Ijodkor yoshlarning “Isteʼdod” respublika jamgʻarmasi faoliyatini tashkil etish chora-tadbirlari toʻgʻrisida (238-son)

19.05.1993

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Ijodkor yoshlarning “Isteʼdod” respublika jamgʻarmasini tuzish haqida” 1993-yil 4-maydagi Farmonini bajarish yuzasidan Vazirlar Mahkamasi qaror qiladi:

1. Belgilab qoʻyilsinki, ijodkor yoshlarning “Isteʼdod” respublika jamgʻarmasining yuqori organi taʼsis konferensiyasi hisoblanadi, u Ustavni tasdiqlaydi, jamgʻarmaning boshqaruvini hamda taftish komissiyasini saylaydi, uning tuzilmasini va yagona tarif setkasiga muvofiq xodimlarning mehnatiga haq toʻlash shartlarini belgilaydi.

Boshqaruv apparatini saqlash bilan bogʻliq xarajatlar “Isteʼdod” jamgʻarmasi mablagʻlari hisobidan amalga oshiriladi.

Boshqaruv apparatining ilova qilinayotgan tuzilmasiga rozilik bildirilsin.

“Isteʼdod” jamgʻarmasiga, ehtiyoj boʻlgan taqdirda, Qoraqalpogʻiston Respublikasida va viloyatlarda respublika jamgʻarmasi mablagʻlari hisobiga oʻz boʻlinmalarini ochishga ruxsat etilsin.

2. Vazirlar Mahkamasining ijtimoiy masalalar, fan va madaniyat majmui (oʻrtoq M. Qoraboyev) 15 kun muddatda ijodkor yoshlarning “Isteʼdod” respublika jamgʻarmasining taʼsis konferensiyasini oʻtkazsin.

3. Oʻzbekiston Respublikasi Adliya vazirligi ijodkor yoshlarning “Isteʼdod” respublika jamgʻarmasi Ustavini belgilangan tartibda roʻyxatga olsin.

4. Toshkent shahar hokimligi bir oy muddatda ijodkor yoshlarning “Isteʼdod” respublika jamgʻarmasi apparatini joylashtirish uchun xizmat xonalari ajratsin.

Qoraqalpogʻiston Respublikasi Vazirlar Kengashi, viloyatlar hokimliklari, viloyatlar boʻlinmalari ochilishiga qarab, jamgʻarma hududiy boʻlinmalarining normal faoliyatini taʼminlash uchun zarur sharoitlar yaratsinlar.

5. “Oʻzshartnomasavdo” davlat uyushmasi hamda respublikaning boshqa ixtisoslashtirilgan savdo-taʼminot tashkilotlari respublika jamgʻarmasining buyurtmanomalari boʻyicha 1993-yilning I choragida inventar, mebel hamda texnika vositalari ajratishni nazarda tutsinlar.

6. “Toshshahartranskorxona” davlat uyushmasi respublika jamgʻarma boshqaruvini shartnoma asosida xizmat avtotransport bilan, Oʻzbekiston Respublikasi Aloqa vazirligi esa shahar telefon aloqasi bilan taʼminlasin.

7. Oʻzbekiston Respublikasi vazirliklari, davlat qoʻmitalari, konsernlar, korxonalar, xoʻjaliklar va tashkilotlar ijodkor yoshlarning “Isteʼdod” respublika jamgʻarmasi faoliyatiga moliyaviy va amaliy yordam koʻrsatsinlar.

8. Respublika aksionerlik-tijorat sanoat-qurilish banki va Oʻzbekiston Respublikasi Tashqi iqtisodiy faoliyat milliy banki respublika va xorijiy davlatlarning fuqarolari korxonalari, muassasalari va tashkilotlari homiylik badallarini oʻtkazishlari uchun maxsus soʻmli va valyuta hisoblarini ochsinlar.

9. Oʻzbekiston Davlat teleradioeshittirish kompaniyasi, gazeta va jurnallar tahririyatlari Oʻzbekiston Respublikasi yosh fuqarolari shaxsiyatini shakllantirishda maʼnaviy qadriyatlarning muhim rolini keng yoritsinlar.

10. Ushbu qarorning bajarilishini nazorat qilish Bosh vazirning oʻrinbosari oʻrtoq M.Q. Qoraboyev zimmasiga yuklatilsin.

Vazirlar Mahkamasining Raisi I. KARIMOV

Toshkent sh.,

1993-yil 19-may,

238-son

Vazirlar Mahkamasining 1993-yil 19-maydagi 238-son qaroriga ILOVA

Ijodkor yoshlarining “Isteʼdod” respublika jamgʻarmasi apparatining namunaviy tuzilmasi