Oʻzbekiston Respublikasi Davlat xavfsizlik xizmati Chegara qoʻshinlariga koʻmaklashuvchi “Chegara posbonlari” otryadlari faoliyatini takomillashtirish chora-tadbirlari toʻgʻrisida (35-son)

23.01.2021

Oʻzbekiston Respublikasi Vazirlar Mahkamasining

qarori

“Oʻzbekiston Respublikasining Davlat chegarasi toʻgʻrisida”gi Oʻzbekiston Respublikasi Qonuni talablarini bajarish hamda Oʻzbekiston Respublikasi Davlat chegarasini qoʻriqlash va himoya qilishda fuqarolarning ixtiyoriy asosda ishtirokini taʼminlash maqsadida Vazirlar Mahkamasi qaror qiladi:

1. Quyidagilarni nazarda tutuvchi Oʻzbekiston Respublikasi Davlat xavfsizlik xizmati Chegara qoʻshinlariga koʻmaklashuvchi “Chegara posbonlari” otryadlari toʻgʻrisidagi nizom 1-ilovaga muvofiq tasdiqlansin:

Oʻzbekiston Respublikasi Davlat xavfsizlik xizmati Chegara qoʻshinlariga koʻmaklashuvchi “Chegara posbonlari” otryadlarining (keyingi oʻrinlarda — “Chegara posbonlari” otryadlari) vazifalari va faoliyatini tashkil etish asoslari;

“Chegara posbonlari” otryadlari aʼzolarining huquq va majburiyatlari hamda ularni ragʻbatlantirish tartibi.

2. “Chegara posbonlari” otryadlari aʼzolariga toʻlanadigan oylik toʻlovlar Oʻzbekiston Respublikasi Davlat xavfsizlik xizmati Chegara qoʻshinlari tomonidan amalga oshirilishi va ushbu xarajatlar Davlat xavfsizlik xizmati Chegara qoʻshinlariga ajratiladigan budjet mablagʻlari hisobidan qoplanishi belgilansin.

3. Qoraqalpogʻiston Respublikasi Vazirlar Kengashi va viloyatlar hokimliklari Oʻzbekiston Respublikasi Davlat xavfsizlik xizmati Chegara qoʻshinlariga koʻmaklashuvchi “Chegara posbonlari” otryadlari oʻz faoliyatini amalga oshirishi uchun chegara oldi hududlarda joylashgan davlat muassasalarida zarur xonalar ajratib, mahalliy budjet mablagʻlari hisobidan ularning mebel va boshqa moddiy-texnik vositalar bilan jihozlanishini taʼminlasin.

4. Oʻzbekiston Respublikasi Hukumatining 2-ilovaga muvofiq ayrim qarorlari oʻz kuchini yoʻqotgan deb hisoblansin.

5. Vazirliklar va idoralar oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari A.J. Ramatov, Oʻzbekiston Respublikasi moliya vaziri T.A. Ishmetov va Oʻzbekiston Respublikasi Davlat xavfsizlik xizmati raisi A.A. Azizov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2021-yil 23-yanvar,

35-son

Vazirlar Mahkamasining 2021-yil 23-yanvardagi 35-son qaroriga1-ILOVA

Oʻzbekiston Respublikasi Davlat xavfsizlik xizmati Chegara qoʻshinlariga koʻmaklashuvchi “Chegara posbonlari” otryadlari toʻgʻrisida

NIZOM

1-bob. Umumiy qoidalar

1. Ushbu Nizom “Oʻzbekiston Respublikasining Davlat chegarasi toʻgʻrisida”gi Oʻzbekiston Respublikasi Qonuniga muvofiq Oʻzbekiston Respublikasi Davlat xavfsizlik xizmati Chegara qoʻshinlariga koʻmaklashuvchi “Chegara posbonlari” otryadlarini (keyingi oʻrinlarda — koʻmaklashuvchi otryad), tashkil etish asoslari, ularning vazifalari, tarkibi, faoliyatini tashkil etish tartibi, ularning huquq va majburiyatlari, koʻmaklashuvchi otryad aʼzolarini ragʻbatlantirish va ijtimoiy himoya qilish tartibini belgilaydi.

2. Koʻmaklashuvchi otryad oʻz faoliyatini Oʻzbekiston Respublikasining Konstitutsiyasiga va qonunlariga, Oʻzbekiston Respublikasi Oliy Majlisi palatalari qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Vazirlar Mahkamasining qarorlari va farmoyishlariga, mahalliy davlat hokimiyati organlarining qarorlari, koʻmaklashuvchi otryadlar faoliyatini tartibga soluvchi Oʻzbekiston Respublikasi Davlat xavfsizlik xizmatining (keyingi oʻrinlarda — Davlat xavfsizlik xizmati) idoraviy hujjatlariga hamda ushbu Nizomga muvofiq amalga oshiradi.

3. Ushbu Nizomda quyidagi asosiy tushunchalardan foydalaniladi:

koʻmaklashuvchi otryad — Davlat xavfsizlik xizmati Chegara qoʻshinlari (keyingi oʻrinlarda — Chegara qoʻshinlari) tomonidan Oʻzbekiston Respublikasining Davlat chegarasini (keyingi oʻrinlarda — Davlat chegarasi) qoʻriqlash va himoya qilish uchun ixtiyoriy ravishda jalb qilingan Oʻzbekiston Respublikasi fuqarolaridan tashkil etilgan jamoatchilik tuzilmasi;

koʻmaklashuvchi otryad sardori — doimiy ravishda Oʻzbekiston Respublikasi chegara oldi hududida istiqomat qiluvchi otryad aʼzolaridan tayinlanib, Chegara qoʻshinlari harbiy qism boʻlinma komandirining Davlat chegarasini qoʻriqlash va himoya qilish boʻyicha koʻrsatmalarini bajaradigan shaxs;

koʻmaklashuvchi otryad aʼzosi — doimiy ravishda Oʻzbekiston Respublikasi chegara oldi hududida istiqomat qiluvchi fuqarolardan tanlanib, Davlat chegarasini qoʻriqlash va himoya qilish boʻyicha koʻmaklashuvchi otryad sardori koʻrsatmalarini bajaradigan shaxs.

4. Fuqarolarning koʻmaklashuvchi otryaddagi ishtiroki ularni oʻz faoliyatini bajarishdan va Oʻzbekiston Respublikasi Qurolli Kuchlari safida umumiy harbiy majburiyatni oʻtashdan ozod qilmaydi.

Davlat chegarasini qoʻriqlash va himoya qilishda faol ishtirok etib, oʻzini ijobiy tomondan koʻrsatgan koʻmaklashuvchi otryad aʼzolari Oʻzbekiston Respublikasi Qurolli Kuchlari safida umumiy harbiy majburiyatni oʻtashi uchun chaqirtirilganida, Chegara qoʻshinlari harbiy qism komandirlari tomonidan koʻmaklashuvchi otryad aʼzosiga Chegara qoʻshinlarida harbiy xizmatni oʻtashga qobiliyatliligi haqida tavsiyanoma berilishi mumkin.

Koʻmaklashuvchi otryad aʼzolariga Chegara qoʻshinlarida harbiy xizmatni oʻtashga qobiliyatliligi haqida tavsiyanoma berish tartibi Davlat xavfsizlik xizmati tomonidan belgilanadi.

2-bob. Koʻmaklashuvchi otryadlarni tashkil etish asoslari va ularning vazifalari

5. Koʻmaklashuvchi otryadlar chegara zonasida, Davlat chegarasiga tutash tumanlarda istiqomat qiluvchi fuqarolar, shuningdek, Davlat chegarasi yaqinida joylashgan muassasa, korxona va tashkilotlarda faoliyat olib borayotgan ishchi va xizmatchilardan tashkil etiladi.

Koʻmaklashuvchi otryadlar aʼzoligiga otryadga yuklangan vazifalarni bajarishga ixtiyoriy ravishda ishtirok etish istagini bildirgan, sogʻlom, fuqarolarning huquq va erkinliklarini hurmat qiladigan 18 yoshdan 60 yoshgacha boʻlgan Oʻzbekiston Respublikasi fuqarolari qabul qilinadi.

Koʻmaklashuvchi otryadga nomzodlar tashkilotchilik, kuchli iroda, topqirlik, tashabbuskorlik qobiliyatlariga va aholi oʻrtasida obroʻ-eʼtiborga ega boʻlgan Oʻzbekiston Respublikasi fuqarolari orasidan tanlanadi.

6. Koʻmaklashuvchi otryadlarga oʻz turmush tarzi bilan aholi oʻrtasida salbiy tavsiflanganlar, ruhiy kasalligi, giyohvandlikka, surunkali ichkilikbozlikka ruju qoʻyganligi uchun tegishli tibbiyot muassasalari hisobida turganlar va Oʻzbekiston Respublikasi huquqni muhofaza qiluvchi organlarning tergov boʻlinmalari tomonidan dastlabki tergov va surishtiruv harakatlari olib borilishi belgilangan jinoyatlarni sodir etgan shaxslar qabul qilinmaydi.

7. Quyidagilar koʻmaklashuvchi otryadlarning asosiy vazifalari hisoblanadi:

Davlat chegarasi rejimiga, chegara rejimiga va Oʻzbekiston Respublikasi Davlat chegarasi orqali oʻtkazish punktlaridagi rejimga rioya etilishini taʼminlash yuzasidan chegara aholi punktlarida amalga oshiriladigan tadbirlarda Chegara qoʻshinlari nazorati ostida qatnashish, belgilangan hududlarda kuzatuv olib borish va faoliyatining tungi vaqtlarida jamoat joylari, mahalla koʻchalari va chegara hududlardagi qarovsiz joylarda tungi patrullik faoliyatida ishtirok etish;

Davlat chegarasini noqonuniy kesib oʻtish, undan qurol-aslaha, oʻq-dorilar, giyohvandlik vositalari yoki psixotrop moddalar kontrabandasi va chegaradan olib oʻtilishi taqiqlangan boshqa turdagi buyumlar, vositalar va mahsulotlarni oʻtkazishga tayyorgarlik koʻrilayotgan holatlar toʻgʻrisida Chegara qoʻshinlariga xabar berish;

Davlat chegarasi rejimi, chegara rejimi va Davlat chegarasi orqali oʻtkazish punktlaridagi rejimni buzuvchilarni qidirish va ularni qoʻlga olishda Chegara qoʻshinlariga koʻmaklashish;

chegaraoldi hududlarda aholi punktlariga olib boruvchi yoʻnalishlarini berkitishda qatnashish;

fuqarolarning oʻzini-oʻzi boshqarish organlari hamda ichki ishlar organlari hamkorligida chegaraoldi hududlarda istiqomat qiluvchi mahalliy aholi orasida Davlat chegarasi rejimi, chegaraoldi rejimi va Davlat chegarasi orqali oʻtkazish punktlaridagi rejim talablariga rioya etilishini va chegara zonasida xavfsizlikni taʼminlash, jamoatchilik tartibini saqlash;

tabiiy ofatlar, yongʻinlar va boshqa favqulodda vaziyatlarda fuqarolarni qutqarish, ularning mol-mulklarini saqlab qolish, favqulodda vaziyat xavfi tugʻilganda aholini oʻz vaqtida xabardor qilish va ushbu holatlarni chegaraoldi hududlarda bartaraf etishda koʻmaklashish;

chegaraoldi hududlarida ijtimoiy-maʼnaviy muhitni sogʻlomlashtirish, huquqbuzarlik va jinoyatchilikning oldini olish hamda aholi punktlarida xavfsizlikni va jamoat tartibini saqlash maqsadida Chegara qoʻshinlari, ichki ishlar organlari va favqulodda vaziyatlar boʻlinmalari tomonidan oʻtkaziladigan hamkorlikdagi profilaktik-targʻibot tadbirlari va tushuntirish ishlarida ishtirok etish, Chegara qoʻshinlari tarkibida muddatli harbiy xizmatni oʻtashga yoshlarni tayyorlashda tushuntirish-targʻibot tadbirlarini amalga oshirish.

8. Chegara qoʻshinlari harbiy qism komandiri va uning oʻrinbosarlari tomonidan koʻmaklashuvchi otryad aʼzolarini ushbu Nizomda nazarda tutilmagan boshqa vazifalarni bajarishga jalb etish taqiqlanadi.

3-bob. Koʻmaklashuvchi otryad aʼzolarining huquqlari va majburiyatlari

9. Koʻmaklashuvchi otryad aʼzolari zimmasiga yuklangan vazifalarni bajarishda quyidagi huquqlarga ega:

chegaraoldi hududlarda harakatlanib kelayotgan shaxslarning hujjatlarini tekshirishda Chegara qoʻshinlariga koʻmaklashish;

Chegara qoʻshinlari harbiy qism boʻlinma komandirlari tomonidan yuklangan vazifalarni bajarishda hamda olingan maʼlumotlarni oʻz vaqtida yetkazishda, muassasa, korxona va tashkilotlarning xizmat aloqa (telefon) vositalaridan foydalanish;

chegaraoldi hududda harakatlanayotgan shaxslardan rejim qoidalariga va jamoat tartibiga amal qilishlarini Chegara qoʻshinlari nazorati ostida talab qilish;

Davlat chegarasi bilan bogʻlik noqonuniy harakatlarni amalga oshirgan huquqbuzarlar, jinoyat sodir etishda gumon qilinganlar hamda shubhali shaxslar xususida Chegara qoʻshinlarini xabardor qilish.

Koʻmaklashuvchi otryad, qonunchilik hujjatlariga muvofiq boshqa huquqlarga ham ega boʻlishi mumkin.

10. Koʻmaklashuvchi otryad aʼzolari quyidagilarga majbur:

Chegara qoʻshinlariga Davlat chegarasini qoʻriqlash va himoya qilishda koʻmaklashish hamda amaliy yordam koʻrsatish;

Oʻzbekiston Respublikasining Konstitutsiyasiga va qonunlariga, Oʻzbekiston Respublikasi Prezidenti va Vazirlar Mahkamasining hujjatlariga hamda boshqa normativ-huquqiy hujjatlar, shuningdek, ushbu Nizom talablariga qatʼiy amal qilish;

Oʻzbekiston Respublikasi Davlat chegarasini qoʻriqlash va himoya qilishni taʼminlash yuzasidan oʻtkaziladigan tadbirlarda, Chegara qoʻshinlari harbiy qism boʻlinma komandirlari va koʻmaklashuvchi otryad sardorlarining talablarini aniq, sidqidildan va vijdonan bajarish;

Davlat chegarasini qoʻriqlash va himoya qilish boʻyicha vazifani bajarish vaqtida koʻmaklashuvchi otryad aʼzoligi guvohnomasini oʻzining yonida olib yurish.

Koʻmaklashuvchi otryad, qonunchilik hujjatlariga muvofiq boshqa huquq va majburiyatlarga ham ega boʻlishi mumkin.

4-bob. Koʻmaklashuvchi otryad aʼzolarining faoliyatini tashkil etish

11. Koʻmaklashuvchi otryad, chegaraoldi hududning geografik joylashuvi, hududdagi vaziyat va zaruratdan kelib chiqqan holda, Chegara qoʻshinlari harbiy qism boʻlinmalari huzurida 1 nafar sardor va 9 nafargacha boʻlgan otryad aʼzolaridan iborat tarkibda tashkil etiladi.

Koʻmaklashuvchi otryad aʼzoligiga qabul qilishda mehnat shartnomasi tuzilmaydi va ish staji hisoblanmaydi.

12. Koʻmaklashuvchi otryadga qabul qilish va roʻyxatdan chiqarish Chegara qoʻshinlari harbiy qism komandirining buyrugʻi asosida amalga oshiriladi.

13. Koʻmaklashuvchi otryadga qabul qilish fuqaroning shaxsini tasdiqlovchi hujjati nusxasini ilova qilgan holda Chegara qoʻshinlari harbiy qism komandiri nomiga taqdim qilgan yozma murojaati asosida qabul qilinadi.

Murojaat kelib tushgan kundan boshlab bir oygacha boʻlgan muddat ichida koʻrib chiqilib, nomzodni koʻmaklashuvchi otryad aʼzoligiga qabul qilish yoki qilmaslik masalasi hal qilinadi.

Agarda nomzod boʻyicha ijobiy qaror qabul qilinmasa, unga javob xatida rad etish sabablari koʻrsatilmaydi.

14. Chegara qoʻshinlari harbiy qism komandirining fuqaroni koʻmaklashuvchi otryadga qabul qilinganligi toʻgʻrisidagi buyrugʻi imzolangandan soʻng, uning koʻchirmasi koʻmaklashuvchi otryad aʼzosining asosiy ish joyining ish beruvchisiga yuboriladi.

15. Chegara qoʻshinlari harbiy qism komandiri tomonidan koʻmaklashuvchi otryad aʼzolariga guvohnoma beriladi. Koʻmaklashuvchi otryad aʼzolariga beriladigan guvohnoma shakli va uni berish tartibi Davlat xavfsizlik xizmati tomonidan belgilanadi.

16. Koʻmaklashuvchi otryad aʼzolari faoliyatini Chegara qoʻshinlari harbiy qism boʻlinma komandirlari tomonidan ishlab chiqilgan rejalar asosida amalga oshiradi.

Rejada quyidagi tadbirlar nazarda tutilishi mumkin:

oʻzlariga belgilangan hududda vaziyatni muntazam kuzatib borish;

Davlat chegarasi rejimi, chegara rejimi va Oʻzbekiston Respublikasi Davlat chegarasi orqali oʻtkazish punktlaridagi rejim qoidalariga rioya qilinishini taʼminlash va chegara-qidiruv tadbirlarida Chegara qoʻshinlari nazorati ostida ishtirok etish.

Koʻmaklashuvchi otryadlar Davlat chegarasini qoʻriqlash va himoya qilish faoliyati doirasida qonunchilik hujjatlari bilan taqiqlanmagan boshqa tadbirlarga ham jalb qilinishi mumkin.

17. Koʻmaklashuvchi otryad sardori koʻmaklashuvchi otryad aʼzolarining Davlat chegarasini qoʻriqlash va himoya qilish bilan bogʻliq faoliyati yakunlangandan soʻng uning natijalari boʻyicha hamda biriktirilgan hududdagi vaziyat xususida uch soat ichida Chegara qoʻshinlari harbiy qism boʻlinma komandiriga hisobot beradi.

18. Koʻmaklashuvchi otryad aʼzolarini oʻqitish, faoliyatini amalga oshirish davomida ularga yoʻriqnoma oʻtkazish ular faoliyat olib borayotgan hududda joylashgan Chegara qoʻshinlari harbiy qism boʻlinmasida amalga oshiriladi.

Bir necha koʻmaklashuvchi otryad faoliyatining umumiy natijalari boʻyicha yigʻilishlar oʻtkazish va ularning faoliyatini muvofiqlashtirish ular faoliyat olib borayotgan harbiy qismda tashkil qilinadi.

19. Koʻmaklashuvchi otryad aʼzolari asosiy ish faoliyatlaridan boʻsh vaqtlarida Davlat chegarasini qoʻriqlash va himoya qilishda ishtirok etadilar.

20. Davlat chegarasini qoʻriqlash va himoya qilishda, zarurat tugʻilganda, koʻmaklashuvchi otryad aʼzolari oʻzlarining asosiy ish joyi ish beruvchisi roziligi asosida faoliyatidan yil davomida jami oʻttiz ish kunidan oshmagan holda vaqtincha ozod qilinadi va bunda ularning ish staji hamda oʻrtacha oylik maoshi oʻz holicha saqlanib qolinadi.

Bunda Chegara qoʻshinlari harbiy qism komandiri tomonidan koʻmaklashuvchi otryad aʼzosining asosiy ish joyiga xizmat xati taqdim qilinadi.

21. Oʻz vazifasini bajarmagan yoki lozim darajada bajarmagan, faoliyati salbiy baholangan, qonunga zid xatti-harakatlar sodir etgan va oʻz xohishi bilan koʻmaklashuvchi otryad aʼzoligidan boʻshatilishini soʻrab murojaat qilgan koʻmaklashuvchi otryad aʼzosi tegishli buyruq asosida otryad tarkibidan chiqariladi, uning guvohnomasi olib qoʻyiladi hamda bu haqda uning asosiy ish joyiga xabar beriladi.

22. Koʻmaklashuvchi otryad aʼzosi ish, yashash yoki oʻqish joyini oʻzgartirganligi munosabati bilan otryad tarkibidan chiqarilganda, uning murojaati va Chegara qoʻshinlari harbiy qism komandiri tomonidan avval berilgan tavsifnoma asosida yangi ish, yashash yoki oʻqish joyidan qaytadan otryad aʼzoligiga qabul qilinishi mumkin.

23. Koʻmaklashuvchi otryad tarkibiga qabul qilinayotgan va chiqarilayotgan aʼzolar hisobi Chegara qoʻshinlari harbiy qism boʻlinma komandirlari tomonidan yuritiladi.

5-bob. Koʻmaklashuvchi otryad aʼzolarini ragʻbatlantirish va ijtimoiy himoyalash

24. Davlat chegarasini qoʻriqlash va himoya qilishni taʼminlashda amaliy yordam va koʻmak koʻrsatganligi uchun koʻmaklashuvchi otryad aʼzolariga quyidagicha oylik toʻlovlari belgilanadi:

koʻmaklashuvchi otryad sardorlariga — mehnatga haq toʻlashning eng kam miqdorining 1,41 baravarigacha boʻlgan miqdorda;

koʻmaklashuvchi otryad aʼzolariga — mehnatga haq toʻlashning eng kam miqdorining 1,06 baravarigacha boʻlgan miqdorda.

Koʻmaklashuvchi otryad aʼzolariga oylik toʻlovlar Davlat xavfsizlik xizmatining idoraviy hujjatlari asosida amalga oshiriladi.

25. Davlat chegarasini qoʻriqlash va himoya qilishda faol ishtirok etib, oʻzining faoliyatida yaxshi natijalarga erishgan koʻmaklashuvchi otryad aʼzolari quyidagicha taqdirlanadi:

Davlat chegarasini qoʻriqlash va himoya qilish, fuqarolar osoyishtaligini taʼminlash, jamoat tartibini saqlash, shuningdek, jinoyat va boshqa turdagi huquqbuzarliklarni sodir etgan shaxslarni aniqlash hamda oʻziga yuklangan vazifalarni bajarishda yuksak natijalarga erishganligi va oʻrnak koʻrsatganligi uchun qonunchilik hujjatlariga belgilangan tartibda davlat mukofotlariga tavsiya etiladi;

koʻmaklashuvchi otryad aʼzosining ish joyiga xabar bergan holda unga minnatdorchilik eʼlon qilinadi;

Chegara qoʻshinlari harbiy qism komandirlarining vakolati doirasida faxriy va maqtov yorliqlari, qimmatbaho sovgʻa hamda pul mukofotlari beriladi.

26. Koʻmaklashuvchi otryad aʼzolarini ragʻbatlantirish tadbirlari tantanali ravishda, chegaraoldi hududda joylashgan mahalla fuqarolar yigʻinlarida boshqa koʻmaklashuvchi otryad aʼzolari ishtirokida yoki ular faoliyat yuritadigan muassasa, korxona va tashkilotlar yigʻilishlarida oʻtkaziladi.

27. Koʻmaklashuvchi otryad aʼzolari, Davlat chegarasini qoʻriqlash va himoya qilish yuzasidan ularga yuklangan vazifalarni bajarish vaqtida halok boʻlgan yoxud ogʻir tan jarohati olgan taqdirda, amaldagi qonunchilik hujjatlariga hamda Davlat xavfsizlik xizmati idoraviy hujjatlari asosida unga va oila aʼzolariga moddiy yordam koʻrsatiladi.

6-bob. Yakunlovchi qoidalar

28. Koʻmaklashuvchi otryad aʼzolariga Davlat chegarasini qoʻriqlash va himoya qilish yuzasidan oʻtkaziladigan tadbirlarda Chegara qoʻshinlari harbiy qism komandirining ruxsati bilan boʻlinma komandiri tomonidan radio-aloqa va kuzatuv vositalari taqdim qilinishi mumkin.

29. Davlat chegarasida yuzaga kelgan zaruratdan kelib chiqib, koʻmaklashuvchi otryad aʼzolariga Chegara qoʻshinlari harbiy qism komandirlari qarorlari bilan ularga boshqa turdagi texnik vositalar vaqtincha foydalanish maqsadida berilishi mumkin.

30. Chegara qoʻshinlari harbiy qism komandirlari, mahalliy ijro etuvchi hokimiyat organlari va boshqa mutasaddi tashkilot vakillari ushbu Nizom talablariga rioya etilishini taʼminlaydilar.

31. Chegara qoʻshinlari harbiy qism va boʻlinma komandirlari koʻmaklashuvchi otryad aʼzolariga qonunga xilof topshiriqlar berilmasligini hamda ularni davlat sirlarini tashkil etuvchi hujjatlar bilan tanishtirilmasligini taʼminlaydi.

32. Ushbu Nizom talablarini buzgan shaxslar qonunchilik hujjatlarida belgilangan tartibda javobgarlikka tortiladi.

Vazirlar Mahkamasining 2021-yil 23-yanvardagi 35-son qaroriga2-ILOVA

Oʻzbekiston Respublikasi Hukumatining oʻz kuchini yoʻqotgan deb eʼtirof etilayotgan qarorlari

ROʻYXATI

1. Vazirlar Mahkamasining “Oʻzbekiston Respublikasi Davlat xavfsizlik xizmatining Chegara qoʻshinlariga koʻmaklashuvchi “Chegara posbonlari” otryadlari toʻgʻrisida” 2014-yil 30-sentabrdagi 273-son qarori (Oʻzbekiston Respublikasi QHT, 2014-y., 40-son, 497-modda).

2. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar kiritish toʻgʻrisida” 2018-yil 29-maydagi 396-son qaroriga (Oʻzbekiston Respublikasi QT, 2018-y., 5-son, 126-modda) ilovaning 75-bandi.

3. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida” 2018-yil 20-sentabrdagi 748-son qaroriga (Oʻzbekiston Respublikasi QT, 2018-y., 9-son, 230-modda) ilovaning 36-bandi.

4. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar kiritish toʻgʻrisida” 2019-yil 28-dekabrdagi 1046-son qaroriga ilovaning 136-bandi.