Oʻzbekiston Respublikasi kichik hajmli kemalar boʻyicha davlat inspeksiyasining Oʻzbekiston Respublikasi Davlat tabiatini muhofaza qilish qoʻmitasiga boʻysunishi toʻgʻrisida (167-son)

01.04.1993

Oʻzbekiston Respublikasi Vazirlar Mahkamasining

qarori

Vazirlar Mahkamasi qaror qiladi:

1. Oʻzbekiston Respublikasi kichik hajmli kemalar boʻyicha davlat inspeksiyasi Oʻzbekiston Respublikasi Davlat jismoniy tarbiya va sport qoʻmitasi huzuridagi Respublika koʻp ixtisosli tez harakat qilish markazidan Oʻzbekiston Respublikasi Davlat tabiatni muhofaza qilish qoʻmitasi boʻysunishiga berilsin.

2. Oʻzbekiston Respublikasi kichik hajmli kemalar boʻyicha davlat inspeksiyasi mustaqil inspeksiya huquqi bilan Oʻzbekiston Respublikasi Davlat tabiatni muhofaza qilish qoʻmitasi huzuridagi Respublika hayvonot va oʻsimlik dunyosini muhofaza qilish va ulardan oqilona foydalanish davlat inspeksiyasi (Davlat biologiya nazorati) tarkibiga kiritilsin.

3. Oʻzbekiston Respublikasi kichik hajmli kemalar boʻyicha davlat inspeksiyasi toʻgʻrisidagi ilova qilinayotgan nizom tasdiqlansin.

4. Oʻzbekiston SSR Ministrlar Sovetining 1984-yil 8-iyundagi 303-son (OʻzSSR QT, № 6, 28-modda) va 1990-yil apreldagi 172-son qarorlari oʻz kuchini yoʻqotgan deb hisoblansin.

Oʻzbekiston Respublikasining Bosh vaziri A. Mutalov

Toshkent sh.,

1993-yil 1-aprel,

167-son

Vazirlar Mahkamasining 1993-yil 1-apreldagi 167-son qarori bilan TASDIQLANGAN

Oʻzbekiston Respublikasi kichik hajmli kemalar boʻyicha davlat inspeksiyasi toʻgʻrisida

NIZOM

1 Oʻzbekiston Respublikasi kichik hajmli kemalar boʻyicha davlat inspeksiyasi mustaqil inspeksiyasi bilan Oʻzbekiston Respublikasi Davlat tabiatni muhofaza qilish qoʻmitasi huzuridagi Respublika hayvonot va oʻsimlik dunyosini muhofaza qilish va ulardan oqilona foydalanish davlat inspeksiyasi tarkibiga kiradi.

2. Suzishning xavfsizligini taʼminlash, huquq-targʻibotni mustahkamlash va atrof tabiiy muhitni muhofaza qilish maqsadida Oʻzbekiston Respublikasi va Qoraqalpogʻiston Respublikasining barcha suv akvatoriyalarida suzish vositalaridan hamda ularning toʻxtash bazalaridan toʻgʻri foydalanilishini nazorat qilish Oʻzbekiston Respublikasi kichik hajmli kemalar boʻyicha davlat inspeksiyasining bosh vazifasi hisoblanadi.

3. Oʻzbekiston Respublikasi kichik hajmli kemalar boʻyicha davlat inspeksiyasi oʻz vazifalarini dvigatelning quvvati va yuk koʻtarishidan qatʼi nazar, davlat, jamoa, xususiy, chet el korxonalari, muassasalari, tashkilotlariga (maxsus topshiriqli harbiy suzish vositalaridan tashqari), shuningdek, fuqarolarga tegishli boʻlgan barcha oʻzi yurar va tirkaladigan kemalar (zemsnaryadlar, katyerlar, motorli, sport, eshkakli, dam beriladigan qayiqlar) ga nisbatan amalga oshiradi.

4. Oʻzbekiston Respublikasi kichik hajmli kemalar boʻyicha davlat inspeksiyasi va uning mansabdor shaxslari oʻz faoliyatlaridagi Oʻzbekiston Respublikasi qonunchiligining oʻzlariga tegishli barcha aktlariga, shuningdek, Qoraqalpogʻiston Respublikasi hududida Qoraqalpogʻiston Respublikasi qonunchiligiga amal qiladilar hamda oʻz ishlarida faoliyati suv havzalarida huquq-tartibotni taʼminlash va atrof tabiiy muhitni muhofaza qilish bilan bogʻliq boʻlgan davlat va jamoat tashkilotlari bilan oʻzaro hamkorlik qiladilar.

5. Oʻzbekiston Respublikasi kichik hajmli kemalar boʻyicha davlat inspeksiyasi:

Oʻzbekiston Respublikasi kichik hajmli kemalar boʻyicha davlat inspeksiyasi boshqarmasi;

Qoraqalpogʻiston Respublikasi va viloyatlarning kichik hajmli kemalar boʻyicha davlat inspeksiyalari;

gʻavvos-texnika nazorati boʻlimlari, uchastkalari, guruhlari, Oʻquv-uslubiyat markazi, roʻyxatga olish va imtihon komissiyalari;

patrul xizmati, texnik koʻriklar oʻtkazish uchun diagnostika stansiyalari va inspeksiyaga yuklatilgan vazifalarni amalga oshirish uchun zarur boʻlgan boshqa boʻlinmalardan iborat tarkibda tashkil etilgan.

Oʻzbekiston Respublikasi kichik hajmli kemalar boʻyicha davlat inspeksiyasi huzurida yuridik va jismoniy shaxslarga har xil xizmatlar koʻrsatish boʻyicha korxonalar va tashkilotlar tashkil etiladi.

6. Oʻzbekiston Respublikasi kichik hajmli kemalar boʻyicha davlat inspeksiyasi oʻziga yuklatilgan vazifalarga muvofiq:

korxonalar, muassasalar, tashkilotlar va fuqarolar tomonidan suzish vositalaridan va ularning toʻxtash bazalaridan foydalanishning belgilangan qoidalariga rioya qilinishi ustidan davlat nazoratini amalga oshiradi, bu qoidalarni hamda suzishning xavfsizligiga va atrof tabiiy muhit muhofazasiga oid boshqa normativlar va talablarning buzilishini aniqlaydi va ularga barham beradi.

tasniflaydi va texnika nazoratini amalga oshiradi, boshlangʻich va yillik tekshiruvlar va maxsus koʻriklar oʻtkazadi;

kemaga bogʻliq ravishda yoʻlovchilar soni, muayyan quvvat va dvigatellar soni, paruslarning yoʻl qoʻyilishi mumkin boʻlgan maydoni, toʻlqinning balandligi, botish, suv usti borti, qutqarish va yongʻinga qarshi vositalar, belgi berish chiroqlari, navigatsiya va boshqa asbob-uskunalar bilan jihozlanganlik boʻyicha majburiy shartlar, meʼyorlar va texnik talablarni belgilaydi.

roʻyxatdan oʻtkazadi va hisob-kitobni yuritadi, bort nomyerlari beradi hamda kema egalari bilan kemalarning nomlarini kelishadi;

kema chiptalari beradi va ularning hisobotini yuritadi;

kema haydovchilari tayyorlash kurslari va maktablarini roʻyxatdan oʻtkazadi, imtihonlar oladi va attestatsiya qiladi, kemalarni boshqarish huquqini beruvchi guvohnoma beradi;

suzish vositalarini, bazalarni va suzish vositalaridan foydalanishni taʼminlovchi boshqa meʼyoriy-texnik hujjatlarni texnikaviy boshlangʻich va yillik tekshiruvlar va maxsus koʻriklardan oʻtkazish hajmini belgilovchi talablar va normativlarni ishlab chiqadi va tasdiqlaydi;

bu talablar va normativlarga barcha korxonalar, muassasalar tashkilotlar va fuqarolar rioya etishlari ustidan nazoratni amalga oshiradi;

suzish vositalari va ularning bazalari bilan bogʻliq avariyalar va hodisalarni belgilangan tartibda hisobga olishni yuritadi, ularning yuz berishi sabablari va shart-sharoitlarini tahlil qiladi, bu sabablar va shart-sharoitlarni bartaraf etish chora-tadbirlarini koʻradi;

suzish xavfsizligi darajasini oshirish boʻyicha takliflar ishlab chiqadi, ularni belgilangan tartibda davlat organlariga kiritadi va roʻyobga chiqishiga koʻmaklashadi;

suzish vositalari, ularning toʻxtash bazalari, gidrologiya inshootlari, kemalar qatnaydigan yoʻllarning texnik holati hamda choʻkkan kemalarni koʻtarib olish ishlarini olib boradi;

suzish vositalari avariyaga uchrashining oldini olish ishlarini nazorat qiladi hamda oʻgʻrincha ovlashga, ovchilik va baliq, ovlash qoidalarini boshqa buzishlarga qarshi kurashda, shuningdek, atrof tabiiy muhitni muhofaza qilishda ishtirok etadi;

suzish vositalaridan foydalanishda ularning xavfsizligini taʼminlashga tegishli boʻlgan texnik reglamentlar yoki standartlar, suzish vositalari va ularning dvigatellarining loyihalari va konstruksiyalari boʻyicha xulosalar beradi, yangi kema texnikasi namunasini sinab koʻrish va uni qabul qilib olishda qatnashadi, suzish bazalari va ularning bazalaridan foydalanish shartlarini hamda ular konstruksiyasidagi kamchiliklarni oʻrganadi, kemalar, asbob-uskunalar va mexanizmlarning mustahkamligini oshirishga oid takliflarni ishlab chiqadi;

Qonunchilik va suzish xavfsizligini tushuntirish va targʻib qilish, suzish vositalaridan toʻgʻri foydalanish va atrof tabiiy muhitni muhofaza qilish ishlarini tashkil etadi, ana shu maqsadlarda ommaviy axborot vositalaridan foydalanadi;

Kemalar va ularning bazalaridan foydalanganlik uchun undiriladigan qonunchilikda belgilangan yigʻimlarning, shuningdek, suv havzalarida va atrof tabiiy muhitni muhofaza qilish borasida huquq-tartibot buzilganligi uchun suzish vositalari egalari tomonidan jarimalar toʻlanishini nazorat qiladi;

suzish vositalarini, ularning toʻxtash joylarini, motorlarni tuzatish-qurilish ishlari bilan shugʻullanadi, shuningdek, tashkilotlar va aholiga oʻz tarkibiy boʻlinmalari orqali boshqa xizmatlar koʻrsatadi.

7. Oʻzbekiston Respublikasi kichik hajmli kemalar boʻyicha davlat inspeksiyasi oʻziga yuklatilgan vazifalar va majburiyatlarni amalga oshirish maqsadida quyidagi huquqlarga ega boʻladi:

suzish vositalaridan dvigatelning quvvati va soniga, paruslar maydoniga, harakat tezligiga koʻra foydalanish rejalarida mahalliy sharoitlarni hisobga olgan holda qoʻshimcha cheklashlar belgilash;

holati ishlatish xavfsizligiga va atrof tabiiy muhit muhofazasiga xavf soluvchi kichik kemalardan, ularning bazalaridan, gidrologiya inshootlaridan, kemalar qatnaydigan yoʻllardan foydalanishni taqiqlash;

kema haydovchilarning suzish vositalaridan foydalanish qoidalarini bilishlarini tekshirish, shuningdek, kemalarni boshqarishga yaroqli ekanliklarini aniqlash uchun ularni tibbiy tekshiruvga yoʻllash;

tashkilotlarga va aholiga koʻrsatilgan barcha xizmatlar uchun preyskurantga muvofiq tegishli haq undirish;

suzish vositalari va ularning bazalaridan foydalanish qoidalarini buzishda aybdor boʻlgan shaxslarni maʼmuriy javobgarlikka tortish.

8. Oʻzbekiston Respublikasi kichik kemalar boʻyicha davlat inspeksiyasining mansabdor shaxslari (davlat inspektorlari, shtatsiz inspektorlar, inspeksiya boshligʻi va uning oʻrinbosari, Qoraqalpogʻiston Respublikasi va viloyatlar inspeksiyalarining boshliqlari) quyidagi huquqlarga ega boʻladilar:

mast holatdagi, boshqarish huquqini beruvchi guvohnomaga ega boʻlmagan, kemani haydash qoidalarini qoʻpol ravishda buzgan shaxslarni kemani boshqarishdan chetlatish, zarurat boʻlganda musodara qilingan kemalar va dvigatellarni kema egalari hisobidan tayanch punktlari bazalariga topshirish;

avariyaga yoʻl qoʻygan yoki kemalardan foydalanish qoidalarini buzgan kema egasi yoki kema haydovchisini vaziyatni aniqlash va yuz bergan voqeani tekshirish uchun voqea yuz bergan joyga yoki inspeksiyaga chaqirish;

roʻyxatdan oʻtish, hisobga olish, texnika nazorati qoidalarini, shuningdek, suzish vositalaridan va ularning toʻxtash bazalaridan foydalanish qoidalarini buzgan shaxslarga belgilangan tartibda bayonnomalar tuzish;

kechiktirish mumkin boʻlmagan hollarda qoidani buzishlarning oldini olish va qoidani buzuvchini ushlash, aziyat chekkanlarni eng yaqin davolash muassasalariga keltirish uchun tashkilotlarga va fuqarolarga tegishli boʻlgan kemalar, transportdan, telefonlardan foydalanish, shuningdek, suzish vositalari va ularning toʻxtash bazalariga , suv oʻrtasida joylashgan dam olish tegralariga hamda tasarrufida suv akvatoriyasi boʻlgan tashkilotlarga kirish.

9. Oʻzbekiston Respublikasi kichik hajmli kemalar boʻyicha davlat inspeksiyasi boshligʻi:

inspeksiyaning butun faoliyatiga rahbarlik qiladi, joylardagi davlat inspeksiyalari toʻgʻrisidagi nizom, tuzilma, shtat jadvali oʻz aylanma mablagʻlari smetasini, koʻrsatiladigan xizmatlarning baholari preyskurantini, maxsus kiyim-bosh berish va uni kiyib yurish tartibi toʻgʻrisidagi nizomni, suzish vositalaridan va ularning toʻxtash joylaridan foydalanish, roʻyxatdan oʻtkazish va texnika nazorati qoidalarini, kema haydovchilarini attestatsiya qilishni tasdiqlaydi ;

yil choraklari balanslari va hisobotlar asosida budjet bilan oʻzaro munosabatlarni oʻzgartirmagan holda oʻz aylanma mablagʻlarining ortiqchasini taqsimlaydi;

Davlat inspeksiyasining davlat inspektorlari toifasiga tegishli boʻlgan lavozimlari roʻyxatini belgilaydi;

shtatsiz inspektorlar toʻgʻrisidagi nizomni va ularning tarkibini koʻrib chiqadi va tasdiqlaydi;

doimiy ishlovchi malaka va imtihon komissiyalarining ish tartibini belgilaydi.

10. Oʻzbekiston Respublikasi kichik hajmli kichik kemalar boʻyicha davlat inspeksiyasi yuridik shaxs hisoblanadi va oʻzini oʻzi qoplash asoslarida faoliyat koʻrsatadi.

Davlat inspeksiyasining daromadlari oʻzining huquqiy majburiyatlariga va unga yuklatilgan vazifalarga muvofiq bajarilgan ishlardan hamda tashkilotlarga va aholiga koʻrsatilgan xizmatlardan tushgan tushumlardan iborat boʻladi. Ularning 10 foizi ishlab chiqarishni rivojlantirish uchun Oʻzbekiston Respublikasi Davlat tabiatni muhofaza qilish qoʻmitasi huzuridagi Respublika hayvonot va oʻsimlik dunyosini muhofaza qilish va ulardan oqilona foydalanish davlat inspeksiyasiga ajratiladi.

11. Oʻzbekiston Respublikasi kichik hajmli kemalar boʻyicha davlat inspeksiyasi oʻz nomi Oʻzbekiston Respublikasining davlat tilida yozilgan gerbli muhrga, vimpel va emblemaga, maxsus kiyim-bosh va tabel qurolga ega boʻladi.

Oʻzbekiston Respublikasi kichik hajmli kemalar boʻyicha davlat inspeksiyasini mablagʻ bilan taʼminlash va uning moddiy-texnika taʼminoti amaldagi qonunchilikka muvofiq amalga oshiriladi.