Sanoat xavfsizligi davlat qoʻmitasining texnik jihatdan tartibga solish sohasidagi ayrim normativ hujjatlariga oʻzgartirishlar kiritish toʻgʻrisida (20/ЮБ-67-son)
04.11.2020
Oʻzbekiston Respublikasi Sanoat xavfsizligi davlat qoʻmitasining
qarori
[Oʻzbekiston Respublikasi Adliya vazirligi tomonidan 2020-yil 11-dekabrda hisobga olindi, hisob raqami 3]
Oʻzbekiston Respublikasi Prezidenti Administratsiyasi rahbarining 2020-yil 4-sentabrdagi 02-2488-son topshirigʻi bilan tasdiqlangan “Sanoat xavfsizligi davlat qoʻmitasi organlarida yashirin iqtisodiyot va korrupsiyaga qarshi kurashish hamda ularni oldini olish boʻyicha 2020-2021-yillarga moʻljallangan “Yoʻl xaritasi” 17-ilovasi 1-bandi, 2-kichik bandi ijrosini taʼminlash maqsadida Oʻzbekiston Respublikasi Sanoat xavfsizligi davlat qoʻmitasi qaror qiladi:
1. Sanoat xavfsizligi davlat qoʻmitasining texnik jihatdan tartibga solish sohasidagi ayrim normativ hujjatlariga ilovaga muvofiq oʻzgartirishlar kiritilsin.
2. Mazkur qaror rasmiy eʼlon qilingan kundan eʼtiboran kuchga kiradi.
Rais B. GULYAMOV
Toshkent sh.,
2020-yil 4-noyabr,
20/YuB-67-son
Oʻzbekiston Respublikasi Sanoat xavfsizligi davlat qoʻmitasining 2020-yil 4-noyabrdagi 20/YuB-67-son qaroriga ILOVA
Sanoat xavfsizligi davlat qoʻmitasining texnik jihatdan tartibga solish sohasidagi ayrim normativ hujjatlariga kiritilayotgan oʻzgartirishlar
1. Oʻzbekiston Respublikasi Sanoatda, konchilikda va kommunal-maishiy sektorda ishlarning bexatar olib borilishini nazorat qilish davlat inspeksiyasi “Sanoatkontexnazorat 2009-yil “18” maydagi 105-son buyrugʻi bilan tasdiqlangan (Oʻzbekiston Respublikasi Adliya vazirligi bilan kelishilgan holda texnik hujjat deb topilgan, 2009-yil 26-iyun 6-15/23-5047/6-son) Foydali qazilma konlarini ochiq usul bilan qazib olishda xavfsizlik qoidalarining 4-ilovasi 3-bandidagi “kon qutqarish xizmati boshligʻi (koʻngilli drujina yoʻriqchisi) va yongʻin oʻchirish qismi boshligʻi tomonidan kelishiladi va” soʻzlari chiqarib tashlansin.
2. Oʻzbekiston Respublikasi Vazirlar Mahkamasi huzuridagi Yer qaʼrini geologik oʻrganish, sanoatda, konchilikda va kommunal-maishiy sektorda ishlarning bexatar olib borilishini nazorat qilish davlat inspeksiyasining 2018-yil 17-avgustdagi 16/NTD-4-son buyrugʻi bilan tasdiqlangan (Oʻzbekiston Respublikasi Adliya vazirligi bilan kelishilgan holda texnik hujjat deb topilgan, 2018-yil 26-noyabr 6-21/3-14375/6-son) Osma arqonli yoʻlovchi yoʻllarning tuzilishi va ulardan xavfsiz foydalanish qoidalarining 14-§, 134-band, “g” kichik bandi chiqarib tashlansin.
3. Oʻzbekiston Respublikasi Sanoatda, konchilikda va kommunal-maishiy sektorda ishlarning bexatar olib borilishini nazorat qilish davlat inspeksiyasi “Sanoatkontexnazorat” boshligʻining 2009-yil 5-dekabrdagi 260-son buyrugʻi bilan tasdiqlangan (Oʻzbekiston Respublikasi Adliya vazirligi bilan kelishilgan holda texnik hujjat deb topilgan, 2009-yil 30-dekabr 6-15/11-1066016-son) Tutun va shamollatish sanoat quvurlarini ishlatishda xavfsizlik qoidalarida:
a) I-bob, 1-§, 6-bandidagi “Sanoatkontexnazorat” davlat inspeksiyasi vakillari ishtirokida soʻzlari chiqarib tashlansin;
b) II-bob, 5-§, 74-bandidagi “va “Sanoatkontexnazorat” davlat inspeksiyasining hududiy organi bilan kelishilgan” soʻzlari chiqarib tashlansin.
4. Oʻzbekiston Respublikasi Sanoatda, konchilikda va kommunal-maishiy sektorda ishlarning bexatar olib borilishini nazorat qilish davlat inspeksiyasi “Sanoatkontexnazorat” boshligʻining 2008-yil 24-oktabrdagi 220-son buyrugʻi bilan tasdiqlangan (Oʻzbekiston Respublikasi Adliya vazirligi bilan kelishilgan holda texnik hujjat deb topilgan, 2008-yil 6-noyabr 20-15-372/12-son) Ammiakli sovutish qurilmalarining texnik holatini tekshirish va ulardan foydalanishda xavfsizlikni taʼminlash boʻyicha uslubiy koʻrsatmalarning 14-band “a” kichik bandidagi “korxonada (tashkilot) “Sanoatkontexnazorat” Davlat inspeksiyasining hududiy organi tomonidan” soʻzlari chiqarib tashlansin.