Oʻzbekiston Respublikasi qishloq xoʻjaligi vaziri J. Xodjayevning “Oʻzbekiston Respublikasi qishloq xoʻjaligini rivojlantirishning 2020-2030-yillarga moʻljallangan strategiyasi doirasida amalga oshirilayotgan ishlar toʻgʻrisida”gi axboroti eshitilishini tashkil qilish haqida (417-IV-son)
05.08.2020
Oʻzbekiston Respublikasi Oliy Majlisi Qonunchilik palatasining
Qarori
Oʻzbekiston Respublikasi qishloq xoʻjaligi vazirining Oʻzbekiston Respublikasi qishloq xoʻjaligini rivojlantirishning 2020 — 2030-yillarga moʻljallangan strategiyasini (keyingi oʻrinlarda — Strategiya) amalga oshirish boʻyicha birinchi yarim yillikda bajarilgan ishlar haqidagi axborotini eshitish masalasini muhokama qilib, Oʻzbekiston Respublikasi Oliy Majlisi Qonunchilik palatasi taʼkidlaydiki, joriy yilning 5-avgust kuni oʻtkazilgan “hukumat soati”da deputatlarning savollariga javob berish davomida Strategiyani amalga oshirishga qaratilgan ishlar haqida atroflicha toʻxtalib oʻtdi.
Strategiyani amalga oshirish doirasida respublika hududlarini bosqichma-bosqich qishloq xoʻjaligi mahsulotlarining muayyan turlarini yetishtirishga ixtisoslashtirish, mahsulot ishlab chiqaruvchilarning moddiy manfaatdorligini oshirish maqsadida dastlab Jizzax viloyatining jami 116,3 ming gektar qoʻshimcha yer maydonlarini qishloq xoʻjaligi mahsulotlari yetishtirishga ixtisoslashtirish ishlari boshlab yuborildi.
Deputatlar taʼkidlaganidek, Strategiyada belgilangan vazifalarni 2020-yilda amalga oshirish boʻyicha chora-tadbirlar Dasturining ijrosini taʼminlash boʻyicha olib borilayotgan ishlar aholining oziq-ovqat xavfsizligini taʼminlash, soha boshqaruvida davlat ishtirokini kamaytirish va investitsiyaviy jozibadorlikni oshirish, qulay agrobiznes muhitini yaratish, qishloq xoʻjaligida ilm-fan, axborot xizmatlari tizimini rivojlantirishda muhim ahamiyat kasb etmoqda.
Qayd etilganidek, pandemiya sharoitida aholining sifatli va arzon mahsulotlarga boʻlgan ehtiyojini qondirish, qolaversa, mahsulotlar eksporti barqarorligini taʼminlash boʻyicha qator ishlar amalga oshirilmoqda. Xususan, oʻtgan davrda 923,2 mlrd. soʻmlik investitsiya mablagʻlari hisobiga 9 ta agrologistika markazi ishga tushirildi. Joriy yilning birinchi yarim yilligida 481,2 mln. dollar qiymatdagi 761,6 ming tonna meva-sabzavot mahsulotlari eksport qilindi.
Yuqoridagilardan kelib chiqib, shuningdek siyosiy partiyalar fraksiyalarining takliflarini inobatga olgan holda Oʻzbekiston Respublikasi Oliy Majlisi Qonunchilik palatasi qaror qiladi:
1. Oʻzbekiston Respublikasi qishloq xoʻjaligi vaziri J. Xodjayevning “Oʻzbekiston Respublikasi qishloq xoʻjaligini rivojlantirishning 2020 — 2030-yillarga moʻljallangan strategiyasida belgilangan vazifalarni 2020-yilda amalga oshirishga oid chora-tadbirlar dasturining ijrosi boʻyicha amalga oshirilayotgan ishlar toʻgʻrisida”gi axborotini joriy yilning toʻqqiz oylik yakunlariga koʻra eshitish taklifi qoʻllab-quvvatlansin.
2. Oʻzbekiston Respublikasi Oliy Majlisi Qonunchilik palatasining Agrar va suv xoʻjaligi masalalari qoʻmitasi (R. Mamutov):
Oʻzbekiston Respublikasi qishloq xoʻjaligini rivojlantirishning 2020 — 2030-yillarga moʻljallangan strategiyasida belgilangan vazifalarni 2020-yilda amalga oshirish boʻyicha chora-tadbirlar Dasturida belgilangan tadbirlarning amalga oshirilishi holatini doimiy monitoring qilib borsin;
Oʻzbekiston Respublikasi qishloq xoʻjaligi vazirining joriy yil toʻqqiz oylik yakunlari boʻyicha Oʻzbekiston Respublikasi qishloq xoʻjaligini rivojlantirishning 2020 — 2030-yillarga moʻljallangan Strategiyasini amalga oshirish boʻyicha bajarilgan ishlar yuzasidan axborotini eshitishni oʻz vaqtida va samarali tashkil etish choralarini koʻrsin.
3. Ushbu Qarorning ijrosini nazorat qilish Oʻzbekiston Respublikasi Oliy Majlisi Qonunchilik palatasi Spikerining oʻrinbosari A. Xaitov zimmasiga yuklansin.
4. Ushbu Qaror qabul qilingan kundan eʼtiboran kuchga kiradi.
Oʻzbekiston Respublikasi Oliy Majlisi Qonunchilik palatasining Spikeri N. ISMOILOV
Toshkent sh.,
2020-yil 5-avgust,
417-IV-son