Bolalarning maktabgacha tarbiya muassasalarida boʻlishlari uchun ota-onalardan olinadigan haq miqdorlari toʻgʻrisida (441-son)

22.11.1995

Oʻzbekiston Respublikasi Vazirlar Mahkamasining

qarori

Vazirlar Mahkamasi qaror qiladi:

1. 1996-yil 1-yanvardan boshlab bolaning respublika davlat budjetidan mablagʻ bilan taʼminlanadigan bolalar yaslisi, bolalar bogʻchasi yoki yasli-bogʻchada boʻlganligi uchun bir oyga toʻlanadigan haq miqdori ish tartibiga qarab Oʻzbekiston Respublikasida belgilangan eng kam ish haqining oʻrta hisobda 50 foizi miqdorida belgilansin.

2. Oʻz tasarrufida bolalar maktabgacha tarbiya muassasalari boʻlgan korxonalar, tashkilotlar, muassasalarga ota-onalarning haq toʻlashini respublika davlat budjetidan mablagʻ bilan taʼminlanadigan bolalar maktabgacha tarbiya muassasalarida qabul qilingan tartibda belgilash tavsiya etilsin.

Bunda korxonalar, tashkilotlar va muassasalar oʻz mablagʻlari hisobidan oʻzlariga qarashli bolalar maktabgacha tarbiya muassasalarida bolalarning boʻlishi uchun ota-onalardan haq undirish boʻyicha qoʻshimcha imtiyozlar belgilashlari mumkin.

3. Oʻzbekiston Respublikasi Xalq taʼlimi vazirligi Moliya vazirligi va Mehnat vazirligi bilan kelishgan holda bolalarning bolalar yaslilarida, bolalar bogʻchalarida va yasli-bogʻchalarda boʻlishlari uchun haq undirish tartibi toʻgʻrisidagi Yoʻriqnomaga oʻzgartirishlar kiritsin.

4. Oʻzbekiston Respublikasi Vazirlar Mahkamasining “Bolalarning maktabgacha tarbiya muassasalarida boʻlishlari uchun ota-onalardan olinadigan haq miqdorlari toʻgʻrisida” 1994-yil 20-iyuldagi 374-son qarori 1996-yil 1-yanvardan boshlab oʻz kuchini yoʻqotgan deb hisoblansin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari S.S.Saidqosimov zimmasiga yuklansin.

Oʻzbekiston Respublikasi Bosh vaziri A. MUTALOV

Toshkent sh.,

1995-yil 22-noyabr,

441-son