Umumiy yurisdiksiya sudlarining tuzilmasiga oʻzgartirish kiritish toʻgʻrisida (PF-3471-son)

11.08.2004

Oʻzbekiston Respublikasi Prezidentining

Farmoni

Oʻzbekiston Respublikasi Oliy Majlisining 2004-yil 30-apreldagi 629-II-sonli “Sirdaryo viloyatining maʼmuriy-hududiy tuzilishiga baʼzi oʻzgartirishlar kiritish toʻgʻrisida”gi va “Qoraqalpogʻiston Respublikasi Boʻzatov tuman maʼmuriy-hududiy tuzilmasini tugatish toʻgʻrisida”gi qaroriga asosan hamda Oʻzbekiston Respublikasi “Sudlar toʻgʻrisida”gi Qonunining 78-moddasiga koʻra:

1. Qoraqalpogʻiston Respublikasi jinoyat ishlari boʻyicha Boʻzatov va Sirdaryo viloyati jinoyat ishlari boʻyicha Mehnatobod tuman sudlari tugatilsin.

2. Oʻzbekiston Respublikasi Prezidentining 2004-yil 20-fevraldagi PF-3400-sonli “Umumiy yurisdiksiya sudlarining ayrimlarini tugatish va qayta tashkil etish toʻgʻrisida”gi Farmoniga 7 ilovadan Boʻzatov, Mehnatobod tumanlari chiqarilib, Sirdaryo viloyati Sharof Rashidov tumanining nomi Sardoba tumani deb oʻzgartirilsin.

3. Oʻzbekiston Respublikasi Moliya vazirligi, Oliy sudi, Adliya vazirligi huzuridagi Sud qarorlarini ijro etish, sudlar faoliyatini moddiy-texnika jihatidan va moliyaviy taʼminlash Departamenti, jinoyat ishlari boʻyicha Qoraqalpogʻiston Respublikasi va Sirdaryo viloyati sudlarining xarajatlar smetasi va shtat jadvallariga tegishli oʻzgartirishlar kiritsinlar.

4. Mazkur Farmon ijrosini nazorat qilish Oʻzbekiston Respublikasi Prezidentining Davlat maslahatchisi T. Xudaybergenov zimmasiga yuklatilsin.

Oʻzbekiston Respublikasi Prezidenti I. KARIMOV

Toshkent sh.,

2004-yil 11-avgust,

PF-3471-son