Oʻzbekiston Respublikasining 2001-yilga moʻljallangan davlat budjeti toʻgʻrisida (157-II-son)

14.12.2000

Oʻzbekiston Respublikasi Oliy Majlisining

Qarori

Oʻzbekiston Respublikasi Vazirlar Mahkamasi tomonidan taqdim etilgan, muhokama davomida Oliy Majlis deputatlari bildirgan taklif va mulohazalarni hisobga olgan holda qoʻshimcha ravishda ishlab chiqilgan Oʻzbekiston Respublikasining 2001-yilga moʻljallangan Davlat budjeti loyihasini koʻrib chiqib, Oʻzbekiston Respublikasi Oliy Majlisi qaror qiladi:

1. Oʻzbekiston Respublikasining 2001-yilga moʻljallangan Davlat budjeti budjet taqchilligining yuqori darajasi (davlat maqsadli fondlarisiz) yalpi ichki mahsulot hajmiga nisbatan 1,5 foiz miqdorida belgilangan holda maʼqullansin.

2. Oʻzbekiston Respublikasi Vazirlar Mahkamasi:

kadrlar tayyorlash, sogʻliqni saqlash tizimini isloh qilish va mamlakat xavfsizligini taʼminlash dasturlarini ustuvor tarzda moliyalashtirishga alohida eʼtibor qaratgan holda makroiqtisodiy va moliyaviy barqarorlik yanada mustahkamlanishini, faol investitsiya siyosati oʻtkazilishini, aholini ijtimoiy himoya qilish kuchaytirilishini taʼminlasin;

davlat budjetining taqchilligini qoplash uchun Oʻzbekiston Respublikasi Markaziy bankining kreditlari, davlat qimmatli qogʻozlarini joylashtirishdan va davlat mulkini xususiylashtirishdan olinadigan daromadlar jalb etilishini nazarda tutsin.

3. Mahalliy davlat hokimiyati organlari budjetga toʻlovlar toʻliq tushishini, xarajatlar mahalliy budjetlardan oʻz vaqtida moliyalashtirilishini va davlat mablagʻlaridan maqsadga muvofiq foydalanilishi ustidan qattiq nazorat qilinishini taʼminlasinlar.

4. Oʻzbekiston Respublikasining Markaziy banki 2001-yilda Davlat budjetining taqchilligi yalpi ichki mahsulot hajmiga nisbatan 0,5 foiz doirasida qoplanishini nazarda tutsin.

Oʻzbekiston Respublikasi Oliy Majlisining Raisi E. XALILOV

Toshkent sh.,

2000-yil 14-dekabr,

157-II-son