Oʻzbekiston Respublikasi Moliya vazirligi huzuridagi Davlat mulki jamgʻarmasi (“Oʻzdavjamgʻarma”) faoliyatini tashkil etish masalalari toʻgʻrisida (518-son)
10.11.1992
Oʻzbekiston Respublikasi Prezidenti huzuridagi Vazirlar Mahkamasining
qarori
“Davlat mulki jamgʻarmasini tashkil etish toʻgʻrisida” 1992-yil 7-sentabrdagi 471-son Farmonga muvofiq hamda davlat tasarrufidan chiqarish va xususiylashtirish jarayonida respublikaning mulkiy huquqlari va davlat manfaatlarini taʼminlash, davlat mulki obyektlarini qayta oʻzgartirishdan tushadigan mablagʻlarni safarbar qilish va ulardan samarali foydalanish maqsadida Vazirlar Mahkamasi qaror qiladi:
1. Belgilab qoʻyilsinki, Oʻzbekiston Respublikasi Moliya vazirligi huzuridagi Davlat mulki jamgʻarmasi davlat boshqaruv organi hisoblanadi.
“Oʻzdavjamgʻarma”ning oʻz vakolatlari doirasida qabul qilgan qarorlari vazirliklar, davlat qoʻmitalari, idoralar, mahalliy davlat boshqaruv organlari, mulkchilik shaklidan qatʼi nazar, konsernlar, uyushmalar, birlashmalar, korxonalar va tashkilotlar, shuningdek, respublika fuqarolari tomonidan bajarilishi majburiy hisoblanadi.
2. Belgilansinki, davlat mulki obyektlarini davlat tasarrufidan chiqarish va xususiylashtirishdan tushadigan mablagʻlar, davlat korxonalari va tashkilotlarini ijaraga olganlik uchun toʻlanadigan haqlar, yangidan taʼsis etiladigan va Oʻzbekiston Respublikasi Davlat mulki qoʻmitasi tomonidan qayta tashkil etilgan aksiyadorlar jamiyatlarining aksiyalarini sotishdan tushgan daromadlar Oʻzbekiston Respublikasi Moliya vazirligi tomonidan maxsus ochiladigan schyotda jamlanadi, hamda:
Oʻzbekiston Respublikasining ichki va tashqi qarzlarini toʻlashga;
respublika xalq xoʻjaligini tarkibiy qayta qurishni mablagʻ bilan taʼminlashga;
Oʻzbekiston Respublikasi mintaqalarining ijtimoiy-iqtisodiy rivojlanish darajasini tenglashtirishni mablagʻ bilan taʼminlashga;
qonun bilan belgilangan tartibda tasdiqlangan davlat tasarrufidan chiqarish va xususiylashtirish dasturlarida nazarda tutilgan boshqa maqsadlarga yoʻnaltiriladi.
Belgilab qoʻyilsinki, davlat tasarrufidan chiqarish va xususiylashtirishdan tushadigan mablagʻlarning 5 foizi tasarruf etish, boshqarish funksiyalarini amalga oshirish, shuningdek, davlat mulki obyektlarini tanlov boʻyicha va auksionda xususiylashtirish bilan bogʻliq boʻlgan faoliyat xarajatlarini qoplash uchun davlat mulkining sotuvchisi sifatida ish koʻruvchi Oʻzbekiston Respublikasi Davlat mulki qoʻmitasining hisob-kitob schyotiga yoʻnaltiriladi.
Oʻzbekiston Respublikasi Moliya vazirligi Davlat mulki qoʻmitasi bilan birgalikda bir oy muddat ichida davlat mulkini davlat tasarrufidan chiqarish va xususiylashtirishdan tushadigan mablagʻlarni toʻlash, ularni taqsimlash, ulardan foydalanish, hisobga olish va tushgan mablagʻlarni nazorat qilish tartibi toʻgʻrisidagi Nizomni ishlab chiqsin hamda tasdiqlash uchun Vazirlar Mahkamasiga kiritsin.
3. Oʻzbekiston Respublikasi Moliya vazirligi huzuridagi Davlat mulki jamgʻarmasi apparati va uning hududiy boshqarmalari tuzilmasi 1, 2-ilovalarga muvofiq tasdiqlansin.
Oʻzbekiston Respublikasi Moliya vazirligi huzuridagi Davlat mulki jamgʻarmasi tizimi xodimlarining cheklangan soni, uning hududiy boshqarmalari ham shu jumlaga kiradi, 301 nafardan iborat qilib, shu jumladan, markaziy apparat xodimlari soni — 55 nafardan iborat qilib xizmat koʻrsatuvchi xodimlar hisobga olinmagan holda) belgilansin.
4. Belgilab qoʻyilsinki, “Oʻzdavjamgʻarma”ga Vazirlar Mahkamasi tomonidan tayinlanadigan Oʻzbekiston Respublikasi Moliya vazirining oʻrinbosari — “Oʻzdavjamgʻarma” raisi boshchilik qiladi.
“Oʻzdavjamgʻarma”ga raisning ikki nafar oʻrinbosariga va shaxsiy tarkibi Oʻzbekiston Respublikasi Moliya vazirligining hayʼati tomonidan tasdiqlanadigan 7 kishidan iborat boshqaruvga ega boʻlishga ruxsat berilsin.
5. Belgilab qoʻyilsinki, Davlat mulki jamgʻarmasining hududiy boshqarmalari oʻz faoliyatlarida Oʻzbekiston Respublikasi Moliya vazirligi huzuridagi Davlat mulki jamgʻarmasiga va viloyatlar hamda Toshkent shahar hokimliklarining moliya boshqarmalariga boʻysunadilar.
“Oʻzdavjamgʻarma” ning hududiy boshqarmalari boshliqlari hokimlar va “Oʻzdavjamgʻarma” raisining taqdimnomasi boʻyicha Oʻzbekiston Respublikasi Moliya vaziri tomonidan lavozimga tayinlanadilar va lavozimdan ozod qilinadilar.
6. Oʻzbekiston Respublikasi Moliya vazirligi huzuridagi Davlat mulki jamgʻarmasi toʻgʻrisidagi Nizom 3-ilovaga muvofiq tasdiqlansin.
7. Oʻzbekiston Respublikasi Moliya vazirligi Davlat mulki jamgʻarmasi apparati va uning hududiy boshqarmalarini saqlash uchun davlat boshqaruvi organlariga zarur mablagʻlar ajratishni nazarda tutsin hamda ikkita yengil avtomobilni saqlash uchun limit ajratsin.
8. Toshkent shahar hokimligi Davlat mulki jamgʻarmasining markaziy apparatini Mustaqillik maydonidagi 20 qavatli maʼmuriy binoga joylashtirsin. Qoraqalpogʻiston Respublikasi Vazirlar Kengashi, viloyatlar va Toshkent shahar hokimlari “Oʻzdavjamgʻarma”ning hududiy boshqarmalarini joylashtirish uchun zarur binolar va aloqa vositalari ajratilishini taʼminlasinlar.
9. Oʻzbekiston Respublikasi Prezidenti huzuridagi Vazirlar Mahkamasining 1992-yil 3-avgustdagi 362-son qarori bilan tasdiqlangan Oʻzbekiston Respublikasi Davlat mulkini boshqarish va xususiylashtirish qoʻmitasi toʻgʻrisidagi Nizomga quyidagi oʻzgartirishlar kiritilsin:
4-bandning oʻn toʻrtinchi xatboshi, 5-bandning sakkizinchi xatboshi va 6-band oʻz kuchini yoʻqotgan deb hisoblansin;
4-bandning toʻqqizinchi xatboshidagi “davlat mulki hisoblangan aksiyalar egasi funksiyasini amalga oshiradi”, “davlat aksiyalarini sotishni amalga oshiradi” soʻzlari chiqarib tashlansin;
4-bandning oʻn beshinchi xatboshi quyidagi tahrirda bayon qilinsin: “Oʻzbekiston Respublikasining muxtor vakili, davlatlararo aksionerlik jamiyatlarining muassisi sifatida ish koʻradi”;
5-bandning toʻqqizinchi xatboshidagi “aksiya egasi Qoʻmita hisoblangan aksiyalar boʻyicha olingan dividendlarning bir qismini davlat tasarrufidan chiqarish va xususiylashtirish boʻyicha tayyorgarlik ishlarini tashkil etish uchun hamda komission yigʻim miqdorida” soʻzlari oʻrniga “Davlat tasarrufidan chiqarish va xususiylashtirishdan tushuvchi mablagʻlarning 5 foizi” soʻzlari yozilsin va soʻngra matn boʻyicha.
10. Oʻzbekiston Respublikasi Vazirlar Mahkamasining 1992-yil 10-fevraldagi 57-son qarori 1-bandining sakkizinchi xatboshidagi “davlat mulkida mavjud boʻlgan aksiyalarning egasi funksiyasini amalga oshiradi”, “davlat aksiyalarini sotishni amalga oshiradi” soʻzlari chiqarib tashlansin.
11. Mazkur qarorning bajarilishini nazorat qilish Vazirlar Mahkamasi Raisining oʻrinbosari oʻrtoq B.S. Hamidov zimmasiga yuklatilsin. Qarorning qanday bajarilayotganligi 1993-yil yanvar oyida, keyinchalik esa — yilning har choragida koʻrib chiqilsin.
Vazirlar Mahkamasining Raisi I. KARIMOV
Toshkent sh.,
1992-yil 10-noyabr,
518-son
Vazirlar Mahkamasining 1992-yil 10-noyabrdagi 518-son qaroriga 1-ILOVA
Oʻzbekiston Respublikasi Moliya vazirligi huzuridagi Davlat mulki jamgʻarmasi markaziy apparati TUZILMASI
Rais
Rais oʻrinbosari
Davlat mulkini ijaraga olish boshqarmasi
Moddiy ishlab chiqarishda davlat mulkini ijaraga olish boʻlimi
Noishlab chiqarish sohasida davlat mulkini ijaraga olish boʻlimi
Aksionerlik jamiyatlarida, ittifoqlar va shirkatlarda Davlat mulki jamgʻarmasi boshqarmasi
Davlat mulkidan foydalanishni metodologik va huquqiy taʼminlash boʻlimi
Tahlil va qimmatbaho qogʻozlar bozori konyunkturasi boʻlimi
Qimmatbaho qogʻozlar bilan aʼmollar oʻtkazish va dividendlardan foydalanish boʻlimi (kaznacheylik)
Rais oʻrinbosari — davlat mulkining hududiy jamgʻarmalari boshqarmalari bilan aloqalar boʻyicha boshqarmasi boshligʻi
Jamgʻarma mablagʻlari tushumlarini hisobga olish va hisobot boʻlimi
Ekspertlar, maslahatchilar va konsultantlar boʻlimi
Respublika mulki jamgʻarmasi boʻlimi
Munitsipal mulk jamgʻarmasi boʻlimi
Ishlar boshqarmasi
Moliya-xoʻjalik boʻlimi
Yuriskonsult
Kadrlar shuʼbasi va birinchi boʻlim
Matbuot xizmati va reklama shuʼbasi
Tahririyat-nashriyot shuʼbasi
Oʻzbekiston Respublikasi Moliya vazirligi huzuridagi Davlat mulki jamgʻarmasining TUZILMASI
Markaziy apparatning umumiy sonini 55 kishi tashkil etadi, shu jumladan:
Rahbariyat — 4 kishi, Davlat mulkini ijaraga olish boshqarmasi — 9 kishi, Aksionerlik jamiyatlari, ittifoqlar va shirkatlarda Davlat mulki jamgʻarmasi boshqarmasi — 13 kishi, Davlat mulkining hududiy jamgʻarmalari bilan aloqalar boʻyicha boshqarma — 16 kishi, Ishlar boshqarmasi — 13 kishi.
Vazirlar Mahkamasining 1992-yil 10-noyabrdagi 518-son qaroriga 2-ILOVA
Oʻzbekiston Respublikasi Moliya vazirligi huzuridagi Davlat mulki jamgʻarmasining hududiy boshqarmalari TUZILMASI
Boshliq
Buxgalteriya
Xoʻjalik mudiri
Yuriskonsult
Kadrlar va maxsus ishlar boʻyicha inspektor
Mashinkada yozuvchi kotib
Boshliq oʻrinbosari
Aksiyalashtirish va qimmatbaho qogʻozlar boʻlimi
Daromadlarni jamlash boʻlimi
Davlat mulkini baholash guruhi
Xodimlar soni:
1. Qoraqalpogʻiston Respublikasi, Andijon, Buxoro, Qashqadaryo, Namangan, Navoiy, Samarqand, Surxondaryo, Toshkent, Fargʻona, Xorazm viloyatlarida va Toshkent shahrida — 18 nafardan
2. Jizzax, Sirdaryo viloyatlarida — 15 nafardan
Jami: 246 nafar
Qoraqalpogʻiston Respublikasi Moliya vazirligi, viloyatlar va Toshkent shahar moliya boshqarmalari huzuridagi “Oʻzdavjamgʻarma” boshqarmasi TUZILMASI
Tuzilma boʻyicha xodimlar soni 18 kishi*.
Izoh: Xodimlarning ushbu soni Qoraqalpogʻiston Respublikasi, mehnatga haq toʻlash boʻyicha guruhdan tashqari, birinchi va ikkinchi guruhga kiruvchi viloyatlar uchun belgilanadi, uchinchi guruh uchun boʻlimlar sonini qisqartirish hisobiga — 15 nafar qilib belgilanadi.
Vazirlar Mahkamasining 1992-yil 10-noyabrdagi 518-son qaroriga 3-ILOVA
Oʻzbekiston Respublikasi Moliya vazirligi huzuridagi Davlat mulki jamgʻarmasi toʻgʻrisida
NI3OM
1. Oʻzbekiston Respublikasi Moliya vazirligi huzuridagi Davlat mulki jamgʻarmasi (“Oʻzdavjamgʻarma”) davlat boshqaruvi organi hisoblanadi va bevosita Oʻzbekiston Respublikasi Moliya vazirligiga boʻysunadi.
2. “Oʻzdavjamgʻarma” oʻz faoliyatida Oʻzbekiston Respublikasi qonunlariga, Oʻzbekiston Respublikasi Oliy Kengashining boshqa qarorlariga, Oʻzbekiston Respublikasi Prezidentining farmonlariga, Oʻzbekiston Respublikasi Prezidenti huzuridagi Vazirlar Mahkamasining qarorlari va farmoyishlariga, Oʻzbekiston Respublikasi Moliya vazirligining buyruqlari va yoʻriqnomalariga, shuningdek, mazkur Nizomga amal qiladi.
3. Quyidagilar “Oʻzdavjamgʻarma”ning asosiy vazifalari hisoblanadi:
davlat tasarrufidan chiqarish va xususiylashtirish, bozor munosabatlarini shakllantirish jarayonida respublikaning mulkiy huquqlari va davlat manfaatlarini himoya qilishni taʼminlash;
davlat mulki obyektlarini mulkchilikning boshqa shakllariga aylantirishdan tushgan mablagʻlarni ustuvor umumdavlat va aholini ijtimoiy himoya qilish vazifalarini hal etishga safarbar qilish.
4. “Oʻzdavjamgʻarma” oʻziga yuklatilgan vazifalarga muvofiq:
aksiyadorlar jamiyatlari, boshqa xoʻjalik jamiyatlari va shirkatlarning sarmoyasidagi unga Oʻzbekiston Respublikasi Davlat mulki qoʻmitasi tomonidan berilgan davlatga tegishli aksiyalar (hissalar, paylar)ga egalik qilish funksiyasini amalga oshiradi;
aksiyadorlar (paychilar)ning umumiy yigʻilishlarida, jamiyatlar va shirkatlarning kengashlari va boshqaruvlarida, unga tegishli aksiyalar (hissalar, paylar) boʻyicha mulk egasi sifatida davlatning vakolatlarini roʻyobga chiqaradi;
davlatlararo aksiyadorlar jamiyatlarida Oʻzbekiston Respublikasiga tegishli boʻlgan aksiyalarning egasi funksiyasini amalga oshiradi, shuningdek, oʻzining vakolatli vakillarini bu jamiyatlar boshqaruvlariga vakil qilib yuboradi;
Oʻzbekiston Respublikasi Davlat mulki qoʻmitasi tomonidan berilgan davlat korxonalari va tashkilotlari ijara shartnomalarining egasi funksiyasini amalga oshiradi;
davlat mulkini davlat tasarrufidan chiqarish va xususiylashtirishdan tushgan mablagʻlarni, davlat korxonalari va tashkilotlarini ijaraga olganlik uchun toʻlovlarni, yangidan tashkil etilgan va Oʻzbekiston Respublikasi Davlat mulki qoʻmitasi tomonidan aksiyadorlar jamiyatlariga aylantirilgan jamiyatlarning aksiyalarini sotishdan tushgan daromadlarni jamlaydi;
davlat korxonalarini davlat tasarrufidan chiqarish va xususiylashtirish boʻyicha komissiyalar ishida ishtirok etadi;
davlat mulkini davlat tasarrufidan chiqarish va xususiylashtirish jarayonidan tushuvchi mablagʻlarni taqsimlash va ulardan foydalanish tartibi toʻgʻrisidagi takliflarni tayyorlaydi va yuqori turuvchi organlarga kiritadi;
oʻziga ishonib topshirilgan davlat mulkidan samarali foydalanish va uni saqlash ustidan nazoratni taʼminlaydi;
oʻz hududiy boshqarmalarining faoliyati ustidan tashkiliy va uslubiy rahbarlikni va nazoratni amalga oshiradi;
“Oʻzdavjamgʻarma” huquq doirasiga kiruvchi masalalar boʻyicha respublika vazirliklari davlat qoʻmitalari, idoralar, konsernlar, uyushmalar, shuningdek mahalliy davlat va boshqaruv organlari bilan oʻzaro hamkorlik qiladi;
davlat tasarrufidan chiqarish va xususiylashtirish jarayonlarini tartibga soluvchi qonunchilik va meʼyoriy aktlar loyihalarini, shuningdek, xoʻjalik faoliyati masalalarini ishlab chiqishda belgilangan tartibda qatnashadi;
5. “Oʻzdavjamgʻarma”ga quyidagi huquqlar beriladi:
davlatga tegishli boʻlgan aksiyalar (hissalar, paylar) boʻyicha boshqarish huquqini davlat boshqaruvining boshqa organlariga, konsernlar, uyushmalar, korporatsiyalar va boshqa xoʻjalik uyushmalariga berish;
davlatga tegishli aksiyalar boʻyicha dividendlarning bir qismini aksiyadorlar jamiyatlariga ularni rivojlantirish va ijtimoiy muammolarni hal qilish uchun shartnoma asosida berish;
aksiyadorlar jamiyatlari, boshqa xoʻjalik jamiyatlari, shirkatlarning aksiyalari (hissalari, paylari)ni sotib olish;
Oʻzbekiston Respublikasi Prezidenti huzuridagi Vazirlar Mahkamasining yoki Oʻzbekiston Respublikasi Davlat mulki qoʻmitasining qarori boʻyicha davlatga tegishli aksiyalarni sotish, shuningdek, ularni davlat tasarrufidan chiqarish va xususiylashtirish maxsus jamgʻarmalarining, xolding kompaniyalarning aksiyalariga almashtirish boʻyicha aʼmollarni bajarish;
vazirliklar, davlat qoʻmitalari, idoralar, hokimliklar, konsernlar, uyushmalar, shuningdek, mulkchilik shaklidan qatʼi nazar, bevosita birlashmalar, korxonalar va tashkilotlardan oʻz faoliyati uchun zarur boʻlgan maʼlumotnoma, statistika va axborot materiallarini olish;
davlat aksiyalari ulushiga muvofiq aksiyalarning bir qismi davlat mulki hisoblangan aksiyadorlar jamiyatlari direktorlarini lavozimga tayinlash va lavozimdan ozod qilishda, yil yakunlari boʻyicha bu jamiyatlar faoliyati natijalarini tasdiqlashda, keyingi yil aʼmollari rejasini tasdiqlashda hamda aksiya egalariga yuklatiladigan boshqa harakatlarda qatnashish.
6. Davlat mulki obyektlarini davlat tasarrufidan chiqarish va xususiylashtirishdan tushadigan mablagʻlar, davlat korxonalari va tashkilotlarini ijaraga olganlik uchun toʻlanadigan haqlar yangidan taʼsis etiladigan va Oʻzbekiston Respublikasi Davlat mulki qoʻmitasi tomonidan qayta tashkil etilgan aksiyadorlar jamiyatlarining aksiyalarini sotishdan tushgan daromadlar Oʻzbekiston Respublikasi Moliya vazirligi tomonidan maxsus ochiladigan schyotda jamlanadi va:
Oʻzbekiston Respublikasi qarzlarini toʻlashga;
Oʻzbekiston Respublikasi mintaqalarining ijtimoiy-iqtisodiy rivojlanishini tenglashtirishni mablagʻ bilan taʼminlashga;
qonun bilan belgilangan tartibda tasdiqlangan davlat tasarrufidan chiqarish va xususiylashtirish dasturlarida nazarda tutilgan boshqa maqsadlarga yoʻnaltiriladi;
Davlat mulkini davlat tasarrufidan chiqarish va xususiylashtirishdan tushadigan mablagʻlarni toʻlash, ularni taqsimlash, ulardan foydalanish, hisobga olish va tushgan mablagʻlarni nazorat qilish tartibi Oʻzbekiston Respublikasi Prezidenti huzuridagi Vazirlar Mahkamasi tomonidan tasdiqlangan Nizomga muvofiq amalga oshiriladi.
7. “Oʻzdavjamgʻarma” Qoraqalpogʻiston Respublikasi Moliya vazirligi, viloyatlar, Toshkent shahar hokimliklari moliya boshqarmalari huzurida belgilangan tartibda oʻz hududiy boshqarmalarini tashkil etadi hamda ularning faoliyatiga rahbarlikni amalga oshiradi. Hududiy boshqarmalar bevosita “Oʻzdavjamgʻarma”ga, shuningdek, huzurida tashkil etilgan moliyaviy organlarga boʻysunadilar, yuridik shaxs hisoblanadilar, bankda oʻz hisob-kitob schyotlariga va Oʻzbekiston Respublikasi Davlat gerbi tasvirlangan muhrga ega boʻladilar.
Hududiy boshqarmalar boshliqlari hokimliklar va “Oʻzdavjamgʻarma” raisining taqdimnomasi boʻyicha Oʻzbekiston Respublikasi Moliya vaziri tomonidan lavozimga tayinlanadilar va lavozimdan ozod qilinadilar.
8. “Oʻzdavjamgʻarma”ga Oʻzbekiston Respublikasi Prezidenti huzuridagi Vazirlar Mahkamasi tomonidan tayinlanadigan Oʻzbekiston Respublikasi Moliya vazirining oʻrinbosari — Jamgʻarma raisi boshchilik qiladi;
“Oʻzdavjamgʻarma” raisi Jamgʻarma zimmasiga yuklatilgan vazifalarning bajarilishi va uning oʻz funksiyalarini amalga oshirishi uchun shaxsan javob beradi, Jamgʻarma markaziy apparati tarkibiy boʻlinmalari rahbarlarini lavozimga tayinlaydi va lavozimdan ozod qiladi va ularning shaxsan javobgarligi darajasini belgilaydi.
“Oʻzdavjamgʻarma” raisi Oʻzbekiston Respublikasi Moliya vaziri tomonidan tayinlanadigan ikki nafar oʻrinbosarga ega boʻladi. Oʻrinbosarlar oʻrtasida vazifalarni taqsimlash “Oʻzdavjagʻarma” raisi tomonidan amalga oshiriladi.
“Oʻzdavjamgʻarma”da boshqaruv tashkil etiladi, uning tarkibiga “Oʻzdavjamgʻarma” raisi, uning ikki oʻrinbosari va boshqaruv aʼzolari kiradi, ularning shaxsiy tarkibi Oʻzbekiston Respublikasi Moliya vazirligi hayʼati tomonidan tasdiqlanadi.
9. “Oʻzdavjamgʻarma” markaziy apparatining tuzilmasi va xodimlari soni Oʻzbekiston Respublikasi Prezidenti huzuridagi Vazirlar Mahkamasi tomonidan tasdiqlanadi.
“Oʻzdavjamgʻarma” raisi xodimlar soni va mehnatga haq toʻlash fondi doirasida tasdiqlangan tuzilmaga oʻzgartish kiritish toʻgʻrisida belgilangan tartibda taklif kiritish huquqiga egadir.
“Oʻzdavjamgʻarma” markaziy apparati tarkibiy boʻlinmalari va uning hududiy boshqarmalari toʻgʻrisidagi Nizom “Oʻzdavjamgʻarma” raisi tomonidan tasdiqlanadi.
10. “Oʻzdavjamgʻarma” raisi oʻz huquq doirasida barcha vazirliklar, davlat qoʻmitalari, idoralar, mahalliy boshqaruv organlari, mulkchilik shaklidan qatʼi nazar, konsernlar, uyushmalar va fuqarolar tomonidan bajarilishi majburiy boʻlgan buyruqlar, yoʻriqnomalar va farmoyishlar chiqaradi.
11. “Oʻzdavjamgʻarma” raisi, uning oʻrinbosarlari, markaziy apparat xodimlari, shuningdek, hududiy boshqarmalar rahbarlari va xodimlari bevosita yoki boshqa shaxslar orqali “Oʻzdavjamgʻarma” va uning hududiy boshqarmalari tomonidan sotish uchun tayyorlanadigan qimmatbaho qogʻozlarni sotib olish huquqiga ega emaslar.
Mazkur cheklashlar qayd qilib oʻtilgan mansabdor shaxslar ishlaydigan butun muddat davomida va ular egallab turgan lavozimlaridan boʻshaganlaridan keyin ikki yil mobaynida amal qiladi.
12. “Oʻzdavjamgʻarma” yuridik shaxs hisoblanadi, bankda oʻz hisob-kitob schyotiga, Oʻzbekiston Respublikasining Davlat gerbi tasvirlangan va oʻz nomi oʻzbek va rus tillarida yozilgan muhrga ega boʻladi.