19-modda. Milliy gvardiyaga xizmatga qabul qilish

Milliy gvardiyaga harbiy xizmatga (xizmatga) tegishli maʼlumotga ega boʻlgan, sogʻligʻining holatiga va jismoniy tayyorgarligiga koʻra Milliy gvardiya harbiy xizmatchisining (xodimining) xizmat majburiyatlarini bajarishga qodir boʻlgan Oʻzbekiston Respublikasi fuqarolari qabul qilinadi.

Harbiy xizmatga fuqarolar umumiy harbiy majburiyat va harbiy xizmat toʻgʻrisidagi qonunchilik hujjatlariga muvofiq qabul qilinadi.

Xizmatga oʻn sakkiz yoshdan oʻttiz yoshgacha boʻlgan va oʻttiz yoshdagi fuqarolar Oʻzbekiston Respublikasi Prezidenti tomonidan tasdiqlanadigan Milliy gvardiya xodimlarining xizmatni oʻtash tartibi toʻgʻrisidagi nizomga muvofiq qabul qilinadi.

Milliy gvardiyaga harbiy xizmatga (xizmatga) qabul qilish tartibi Milliy gvardiya qoʻmondoni tomonidan belgilanadi.

Zarur boʻlgan hollarda, Milliy gvardiyaning ayrim boʻlinmalariga, Milliy gvardiya xodimlari lavozimiga oʻttiz yoshdan katta boʻlgan fuqarolar, agar ular xizmatda boʻlishning eng yuqori yoshiga toʻlgan paytida koʻp yillik xizmati uchun pensiya olish huquqiga ega boʻlsa, qabul qilinishi mumkin.

Milliy gvardiyaning oʻttiz yoshdan katta fuqarolar qabul qilinadigan ayrim boʻlinmalari va lavozimlarining roʻyxati Milliy gvardiya qoʻmondoni tomonidan belgilanadi.

Erkaklar Milliy gvardiyaga xizmatga kirguniga, Milliy gvardiya xodimi lavozimiga tayinlanguniga qadar Oʻzbekiston Respublikasi Qurolli Kuchlaridagi muddatli harbiy xizmatni yoki safarbarlik chaqiruvi rezervidagi harbiy xizmatni oʻtashi yoxud oliy taʼlim tashkilotlarida harbiy tayyorgarlikdan oʻtishi kerak.

Alohida hollarda, boshqa davlat organlari va oʻzga tashkilotlardan xodimlar Milliy gvardiyaga harbiy xizmatga (xizmatga) ushbu moddaning uchinchi va beshinchi qismlarida belgilangan talablarga rioya etilmagan holda, Milliy gvardiya qoʻmondonining qaroriga koʻra qabul qilinishi mumkin.

Siyosiy partiyalarning aʼzolari boʻlgan, Milliy gvardiyaga harbiy xizmatga (xizmatga) qabul qilingan fuqarolar xizmatni oʻtash davrida siyosiy partiyalarga aʼzolikni toʻxtatib turadi.

Milliy gvardiyaning taʼlim muassasalariga oʻqishga qabul qilish uchun tegishli maʼlumotga ega boʻlgan Oʻzbekiston Respublikasi fuqarolari, shuningdek harbiy xizmatchilar (xodimlar) qabul qilinadi.

Milliy gvardiyaning taʼlim muassasalarida chet ellik fuqarolar qonunchilikda nazarda tutilgan hollarda va tartibda oʻqishi mumkin.