oʻrnatish maqsadida texnik koʻrikdan oʻtkazilgan transport vositasi tadbirkorlik subyektlari tomonidan mazkur Nizomning 15, 17, 23, 24 va 25-bandlari talablariga muvofiq DYHXX xodimi ishtirokida nazorat tariqasida qayta texnik koʻrikdan oʻtkazilishi mumkin.

Qayta texnik koʻrikdan oʻtkazish jarayonida transport vositasining texnik nosozligi aniqlansa, tadbirkorlik subyektlari tomonidan oʻtkazilgan texnik koʻrik bekor qilinadi va “Texnik koʻrik” moduliga transport vositasining nosozligi toʻgʻrisidagi maʼlumotlar kiritiladi.

512. Ommaviy va maxsus tadbirlarga jalb etiladigan transport vositalarining texnik holati DYHXX xodimlari tomonidan tekshiriladi va ushbu Nizomga 2, 3 yoki 4-ilovalarda keltirilgan dalolatnomalardan biri ikki nusxada rasmiylashtiriladi.

Dalolatnomaning bir nusxasi transport vositasi haydovchisiga (transport vositalari egasiga yoki tadbir tashkilotchisiga) beriladi, ikkinchi nusxasi DYHXXda saqlanadi.

Transport vositalarini texnik holatini tekshirish joylari DYHXXning hududiy boʻlinmalari tomonidan belgilanadi.

Bunda tadbirkorlik subyektlari yoki boshqa tashkilotlarga tegishli boʻlgan texnik bazalardan ular bilan kelishilgan holda foydalanishi mumkin.

6-bob. Yakunlovchi qoidalar

52. Texnik koʻrikdan oʻtkazilganligi toʻgʻrisidagi muhrlarni ushbu Nizomga 6-ilovaga muvofiq shaklda tayyorlash va DYHXXning hududiy organlarini ushbu muhrlar bilan taʼminlash Qoraqalpogʻiston Respublikasi Ichki ishlar vazirligi, Toshkent shahar va Toshkent viloyati ichki ishlar bosh boshqarmalari hamda viloyatlar ichki ishlar boshqarmalari tomonidan amalga oshiriladi.

54. Tadbirkorlik subyektlari transport vositalarini mazkur Nizom talablariga muvofiq holda sifatli texnik koʻrikdan oʻtkazilishini taʼminlash uchun masʼul boʻladilar.

55. Mazkur Nizom talablari buzilishida aybdor boʻlgan shaxslar qonunchilik hujjatlarida belgilangan tartibda javob beradilar.

Transport vositalarini majburiy texnik koʻrikdan oʻtkazish tartibi toʻgʻrisidagi nizomga 1-ILOVA

Transport vositalarini texnik koʻrikdan oʻtkazish uchun moʻljallangan ishlab chiqarish-texnika bazasi joylashtiriladigan xona va maydonlarga doir

talablar

1-§. Umumiy qoidalar

1. Ushbu Talablar DYHXX diagnostika stansiyalari, vazirliklar va idoralar, boshqa tashkilotlar hamda jismoniy shaxslarga tegishli boʻlgan texnik xizmat koʻrsatish stansiyalari, tadbirkorlik subyektlari — yuridik shaxslar tomonidan transport vositalarini texnik koʻrikdan oʻtkazish uchun moʻljallangan ishlab chiqarish-texnika bazasi (laboratoriyalar) (keyingi oʻrinlarda — ishlab chiqarish-texnika bazasi) joylashtiriladigan xona va maydonlarning parametrlariga doir texnik normalarni belgilaydi.

2. Ishlab chiqarish-texnika bazasi belgilangan tartibda texnik jihatdan malakaliligini maʼqullashdan oʻtkazilgan, transport vositalarining texnik holatini texnik jihatidan tartibga solish sohasidagi normativ hujjatlar talablariga muvofiqligini baholashni tashkil etish va oʻtkazish uchun tegishli texnologik, sinov jihozlari va oʻlchash vositalari bilan taʼminlangan boʻlishi zarur.

2-§. Ishlab chiqarish-texnika bazasining hududiga doir talablar

3. Ishlab chiqarish-texnika bazasi hududining oʻlchamlarida quyidagi majburiy elementlarni joylashtirish imkoniyati nazarda tutilgan boʻlishi kerak:

ishlab chiqarish xonalari;

texnik koʻrikdan oʻtkazilishi kutilayotgan va tugallangan transport vositalari uchun maydon;

xona va maydonlarga kirish va oʻtish yoʻllari.

4. Ishlab chiqarish-texnika bazasi hududida transport vositalari harakatini tashkil etish uchun quyidagilar mavjud boʻlishi kerak:

sunʼiy yoritish chiroqlari;

qatnov qismi tekis va qattiq qoplamali (asfalt-betonli yoki sement-betonli) boʻlgan kirish yoʻli, maydoni;

perimetri boʻyicha oʻrnatilgan toʻsiq.

5. Ishlab chiqarish-texnika bazasi hududi yoki u joylashgan tashkilotga kirish joyi oldida ishlab chiqarish-texnika bazasining ish rejimi va texnik koʻrikdan oʻtkaziladigan transport vositalarining harakatlanish sxemasi koʻrsatilgan axborot stendi oʻrnatilgan boʻlishi kerak.

Ishlab chiqarish-texnika bazasi binosining kirish qismida 2,0 metrdan va balandligi 0,7 metrdan kam boʻlmagan oʻlchamdagi, davlat tilida “Texnik koʻrik” yozuvi boʻlgan peshlavha oʻrnatilgan boʻlishi kerak. Yozuv boshqa tillarda takrorlanishi ham mumkin.

6. Ishlab chiqarish-texnika bazasi hududi, xonalari va unga kirish-chiqish joylariga zamonaviy videokuzatuv kameralari oʻrnatilgan boʻlishi kerak.

7. Ishlab chiqarish-texnika bazasining ishlab chiqarish xonasiga kirish yoʻllari boʻylab transport vositalarining harakati quyidagi talablar hisobga olgan holda tashkil qilinishi zarur:

transport vositalarining bir tomonlama harakatini tashkil etish;

transport vositalarining xavfsiz harakatlanishi uchun imkoniyat yaratish;

ishlab chiqarish-texnika bazasi hududida transport vositalarining ruxsat etilgan harakat yoʻnalishlarini tegishli yoʻl chiziqlari bilan belgilash.

8. Ishlab chiqarish-texnika bazasi hududi ichimlik va ishlab chiqarish suv quvurlari bilan jihozlangan boʻlishi kerak.

9. Ishlab chiqarish-texnika bazasi hududi maydonining yuzasi tekis, unda suv quvurlari va suv oqib ketadigan ariq mavjud boʻlishi kerak.

10. Ishlab chiqarish-texnika bazasiga kirish hamda uning hududi boʻylab transport vositalarining harakatlanishi barcha mavjud inshootlar, yoʻl belgilari va chiziqlari koʻrsatilgan sxema hududida ishlab chiqarish-texnika bazasi joylashgan tashkilot rahbari tomonidan tasdiqlanadi.

Yoʻlning kengligi yengil avtomobillar uchun 3 metrdan, yuk avtomobillari va avtobuslar uchun 4,5 metrdan kam boʻlmasligi kerak.

11. Texnik koʻrikdan oʻtishni kutayotgan va oʻtgan transport vositalarini joylashtirish uchun maydonlarning oʻlchamlarini aniqlashda baholanadigan transport vositalarining gabarit oʻlchamlari va texnik koʻrik liniyasining kamida bir soatlik ishlab chiqarish quvvatiga teng boʻlgan miqdordagi transport vositalarining texnik koʻrik liniyasi maydonida aynan bir vaqtda boʻlishi eʼtiborga olinishi kerak.

12. Ishlab chiqarish-texnika bazasining ishlab chiqarish xonasiga kirish oldidagi maydon 70 kvadrat metrdan kam boʻlmasligi kerak.

13. Siqilgan va suyultirilgan tabiiy gaz yonilgʻisida ishlaydigan transport vositalarini texnik koʻrikdan oʻtkazishga moʻljallangan xonalar yertoʻlada, aholi yashash uylarida va boshqa korxonalar binolariga tutashgan holda joylashtirilishiga ruxsat etilmaydi.

3-§. Ishlab chiqarish-texnika bazasining xonalariga doir talablar

14. Ishlab chiqarish-texnika bazasi tarkibiga quyidagilar kiritilishi kerak:

ishlab chiqarish xonasi;

transport vositalari egalarini qabul qilish va ularga xizmat koʻrsatish xonasi;

transport vositasini texnik koʻrikdan oʻtkazish natijalarini rasmiylashtirish uchun xona;

sanitariya-gigiyena xonalari.

15. Ishlab chiqarish-texnika bazasining ishlab chiqarish xonalari quyidagilarni inobatga olgan holda rejalashtiriladi:

transport vositasining texnik holatini baholashdan oʻtkazish dasturi;

qoʻllaniladigan oʻlchash vositalari va sinov jihozlari;

transport vositasining texnik holatini baholash va natijalarini rasmiylashtirishning texnologik jarayoni;

yongʻin xavfsizligi va mehnatni muhofaza qilish talablari.

16. Ishlab chiqarish-texnika bazasi ishlab chiqarish xonasining oʻlchamlari mazkur Talablarga ilovaga muvofiq texnik koʻrik liniyalarining texnologik postlari soni va transport vositalarining gabarit oʻlchamlaridan kelib chiqqan holda aniqlanadi.

17. Ishlab chiqarish-texnika bazasi ishlab chiqarish xonasining rejasi ishlab chiqarish bino va inshootlarini texnologik loyihalashtirish qoidalari va normalari talablariga muvofiq boʻlishi kerak.

Ishlab chiqarish korpusi xonasining boʻrtib chiqqan qurilish konstruksiyalarigacha boʻlgan balandligi yengil avtomobillar uchun — 4,0 metrdan, yuk avtomobillari va avtobuslar uchun — 6,0 metrdan kam boʻlmasligi kerak.

Xonalarning poli tekis, neft mahsulotlari taʼsiriga chidamli boʻlishi kerak.

18. Xonada barcha texnologik jarayonlar sanitariya-gigiyena normalariga muvofiq holda xavfsiz va oqilona bajarilishi kerak.

19. Ishlab chiqarish xonalaridagi shovqin va vibratsiya darajasi sanitariya-gigiyena normalarida belgilangan hamda ruxsat etilgan koʻrsatkichlardan oshmasligi kerak.

20. Xona va ish joylarining tabiiy va sunʼiy yoritilishi ishlarning xavfsiz bajarilishi, odamlar uchun xavfsiz boʻlishi va ularning harakatlanishini taʼminlash uchun yetarli va quyidagi talablarga muvofiq boʻlishi kerak:

ish joylarida xonaning poli sathida — kamida 200 lk;

ishchi xonalarda (kabinetlarda) poldan 0,8 metr balandlikdagi sathda — kamida 200 lk;

koʻrikdan oʻtkazish xandagʻida transport vositalarining tag qismi sathida — kamida 150 lk;

avariya holatlarida yoritish ish yuzasini umumiy yoritish uchun belgilangan normalarning 5 foizidan kam boʻlmasligi, lekin kamida 2 lk boʻlishi kerak.

21. Transport vositalarini texnik koʻrikdan oʻtkazish uchun moʻljallangan xonalardagi havo harorati oʻtkaziladigan sinov metodlariga doir normativ hujjatlar talablariga muvofiq boʻlishi kerak. Ishlab chiqarish-texnika bazasi binolaridagi havo harorati yilning sovuq davrida — 15 °C dan 25 °C gacha, issiq davrida — 22 °C dan 30 °C gacha oraliqda boʻlishi kerak.

22. Transport vositalarining korxona hududida harakatlanish tezligi ochiq yoʻllarda — 10 km/s dan, xona ichida — 5 km/s dan ortiq boʻlmasligi kerak.

23. Ishlab chiqarish-texnika bazasining ishlab chiqarish xonasiga kirish joyi peshlavha bilan belgilanadi va sutkaning qorongʻi paytida yoritiladi. Ishlab chiqarish xonasiga kirish (chiqish) yoʻli ishlab chiqarish xonasidan boshqariladigan yorugʻlik (masalan, svetofor) signalizatsiyasi bilan jihozlanadi.

Kirish darvozasi ustida 3.13 “Cheklangan balandlik”, 3.14 “Cheklangan kenglik” va 3.24 “Yuqori tezlik cheklangan (5 km/s)” yoʻl belgilari joylashtiriladi.

24. Ishlab chiqarish-texnika bazasi xonasining mijozlar uchun qulay boʻlgan joyida quyidagi maʼlumotlar aks ettirilgan axborot stendi yoki boshqa maxsus qurilma oʻrnatiladi:

ishlab chiqarish-texnika bazasining tegishliligi, joylashgan yeri, ish tartibi va rejimi, aloqa telefonlari;

Oʻzbekiston Respublikasi Ichki ishlar vazirligining Call-markazi telefoni va hududiy YHXBning ishonch telefoni raqamlari, taklif va eʼtirozlar kitobi saqlanadigan joy va uni yuritish (saqlash) uchun masʼul boʻlgan shaxsning familiyasi, ismi, otasining ismi;

transport vositalarini texnik koʻrikdan oʻtkazish tartibi, tekshiriladigan (baholanadigan) parametrlar va normativlar, majburiy texnik koʻrikdan oʻtkazishning davriyligi va texnik holatni baholash natijalari toʻgʻrisidagi hujjatni berish tartibi;

transport vositasini texnik koʻrikdan oʻtkazish uchun qonunchilik hujjatlariga muvofiq koʻrsatilishi zarur boʻlgan hujjatlar, majburiy texnik koʻrikdan oʻtkazish uchun toʻlov miqdori, zarur jarayonlarni amalga oshirish muddati va boshqa maʼlumotlar.

25. Ishlab chiqarish xonasi elektr xavfsizligi talablarini belgilovchi normativ-huquqiy hujjatlar talablariga muvofiq elektr taʼminoti (yoritish) uchun elektr tarmoqlari, shuningdek, quvvat berish kabellari (diagnostika jihozlarining elektr energiyasi taʼminoti uchun) va taqsimlagich elektroshitlar bilan jihozlanadi.

26. Ishlab chiqarish-texnika bazasining ishlab chiqarish xonasida ikkitadan kam boʻlmagan evakuatsiya chiqish joylari mavjud boʻlishi nazarda tutiladi. Evakuatsiya chiqish joylarining eshiklari xonadan tashqari tomonga ochiladigan, oʻtish yoʻlagining kengligi 1 metrdan kam boʻlmasligi kerak.

27. Ishlab chiqarish-texnika bazasining yongʻindan himoyasi, yongʻinning oldini olish tizimi va yongʻin xavfsizligi hamda portlash xavfsizligini taʼminlash boʻyicha tashkiliy-texnik tadbirlar qonunchilik hujjatlarida belgilangan talablarga muvofiq boʻlishi kerak.

28. Transport vositalari egalarini qabul qilish va ularga xizmat koʻrsatish xonasi (binosi) hamda transport vositasining texnik holatini baholash natijalari haqidagi hujjatni rasmiylashtirish uchun xona ishlab chiqarish-texnika bazasining ishlab chiqarish xonasida yoki unga bevosita yaqin joyda boʻlishi kerak. Ushbu xonalarga kirish joyi tegishli koʻrsatkichlar bilan belgilab qoʻyiladi.

29. Transport vositalarining egalarini qabul qilish va ularga xizmat koʻrsatish xonalarining oʻlchamlarini aniqlashda, ularda ishlab chiqarish-texnika bazasining xodimi tomonidan hujjatlarni rasmiylashtirish uchun ish joylari hamda transport vositalarini egalarining kutib turish joylari inobatga oliinishi kerak.

Transport vositalari egalarining kutib turish joylari soni har bir texnik koʻrik liniyasiga beshtadan kam boʻlmasligi kerak.

30. Ishlab chiqarish-texnika bazasi ishlab chiqarish xonasining sanitariya-gigiyena normalari va qoidalariga muvofiqligi vakolatli sanitariya-epidemiologiya nazorat organining tegishli xulosasi bilan tasdiqlanadi.

4-§. Ishlab chiqarish-texnika bazasining ishlab chiqarish xonasini texnologik rejalashtirishga doir talablar

31. Ishlab chiqarish-texnika bazasining diagnostika jihozlari texnologik loyihalashga doir talablar va normalarga amal qilgan holda oʻrnatilishi kerak.

32. Transport vositalarini texnik koʻrikdan oʻtkazish dvigatel ishlab turgan paytda bajariladigan postlar (ishlab chiqarilgan gazlardagi tutun va zaharli gaz miqdorini, shovqin darajasini, tormozlanish samaradorligi koʻrsatkichlarini tekshirish va boshqalar) transport vositasidan gazlarni chiqarish quvuri (quvurlari)dan chiqayotgan ishlab chiqarilgan gazlarni tashqariga olib chiqish tizimi bilan jihozlanadi.

33. Ishlab chiqarish-texnika bazasining ishlab chiqarish xonasiga transport vositalarining kirishi (chiqishi) uchun har bir texnik koʻrik liniyasida:

universal liniyalar uchun — kengligi 3,0 metrdan va balandligi 4,3 metrdan kam boʻlmagan;

M1 va N1 toifadagi transport vositalarini tekshirish boʻyicha liniyalar uchun — kengligi 2,5 metrdan va balandligi 2,3 metrdan kam boʻlmagan oʻlchamli kirish (chiqish) darvozalari quriladi.

34. Texnik koʻrik liniyalarida transport vositalarini texnik koʻrikdan oʻtkazish xandagʻidan foydalangan holda bajariladi. Bunda:

ishlab chiqarish xonasidagi koʻrikdan oʻtkazish xandaqlari soni texnik koʻrikdan oʻtkazish liniyalari soniga muvofiq boʻlishi;

koʻrikdan oʻtkazish xandagʻining uzunligi mazkur liniyada tekshirilishi rejalashtirilayotgan transport vositasining maksimal uzunligini va undan chiqib ketish uchun zaxira yoʻlning mavjudligini hisobga olgan holda aniqlanishi;

koʻrikdan oʻtkazish xandagʻining kengligi 0,9 metrdan, chuqurligi 1,6 metrdan kam boʻlmasligi kerak. Maksimal kengligi mazkur liniyada tekshirilishi rejalashtirilayotgan minimal koleyali transport vositasining xandaqdan oʻtish imkoniyatini hisobga olgan holda aniqlanishi;

koʻrikdan oʻtkazish xandaqlari tutunni tortib olish ventilyatsiyasi bilan jihozlanishi kerak.

5-§. Yakunlovchi qoidalar

35. Transport vositalarining texnik holatini baholashning texnologik jarayoni texnik koʻrik liniyasining rejalashtiriladigan yechimlarini, tekshiriladigan transport vositalarining toifasini, bajariladigan ishlarning murakkabligini, qoʻllanadigan jihozlar, oʻlchov vositalari va anjomlarni hisobga olgan holda ishlab chiqiladi.

36. Transport vositalarining texnik holatini baholash boʻyicha ishlarni bajarishda texnika xavfsizligi va mehnat muhofazasi sohasidagi normativ-huquqiy hujjatlar talablariga amal qilish majburiy hisoblanadi.

37. Texnologik postlarda diagnostika parametrlari, texnika xavfsizligi qoidalari va ishlarning xavfsiz usullari boʻyicha amalda boʻlgan tavsiyalar koʻrsatilgan texnologik xaritalar joylashtiriladi.

38. Ishlab chiqarish-texnika bazasida texnik holati baholanadigan toifaga mansub transport vositalaridan foydalanish boʻyicha normativ-huquqiy hujjatlar, texnik tartibga solish sohasidagi normativ hujjatlar, qoʻllanmalar (yoʻriqnomalar), avtomobil maʼlumotnomalari va boshqa zarur maʼlumotnomalar mavjud boʻlishi kerak.

39. Ishlab chiqarish-texnika bazasida birinchi tibbiy yordam koʻrsatish uchun zarur boʻladigan tibbiyot dori vositalari va anjomlari bilan jamlangan tibbiyot qutichasi boʻlishi kerak.

Transport vositalarini texnik koʻrikdan oʻtkazish uchun moʻljallangan ishlab chiqarish-texnika bazasi joylashtiriladigan xona va maydonlarga doir talablarga ILOVA

Transport vositalarini texnik koʻrikdan oʻtkazish uchun texnik koʻrik liniyalarining

OʻLCHAMLARI

T/r Texnik holati baholanadigan transport vositalarining toifalari Texnologik postlar soni 1 2 3 Texnik koʻrik liniyasining uzunligi, metrdan kam emas 1. M1, M2, N1, O1 12 18 24 2. M1, M2, M3, N1, N2, N3, O1 18 30 42 3. M1, M2, M3, N1, N2, N3, O1, O2 21 36 51 4. M1, M2, M3, N1, N2, N3, O1, O2, O3 24 42 60 5. M1, M2, M3, N1, N2, N3, O1, O2, O3, O4 27 45 66

Transport vositalarini majburiy texnik koʻrikdan oʻtkazish tartibi toʻgʻrisidagi nizomga 2-ILOVA

Transport vositalarini majburiy texnik koʻrikdan oʻtkazish tartibi toʻgʻrisidagi nizomga 3-ILOVA

Transport vositalarini majburiy texnik koʻrikdan oʻtkazish tartibi toʻgʻrisidagi nizomga 4-ILOVA

Transport vositalarini majburiy texnik koʻrikdan oʻtkazish tartibi toʻgʻrisidagi nizomga 5-ILOVA

Texnik koʻrikdan oʻtganligi toʻgʻrisidagi talon

NAMUNASI

Transport vositalarini majburiy texnik koʻrikdan oʻtkazish tartibi toʻgʻrisidagi nizomga 6-ILOVA

Transport vositasining texnik koʻrikdan oʻtkazilganligi toʻgʻrisidagi muhr

NAMUNASI

Muhr 50x8 mm. oʻlchamga ega boʻlib, unga quyidagilar kiritiladi:

muhrning 12x8 mm. oʻlchamli chap tomonidagi toʻrt burchakning yuqori qismida hududning kodi (01, 10, 20 va h.k), pastki qismida muhr raqami kiritiladi;

muhrning 13x8 mm. oʻlchamli oʻrtadagi toʻrt burchagida “SOZ” soʻzi yoziladi;

muhrning 25x8 mm. oʻlchamli oʻng tomonidagi burchakda navbatdagi texnik koʻrik oʻtkazish sanasi koʻrsatiladi.

Vazirlar Mahkamasining 2021-yil 9-martdagi 125-son qaroriga 2-ILOVA

Oʻzbekiston Respublikasi Hukumatining oʻz kuchini yoʻqotgan deb eʼtirof etilayotgan baʼzi qarorlari

roʻyxati

1. Vazirlar Mahkamasining “Transport vositalarini majburiy texnik koʻrikdan oʻtkazish tartibi toʻgʻrisidagi nizomni tasdiqlash haqida” 2003-yil 31-yanvardagi 54-son qarori (Oʻzbekiston Respublikasi QT, 2003-y., 1-son, 12-modda).

2. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida” 2004-yil 29-apreldagi 203-son qaroriga (Oʻzbekiston Respublikasi QT, 2004-y., 4-son, 43-modda) ilovaning 7-bandi.

3. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar kiritish hamda baʼzilarini oʻz kuchini yoʻqotgan deb hisoblash toʻgʻrisida” 2004-yil 26-iyuldagi 359-son qaroriga (Oʻzbekiston Respublikasi QT, 2004-y., 7-son, 74-modda) ilovaning 9-bandi.

4. Vazirlar Mahkamasining “Transport vositalarini majburiy texnik koʻrikdan oʻtkazish tartibi toʻgʻrisidagi nizomga oʻzgartirish va qoʻshimchalar kiritish haqida” 2012-yil 24-fevraldagi 49-son qarori.

5. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish, shuningdek baʼzilarini oʻz kuchini yoʻqotgan deb hisoblash toʻgʻrisida” 2012-yil 1-noyabrdagi 313-son qaroriga (Oʻzbekiston Respublikasi QT, 2012-y., 11-son, 79-modda) 1-ilovaning 31-bandi.

6. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish hamda baʼzilarini oʻz kuchini yoʻqotgan deb hisoblash toʻgʻrisida” 2014-yil 3-martdagi 45-son qaroriga (Oʻzbekiston Respublikasi QT, 2014-y., 3-son, 16-modda)” 1-ilovaning 11-bandi.

7. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar kiritish toʻgʻrisida” 2014-yil 11-sentabrdagi 259-son qaroriga ilovaning 3-bandi.

9. Vazirlar Mahkamasining “Innovatsion oʻqitish uslublarini joriy etish yoʻli bilan haydovchilarni tayyorlash va qayta tayyorlash, shuningdek ularning malakasini oshirish tizimini yanada takomillashtirish toʻgʻrisida” 2017-yil 4-sentabrdagi 693-son qaroriga (Oʻzbekiston Respublikasi QHT, 2017-y., 36-son, 958-modda) 2-ilovaning 1 va 2-bandlari.

10. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida” 2017-yil 20-dekabrdagi 1001-son qaroriga (Oʻzbekiston Respublikasi QT, 2017-y., 12-son, 292-modda) ilovaning 12, 15 va 40-bandlari.

11. Vazirlar Mahkamasining “Transport vositalarini majburiy texnik koʻrikdan oʻtkazish tartibini takomillashtirishga doir qoʻshimcha chora-tadbirlar toʻgʻrisida” 2017-yil 22-dekabrdagi 1010-son qarori (Oʻzbekiston Respublikasi QT, 2017-y., 12-son, 298-modda).

12. Vazirlar Mahkamasining “Avtomototransport vositalari haydovchilarini tayyorlash, qayta tayyorlash va ularning malakasini oshirish tizimini takomillashtirish chora-tadbirlari toʻgʻrisida” 2018-yil 23-fevraldagi 139-son qaroriga (Oʻzbekiston Respublikasi QT, 2018-y., 2-son, 47-modda) 2-ilovaning 1 va 3-bandlari.

13. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar kiritish toʻgʻrisida” 2018-yil 29-maydagi 396-son qaroriga ilovaning 22-bandi.

14. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida” 2018-yil 20-sentabrdagi 748-son qaroriga (Oʻzbekiston Respublikasi QT, 2018-y., 9-son, 230-modda) ilovaning 10 va 48-bandlari.

15. Vazirlar Mahkamasining “Transport vositalarini majburiy texnik koʻrikdan oʻtkazish tartibining takomillashtirilishi munosabati bilan Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida” 2019-yil 15-fevraldagi 136-son qarori.

16. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida” 2019-yil 10-avgustdagi 661-son qaroriga (Oʻzbekiston Respublikasi QT, 8-son, 179-modda) ilovaning 3 va 16-bandlari.

17. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish, shuningdek, baʼzilarini oʻz kuchini yoʻqotgan deb hisoblash toʻgʻrisida” 2020-yil 8-maydagi 271-son qaroriga 1-ilovaning 8-bandi.

19. Vazirlar Mahkamasining “Oʻzbekiston Respublikasida chet el fuqarolari va fuqaroligi boʻlmagan shaxslarni roʻyxatga olish tartibini soddalashtirish chora-tadbirlari toʻgʻrisida” 2020-yil 28-sentabrdagi 593-son qaroriga 4-ilovaning 6-bandi.