1993 — 1995-yillarda va 2000-yilgacha boʻlgan davrda Oʻrta Osiyo temir yoʻlini elektrlashtirishning bosh dasturi toʻgʻrisida (304-son)

23.06.1993

Oʻzbekiston Respublikasi Vazirlar Mahkamasining

qarori

Respublika temir yoʻl transporti ishi samaradorligini oshirish, Oʻrta Osiyo temir yoʻlining barqaror ishlashini taʼminlashning muhim omili sifatida elektrlashtirishni jadallashtirish respublika xalq xoʻjaligining yuk tashish xarajatlarini kamaytirish, temir yoʻl transportining tabiiy muhitga zararli taʼsirini ozaytirish maqsadida Vazirlar Mahkamasi qaror qiladi:

1. Oʻrta Osiyo temir yoʻli bosh yoʻnalishi uchastkalaridagi harakatning barcha turlarini elektr kuchi bilan tortishga oʻtkazish dasturi qurilishning bosqichlari hamda uni boshlash va tugatish muddatlari boʻyicha 1-ilovaga muvofiq tasdiqlansin.

Oʻrta Osiyo temir yoʻlini elektrlashtirish bosh rejasining amalga oshirilishi respublikaning davlat maqsadli dasturi deb hisoblansin.

2. Oʻrta Osiyo Temir yoʻl boshqarmasi — elektrlashtirishning bosh buyurtmachisi, Oʻzbekiston Davlat transport qurilish korxonalari uyushmasi bosh pudratchi etib belgilansin.

3. “Oʻzistiqbolstat” davlat qoʻmitasi, Oʻzbekiston Respublikasi Moliya vazirligi va mablagʻ bilan taʼminlovchi banklar kapital qurilish istiqbolini belgilashda temir yoʻlni elektrlashtirish boʻyicha respublikaning davlat maqsadli dasturini amalga oshirish uchun zarur hajmlarda kredit resurslari, shu jumladan, imtiyozli uzoq muddatli kredit ajratilishini nazarda tutsinlar.

4. Oʻzbekiston Respublikasi Markaziy bankiga elektrlashtirish uchun moddiy resurslar va asbob-uskunalar uchun MDH mamlakatlari bilan hisob-kitoblarda Oʻrta Osiyo Temir yoʻl boshqarmasi va “Oʻzbektransqurilish” davlat uyushmasiga eng qulay sharoitlar yaratib berish tavsiya qilinsin.

5. “Oʻzshartnomasavdo” har yili 2-ilovaga muvofiq qurilish hamda elektrlashtirish obyektlarini foydalanishga topshirish muddatlari boʻyicha moddiy resurslar va asbob-uskunalar ajratishni va yetkazib berishni nazarda tutsin.

“Oʻzdavneftmahsulot” birlashmasi Oʻrta Osiyo Temir yoʻl boshqarmasi va “Oʻzbektransqurilish” davlat uyushmasiga elektrlashtirish hajmlari hisob-kitoblariga muvofiq transport taʼminotiga neft mahsulotlari ajratishni amalga oshirsin.

6. Oʻzbekiston Respublikasi Energetika va elektrlashtirish vazirligi temir yoʻl orqali oʻtish joylarida 35 kV va undan yuqori elektr uzatish liniyalarining tashqi elektr taʼminoti va qayta qurish boʻyicha buyurtmachi funksiyasini qabul qilsin. Oʻrta Osiyo Temir yoʻl boshqarmasi elektrlashtirish rejalariga muvofiq qurilishning umumiy smetasida ana shu maqsadlar uchun nazarda tutilgan mablagʻlarni bersin.

7. Oʻzbekiston Respublikasi Aloqa vazirligi va Oʻrta Osiyo Temir yoʻl boshqarmasining Aloqa vazirligining, shuningdek, boshqa vazirliklar va idoralarning temir yoʻlni elektrlashtirish tegrasidagi aloqa liniyasini himoya qilishni loyihalashtirish, qurish boʻyicha ishlar qurilishning umumiy smetasi hisobidan kelishilgan muddatlarda “Oʻzbekaloqainvest” konserni tomonidan tayyor holda bajarilishi haqidagi taklifi qabul qilinsin.

8. Qoraqalpogʻiston Respublikasi Vazirlar Kengashi, Toshkent, Jizzax Buxoro, Samarqand, Navoiy, Xorazm, Fargʻona, Andijon, Namangan, Qashqadaryo viloyatlari hokimliklari Oʻrta Osiyo temir yoʻlini elektrlashtirish obyektlari uchun yer uchastkalarini hamda ularni loyihalashtirish va qurish uchun zarur kelishuvlarni belgilangan tartibda va muddatlarda amalga oshirsinlar, shuningdek, qurilish va montaj qilish bilan shugʻullanayotgan tashkilotlarga belgilangan meʼyorlar boʻyicha oziq-ovqat tovarlari ajratsinlar.

9. “Oʻzbektransqurilish” davlat uyushmasi 1993-1994-yillar mobaynida elektrlashtirish qurilmalarini montaj qilish boʻyicha ixtisoslashtirilgan korxonalar tashkil etsin hamda oʻzining korxonalari va respublika sanoat korxonalari negizida ularni MDH mamlakatlaridan keltirishni istisno qilish maqsadida detallar, armaturalar, ulanish tarmoqlari konstruksiyalari va tortish kuchi bilan ishlaydigan qoʻshimcha stansiyalar asbob-uskunalari tayyorlashni rivojlantirsin.

10. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari oʻrtoq K.N. Toʻlaganov zimmasiga yuklatilsin.

Vazirlar Mahkamasining Raisi I. KARIMOV

Toshkent sh.,

1993-yil 23-iyun,

304-son

Vazirlar Mahkamasining 1993-yil 23-iyundagi 304-son qaroriga 1-ILOVA

Oʻrta Osiyo temir yoʻli uchastkalarini qurish bosqichlari va foydalanishga topshirish muddatlari dasturi

Vazirlar Mahkamasining 1993-yil 23-iyundagi 304-son qaroriga 2-ILOVA

Asosiy moddiy resurslarni yetkazib berish muddatlari va miqdori