“Oʻzbekiston Respublikasining fuqaroligi toʻgʻrisida”gi Oʻzbekiston Respublikasi Qonunini amalga kiritish tartibi toʻgʻrisida (633-XII-son)

02.07.1992

Oʻzbekiston Respublikasi Oliy Kengashining

Qarori

Oʻzbekiston Respublikasi Oliy Kengashi qaror qiladi:

1. “Oʻzbekiston Respublikasining fuqaroligi toʻgʻrisida”gi Oʻzbekiston Respublikasi Qonuni matbuotda eʼlon qilingan kundan boshlab amalga kiritilsin.

2. Ushbu Qonun u kuchga kirgandan keyin yuzaga keladigan huquqiy munosabatlarga nisbatan qoʻllaniladi.

3. Oʻzbekiston Respublikasining qonunlari “Oʻzbekiston Respublikasining fuqaroligi toʻgʻrisida”gi Oʻzbekiston Respublikasi Qonuniga muvofiq holga keltirilguniga qadar ushbu Qonunga zid boʻlmagan amaldagi qonun hujjatlari qoʻllanaveradi.

4. Oʻzbekiston Respublikasi fuqarosining pasporti haqidagi hamda tugʻilganlik toʻgʻrisidagi guvohnoma haqidagi nizomlar tasdiqlangunga va ularning namunalari tayyorlangunga qadar mavjud hujjatlar amalda boʻlaveradi.

5. Oʻzbekiston Respublikasi Prezidenti huzuridagi Vazirlar Mahkamasi:

Oʻzbekiston Respublikasi Hukumatining qarorlarini ushbu Qonunga muvofiq holga keltirsin;

ushbu Qonunga zid boʻlmagan idoraviy normativ hujjatlar qayta koʻrib chiqilishini va bekor qilinishini taʼminlasin;

Oʻzbekiston Respublikasi fuqarosining pasporti va tugʻilganlik toʻgʻrisidagi guvohnomasi haqidagi nizomlarni tasdiqlasin;

Oʻzbekiston Respublikasining fuqaroligini tasdiqlovchi hujjatlar berishga doir 5- va 42-moddalarning bosqichma-bosqich joriy etilishini taʼminlasin.

Oʻzbekiston Respublikasi Oliy Kengashining Raisi Sh. YOʻLDOShEV

Toshkent sh.,

1992-yil 2-iyul,

633-XII-son