Fuqarolarning oʻzini oʻzi boshqarish organlari uchun kadrlar tayyorlash tizimini takomillashtirish chora-tadbirlari toʻgʻrisida (3-son)

08.01.2021

Oʻzbekiston Respublikasi Vazirlar Mahkamasining

qarori

Fuqarolarning oʻzini oʻzi boshqarish organlarini yuqori malakali mutaxassislar bilan toʻldirish, ushbu sohaning joylarda oliy maʼlumotli kadrlarga boʻlgan ehtiyojini qondirish va ularni tayyorlash tizimini yanada takomillashtirish maqsadida Vazirlar Mahkamasi qaror qiladi:

1. Oʻzbekiston Respublikasi Mahalla va oilani qoʻllab-quvvatlash vazirligi hamda Oliy va oʻrta maxsus taʼlim vazirligining 2021/2022 oʻquv yilidan boshlab pedagogika va moliya-iqtisod sohalaridagi oliy taʼlim muassasalarida “5520100 — Ijtimoiy ish (faoliyatning turli sohalari boʻyicha)” bakalavriat taʼlim yoʻnalishi boʻyicha fuqarolarning oʻzini oʻzi boshqarish organlari va mahalla xotin-qizlar faoli lavozimi uchun sirtqi taʼlim shaklida kadrlar tayyorlash tizimini joriy etish toʻgʻrisidagi taklifi maʼqullansin.

2. Oʻzbekiston Respublikasi Iqtisodiy taraqqiyot va kambagʻallikni qisqartirish vazirligi 2021/2022 oʻquv yili va undan keyingi oʻquv yillarida Oʻzbekiston Respublikasi oliy taʼlim muassasalari bakalavriatining sirtqi taʼlim shakli boʻyicha davlat buyurtmasi asosida oʻqishga qabul qilish parametrlarini shakllantirishda pedagogika va moliya-iqtisod sohalaridagi oliy taʼlim muassasalarida mazkur qarorning 1-bandida koʻrsatilgan bakalavriat taʼlim yoʻnalishi boʻyicha fuqarolarning oʻzini oʻzi boshqarish organlari va mahalla xotin-qizlar faoli lavozimi uchun sirtqi taʼlim shakliga qoʻshimcha qabul koʻrsatkichlarini nazarda tutsin.

3. Oʻzbekiston Respublikasi Mahalla va nuroniylarni qoʻllab-quvvatlash vazirligi, Oila va xotin-qizlar qoʻmitasi Oliy va oʻrta maxsus taʼlim vazirligi hamda Moliya vazirligi bilan birgalikda 2021-yil 1-martga qadar tegishincha fuqarolarning oʻzini oʻzi boshqarish organlarida va mahalla xotin-qizlar faoli lavozimlari uchun kadrlarga boʻlgan joriy va istiqboldagi ehtiyojni toʻliq tahlil qilgan holda 2021/2022 oʻquv yilida Oʻzbekiston Respublikasi oliy taʼlim muassasalari bakalavriatining sirtqi taʼlim shakli boʻyicha davlat buyurtmasi asosida oʻqishga qabul qilish parametrlariga kiritish uchun, keyinchalik har yili 1-martga qadar asoslantirilgan takliflarni Oʻzbekiston Respublikasi Iqtisodiy taraqqiyot va kambagʻallikni qisqartirish vazirligiga taqdim etsin.

4. Belgilab qoʻyilsinki, mazkur qaror asosida joriy etilayotgan fuqarolarning oʻzini oʻzi boshqarish organlari va mahalla xotin-qizlar faoli lavozimi uchun sirtqi taʼlim shakli doirasida:

oʻqitish toʻlov-kontrakt asosida tashkil etiladi;

kadrlar tayyorlash boʻyicha malaka talablari, oʻquv rejalari, fan dasturlari hamda oʻquv va oʻquv-metodik adabiyotlarni ishlab chiqish uchun Mirzo Ulugʻbek nomidagi Oʻzbekiston Milliy universiteti tayanch oliy taʼlim muassasasi hisoblanadi;

tegishincha Oʻzbekiston Respublikasi Mahalla va nuroniylarni qoʻllab-quvvatlash vazirligi, Oila va xotin-qizlar qoʻmitasi tomonidan berilgan tavsiyanomaga ega boʻlgan hamda kirish imtihonlaridan muvaffaqiyatli oʻtgan fuqarolarning oʻzini oʻzi boshqarish organlari xodimlari va mahalla xotin-qizlar faollari belgilangan tartibda talabalikka tavsiya etiladi;

tavsiyanoma berish ushbu qaror talablarini inobatga olgan holda Vazirlar Mahkamasining 2020-yil 23-iyundagi 402-son qarori bilan tasdiqlangan Oliy taʼlim muassasalariga qoʻshimcha davlat granti asosidagi qabul koʻrsatkichlari doirasida xotin-qizlarga tanlovda ishtirok etish uchun tavsiyanoma berish va ularni oʻqishga qabul qilishni tashkil etish tartibi toʻgʻrisidagi nizomga muvofiq amalga oshiriladi;

tavsiyanoma asosida oʻqiyotgan talabalar oʻqishini boshqa bakalavriat taʼlim yoʻnalishiga koʻchirishga ruxsat berilmaydi.

5. Fuqarolarning oʻzini oʻzi boshqarish organlari xodimlariga va mahalla xotin-qizlar faollariga tavsiyanomalar berish tegishincha Oʻzbekiston Respublikasi Mahalla va nuroniylarni qoʻllab-quvvatlash vazirligi hamda Oila va xotin-qizlar qoʻmitasi tomonidan quyidagi mezonlar asosida amalga oshiriladi:

egallab turgan lavozimida soʻnggi bir yil davomida faoliyat yuritayotganligi;

mahalla tizimida kamida uch yillik ish stajiga ega boʻlganligi;

faoliyat yuritayotgan fuqarolar yigʻini va xotin-qizlar faolining reyting koʻrsatkichi boʻyicha “namunali” deb topilganligi;

tegishincha viloyat, tuman (shahar) mahalla va nuroniylarni qoʻllab-quvvatlash hamda oila va xotin-qizlar boshqarmalari, boʻlimlari tomonidan ijobiy tavsiflanganligi;

xalq deputatlari tuman (shahar) kengashlari tomonidan ish faoliyati ijobiy deb baholanganligi;

intizomiy jazo chorasi qoʻllanilmaganligi.

6. Oʻzbekiston Respublikasi Oliy va oʻrta maxsus taʼlim vazirligi, Mahalla va oilani qoʻllab-quvvatlash vazirligi 2021-yil 1-iyunga qadar:

pedagogika va moliya-iqtisod sohalaridagi oliy taʼlim muassasalarida bakalavriat taʼlim yoʻnalishi boʻyicha oʻquv reja va fan dasturlarini fuqarolarning oʻzini oʻzi boshqarish organlarida ish yuritishni tashkil etishni hisobga olgan holda qayta koʻrib chiqish, shuningdek, ularni tegishli fanlar boʻyicha zarur oʻquv adabiyotlari bilan taʼminlash;

pedagogika va moliya-iqtisod sohalaridagi oliy taʼlim muassasalarining taʼlim jarayoniga tegishli soha yoʻnalishlarida yuqori amaliy ish tajribasiga ega boʻlgan amaliyotchi xodimlarni, shu jumladan, xorijiy oliy taʼlim va ilmiy muassasalari bilan hamkorlik doirasida xorijiy professor-oʻqituvchilar va mutaxassislarni shartnoma asosida jalb etish choralarini koʻrsin.

7. Oʻzbekiston Respublikasi Bandlik va mehnat munosabatlari vazirligi Mahalla va oilani qoʻllab-quvvatlash vazirligi bilan birgalikda ikki oy muddatda Xizmatchilarning asosiy lavozimlari va ishchilar kasblari klassifikatorini fuqarolarning oʻzini oʻzi boshqarish organlari xodimlari uchun oliy maʼlumot zarur boʻlgan lavozimlar roʻyxatini qayta koʻrib chiqsin.

8. Oʻzbekiston Respublikasi Mahalla va oilani qoʻllab-quvvatlash vazirligi bir oy muddatda:

fuqarolarning oʻzini oʻzi boshqarish organlari uchun sirtqi taʼlim shaklida oʻqishga qabul qilish uchun tavsiyanoma shaklini tasdiqlasin;

manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni ushbu qarorga muvofiqlashtirsin.

9. Mazkur qarorning bajarilishini nazorat qilish Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari, Oʻzbekiston Respublikasi mahalla va nuroniylarni qoʻllab-quvvatlash vaziri v.b. T. Xudayberganov, Oila va xotin-qizlar davlat qoʻmitasi raisi Z.B. Maxkamova hamda oliy va oʻrta maxsus taʼlim vaziri A.H. Toshqulov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2021-yil 8-yanvar,

3-son