“Faol investitsiyalar va ijtimoiy rivojlanish yili” Davlat dasturining 2019-yil uchinchi choragida bajarilishi yuzasidan Oʻzbekiston Respublikasi Vazirlar Mahkamasining hisoboti toʻgʻrisida (2860-III-son)

31.10.2019

Oʻzbekiston Respublikasi Oliy Majlisi Qonunchilik palatasining

Qarori

“Faol investitsiyalar va ijtimoiy rivojlanish yili” Davlat dasturining 2019-yil uchinchi choragida bajarilishi yuzasidan Vazirlar Mahkamasining hisobotini koʻrib chiqib, Oʻzbekiston Respublikasi Oliy Majlisi Qonunchilik palatasi taʼkidlaydiki, Hukumat tomonidan yuqori iqtisodiy oʻsish surʼatlarini saqlab qolish, xorijiy investitsiyalarni jalb etish, qulay ishbilarmonlik muhitini yaratish hamda hududlarning ijtimoiy-iqtisodiy rivojlanish koʻrsatkichini yaxshilash borasida sezilarli ishlar amalga oshirildi.

Xususan, joriy yilning toʻqqiz oyida yalpi ichki mahsulot oʻtgan yilning mos davriga nisbatan 5,7 foizga oʻsishi taʼminlandi va davlat budjetining daromadlari 1,5 baravarga ortdi.

Taʼkidlanganidek, oʻtgan davrda Vazirlar Mahkamasi tomonidan Davlat dasturining bajarilishida bir qator jihatlarga alohida eʼtibor qaratildi. Jumladan, davlatimiz rahbarining 2019-yil 17-yanvardagi Farmoni bilan belgilangan ustuvor yoʻnalishlarni sifatli, samarali amalga oshirish, hisobot davrida makroiqtisodiy barqarorlik va iqtisodiy-ijtimoiy sohaning bardavom rivojlanishini taʼminlash, xorijiy investitsiyalarni jalb qilish, jozibador investitsiya muhitini yaratish, mavjud muammo va kamchiliklarni aniqlash hamda ularni bartaraf etish yuzasidan tegishli choralarni koʻrishga ustuvor ahamiyat berildi.

Davlatimiz rahbari ilgari surgan gʻoyaning amalga oshirilishi va shu orqali mahalliy budjet daromadlarini shakllantirishda mahalliy davlat hokimiyati organlari mustaqilligining kuchaytirilishi, natijada daromad tushumlari koʻrsatkichlarining ortigʻi bilan bajarilishi hisobiga mahalliy hokimliklar ixtiyorida qoʻshimcha 4,0 trln. soʻm yoki oʻtgan yilning shu davriga nisbatan 28 foiz koʻp mablagʻ qoldirildi. Bu esa faqat markazlashgan mablagʻlargagina qaram boʻlmay, mahalliy budjetlar hisobiga ham investitsiyaviy muhitni yaxshilash, turizm uchun qulayliklar yaratish, aholini ish bilan taʼminlash kabi muhim yoʻnalishlarga eʼtiborni kuchaytirish imkonini berdi.

Jumladan, mamlakatimizda yaratilgan qulay investitsiya muhiti natijasida ularning oʻzlashtirilishi jadallashtirilib, jalb etilayotgan jami investitsiyalar hajmi 46 foizga oʻsdi. Bunda Prezidentimiz tomonidan tasdiqlangan Investitsiya dasturining alohida ahamiyati bor.

Oʻtgan davrda Vazirlar Mahkamasi tomonidan davlat va jamiyat qurilishi tizimini takomillashtirish, iqtisodiyotni liberallashtirish, ijtimoiy sohasini rivojlantirish yuzasidan koʻrilgan chora-tadbirlar natijasida Davlat dasturi doirasida 260 ta normativ-huquqiy va boshqa hujjatlar, jumladan Oʻzbekiston Respublikasining 13 ta Qonuni, Oʻzbekiston Respublikasi Prezidentining 23 ta farmoni, 71 ta qarori, 3 ta farmoyishi, Vazirlar Mahkamasining 71 ta qarori va farmoyishlari qabul qilindi hamda 51 ta chora-tadbirlar dasturi tasdiqlanib, izchil amalga oshirilmoqda.

Shu bilan birga Davlat dasturidagi ayrim bandlarning bajarilish muddatlari kechikmoqda. Jumladan, davlat boshqaruvining zamonaviy usullarini keng joriy etish orqali davlat-xususiy sheriklik mexanizmlarini qoʻllagan holda vazirlik va idoralarning shtat birliklarini maqbullashtirishga qaratilgan normativ-huquqiy hujjat (13-band) oxiriga yetkazilmagan.

Davlat unitar korxonalarini xatlovdan oʻtkazish asosida raqobat mavjud sohalarda faoliyat yurituvchi va samaradorligi past davlat unitar korxonalarini davlat tasarrufidan chiqarish va xususiylashtirishni hamda autsorsing mexanizmlarini qoʻllash orqali ularni tugatishni nazarda tutuvchi davlat unitar korxonalari sonini maqbullashtirish (24-band) boʻyicha boshlangan ishlar oʻz nihoyasiga yetmagan.

Mamlakatimizda 2030-yilgacha urbanizatsiyani rivojlantirish konsepsiyasini qabul qilish (102-band), majburiy tibbiy sugʻurta tizimiga bosqichma-bosqich oʻtish, sogʻliqni saqlash ehtiyoji uchun ajratilayotgan pul mablagʻlarini jamlash va taqsimlash mexanizmlarini takomillashtirish (160-band) borasidagi vazifalarning bajarilishi yetarli darajasida emas.

Shular bilan bir qatorda sogʻliqni saqlash tizimini yanada takomillashtirish, tibbiy xizmat sifati va samaradorligini oshirish masalalariga deputatlar tomonidan alohida eʼtibor qaratildi. Xususan, deputatlar tomonidan joylarda koʻrsatilayotgan tibbiy yordam sifati va samaradorligi oʻrganilganda keyingi yillarda aholi oʻrtasida otorinolaringologik, yaʼni tomoq, burun va quloq (LOR) kasalliklarining oʻsish tendensiyasi yuqoriligicha saqlanib turganligi, bu kasallik, ayniqsa, goʻdak va bolalarda koʻproq kuzatilayotganligi sababli respublikada bu sohada ixtisoslashtirilgan tibbiyot markazini tuzish masalasini koʻrib chiqish maqsadga muvofiqligi taʼkidlandi.

Yuqoridagilardan kelib chiqib, “Parlament nazorati toʻgʻrisida”gi Oʻzbekiston Respublikasi Qonunining 81-moddasi va “Oʻzbekiston Respublikasi Oliy Majlisi Qonunchilik palatasining Reglamenti toʻgʻrisida”gi Oʻzbekiston Respublikasi Qonunining 322-moddasiga muvofiq Oʻzbekiston Respublikasi Oliy Majlisining Qonunchilik palatasi qaror qiladi:

1. Oʻzbekiston Respublikasi Vazirlar Mahkamasining “Faol investitsiyalar va ijtimoiy rivojlanish yili” Davlat dasturining 2019-yil uchinchi choragida bajarilishi yuzasidan hisoboti maʼlumot uchun qabul qilinsin.

2. Oʻzbekiston Respublikasi Vazirlar Mahkamasiga:

Davlat dasturida nazarda tutilgan vazifalarni oʻz muddatida va puxta bajarilishini taʼminlash yuzasidan Hukumat aʼzolari, davlat hamda xoʻjalik boshqaruvi organlari rahbarlarining masʼuliyatini yanada oshirish;

Davlat dasturidagi ijrosi taʼminlanmagan bandlarning bajarilishini, xususan, normativ-huquqiy hujjatlar loyihalarini oʻz vaqtida va sifatli ishlab chiqilishi hamda qabul qilinishini taʼminlash;

kuz-qish mavsumida aholi va tadbirkorlik subyektlarini energoresurslar (elektr energiyasi, koʻmir, tabiiy va suyultirilgan gaz) bilan uzluksiz taʼminlash boʻyicha qoʻshimcha choralar koʻrish;

Davlat dasturining oʻtgan choraklardagi ijrosi yuzasidan Vazirlar Mahkamasining hisobotlari boʻyicha Qonunchilik palatasi tomonidan qabul qilingan qarorlarning ijrosini toʻliq taʼminlash;

aholiga yuqori darajada ixtisoslashgan tibbiy otorinolaringologik yordam koʻrsatish va ushbu xizmatni vertikal tizimini yoʻlga qoʻyish boʻyicha ixtisoslashtirilgan tibbiyot markazini tashkil etish masalasini koʻrib chiqish;

Davlat dasturida ijro muddati uzaytirilgan 11 ta bandda belgilangan vazifalarni oʻz vaqtida amalga oshirish yuzasidan mutasaddi vazirlik va idoralarning masʼuliyatini yanada oshirish choralarini koʻrish tavsiya etilsin.

3. Oʻzbekiston Respublikasi Oliy Majlisi Qonunchilik palatasidagi deputatlar birlashmalariga:

Davlat dasturi doirasida amalga oshirilayotgan islohotlarning mazmun-mohiyati va ahamiyatini keng jamoatchilikka yetkazish choralarini koʻrish;

oʻz partiyaviy maqsad va vazifalaridan kelib chiqib, Davlat dasturida belgilangan ustuvor yoʻnalishlarning samarali ijro etilishi ustidan taʼsirchan parlament nazoratini oʻrnatish tavsiya etilsin.

4. Oʻzbekiston Respublikasi Oliy Majlisi Qonunchilik palatasining qoʻmitalari oʻz faoliyat yoʻnalishlaridan kelib chiqqan holda Davlat dasturida ijrosi toʻliq taʼminlanmagan bandlarning bajarilishi ustidan parlament nazoratini oʻrnatsin.

5. Oʻzbekiston Respublikasi Vazirlar Mahkamasi ushbu Qarorning ijrosi boʻyicha joriy yilning 20-noyabr kuniga qadar Oʻzbekiston Respublikasi Oliy Majlisi Qonunchilik palatasiga axborot taqdim etsin.

6. Ushbu Qarorning ijrosini nazorat qilish Oʻzbekiston Respublikasi Oliy Majlisi Qonunchilik palatasi Spikerining oʻrinbosarlari zimmasiga yuklansin.

Oʻzbekiston Respublikasi Oliy Majlisi Qonunchilik palatasining Spikeri N. ISMOILOV

Toshkent sh.,

2019-yil 31-oktabr,

2860-III-son