Oʻzbekiston Respublikasi Oliy Majlisi Qonunchilik palatasining 2019-yilga moʻljallangan “hukumat soati”ni oʻtkazish jadvalini tasdiqlash toʻgʻrisida (2306-III-son)

25.01.2019

Oʻzbekiston Respublikasi Oliy Majlisi Qonunchilik palatasi kengashining

qarori

“Oʻzbekiston Respublikasi Oliy Majlisi Qonunchilik palatasining Reglamenti toʻgʻrisida”gi Oʻzbekiston Respublikasi Qonunining 332-moddasiga, “Parlament nazorati toʻgʻrisida”gi Oʻzbekiston Respublikasi Qonunining 101-moddaciga muvofiq hamda Oʻzbekiston Respublikasi Oliy Majlisi Qonunchilik palatasida “hukumat soati”ni oʻtkazishni yuqori saviyada tashkil etish maqsadida Oʻzbekiston Respublikasi Oliy Majlisi Qonunchilik palatasining Kengashi qaror qiladi:

1. Oʻzbekiston Respublikasi Oliy Majlisi Qonunchilik palatasining 2019-yilga moʻljallangan “hukumat soati”ni oʻtkazish jadvali Oʻzbekiston Respublikasi Bosh vaziri bilan kelishilganligi maʼlumot uchun qabul qilinsin hamda ilovaga muvofiq tasdiqlansin.

2. Navbatdagi oyda oʻtkazilishi rejalashtirilgan “hukumat soati”ga taklif etiladigan hukumat aʼzolariga Oʻzbekiston Respublikasi Oliy Majlisi Qonunchilik palatasidagi deputatlar birlashmalari aʼzolari beradigan savollarni har oyning 15 sanasiga qadar Oʻzbekiston Respublikasi Oliy Majlisi Qonunchilik palatasi Devonining Tashkiliy-nazorat va tahlil boʻlimiga umumlashtirish uchun taqdim qilish tavsiya etilsin.

3. Oʻzbekiston Respublikasi Oliy Majlisi Qonunchilik palatasi Devonining Tashkiliy-nazorat va tahlil boʻlimi deputatlar birlashmalari tomonidan taqdim etiladigan savollarni umumlashtirgan holda har oyning 20 sanasiga qadar Oʻzbekiston Respublikasi Oliy Majlisi Qonunchilik palatasining Kengashi muhokamasiga kiritib borsin.

4. Oʻzbekiston Respublikasi Oliy Majlisi Qonunchilik palatasi Spikerining oʻrinbosari (X. Ketmonov) 2019-yilda oʻtkazilishi moʻljallangan “hukumat soati”ni yuqori saviyada tashkil etish bilan bogʻliq zarur choralarni koʻrib borsin.

5. Oʻzbekiston Respublikasi Oliy Majlisi Qonunchilik palatasi Spikerining oʻrinbosari (S. Otamuratov) 2019-yilda oʻtkaziladigan har bir “hukumat soati” ommaviy axborot vositalarida keng yoritilishini taʼminlasin.

6. Ushbu Qarorning ijrosini nazorat qilish Oʻzbekiston Respublikasi Oliy Majlisi Qonunchilik palatasi Spikerining oʻrinbosarlari hamda Oʻzbekiston Respublikasi Oliy Majlisi Qonunchilik palatasi Devonining rahbari M. Miralimov zimmasiga yuklatilsin.

7. Ushbu qaror qabul qilingan kundan eʼtiboran kuchga kiradi.

Oʻzbekiston Respublikasi Oliy Majlisi Qonunchilik palatasi Spikerining oʻrinbosari S. OTAMURATOV

Toshkent sh.,

2019-yil 25-yanvar,

2306-III-son

Oʻzbekiston Respublikasi Oliy Majlisi Qonunchilik palatasi Kengashining 2019-yil 25-yanvardagi 2306-III-sonli Qaroriga ILOVA

Oʻzbekiston Respublikasi Oliy Majlisi Qonunchilik palatasining 2019-yilda moʻljallangan “hukumat soati”ni oʻtkazish

JADVALI

T/r Oʻtkazilish oyi Oʻtkazilish kuni Oʻtkazilish vaqti 1. Fevral 5-fevral Soat 1500 — 1600 2. Mart 5-mart 3. Aprel 2-aprel 4. May 7-may 5. Iyun 4-iyun 6. Iyul 2-iyul 7. Avgust 6-avgust 8. Sentyabr 3-sentabr 9. Oktyabr 2-oktabr 10. Noyabr 5-noyabr 11. Dekabr 3-dekabr