Organik yer maydonlariga belgi va koʻrsatkichlar oʻrnatish shakli va tartibi toʻgʻrisida (33-son)
22.01.2021
Oʻzbekiston Respublikasi Vazirlar Mahkamasining
qarori
Oʻzbekiston Respublikasi Prezidentining “Qishloq xoʻjaligi mahsulotlarining sifat va xavfsizlik koʻrsatkichlari xalqaro standartlarga muvofiqligini taʼminlashga doir qoʻshimcha chora-tadbirlar toʻgʻrisida” 2020-yil 18-maydagi PF-5995-son Farmoni ijrosi yuzasidan, shuningdek, organik yer maydonlariga belgi va koʻrsatkichlar oʻrnatish shakli hamda tartibini joriy etish maqsadida Vazirlar Mahkamasi qaror qiladi:
1. Organik mahsulotlar yetishtirishda va ularni yigʻib olishda yer maydonlariga qoʻyilgan talablarni, shuningdek, organik yer maydonlariga belgi va koʻrsatkichlar oʻrnatish shakli hamda tartibini nazarda tutuvchi Organik yer maydonlariga belgi va koʻrsatkichlar oʻrnatish shakli hamda tartibi toʻgʻrisidagi nizom ilovaga muvofiq tasdiqlansin.
2. Qoraqalpogʻiston Respublikasi Vazirlar Kengashi, viloyatlar hamda tumanlar (Quvasoy shahar) hokimliklari, Oʻzbekiston Respublikasi Qishloq xoʻjaligi vazirligi, Oʻrmon xoʻjaligi davlat qoʻmitasi hamda Veterinariya va chorvachilikni rivojlantirish davlat qoʻmitasi 2021-yildan boshlab:
a) har yili 1-oktabrga qadar:
organik qishloq xoʻjaligi mahsulotlarini yetishtiruvchi hamda yovvoyi holda oʻsuvchi oʻsimlik mahsulotlarini yigʻib oluvchi xoʻjaliklar yer maydonlarining manzilli roʻyxatini shakllantirsin;
organik qishloq xoʻjaligi mahsulotlarini yetishtiruvchi va yovvoyi holda oʻsuvchi oʻsimlik mahsulotlarini yigʻib oluvchi xoʻjaliklar yer maydonlarining oxirgi uch yil uchun statistik tahlil natijalari va topografik joylashuvini oʻrganish, tuproq, sizot va oqova suvlar sifati hamda xavfsizlik koʻrsatkichlari boʻyicha laboratoriya tahlillarini oʻtkazish choralarini koʻrsin;
b) muntazam ravishda organik qishloq xoʻjaligi mahsulotlarini yetishtiruvchi xoʻjaliklar va yovvoyi holda oʻsuvchi oʻsimlik mahsulotlarini yigʻib oluvchi xoʻjaliklar yer maydonlarini qishloq xoʻjaligi mahsulotlari anʼanaviy usulda yetishtiriladigan yer maydonlaridan ajratib turuvchi belgi va koʻrsatkichlarni oʻrnatish, shuningdek, eksportbop va serdaromad organik qishloq xoʻjaligi mahsulotlari yetishtirish choralarini koʻrsin.
3. Mazkur qarorning bajarilishini nazorat qilish Oʻzbekiston Respublikasi Bosh vazirining agrar va oziq-ovqat sohalarini rivojlantirish masalalari boʻyicha oʻrinbosari Sh.M. Gʻaniyev va Oʻzbekiston Respublikasi qishloq xoʻjaligi vaziri J.A. Xodjayev zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2021-yil 22-yanvar,
33-son
Vazirlar Mahkamasining 2021-yil 22-yanvardagi 33-son qarorigaILOVA
Organik yer maydonlariga belgi va koʻrsatkichlar oʻrnatish shakli va tartibi toʻgʻrisida
NIZOM
1-bob. Umumiy qoidalar
1. Mazkur Nizom organik yer maydonlariga belgi va koʻrsatkichlar oʻrnatish shakli hamda tartibini belgilaydi.
2. Ushbu Nizomning qoidalari organik qishloq xoʻjaligi mahsulotlarni yetishtiruvchi va yovvoyi holda oʻsuvchi oʻsimlik mahsulotlarini yigʻib oluvchi xoʻjaliklarga nisbatan tatbiq etiladi.
3. Mazkur Nizomda quyidagi asosiy tushunchalar qoʻllaniladi:
belgi — organik qishloq xoʻjaligi mahsulotlarini yetishtirish va yovvoyi holda oʻsuvchi oʻsimliklarni yigʻib olish uchun tanlangan yer maydoni hamda mazkur yer maydonida faoliyat yurituvchi xoʻjalik toʻgʻrisidagi koʻrsatkichlarni oʻz ichiga olgan maʼlumotlar peshlavhasi;
koʻrsatkich — organik qishloq xoʻjaligi mahsulotlarini yetishtirish yoki yovvoyi holda oʻsuvchi oʻsimliklarni yigʻib olish uchun tanlangan yer maydoni hamda mazkur yer maydonida faoliyat yurituvchi xoʻjalik toʻgʻrisidagi umumlashtirilgan tavsifi;
organik qishloq xoʻjaligi mahsulotlarini yetishtirish yoki yovvoyi holda oʻsuvchi oʻsimliklarni yigʻib olishga tanlangan yer maydoni — organik qishloq xoʻjaligi mahsulotlarni yetishtirish yoki yovvoyi holda oʻsuvchi oʻsimliklarni yigʻib olishga moʻljallangan yer maydonining belgilangan talablarga muvofiqligi;
organik yer maydonlari — muvofiqlik sertifikatiga ega boʻlgan, organik qishloq xoʻjaligi mahsulotlari yetishtiradigan yoki yovvoyi holda oʻsgan oʻsimliklar yigʻib olinadigan yer maydonlari;
organik mahsulot — ishlab chiqarish, qayta ishlash va savdo qilishning barcha bosqichlarida milliy organik standart talablariga muvofiq boʻlgan ishlab chiqarish texnologiyalarini qoʻllash orqali olingan mahsulot;
tuproq va suv tarkibini tahlil qilish — organik qishloq xoʻjaligi mahsulotlarini yetishtiruvchi hamda yovvoyi holda oʻsuvchi oʻsimliklarni yigʻib oluvchi xoʻjalik yer maydonlarining soʻnggi uch yillik statistik tahlil natijalarini hamda topografik joylashuvini oʻrganish, tuproq tarkibini, sizot va oqova suvlarning sifatini laboratoriyada tahlil qilish.
2-bob. Organik mahsulotlar yetishtirishda va yigʻib olishda yer maydonlariga qoʻyiladigan talablar hamda belgi oʻrnatish tartibi
4. Organik qishloq xoʻjaligi mahsulotlarini yetishtiruvchi yoki yovvoyi holda oʻsuvchi oʻsimliklarni yigʻib olish bilan shugʻullanuvchi xoʻjalikning tanlangan yer maydonida faoliyat olib borish huquqiga ega ekanligini tasdiqlovchi hujjatlarni muvofiqlikni baholash organiga taqdim etadi.
5. Organik qishloq xoʻjaligi mahsulotlarini yetishtiruvchi yoki yovvoyi holda oʻsuvchi oʻsimliklarni yigʻib oluvchi xoʻjalikning yer maydonidagi tuproq tarkibidagi sizot va oqova suvlarning sifati (minerallashuv) tahlil qilinadi.
6. Organik qishloq xoʻjaligi mahsulotlarini yetishtirish uchun yer maydonini tanlashda oxirgi uch yilda shu maydonda ekilgan qishloq xoʻjaligi ekin turlari, qoʻllanilgan agrotexnik tadbirlar, berilgan mineral oʻgʻitlar turlari va miqdori (qoldiq) oʻrganib chiqiladi.
7. Organik qishloq xoʻjaligi mahsulotlarini yetishtirishga tanlangan yer maydonining atrofida anʼanaviy usulda yetishtirilgan qishloq xoʻjaligi ekinlarning turi, sugʻorish tizimi, yer maydoni chegaralarida ihotazorlar barpo etish magistral kanal va avtomobil yoʻllari bilan oraliq masofani hisobga olgan holda tahlil qilinadi.
8. Tuproqning fizik-mexanik, kimyoviy, mikrobiologik va agrokimyoviy tarkibi laboratoriyada tahlil qilinadi.
9. Respublikada kamayib borayotgan va muhofazaga olingan hamda Oʻzbekiston Respublikasining Qizil kitobiga kiritilgan yovvoyi holda oʻsuvchi oʻsimlik turlarini yigʻib olishga ruxsat berilmaydi.
10. Tanlangan yer maydonida tuproq tarkibi, iqlim sharoitini hisobga olgan holda, qishloq xoʻjaligi ekinlari bir yillik yoki koʻp yillik turlarga qarab joylashtiriladi.
11. Organik qishloq xoʻjaligi mahsulotlarini yetishtirishga tanlangan yer maydoni boʻyicha barcha tahlil natijalari ijobiy boʻlgan taqdirda xoʻjalik tomonidan mazkur yer maydonining kirish yoʻlagiga organik qishloq xoʻjaligiga oʻtish davrini bildiruvchi quyidagi koʻrsatkichlar oʻzida aks ettirgan belgi oʻrnatadi:
yer maydoniga egalik qiluvchi xoʻjalik nomi;
xoʻjalik joylashgan joy (pochta manzili);
xoʻjalik rahbarining F.I.O.;
umumiy yer maydoni xaritasi, gektar, organik yer maydoni gektari, konturi;
yetishtiriladigan organik qishloq xoʻjaligi mahsulot nomi;
qishloq xoʻjaligi ekin turlaridan kelib chiqib, organik qishloq xoʻjaligi mahsulotlarini yetishtirishga (bogʻ, uzumzor, texnik va oziq-ovqat ekinlari hamda oziqabop yem-xashak ekinlari) oʻtish davrining muddati;
radiusi 3 km dan kam boʻlmagan asalarichilik xoʻjaligi hududining xaritasi hamda asalari uyalarini hududdan hududga koʻchirish talab etilsa, koʻchish hududlarining xaritalari (asalarichilik xoʻjaliklari uchun);
chorvachilik va parrandachilik xoʻjaliklari inshootlarining yer maydonida (gektar) joylashuv sxemasi hamda yaylovlar xaritasi koʻrsatilgan belgi.
12. Yovvoyi holda oʻsuvchi oʻsimliklarni yigʻib oluvchi xoʻjalik murojaatiga koʻra, muvofiqlikni baholash organi tomonidan berilgan organik muvofiqlik sertifikatiga asosan tanlangan yer maydoniga oʻrnatilgan belgida organik oʻtish davri belgilanmaydi.
13. Yovvoyi holda oʻsuvchi oʻsimliklarni yigʻib olish jarayoniga organik muvofiqlik sertifikati olgan xoʻjalik organik yer maydonining kirish chegarasiga quyidagi koʻrsatkichlarni oʻzida aks ettirgan belgini oʻrnatadi:
organik mahsulotlari yigʻib olinadigan xoʻjalik nomi;
xoʻjalik rahbarining F.I.O.;
yer maydonining xaritasi, maydoni (gektar);
yigʻib olinadigan mahsulot nomi;
muvofiqlikni baholash idorasi nomi (telefon raqami va elektron pochta manzili);
organik muvofiqlik sertifikatining raqami va amal qilish muddati.
14. Qishloq xoʻjaligi mahsulotlarini yetishtiruvchi xoʻjalik tomonidan organik qishloq xoʻjaligiga oʻtish muddatini bildiruvchi belgida koʻrsatilgan maʼlumotga oʻtish muddati tugagunga qadar oʻzgartirish kiritilmaydi.
15. Organik qishloq xoʻjaligi mahsulotlarini yetishtirish jarayoniga muvofiqlikni baholash organi tomonidan berilgan organik muvofiqlik sertifikatiga asosan xoʻjalik tomonidan organik yer maydonining kirish yoʻlagiga quyidagi koʻrsatkichlarni oʻzida aks ettirgan belgi oʻrnatiladi:
yer maydonlariga egalik qiluvchi xoʻjalik nomi;
xoʻjalik rahbarining F.I.O.;
yer maydonining xaritasi, maydoni (gektar);
yetishtiriladigan mahsulot nomi;
xoʻjalik joylashgan joy (pochta manzili);
muvofiqlikni baholash organi nomi (telefon raqami va elektron pochta manzili);
organik muvofiqlik sertifikatning raqami va amal qilish muddati.
3-bob. Yakunlovchi qoidalar
16. Organik qishloq xoʻjaligi mahsulotlarini yetishtirish yoki yovvoyi holda oʻsuvchi oʻsimliklarni yigʻib olish ishlari bilan bogʻliq xarajatlar ushbu faoliyat bilan shugʻullanuvchi xoʻjalik mablagʻi hisobidan amalga oshiriladi.
17. Organik qishloq xoʻjaligi mahsulotlarini yetishtirish va yovvoyi holda oʻsuvchi oʻsimliklarni yigʻib olish jarayonlarida yuzaga keladigan nizolar qonunchilik hujjatlarida belgilangan tartibda hal etiladi.
18. Mazkur Nizom talablari buzilishida aybdor shaxslar qonunchilik hujjatlarida belgilangan tartibda javob beradilar.