“Fuqarolik holati dalolatnomalari toʻgʻrisida”gi QL-509-sonli Oʻzbekiston Respublikasi qonuni loyihasi haqida (2754-III-son)
19.09.2019
Oʻzbekiston Respublikasi Oliy Majlisi Qonunchilik palatasining
Qarori
Oʻzbekiston Respublikasi Oliy Majlisining Qonunchilik palatasi Korrupsiyaga qarshi kurashish va sud-huquq masalalari qoʻmitasining “Fuqarolik holati dalolatnomalari toʻgʻrisida”gi qonun loyihasini rad qilish haqidagi taklifini koʻrib chiqib taʼkidlaydiki, mazkur qonun loyihasi Qonunchilik palatasining 2019-yil 22-iyuldagi majlisida birinchi oʻqishda qabul qilinib, deputatlar tomonidan konseptual jihatdan maʼqullangan boʻlsada, loyihani ikkinchi oʻqishga tayyorlash jarayonida bir qator muammolar vujudga kelgan.
Jumladan, qonun loyihasida mazkur qonunni qabul qilinishi munosabati bilan Oʻzbekiston Respublikasi Oila kodeksining VII boʻlimini (Fuqarolik holati dalolatnomalarini qayd etish) chiqarib tashlash taklif etilgan. Bu esa Oila kodeksidagi meʼyorlarning mantiqiy davomiyligini buzish bilan birga, uning tuzilishiga putur yetkazilishiga olib keladi.
Bundan tashqari, qonun loyihasidagi ayrim qoidalar mazkur qonun loyihasining huquqiy jihatdan tartibga solish predmeti bilan bogʻliq emas, yaʼni loyihada FHDY organlari xodimlarining sonini belgilash, ularga martaba darajalari berish, ushbu xodimlarning malakasini oshirish tartibi va shunga oʻxshagan meʼyorlar ham mavjud.
Mazkur qonunning qabul qilinishi fuqarolik holati dalolatnomalarini qayd etishning amaldagi tartibini oʻzgartirmasligi, yaʼni uni qonun shaklida qabul qilish ijtimoiy-iqtisodiy, huquqiy va boshqa oqibatlarni keltirib chiqarmaydi. Shuningdek qonun loyihasida mavjud boʻlgan ichki qarama-qarshiliklar va havolaki normalar qonunning toʻgʻridan toʻgʻri amal qilishini taʼminlash boʻyicha talablarga javob bermaydi.
Yuqorida bayon etilganlaridan kelib chiqib hamda Oʻzbekiston Respublikasi Oliy Majlisi Qonunchilik palatasi Reglamentining 1351 va 1352-moddalariga muvofiq Oʻzbekiston Respublikasi Oliy Majlisining Qonunchilik palatasi qaror qiladi:
1. Oʻzbekiston Respublikasi Vazirlar Mahkamasi tomonidan 2019-yil 11-iyunda kiritilgan “Fuqarolik holati dalolatnomalari toʻgʻrisida”gi QL-509-sonli Oʻzbekiston Respublikasi qonuni loyihasi rad etilsin va qonunchilik tashabbusi huquqi subyektiga qaytarilsin.
2. Ushbu Qaror Oʻzbekiston Respublikasi Vazirlar Mahkamasiga yuborilsin.
3. Ushbu Qaror eʼlon qilingan kunda eʼtiboran kuchga kiradi.
Oʻzbekiston Respublikasi Oliy Majlisi Qonunchilik palatasining Spikeri N. ISMOILOV
Toshkent sh.,
2019-yil 19-sentabr,
2754-III-son