Oʻzbekiston Respublikasi oliy va oʻrta-maxsus taʼlim vaziri I. Majidovga “Vazirlik tasarrufidagi oliy taʼlim muassasalarida tahsil olayotganlarni talabalar turar joylari bilan taʼminlashni yanada yaxshilash borasida amalga oshirilayotgan ishlar toʻgʻrisida” parlament soʻrovini yuborish haqida (2862-III-son)

31.10.2019

Oʻzbekiston Respublikasi Oliy Majlisi Qonunchilik palatasining

Qarori

“Oʻzbekiston Respublikasi Oliy Majlisining Qonunchilik palatasi toʻgʻrisida”gi Oʻzbekiston Respublikasi Konstitutsiyaviy Qonunining 12-moddasiga va “Parlament nazorati toʻgʻrisida”gi Oʻzbekiston Respublikasi Qonunining 14-moddasiga muvofiq, Oʻzbekiston Respublikasi Oliy Majlisining Qonunchilik palatasi qaror qiladi:

1. Oʻzbekiston Respublikasi Oliy Majlisi Qonunchilik palatasi Fan, taʼlim, madaniyat va sport masalalari qoʻmitasining Oʻzbekiston Respublikasi oliy va oʻrta-maxsus taʼlim vaziri I. Majidovga “Vazirlik tasarrufidagi oliy taʼlim muassasalarida tahsil olayotganlarni talabalar turar joylari bilan taʼminlashni yanada yaxshilash borasida amalga oshirilayotgan ishlar toʻgʻrisida” parlament soʻrovini yuborish haqidagi taklifi qabul qilinsin.

2. Mazkur Qaror va parlament soʻrovi Oʻzbekiston Respublikasi oliy va oʻrta-maxsus taʼlim vaziri I. Majidovga yuborilsin.

3. Ushbu Qaror qabul qilingan kundan eʼtiboran kuchga kiradi.

Oʻzbekiston Respublikasi Oliy Majlisi Qonunchilik palatasining Spikeri N. ISMOILOV

Toshkent sh.,

2019-yil 31-oktabr,

2862-III-son

Oʻzbekiston Respublikasi oliy va oʻrta maxsus taʼlim vaziri I.U. Majidovga

Vazirlik tasarrufidagi oliy taʼlim muassasalarida tahsil olayotganlarni talabalar turar joylari bilan taʼminlashni yanada yaxshilash borasida amalga oshirilayotgan ishlar toʻgʻrisida

PARLAMENT SOʻROVI

Hurmatli Inomjon Urishovich,

Davlatimiz rahbari tomonidan ilgari surilgan tashabbuslar asosida mamlakatimiz iqtisodiyotining real sektorlari uchun malakali va zamon talablariga javob beradigan oliy maʼlumotli mutaxassis kadrlar tayyorlash, yoshlarning oliy maʼlumotli boʻlishlari uchun keng imkoniyatlar yaratish borasida sezilarli ishlar amalga oshirilmoqda. Jumladan, koʻplab yangi oliy oʻquv yurtlarining faoliyati yoʻlga qoʻyilmoqda, ularda sirtqi va kechki boʻlimlar tashkil etilmoqda, qabul kvotalari soni sezilarli darajada oshirilmoqda. Natijada mamlakatimizda oliy taʼlim muassasalarining soni koʻpayishi barobarida talabalar sonining ham ortishiga olib kelmoqda. Jumladan, bugungi kunda mamlakatimizdagi 93 ta mahalliy, 20 ta xorijiy oliy taʼlim muassasasida hamda ularning 81 ta filiallarida jami 350 mingdan ziyod talaba tahsil olmoqda. Bu esa oʻtgan yillardagiga nisbatan ancha koʻp dyemakdir.

Shundan kelib chiqib oliy taʼlim muassasalaridagi talabalar turar joylari sonini koʻpaytirish, yangilarini qurish, talabalar turar joylarining moddiy-texnika taʼminotini yaxshilash, ularda talabalar uchun zarur shart-sharoitlar yaratishni taqozo etmoqda.

Bugungi kunda mavjud oliy oʻquv yurtlarida 49 188 oʻrinli 189 ta talabalar turar joyi mavjud boʻlib, ularda 68 mingdan ortiq talabalar yashab kelmoqda. Oʻrganishlar mobaynida tahsil olayotgan talabalarning 40 foizi talabalar turar joyi bilan taʼminlanishi lozim boʻlsa-da, amalda talabalar ehtiyojining bor yoʻgʻi 15 foizi qanoatlantirilgani kuzatildi. Mazkur talabalar turar joylaridagi yaratilgan shart-sharoitlarni ham qoniqarli deb boʻlmaydi. Ularning baʼzilari kapital taʼmirga muhtoj boʻlib, aksariyatida maydon yetishmasligi sababli turli xil toʻgaraklar, kutubxonalar va maʼnaviyat xonalari tashkil etilmagan.

Deputatlar tomonidan hududlarda oʻtkazilgan oʻrganishlar shuni koʻrsatmoqdaki, bugungi kunda respublika boʻyicha qoʻshimcha 70 ming oʻrinli talabalar turar joyiga ehtiyoj mavjud.

Yuqoridagilardan kelib chiqib hamda “Parlament nazorati toʻgʻrisida”gi Oʻzbekiston Respublikasi Qonunining 14-moddasiga muvofiq Sizdan 10 kun muddatda quyidagi masalalar yuzasidan asoslantirilgan tushuntirishlar berishingizni soʻraymiz:

vazirlik tasarrufidagi oliy taʼlim muassasalaridagi qabul kvotalarining oshirilishiga mos ravishda talabalar turar joylariga nisbatan oʻsib borayotgan ehtiyojni oʻz vaqtida taʼminlash va zamon talablari asosida ularning moddiy-texnik bazasini mustahkamlash borasida olib borilayotgan ishlar;

talabalar turar joylarining moddiy taʼminotini yaxshilash uchun ajratilayotgan budjet mablagʻlaridan samarali foydalanish boʻyicha amalga oshirilayotgan ishlar;

davlat-xususiy sheriklik shartlari asosida talabalar turar joylarini qurish va taʼmirlash yuzasidan koʻrilayotgan choralar.

Oʻzbekiston Respublikasi Oliy Majlisining Qonunchilik palatasi