Oʻzbekiston Respublikasidagi diplomatik va ularga tenglashtirilgan boshqa chet el vakolatxonalarning faoliyat koʻrsatishi uchun zarur shart-sharoitlar yaratish chora-tadbirlari toʻgʻrisida (247-son)

25.05.1993

Oʻzbekiston Respublikasi Vazirlar Mahkamasining

qarori

Oʻzbekiston Respublikasining tashqi aloqalari infrastrukturasini yaratishda oʻzaro mulkiy munosabatlarni tartibga solish, xorijiy davlatlar vakolatxonalari faoliyatini tashkil etish bilan bogʻliq masalalarni puxta hal qilish maqsadida Vazirlar Mahkamasi qaror qiladi:

1. Oʻzbekiston Respublikasi Tashqi ishlar vazirligi huzuridagi Diplomatik servis xizmati diplomatik va ularga tenglashtirilgan boshqa chet el vakolatxonalariga xizmat koʻrsatish boʻyicha yagona buyurtmachi qilib belgilansin. Unga Oʻzbekiston Respublikasidagi diplomatik vakolatxonalarga xizmat koʻrsatuvchi tashkilot va korxonalarning faoliyatini muvofiqlashtirib borish vazifasi yuklatilsin.

2. Diplomatik va ularga tenglashtirilgan boshqa chet el vakolatxonalariga xizmat va uy-joy binolarini ijaraga berish hamda hisobga olish tartibi toʻgʻrisidagi Vaqtinchalik nizom ilovaga muvofiq tasdiqlansin.

3. Oʻzbekiston Respublikasi tashqi ishlar vazirligi va Davlat mulki qoʻmitasiga xorijiy davlatlarda mamlakatning diplomatik va boshqa vakolatxonalarini ochishda Oʻzbekiston Respublikasining mulkiy manfaatlarini ifodalash vakolati berilsin.

4. Oʻzbekiston Respublikasi Tashqi ishlar vazirligi:

Moliya vazirligi, Davlat mulki qoʻmitasi, Davlat qurilish ishlari qoʻmitasi va Toshkent shahar hokimligi bilan birgalikda mutaxassislar guruhini bozor iqtisodiyoti rivojlangan mamlakatlarda qoʻzgʻalmas mulklar bilan aʼmollarni amalga oshirish qoʻzgʻalmas mulk va xizmatlar narxini shakllantirish tartibini, oʻrganish uchun yuborsin hamda 1993-yilning 1-iyuligacha Vazirlar Mahkamasiga takliflar kiritsin;

Oʻzbekiston Respublikasi Sogʻliqni saqlash vazirligi bilan birgalikda diplomatik va ularga tenglashtirilgan boshqa chet el vakolatxonalari xodimlariga tibbiy xizmat koʻrsatish boʻyicha xoʻjalik hisobidagi, ixtisoslashtirilgan poliklinika va statsionar ochish masalasini tibbiy sugʻurta tizimini qoʻllangan holda bir oy muddat ichida ishlab chiqsin;

“Oʻzbeksavdo” uyushmasi, Toshkent shahar hokimligi bilan birgalikda diplomatik va ularga tenglashtirilgan boshqa chet el vakolatxonalariga oziq-ovqat va sanoat mollarini valyutaga sotadigan ixtisoslashtirilgan magazin ochish masalasini bir oy muddat ichida hal etsin.

5. “Oʻzshartnomasavdo”, “Oʻzbeksavdo” uyushmasi va Oʻzbekbirlashuv diplomatik vakolatxonalar ehtiyojlari uchun Oʻzbekiston Respublikasi Tashqi ishlar vazirligi huzuridagi Diplomatik servis xizmati talabnomalari boʻyicha zarur asbob-uskunalar va tovarlar ajratishni birinchi navbatda taʼminlasinlar.

6. Moliya vazirligi, Davlat soliq bosh boshqarmasi Toshkent shahar hokimligi va Tashqi ishlar vazirligi bilan birgalikda diplomatik va ularga tenglashtirilgan chet el vakolatxonalariga uy-joy binolarini ijaraga beradigan Oʻzbekiston Respublikasi fuqarolari daromadidan soliqlar olish tartibini ikki hafta muddat ichida ishlab chiqsinlar va tasdiqlasinlar.

7. Ichki ishlar vazirligi Tashqi ishlar vazirligi va Toshkent shahar hokimligi bilan birgalikda xususiy uy-joy sektorida yashaydigan diplomatik va ularga tenglashtirilgan boshqa chet el vakolatxonalari xodimlarini roʻyxatdan oʻtkazish tartibini, shuningdek, avtotransportni rasmiylashtirish tartibini bir oy muddat ichida ishlab chiqsin.

8. Oʻzbekiston Respublikasi Tashqi ishlar vazirligi huzuridagi Diplomatik servis xizmati Respublika valyuta jamgʻarmasiga chet el valyutasida tushadigan tushumlardan soliq toʻlashdan 1993-1994-yillarda ozod qilinsin. Diplomatik servis xizmati valyuta tushumlarini elchixona binolarini saqlash xarajatlarini oʻzaro toʻlash toʻgʻrisidagi hukumatlararo bitimlar boʻyicha oʻzaro hisob-kitoblarni tashkil etishga hamda Oʻzbekiston Respublikasidagi diplomatik korpusga xizmat koʻrsatish shart-sharoitlarini takomillashtirishga yoʻnaltirsin.

9. Oʻzbekiston Respublikasi Moliya vazirligi, Davlat bojxona qoʻmitasi 1993-1994-yillarda Diplomatik servis xizmatini keyinchalik diplomatik vakolatxonalarga sotish uchun tashib keltiriladigan yuk va tovarlarning barcha turlarini bojxona bojlaridan ozod qilsin.

10. Ushbu qarorning bajarilishini nazorat qilish Bosh vazir oʻrinbosari oʻrtoq K. N. Toʻlaganov zimmasiga yuklatilsin.

Oʻzbekiston Respublikasi Hukumati qarorlariga kiritilayotgan ilova qilinayotgan oʻzgarishlar tasdiqlansin.

Vazirlar Mahkamasining Raisi I. KARIMOV

Toshkent sh.,

1993-yil 25-may,

247-son

Vazirlar Mahkamasining 1993-yil 25-maydagi 247-son qarori bilan TASDIQLANGAN

Diplomatik va ularga tenglashtirilgan boshqa chet el vakolatxonalariga xizmat va uy-joy binolarini ijaraga berish hamda hisobga olish tartibi toʻgʻrisida

VAQTINChALIK NIZOM

I. Umumiy qoidalar

1. Xizmat binolariga Oʻzbekiston Respublikasi Hukumati, shuningdek, Toshkent shahar hokimligi tomonidan yangi ochilayotgan diplomatik va ularga tenglashtirilgan boshqa chet el vakolatxonalarini (bundan keyin matnda dipvakolatxonalar deb ataladi) joylashtirish uchun ajratilgan binolar kiradi.

2. Uy-joy binolariga Oʻzbekiston Respublikasi Hukumati hamda Toshkent shahar hokimligi tomonidan dipvakolatxonalar boshliqlari va xodimlarining yashashi uchun ajratilgan, shuningdek, ana shu maqsadlar uchun alohida shaxslardan ijaraga olingan uy va kvartiralar kiradi.

3. Dipvakolatxonalar va ularning xodimlarini joylashtirish uchun ajratiladigan xizmat va uy-joy binolari Diplomatik servis xizmati (bundan keyin matnda Dipservis xizmati deb ataladi), shuningdek, mahalliy hokimiyat organlari tomonidan hisobga olinadi.

4. Dipvakolatxonalar va ularning xodimlarini joylashtirish uchun ajratilgan binolarni ijaraga berish huquqi Dipservis xizmatiga beriladi.

Dipservis xizmati dipvakolatxonalar va ularning xodimlari tomonidan alohida shaxslardan binolarni ijaraga olishda vositachilik qiladi.

II. Binolarni ijaraga berish tartibi

5. Dipvakolatxonalar zarur binoning foydalanish maqsadini, maydonini, xonalar sonini, joylashgan oʻrnini va shart-sharoitlarini koʻrsatgan holda Dipservis xizmatiga talabnoma berishadi.

Dipservis xizmati mazkur talabnoma asosida ijaraga berish uchun binolarning mavjud variantlarini tanlaydi va taqdim etadi.

Tomonlar oʻrtasida ijara yuzasidan kelishuvga erishilgan taqdirda Dipservis xizmati shahar hokimligini bundan xabardor qiladi.

6. Doimiy bino ajratilgungacha dipvakolatxonalar Dipservis xizmati tomonidan maʼmuriy binolarga va mehmonxonalarga joylashtirilishi mumkin.

III. Ijara shartnomasi

7. Ijara shartnomasi Dipservis xizmati bilan dipvakolatxona oʻrtasidagi munosabatlarni tartibga solib turuvchi asosiy hujjat hisoblanadi.

8. Binolarni ijaraga olish shartnomasida quyidagilar koʻzda tutilgan boʻlishi kerak:

ijaraga berilayotgan binoning tarkibi, maydoni va qiymati;

ijara haqining, shuningdek, boshqa toʻlovlarning miqdori;

ijara muddatlari;

tomonlarning xonalarni, binoni taʼmirlash va undan joriy foydalanish majburiyatlarini taqsimlash;

ijara haqini va boshqa toʻlovlarni toʻlash muddatlari;

dipvakolatxona tomonidan kommunal xizmatlar haqini toʻlash hamda xonalardan, binodan va yondosh hududlardan foydalanish shartlari;

ijaraga olingan xonalar va binoga yetkazilgan zarar boʻyicha ijarachining javobgarligi;

tomonlarning shartnoma shartlarini bajarmaganligi uchun sanksiyalar;

boshqa zarur shart-sharoitlar.

Ijara shartnomasini muddatidan oldin bekor qilish qonunda belgilangan tartibda amalga oshiriladi.

9. Binolarni ijaraga topshirish ijarachiga ularni oʻz mulki qilib olish huquqini bermaydi.

IV. Ijara haqi

10. Ijara haqi boʻyicha xarajatlarni hukumatlararo bitimlar asosida qoplash:

toʻlovlarni oʻzaro hisobga olish yoʻli bilan;

birgalikda badalsiz amalga oshiriladi.

11. Xizmat va uy-joy binolari uchun ijara haqi miqdori shartnoma asosida belgilanadi.

12. Ijara haqi stavkasini Dipservis xizmati Oʻzbekiston Respublikasi Moliya vazirligi bilan kelishgan holda belgilaydi.

Ijara haqining bazaviy stavkasi qaror topgan jahon raqobat narxlari hamda Oʻzbekiston Respublikasida oʻzining vakolatxonasini ochgan mamlakat poytaxtidagi qoʻzgʻalmas mulkning bozor qiymatiga tuzatish koeffitsiyenti asosida belgilanadi.

Dipvakolatxonalar, I, II va III zonalarda joylashtirilganda ijara haqi tegishli ravishda 30, 20 va 10 foizga koʻpayadi.

Toʻlovlar erkin almashtiriladigan istalgan valyutada amalga oshiriladi.

V. Binolarni topshirish va qabul qilib olish tartibi

13. Binoni tuzilgan shartnoma boʻyicha topshirish va qabul qilib olish tomonlarning vakolatli vakillari ishtirokida, ikki tomonlama dalolatnoma tuzgan holda amalga oshiriladi. Dalolatnomada quyidagilar koʻrsatiladi:

dalolatnomani tuzish joyi va sanasi;

qatnashchilarga tomonlarning manfaatlarini ifodalash huquqini beruvchi hujjatlarning nomi va rekvizitlari;

binolarni topshirish va qabul qilib olishga asos boʻladigan ijara shartnomalarining nomeri va imzolangan sanasi;

berilayotgan binolarning texnikaviy holati;

aniqlangan nosozliklarni bartaraf etish muddatlari va tartibi;

vakillarning tomonlar muhri bilan tasdiqlangan imzolari.

14. Topshirish va qabul qilib olish dalolatnomasi ikki nusxada, har qaysi tomon uchun bittadan tuziladi.

Vazirlar Mahkamasining 1993-yil 25-maydagi 247-son qarori bilan TASDIQLANGAN

Oʻzbekiston Respublikasi Hukumati qarorlariga kiritiladigan

OʻZGARIShLAR

1. Oʻzbekiston SSR Ministrlar Sovetining “Diplomatik va boshqa chet el vakolatxonalariga xizmat koʻrsatishni yaxshilash chora-tadbirlari toʻgʻrisida” 1988-yil 13-sentabrdagi 325-son qaroridan 11-bandning ikkinchi xatboshi, 12-band, 17-bandning oʻninchi xatboshi chiqarib tashlansin.

2. Oʻzbekiston SSR Ministrlar Sovetining “Oʻzbekiston SSRda chet el firmalari, banklari va tashkilotlarining vakolatxonalarini ochish hamda ularning faoliyati toʻgʻrisida” 1989-yil 28-dekabrdagi 442-son qarorining 4-bandi quyidagi tahrirda bayon qilinsin:

“4. Diplomatik va ularga tenglashtirilgan boshqa chet el vakolatxonalariga xizmat koʻrsatish Oʻzbekiston Respublikasi Tashqi ishlar vazirligi huzuridagi Diplomatik servis xizmati tomonidan amalga oshiriladi. Mulkchilikning turli shakllaridagi korxonalarga Diplomatik servis xizmati bilan kelishgan holda chet el firmalariga, vakolatxonalariga, banklarga va xalqaro tashkilotlarga shartnomalar asosida xizmat koʻrsatishga ruxsat etilsin.”.

3. Oʻzbekiston Respublikasi Prezidentining “Toshkent shahrida chet el diplomatik vakolatxonalar uchun binolar qurish va ajratish, ularning faoliyatini zarur shart-sharoitlar bilan taʼminlash toʻgʻrisida” 1992-yil 11-yanvardagi farmoyishining 3-bandi quyidagi tahrirda bayon qilinsin:

“3. Oʻzbekiston Respublikasi Tashqi ishlar vazirligi huzuridagi Diplomatik servis xizmati diplomatik va ularga tenglashtirilgan boshqa chet el vakolatxonalari uchun moʻljallangan obyektlar hamda uy-joylarni qurish va qayta barpo etish boʻyicha buyurtmachi etib belgilansin.”.