Oʻzbekiston xalq artisti Botir Zokirov tavalludining 85 yilligini keng nishonlash toʻgʻrisida (PQ-4908-son)

02.12.2020

Oʻzbekiston Respublikasi Prezidentining

Qarori

Milliy estrada sanʼatimiz asoschilaridan biri, zamonaviy oʻzbek madaniyatini dunyo miqyosida keng targʻib etish, ijodiy va ijtimoiy faoliyati bilan xalqimiz maʼnaviyatini yuksaltirishga beqiyos hissa qoʻshgan buyuk sanʼatkor, Oʻzbekiston xalq artisti Botir Zokirov ijodiy merosining yosh avlodni Vatanga muhabbat va sadoqat, milliy va umuminsoniy qadriyatlar ruhida tarbiyalash borasidagi ulkan ahamiyatini inobatga olib hamda tavalludining 85 yilligini keng nishonlash va xotirasini abadiylashtirish maqsadida:

1. Oʻzbekiston Respublikasi Madaniyat vazirligi, Oʻzbekiston kompozitorlari va bastakorlari uyushmasi, “Oʻzbekkino” Milliy agentligi, Respublika Maʼnaviyat va maʼrifat markazi, Badiiy akademiya, Yoshlar ishlari agentligi hamda jamoatchilik vakillarining 2021-yilda Oʻzbekiston xalq artisti Botir Zokirov tavalludining 85 yilligini keng nishonlash toʻgʻrisidagi taklifi maʼqullansin.

2. Oʻzbekiston xalq artisti Botir Zokirov tavalludining 85 yilligini nishonlash boʻyicha tashkiliy qoʻmita tarkibi (keyingi oʻrinlarda — Tashkiliy qoʻmita) ilovaga muvofiq tasdiqlansin.

3. Tashkiliy qoʻmita (A. Aripov) bir oy muddatda quyidagilarni nazarda tutuvchi Oʻzbekiston xalq artisti Botir Zokirov tavalludining 85 yilligini nishonlash boʻyicha chora-tadbirlar dasturini ishlab chiqib, tasdiqlasin:

2021-yil dekabr oyining birinchi oʻn kunligida Oʻzbekiston Xalqaro anjumanlar saroyida Botir Zokirov tavalludining 85 yilligiga bagʻishlangan xotira kechasini oʻtkazish;

Toshkent shahrida Oʻzbekiston xalq artisti Botir Zokirov nomidagi milliy estrada oliy maktabini tashkil etish, u yerda xonanda xotirasiga bagʻishlangan yodgorlik majmuasini va muzeyini barpo etish;

Badiiy akademiya tomonidan Botir Zokirov haykalini yaratish boʻyicha tanlov eʼlon qilish va uni Toshkent shahrida belgilangan tartibda oʻrnatish;

Botir Zokirov yashagan Toshkent shahri, Shayxontohur tumani, Navoiy koʻchasi, 3-uyga yodgorlik lavhasi oʻrnatish;

Botir Zokirov tahsil olgan Oʻzbekiston davlat konservatoriyasi joylashgan koʻchaga Botir Zokirov nomini berish;

Oʻzbekiston davlat filarmoniyasining Milliy estrada-simfonik orkestri bilan Botir Zokirov nomidagi estrada orkestrini birlashtirib, Botir Zokirov nomidagi milliy estrada-simfonik orkestrini tashkil etish;

Botir Zokirov nomidagi jamoat fondi faoliyatini qoʻllab-quvvatlash;

Oʻzbekiston kompozitorlari va bastakorlari uyushmasi hamda Yozuvchilar uyushmasi ishtirokida “Botir Zokirov zamondoshlari xotirasida” nomli kitobni nashrga tayyorlash va chop etish;

Botir Zokirov ijodiga mansub tasviriy sanʼat namunalari hamda adabiy asarlardan iborat kitob-albomni oʻzbek, qoraqalpoq, rus va ingliz tillarida nashr etish;

Botir Zokirov nomidagi zamonaviy estrada qoʻshiqchilari tanlovini yuqori saviyada oʻtkazish;

Botir Zokirovning hayoti va ijodiy faoliyati haqida yangi hujjatli film yaratish;

Oʻzbekiston Milliy teleradiokompaniyasi orqali Botir Zokirov va Zokirovlar ijodiy sulolasi haqida hikoya qiluvchi hujjatli filmlarni namoyish etish;

respublika teatrlarida Botir Zokirov hayoti va faoliyatiga bagʻishlangan spektakllar sahnalashtirish;

Oʻzbekiston davlat konservatoriyasida “Botir Zokirov ijodiy merosining milliy sanʼatimiz taraqqiyotidagi oʻrni va ahamiyati” mavzusida ilmiy konferensiya oʻtkazish va anjuman materiallarini toʻplam holida chop etish;

taʼlim muassasalari, mehnat jamoalari, harbiy qismlar va mahallalarda taniqli ijodkorlar, olimlar, madaniyat va sanʼat namoyandalari ishtirokida Botir Zokirov ijodiga bagʻishlangan uchrashuvlar va ijodiy kechalar tashkil etish.

Tashkiliy qoʻmitaga Botir Zokirov tavalludining 85 yilligini nishonlash doirasida oʻtkaziladigan tadbirlarni yuksak saviyada tashkil etish, mazkur qaror va chora-tadbirlar dasturining oʻz vaqtida, sifatli va toʻliq amalga oshirilishini muvofiqlashtirib borish vazifalari yuklatilsin.

4. Oʻzbekiston Milliy axborot agentligi, Oʻzbekiston Milliy teleradiokompaniyasi, Oʻzbekiston elektron ommaviy axborot vositalari milliy assotsiatsiyasi va boshqa ommaviy axborot vositalariga Botir Zokirov tavalludining 85 yilligini nishonlash bilan bogʻliq tadbirlarni keng yoritish tavsiya etilsin.

5. Mazkur qarorda nazarda tutilgan chora-tadbirlarni moliyalashtirish manbalari etib Oʻzbekiston Respublikasi Davlat budjeti mablagʻlari, tashkilotchilarning oʻz mablagʻlari hamda qonun hujjatlari bilan taqiqlanmagan boshqa manbalar belgilansin.

6. Mazkur qarorning ijrosini nazorat qilish Oʻzbekiston Respublikasining Bosh vaziri A.N. Aripov, Oʻzbekiston Respublikasi Prezidentining maslahatchisi A.A. Abduvaxitov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2020-yil 2-dekabr,

PQ-4908-son

Oʻzbekiston Respublikasi Prezidentining 2020-yil 2-dekabrdagi PQ-4908-son qaroriga ILOVA

Oʻzbekiston xalq artisti Botir Zokirov tavalludining 85 yilligini keng nishonlash boʻyicha tashkiliy qoʻmita

TARKIBI

A. Aripov — Oʻzbekiston Respublikasi Bosh vaziri, Tashkiliy qoʻmita raisi O. Nazarbekov — madaniyat vaziri, Tashkiliy qoʻmita raisi oʻrinbosari A. Abduvaxitov — Oʻzbekiston Respublikasi Prezidentining maslahatchisi X. Sultonov — Oʻzbekiston Respublikasi Prezidentining maslahatchisi I. Majidov — oliy va oʻrta maxsus taʼlim vaziri Sh. Shermatov — xalq taʼlimi vaziri R. Mamatov — mahalla va oilani qoʻllab-quvvatlash vaziri F. Arziyev — tashqi ishlar vazirining birinchi oʻrinbosari A. Saʼdullayev — Yoshlar ishlari agentligi direktori R. Abdullayev — Oʻzbekiston kompozitorlari va bastakorlari uyushmasi raisi S. Saidov — Yozuvchilar uyushmasi raisi A. Nuridinov — Badiiy akademiya raisi R. Zokirov — Botir Zokirov nomidagi jamoat fondi direktori F. Zokirov — Oʻzbekiston xalq artisti, “Yalla” ansambli rahbari G. Zokirova — Oʻzbekiston xalq artisti M. Hojimatov — Respublika Maʼnaviyat va maʼrifat markazi rahbari F. Abduholiqov — “Oʻzbekkino” Milliy agentligi bosh direktori A. Koʻchimov — Oʻzbekiston Milliy axborot agentligi bosh direktori A. Xadjayev — Oʻzbekiston Milliy teleradiokompaniyasi raisi

Izoh: Tashkiliy qoʻmita aʼzolari boshqa ishga oʻtganda, uning tarkibiga ushbu lavozimga yangidan tayinlangan yoki zimmasiga tegishli vazifalarni bajarish yuklangan shaxslar kiritiladi.