13-modda. Oʻzbekiston Respublikasi fuqarolarining, chet el fuqarolarining va fuqaroligi boʻlmagan shaxslarning genom boʻyicha davlat roʻyxatiga olishni amalga oshirishdagi huquqlari va majburiyatlari
Genom boʻyicha davlat roʻyxatiga olish toʻgʻrisida (O‘RQ-649-son) · Sana: 24.11.2020 · Amalda
Oʻzbekiston Respublikasi fuqarolari, chet el fuqarolari va fuqaroligi boʻlmagan shaxslar, shu jumladan voyaga yetmaganlarning, sud tomonidan muomalaga layoqatsiz yoki muomala layoqati cheklangan deb topilgan shaxslarning qonuniy vakillari genom boʻyicha davlat roʻyxatiga olishni amalga oshirishda quyidagi huquqlarga ega:
genom boʻyicha ixtiyoriy ravishda davlat roʻyxatiga olinishni uni amalga oshirishning istalgan bosqichida rad etish;
oʻzining genomga oid axboroti yoki oʻzi qaysi shaxslarning qonuniy manfaatlarini ifodalayotgan boʻlsa, oʻsha shaxslarning genomga oid axboroti bilan tanishish;
oʻzining genomga oid axborotiga yoki oʻzi qaysi shaxslarning qonuniy manfaatlarini ifodalayotgan boʻlsa, oʻsha shaxslarning genomga oid axborotiga ishlov berish, uni muhofaza qilish bilan bogʻliq davlat organlarining va mansabdor shaxslarning harakatlari (harakatsizligi) ustidan yuqori turuvchi organga (yuqori turuvchi mansabdor shaxsga) yoki sudga shikoyat qilish;
oʻzining genomga oid axborotini yoki oʻzi qaysi shaxslarning qonuniy manfaatlarini ifodalayotgan boʻlsa, oʻsha shaxslarning genomga oid axborotini yoʻq qilish toʻgʻrisida ariza berish, bundan genom boʻyicha majburiy ravishda davlat roʻyxatiga olinishi lozim boʻlgan shaxslar mustasno.
Genom boʻyicha majburiy ravishda davlat roʻyxatiga olinishi lozim boʻlgan Oʻzbekiston Respublikasi fuqarolari, chet el fuqarolari va fuqaroligi boʻlmagan shaxslar biologik materialni olish tartib-taomilidan oʻtishi shart.