“Mening fikrim” veb-portaliga joylashtirilgan “Mobil qurilmalarning IMEI kodlarini roʻyxatdan oʻtkazishni soddalashtirish haqida”gi elektron jamoaviy murojaatni koʻrib chiqish toʻgʻrisida (312-IV-son)

03.06.2020

Oʻzbekiston Respublikasi Oliy Majlisi Qonunchilik palatasining

Qarori

“Oʻzbekiston Respublikasi Oliy Majlisi Qonunchilik palatasining Reglamenti toʻgʻrisida”gi Oʻzbekiston Respublikasi Qonunining 6-moddasiga muvofiq hamda Oliy Majlis Qonunchilik palatasining Innovatsion rivojlanish, axborot siyosati va axborot texnologiyalari masalalari qoʻmitasi ishchi guruhi tomonidan “Mobil qurilmalarning IMEI-kodlarini roʻyxatdan oʻtkazishni soddalashtirish haqida”gi elektron jamoaviy murojaat yuzasidan tayyorlangan maʼruzani eshitib,u boʻyicha oʻtkazilgan muhokamalar asosida Oʻzbekiston Respublikasi Oliy Majlisi Qonunchilik palatasi Kengashi qaror qiladi:

1. Innovatsion rivojlanish, axborot siyosati va axborot texnologiyalari masalalari qoʻmitasi ishchi guruhi tomonidan “Mobil qurilmalarning IMEI-kodlarini roʻyxatdan oʻtkazishni soddalashtirish haqida”gi elektron jamoaviy murojaat yuzasidan tayyorlangan maʼruza maʼlumot uchun qabul qilinsin hamda Oʻzbekiston Respublikasi Vazirlar Mahkamasiga yuborilsin.

2. Mobil qurilmalarning IMEI-kodlarini roʻyxatdan oʻtkazish boʻyicha joriy etilgan tizim:

a) ishlatiladigan milliy axborot tizimlari va axborot resurslarining axborot xavfsizligi darajasini oshirishga;

b) fuqarolar tomonidan turli xil elektron xizmatlarni olishi uchun xavfsiz platformani shakllantirishga;

v) fuqarolar tomonidan yoʻqotilgan yoki oʻgʻirlatib qoʻyilgan mobil qurilmalardan foydalanishning oldini olishga;

g) radiotexnik uskunalarning import oqimini legallashtirish va ularni standartlashtirishga keng imkon yaratishi eʼtiborga olinsin.

3. Mobil qurilmalarning IMEI-kodlarini roʻyxatdan oʻtkazish amaliyotini Vazirlar Mahkamasining 2018-yil 22-oktabrdagi “Oʻzbekiston Respublikasida mobil qurilmalarni hisobga olish tizimini tartibga solish chora-tadbirlari toʻgʻrisida” 847-sonli hamda 2019-yil 17-sentabrdagi “Oʻzbekiston Respublikasi hududida foydalanilayotgan, sotish yoki shaxsiy foydalanish uchun olib kelinadigan va ishlab chiqariladigan mobil qurilmalarni roʻyxatdan oʻtkazish tartibi toʻgʻrisida”gi 778-sonli qarorlarida belgilangan Qoidalarga asosan davom ettirish maqsadga muvofiq va asosli ekanligi qayd etilsin.

4. Oʻzbekiston Respublikasi Vazirlar Mahkamasiga:

Oliy Majlis Qonunchilik palatasining Innovatsion rivojlanish, axborot siyosati va axborot texnologiyalari masalalari qoʻmitasi ishchi guruhi tomonidan “Mobil qurilmalarning IMEI-kodlarini roʻyxatdan oʻtkazishni soddalashtirish haqida”gi elektron jamoaviy murojaat yuzasidan tayyorlangan maʼruzasida taqdim etilgan taklif va kamchiliklarni inobatga olgan holda mobil qurilmalarning IMEI-kodlarini roʻyxatdan oʻtkazishtizimini yanada takomillashtirish boʻyicha ishlarni davom ettirish tavsiya etilsin.

Oʻzbekiston Respublikasi Oliy Majlisi Qonunchilik palatasi Spikeri N. ISMOILOV

Toshkent sh.,

2020-yil 3-iyun,

312-IV-son