Taʼlim sohasini yanada rivojlantirish borasidagi islohotlarni hayotga tatbiq etish boʻyicha parlament va deputatlar nazoratini amalga oshirishga doir chora-tadbirlar toʻgʻrisida (708-IV-son)

18.01.2021

Oʻzbekiston Respublikasi Oliy Majlisi Qonunchilik palatasi Kengashining

qarori

Oʻzbekiston Respublikasi Prezidenti Sh.M. Mirziyoyevning Oliy Majlisga Murojaatnomasi mamlakatimiz ijtimoiy-iqtisodiy va siyosiy hayotidagi eng muhim voqelikka aylandi.

Davlatimiz rahbarining faoliyati davomida uchinchi marta yoʻllagan Oliy Majlisga Murojaatnomasi avvalgi yillarda boʻlgani kabi, vatanimiz taraqqiyotida muhim ahamiyatga ega barcha dolzarb masalalar va oʻz yechimini kutib turgan muammolarni qamrab olgan, iqtisodiy barqarorlikni taʼminlash, xalqimiz farovonligini yangi bosqichga koʻtarish, barkamol avlodni voyaga yetkazish va yoshlarni har tomonlama qoʻllab-quvvatlashga qaratilgan keng koʻlamli vazifalarni nazarda tutuvchi yaxlit dasturiy hujjatga aylandi.

Murojaatnomada mamlakatimizda Uchinchi Renessans poydevorini barpo etishdek ulugʻ maqsadga erishish uchun yangi Xorazmiylar, Beruniylar, Ibn Sinolar, Ulugʻbeklar, Navoiy va Boburlarni tarbiyalab beradigan muhit va sharoitlarni yaratish lozimligi, bunda, avvalo, taʼlim va tarbiyani rivojlantirish, sogʻlom turmush tarzini qaror toptirish, ilm-fan va innovatsiyalarni taraqqiy ettirish milliy gʻoyamizning asosiy ustunlari boʻlib xizmat qilishi lozimligi taʼkidlandi.

Shuningdek, farzandlarimiz xalqimizning asriy orzu-umidlarini roʻyobga chiqaradigan buyuk va qudratli kuchga aylanishlari uchun, ularning oʻz oldilariga katta marralarni qoʻyib, ularga erishishlari uchun keng imkoniyatlar yaratish va har tomonlama koʻmak berish maqsadida “Yangi Oʻzbekiston — maktab ostonasidan, taʼlim-tarbiya tizimidan boshlanadi”, degan gʻoya asosida keng koʻlamli islohotlarni amalga oshirish boʻyicha ustuvor vazifalar belgilab berildi.

Eʼtirof etish kerakki, soʻnggi toʻrt yil ichida kichik yoshdagi bolalarni maktabgacha taʼlim bilan qamrab olish darajasi 2 barobar ortib, 60 foizga yetdi. Bogʻchalar soni esa 3 barobarga koʻpayib, 14 mingdan oshdi. 2020-yilda oliy taʼlimga qabul parametrlari 2016-yilga nisbatan 2,5 barobarga oʻsdi, yoshlarimizni oliy taʼlim bilan qamrab olish darajasi 9 foizdan 25 foizga yetdi. Ehtiyojmand oilalarning mingga yaqin qizlari ilk bor oliy oʻquv yurtlariga alohida davlat grantlari asosida qabul qilindi.

Shu bilan birga, Murojaatnomada taʼlim sohasi boʻyicha ilgari surilgan qator takliflar amaliyotga joriy etilishi, soʻnggi yillarda aniqlangan tizimli kamchilik va muammolar ham tezroq bartaraf etilishi lozim.

Belgilab berilgan vazifalarning muhim ekanligidan kelib chiqib, Qonunchilik palatasi oʻzining nazorat-tahlil faoliyatini tashkil etishda birinchi navbatda Murojaatnomada ilgari surilgan tashabbuslar va takliflarning amalga oshirilishi yuzasidan qatʼiy va har tomonlama parlament monitoringi tizimini shakllantirishi, belgilangan vazifalarning oʻz muddatida va sifatli bajarilishi holatini joylarga chiqqan holda oʻrganishi hamda taʼsirchan choralarni koʻrishi, shuningdek bu borada hududlarda qatʼiy parlament nazoratini amalga oshirishi zarurligi kun tartibiga chiqmoqda.

Taʼlim tizimini tubdan takomillashtirish boʻyicha qabul qilingan qonun hujjatlari, amalga oshirilayotgan islohotlarning mazmun-mohiyatini va aholiga yaratilayotgan qulayliklarni keng jamoatchilik eʼtiboriga yetkazish, shuningdek bu borada olib borilayotgan ishlarning holatiga real tanqidiy yondashgan holda mahalliy Kengashlarda doimiy ravishda muhokama qilib borish muhim ahamiyat kasb etadi.

Yuqoridagilardan kelib chiqib hamda mamlakatimiz Prezidentining Oliy Majlisga Murojaatnomasida taʼlim sohasini yanada rivojlantirish yuzasidan belgilangan ustuvor vazifalarning oʻz vaqtida va samarali roʻyobga chiqarilishini taʼminlash maqsadida Oʻzbekiston Respublikasi Oliy Majlisi Qonunchilik palatasining Kengashi qaror qiladi:

1. Taʼlim sohasini yanada rivojlantirish borasidagi islohotlarni hayotga tatbiq etish boʻyicha parlament komissiyasi tarkibi 1-ilovaga* muvofiq tuzilsin.

2. Taʼlim sohasini yanada rivojlantirish borasidagi islohotlarni hayotga tatbiq etish boʻyicha parlament va deputatlar nazoratini amalga oshirishga doir Chora-tadbirlar rejasi 2-ilovaga* muvofiq tasdiqlansin.

3. Taʼlim sohasini yanada rivojlantirish borasidagi islohotlarni hayotga tatbiq etish boʻyicha parlament komissiyasiga Koʻmaklashuvchi guruh tarkibi 3-ilovaga* muvofiq tuzilsin.

1 — 3-ilovalar berilmaydi.

4. Parlament komissiyasi zimmasiga:

parlament komissiyasining har bir aʼzosini tegishli hududlarga masʼul etib biriktirish hamda ular tomonidan oʻz faoliyatini asosan joylarda tashkil etilishini belgilash;

Chora-tadbirlar rejasida belgilangan vazifalar oʻz vaqtida va sifatli ijro etilishi uchun parlament komissiyasi aʼzolarining aniq yoʻnalishlar boʻyicha ixtisoslashtirilishini taʼminlash;

parlament komissiyasi aʼzolari oʻrtasida vazifalar hamda oʻrganish mavzulari va obyektlarini aniq taqsimlash;

Chora-tadbirlar rejasida belgilangan vazifalar ijrosining borishi ustidan doimiy nazorat oʻrnatish;

parlament komissiyasi yigʻilishlarini, qoida tariqasida, har oyda kamida bir marotaba oʻtkazish;

hududlarda muntazam ravishda oʻtkazilgan oʻrganish va monitoring natijalarini mahalliy Kengashlarda mutasaddi vazirlik va idoralar vakillari bilan birgalikda atroflicha va tanqidiy ruhda muhokama etilishini taʼminlash;

hududlarda olib borilgan oʻrganishlar yakunlaridan kelib chiqib, Qonunchilik palatasi Kengashida koʻrib chiqish uchun asoslantirilgan takliflarni tayyorlab borish vazifalari yuklatilsin.

5. Oʻzbekiston Respublikasi Vazirlar Mahkamasiga taʼlim sohasini yanada rivojlantirishga doir normativ-huquqiy hujjatlar loyihalarini Parlament komissiyasi bilan kelishilishini taʼminlash tavsiya etilsin.

6. Oʻzbekiston Respublikasi Oliy Majlisi Qonunchilik palatasi Spikerining oʻrinbosari A. Kadirov va Devonining rahbari M. Miralimov Parlament komissiyasi tomonidan bu borada amalga oshirilayotgan ishlarni ommaviy axborot vositalarida muntazam yoritib borilishini taʼminlash choralarini koʻrsin.

7. Oʻzbekiston Respublikasi Oliy Majlisi huzuridagi Qonunchilik muammolari va parlament tadqiqotlari instituti (F. Otaxonov), Oʻzbekiston Respublikasi Oliy Majlisi Qonunchilik palatasi Devonining Davlat budjeti boshqarmasi (K. Ernazarov) va Yuridik boshqarmasi (B. Radjabov) Parlament komissiyasining soʻroviga asosan taʼlim sohasidagi qonunchilikni takomillashtirish, sohaga ajratilayotgan budjet mablagʻlarining maqsadli sarflanishi bilan bogʻliq masalalarni oʻz vaqtida va samarali koʻrib chiqilishini taʼminlasin.

8. Ushbu Qarorning ijrosini nazorat qilish Oʻzbekiston Respublikasi Oliy Majlisi Qonunchilik palatasi Spikerining oʻrinbosari A. Kadirov zimmasiga yuklatilsin.

9. Ushbu Qaror qabul qilingan kundan eʼtiboran kuchga kiradi.

Oʻzbekiston Respublikasi Oliy Majlisi Qonunchilik palatasining Spikeri N. ISMOILOV

Toshkent sh.,

2021-yil 18-yanvar,

708-IV-son