Oʻzbekiston Respublikasi Hisob palatasining 2021-yildagi nazorat ishlari dasturiga taklif kiritish haqida (677-IV-son)

26.12.2020

Oʻzbekiston Respublikasi Oliy Majlisi Qonunchilik palatasining

Qarori

“Hisob palatasi toʻgʻrisida”gi Oʻzbekiston Respublikasi Qonunining 34 va 38-moddalariga muvofiq Oʻzbekiston Respublikasi Oliy Majlisining Qonunchilik palatasi qaror qiladi:

1. Oʻzbekiston Respublikasi Oliy Majlisi Qonunchilik palatasi Mudofaa va xavfsizlik masalalari qoʻmitasining Oʻzbekiston Respublikasi Hisob palatasining 2021-yildagi nazorat ishlari dasturiga quyidagi tadbirlarni kiritish haqidagi taklifi maʼqullansin:

Oʻzbekiston Respublikasi Mudofaa vazirligida, harbiy okruglarda va harbiy qismlarda davlat budjetidan ajratilgan mablagʻlardan maqsadli va samarali foydalanilishi hamda yoʻl qoʻyilayotgan xato-kamchiliklarning kelib chiqish sabablarini oʻrganish;

yoʻl harakati xavfsizligini taʼminlash uchun ajratilayotgan Davlat budjeti mablagʻlaridan, shuningdek belgilangan tartibda tuzilgan jamgʻarmalar mablagʻlaridan Oʻzbekiston Respublikasi Ichki ishlar vazirligi tomonidan maqsadli va samarali foydalanilishini oʻrganish.

2. Oʻzbekiston Respublikasi Hisob palatasi Oʻzbekiston Respublikasi Oliy Majlisi Qonunchilik palatasi tomonidan kiritilgan taklifga muvofiq oʻtkazilgan nazorat natijalari boʻyicha tayyorlangan tahliliy maʼlumotlarni belgilangan tartibda Oʻzbekiston Respublikasi Oliy Majlisi Qonunchilik palatasiga kiritsin.

3. Ushbu Qaror Oʻzbekiston Respublikasi Hisob palatasiga yuborilsin.

4. Mazkur Qarorning ijro etilishini nazorat qilish Oʻzbekiston Respublikasi Oliy Majlisi Qonunchilik palatasi Mudofaa va xavfsizlik masalalari qoʻmitasining raisi E. Salixov zimmasiga yuklatilsin.

5. Ushbu Qaror qabul qilingan kundan eʼtiboran kuchga kiradi.

Oʻzbekiston Respublikasi Oliy Majlisi Qonunchilik palatasi Spikerining oʻrinbosari U. INOYATOV

Toshkent sh.,

2020-yil 26-dekabr,

677-IV-son