Amir Temur haykalini yaratish toʻgʻrisida (322-son)

29.06.1993

Oʻzbekiston Respublikasi Vazirlar Mahkamasining

qarori

Jahon tarixida chuqur iz qoldirgan buyuk davlatning asoschisi, Sharqning ulugʻ sarkardasi, ilm-fan tashkilotchisi va homiysi, milliy madaniyat va meʼmorchilik sanʼatini rivojlantirishga ulkan hissa qoʻshgan shavkatli bobokalonimiz sohibqiron Amir Temur xotirasini abadiylashtirish maqsadida, respublika jamoatchiligi, ijodiy tashkilotlar, olimlar, yozuvchilar va ziyolilarning xohish-istaklarini hisobga olib Vazirlar Mahkamasi qaror qiladi:

1. Oʻzbekiston Respublikasi mustaqilligining ikki yilligi munosabati bilan vatanimiz poytaxti Toshkent shahrida Amir Temur haykali oʻrnatilsin.

2. Amir Temur haykalini yaratish boʻyicha ijodkorlar guruhini oʻz ichiga olgan tashkiliy qoʻmita tarkibi ilovaga* muvofiq tasdiqlansin.

* Ilova berilmaydi.

3. Yodgorlik majmuini loyihalash, yaratish va qurib bitkazish bilan bogʻliq barcha ishlarni shu yilning 25-avgustigacha toʻla tugallash taʼminlansin.

4. Toshkent shahar hokimligining sobiq inqilob xiyoboniga Amir Temur nomini berish hamda shu xiyobonni yodgorlik majmui mohiyatiga muvofiq ravishda taʼmirlash va tiklash haqidagi taklifi qabul qilinsin.

5. Yodgorlik majmuini bunyod etish bilan bogʻliq asosiy sarf-tuzishlar tashkiliy qoʻmita taklifi asosida Vazirlar Mahkamasining zaxira jamgʻarmasidan ajratilsin. Samarqand, Qashqadaryo viloyatlari va Toshkent shahar hokimliklari, “Navroʻz”, Sharof Rashidov jamgʻarmalari, boshqa tashkilotlar, idoralar, ayrim fuqarolarning yodgorlik majmuini tiklashda oʻz mablagʻlari bilan ishtirok etish haqidagi takliflari eʼtiborga olinsin.

6. Mazkur qarorning bajarilishini nazorat qilish Bosh vazirning oʻrinbosarlari N. Qoraboyev va K. Toʻlaganov hamda Toshkent shahar hokimi A. Fozilbekov zimmasiga yuklatilsin.

Vazirlar Mahkamasining Raisi I. KARIMOV

Toshkent sh.,

1993-yil 29-iyun,

322-son