Oʻzbekiston Respublikasida 2023-yilda aholini roʻyxatga olishga tayyorgarlik koʻrish va uni oʻtkazish chora-tadbirlari toʻgʻrisida (710-son)

11.11.2020

Oʻzbekiston Respublikasi Vazirlar Mahkamasining

qarori

“Aholini roʻyxatga olish toʻgʻrisida”gi Oʻzbekiston Respublikasi Qonunida va Oʻzbekiston Respublikasi Prezidentining “Oʻzbekiston Respublikasida 2022-yilda aholini roʻyxatga olishni oʻtkazish konsepsiyasini tasdiqlash toʻgʻrisida” 2019-yil 5-fevraldagi PF-5655-son Farmonida belgilangan vazifalar ijrosini samarali tashkil etish, aholini roʻyxatga olishning tashkiliy va metodik prinsiplarini, dasturiy-texnik taʼminoti va maʼlumotlarni qayta ishlashning texnologik jarayonlarini sinovdan oʻtkazish, davlat va xoʻjalik boshqaruvi organlari, mahalliy davlat hokimiyati organlari rahbarlarining aholini roʻyxatga olishga tayyorgarlik koʻrish va uni oʻtkazish jarayonlaridagi masʼuliyatini yanada oshirish maqsadida Vazirlar Mahkamasi qaror qiladi:

1. Belgilansinki:

Oʻzbekiston Respublikasida aholini roʻyxatga olish 2023-yil 1 — 25-noyabr kunlari;

Oʻzbekiston Respublikasida aholini sinov tariqasida roʻyxatga olish tadbiri 2021-yil 1 — 25-noyabr kunlari Andijon viloyatining Xoʻjaobod tumani, Toshkent viloyatining Yuqori Chirchiq tumani, Xorazm viloyatining Xiva shahri hamda Toshkent shahrining Yashnobod tumanida amalga oshiriladi.

2. Quyidagilar:

Oʻzbekiston Respublikasida 2023-yilda aholini roʻyxatga olishga tayyorgarlik koʻrish va uni oʻtkazish tartibi toʻgʻrisidagi nizom 1-ilovaga muvofiq;

Oʻzbekiston Respublikasida 2021-yilda sinov tariqasida aholini roʻyxatga olish dasturi 2-ilovaga muvofiq;

Oʻzbekiston Respublikasida 2021-yilda sinov tariqasida aholini roʻyxatga olish varagʻi shakllari roʻyxati 3-ilovaga muvofiq;

Aholini roʻyxatga olish jarayonlariga jismoniy va yuridik shaxslarni jalb etish va ularga haq toʻlash tartibi toʻgʻrisidagi nizom 4-ilovaga muvofiq;

Oʻzbekiston Respublikasida 2023-yilda aholini roʻyxatga olishga tayyorgarlik koʻrish va uni oʻtkazish hamda natijalarini eʼlon qilish boʻyicha “Yoʻl xaritasi” 5-ilovaga muvofiq tasdiqlansin.

3. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari huzuridagi Oʻzbekiston Respublikasida 2023-yilda aholini roʻyxatga olishni oʻtkazishga koʻmaklashish boʻyicha hududiy komissiyalar 2021-yilda (sinov tariqasida) va 2023-yilda aholini roʻyxatga olishga tayyorgarlik koʻrish va uni oʻtkazish bilan bogʻliq chora-tadbirlar belgilangan muddatlarda va sifatli amalga oshirilishini taʼminlasinlar.

4. Oʻzbekiston Respublikasi Davlat statistika qoʻmitasi Axborot texnologiyalari va kommunikatsiyalarini rivojlantirish vazirligi bilan birgalikda:

aholini roʻyxatga olish maxsus dasturiy taʼminoti va moddiy-texnika vositalarini sotib olish, roʻyxatga olish natijalarini qayta ishlash tuzilmalari uchun server, kompyuter, printer, skaner va boshqa ofis texnikasi bilan taʼminlashni nazarda tutuvchi texnik hujjat loyihalari ishlab chiqilishini va belgilangan tartibda ekspertizadan oʻtkazilishini;

“Davlat xaridlari toʻgʻrisida”gi Oʻzbekiston Respublikasi Qonuniga muvofiq 2020 — 2023-yillarda xarid ishlarini tashkil etgan holda hududiy statistika organlarini tarmoq uskunalari, aloqa vositalari va yuqori tezlikdagi aloqa kanallari bilan taʼminlasin.

5. Oʻzbekiston Respublikasi Davlat soliq qoʻmitasi huzuridagi Kadastr agentligi Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda 2021-yil 1-martga qadar (sinov tariqasida) va 2022-yil 1-iyunga qadar (asosiy) aholini roʻyxatga olish uchun zarur boʻlgan miqdorda kartografik materiallar (shahar va qishloq aholi punktlarining sxematik rejalari va xaritalari) bilan taʼminlasin.

6. Qoraqalpogʻiston Respublikasi Vazirlar Kengashi, viloyatlar va Toshkent shahar, tuman va shaharlar hokimliklari, Oʻzbekiston Respublikasi Davlat soliq qoʻmitasi huzuridagi Kadastr agentligi, Mahalla va nuroniylarni qoʻllab-quvvatlash vazirligi 2021-yil 1-aprelga qadar aholi punktlari va koʻchalar nom belgilarini oʻrnatish, xonadon va uylarni toʻliq raqamlash ishlarini yakuniga yetkazsin va 2023-yilda aholini roʻyxatga olish davriga qadar muntazam ravishda yangilab borilishini taʼminlasin.

7. Oʻzbekiston Respublikasi Milliy gvardiyasi Ichki ishlar vazirligi bilan birgalikda 2021-yilda (sinov tariqasida) va 2023-yilda oʻtkaziladigan aholini roʻyxatga olish ishlariga jalb etiladigan xodimlar hamda roʻyxatga olish uchun ajratilgan bino va inshootlar xavfsizligini taʼminlasin.

8. Oʻzbekiston Respublikasi Davlat statistika qoʻmitasi har yili belgilangan tartibda tegishli manfaatdor vazirliklar va idoralar bilan birgalikda 2021-yilda (sinov tariqasida) va 2023-yilda aholini roʻyxatga olishni oʻtkazishga tayyorgarlik koʻrish, uni oʻtkazish, maʼlumotlarni qayta ishlash va natijalarini eʼlon qilish bilan bogʻliq xarajatlar smetasini 2020 — 2025-yillarda Oʻzbekiston Respublikasi Davlat budjeti parametrlarida nazarda tutilgan mablagʻlar doirasida ishlab chiqsin hamda tasdiqlash uchun Vazirlar Mahkamasiga kiritsin.

9. Oʻzbekiston Respublikasi Davlat statistika qoʻmitasi Milliy axborot agentligi va Oʻzbekiston Milliy teleradiokompaniyasi bilan birgalikda ushbu qarorning maqsad va vazifalari ommaviy axborot vositalari va Butun Jahon internet axborot tarmogʻida keng yoritilishini tashkil etsin.

10. Mazkur qarorning bajarilishini nazorat qilish Oʻzbekiston Respublikasi Bosh vazirining moliya-iqtisodiyot va kambagʻallikni qisqartirish masalalari boʻyicha oʻrinbosari — Oʻzbekiston Respublikasi iqtisodiy taraqqiyot va kambagʻallikni qisqartirish vaziri J.A. Qoʻchqorov va Oʻzbekiston Respublikasi Davlat statistika qoʻmitasi raisi B.A. Begalov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2020-yil 11-noyabr,

710-son

Vazirlar Mahkamasining 2020-yil 11-noyabrdagi 710-son qaroriga 1-ILOVA

Oʻzbekiston Respublikasida 2023-yilda aholini roʻyxatga olishga tayyorgarlik koʻrish va uni oʻtkazish tartibi toʻgʻrisida

NIZOM

1-bob. Umumiy qoidalar

1. Ushbu Nizom Oʻzbekiston Respublikasida 2023-yilda aholini roʻyxatga olishga tayyorgarlik koʻrish, oʻtkazish, natijalarini tahlil qilish va eʼlon qilish tartibini belgilaydi.

2. Roʻyxatga olish 2023-yil 1 — 25-noyabr kunlari oʻtkaziladi va roʻyxatga olish boshlanishining aniq payti 2023-yil 1-noyabr soat 00.00 etib belgilanadi (keyingi oʻrinlarda — roʻyxatga olish sanasi). Roʻyxatga olishni oʻtkazish davomiyligi — 25 kun.

Respondentlarning shaxsga doir maʼlumotlarini yigʻishda roʻyxatga olish sanasidan keyin sodir boʻlgan demografik holatlar hisobga olinmaydi. 2023-yil 1-noyabrdan keyin tugʻilgan bolalar uchun roʻyxatga olish varagʻi shakllari va boshqa roʻyxatga olish hujjatlari toʻldirilmaydi, biroq ushbu sanadan keyin vafot etgan shaxslar uchun toʻldiriladi. Bunda vafot etgan shaxs toʻgʻrisidagi maʼlumotlar uning voyaga yetgan, muomala layoqatiga ega oila aʼzolari yoki mahalla idorasidagi mavjud maʼlumotlar asosida toʻldiriladi.

3. Shaxsga doir maʼlumotlarni yigʻish:

respondentlar yashaydigan (vaqtincha boʻlib turgan) turar joy va noturar joylarga, binolarga tashrif buyurgan holda uyma-uy yurib soʻrov oʻtkazish orqali amalga oshiriladi. Roʻyxatga olish varagʻi shakllari roʻyxatga oluvchi xodimlar tomonidan respondentlarning soʻzlari asosida toʻldiriladi;

aholini roʻyxatga olishni oʻtkazish davrida yashash (turgan) joyida hozir boʻlmagan yoki voyaga yetmagan shaxslar (respondentlar) toʻgʻrisidagi shaxsga doir maʼlumotlar mazkur uy xoʻjaligining voyaga yetgan aʼzolari tomonidan maʼlum qilinadi. Oʻziga nisbatan vasiylik yoki homiylik belgilangan shaxslar toʻgʻrisidagi shaxsga doir maʼlumotlar ularning vasiylari yoxud homiylari tomonidan maʼlum qilinadi;

yashab turgan xonadonida (joyida) roʻyxatdan oʻtishni istamagan respondentlar uchun roʻyxatga olish soʻrovnomalarini toʻldirish tuman (shahar) hokimliklar tomonidan ajratilgan bino yoki xonalarda joylashgan statsionar uchastkalarda (keyingi oʻrinlarda — statsionar uchastkalar) amalga oshiriladi;

respondent roʻyxatga olish varagʻidagi savollarga javob berishni rad etgan taqdirda, roʻyxatga olish varagʻi fuqarolarning oʻzini oʻzi boshqarish organlaridagi yoki mahalliy davlat hokimiyati organlaridagi mavjud maʼlumotlar asosida toʻldiriladi;

gapirishi va eshitishida nuqsoni boʻlgan fuqarolarning shaxsga doir maʼlumotlarini yigʻish tegishli hudud boʻyicha nogironlik jamiyatlarining xodimlari yoki ushbu shaxslar bilan muomala qilish imkoniyati mavjud boʻlgan shaxslar koʻmagida amalga oshiriladi.

Shaxsga doir maʼlumotlarni yigʻish axborot xavfsizligini taʼminlash talablarini hisobga olgan holda axborot-kommunikatsiya texnologiyalaridan foydalanish orqali ham amalga oshiriladi.

Aholining ayrim toifalari boʻyicha shaxsga doir maʼlumotlarni yigʻish, roʻyxatga olish varagʻi shakllari va boshqa roʻyxatga olish hujjatlarini toʻldirish “Aholini roʻyxatga olish toʻgʻrisida”gi Oʻzbekiston Respublikasi Qonunining 24-moddasiga muvofiq amalga oshiriladi.

4. “Aholini roʻyxatga olish toʻgʻrisida”gi Oʻzbekiston Respublikasi Qonuniga muvofiq Oʻzbekiston Respublikasi fuqarolari, doimiy yoki vaqtincha yashovchi yoxud vaqtincha Oʻzbekiston Respublikasida boʻlib turgan chet el fuqarolari va fuqaroligi boʻlmagan shaxslar, shuningdek, Oʻzbekiston Respublikasida doimiy yashovchi, ammo aholini roʻyxatga olish davrida vaqtincha xorijiy davlat hududida boʻlgan Oʻzbekiston Respublikasi fuqarolari respondent sifatida roʻyxatga olinadi.

5. Aholi soni va uning tarkibini hisoblashda bir yildan ortiq muddatda mamlakat hududida boʻlmagan Oʻzbekiston Respublikasi fuqarolari hamda “Aholini roʻyxatga olish toʻgʻrisida”gi Oʻzbekiston Respublikasi Qonunining 24-moddasi oxirgi xatboshisida nazarda tutilgan shaxslar hisobga olinmaydi, ammo uchinchi xatboshida nazarda tutilgan shaxslar va bir yildan koʻp muddatda respublika hududida vaqtincha yashab kelayotgan xorijiy davlatlar fuqarolari va fuqaroligi boʻlmagan shaxslar hisobga olinadi.

6. Respondentlar oʻzining (doimiy yoki vaqtincha) yashash joyi boʻyicha roʻyxatga olinadi. Kunlik tungi dam olishining koʻproq qismini oʻtkazadigan uy, kvartira, yashash uchun foydalanilayotgan boshqa turar joy yoki noturar joy bino yashash joyi hisoblanadi.

Bu joy respondent roʻyxatdan oʻtgan (roʻyxatga qoʻyilgan) manzil bilan mos kelishi yoki mos kelmasligi ham mumkin.

7. Aholini roʻyxatga olish varagʻi shakllari 2023-yilda Oʻzbekiston Respublikasida aholini roʻyxatga olish dasturiga kiritilgan savollardan tashkil topadi.

2-bob. Aholini roʻyxatga olish jarayonida ishtirok etuvchi davlat organlari

8. Aholini roʻyxatga olish ishlariga tayyorgarlik koʻrish va uni oʻtkazish quyidagi organlar tomonidan amalga oshiriladi:

2023-yilda aholini roʻyxatga olishni oʻtkazishga koʻmaklashish boʻyicha respublika komissiyasi (keyingi oʻrinlarda — respublika komissiyasi);

2023-yilda aholini roʻyxatga olishni oʻtkazishga koʻmaklashish boʻyicha hududiy komissiyalar (keyingi oʻrinlarda — hududiy komissiyalar);

davlat statistika organlari;

tegishli vazirliklar va idoralar.

Oʻzbekiston Respublikasi Davlat statistika qoʻmitasi (keyingi oʻrinlarda — Qoʻmita) Oʻzbekiston Respublikasida aholini roʻyxatga olishni oʻtkazishga koʻmaklashish boʻyicha respublika komissiyasining ishchi organi hisoblanadi.

9. Qoʻmita aholini roʻyxatga olish sohasidagi maxsus vakolatli davlat organi sifatida quyidagilarni amalga oshiradi:

aholini roʻyxatga olish boʻyicha metodika va qoʻllanma materiallar tayyorlaydi hamda belgilangan tartibda tasdiqlaydi;

aholini roʻyxatga olish hujjatlari shakllarini, roʻyxatga oluvchi xodimlar guvohnomasi shaklini ishlab chiqadi;

aholini roʻyxatga olish varagʻidagi maʼlumotlarni kiritish, qayta ishlash va yakuniy maʼlumotlarni oʻz vaqtida olish boʻyicha avtomatlashtirilgan axborot tizimi ishlab chiqilishini tashkil qiladi;

aholini roʻyxatga olish hujjatlarini chop etish, moddiy-texnik taʼminot vositalarini tayyorlash (sotib olish) va ularni oʻz vaqtida hududlarga yetkazib berish ishlarini tashkil etadi;

aholini roʻyxatga oluvchi xodimlarni tanlab olish va oʻqitish tartibini belgilaydi, Qoraqalpogʻiston Respublikasi, viloyatlar va Toshkent shahar statistika boshqarmalari (keyingi oʻrinlarda — hududiy statistika boshqarmalari) xodimlarini oʻqitishni tashkil etadi;

Oʻzbekiston Respublikasi Davlat soliq qoʻmitasi huzuridagi Kadastr agentligi bilan birgalikda aholini roʻyxatga olishda foydalaniladigan kartografik materiallarni tayyorlash boʻyicha texnik shartlarni ishlab chiqadi;

aholini roʻyxatga olishga tayyorgarlik koʻrish va uni oʻtkazish hamda maʼlumotlarni kiritish va qayta ishlash uchun vaqtinchalik binolarni ajratish boʻyicha qoʻllanmani ishlab chiqadi va tasdiqlaydi;

aholini roʻyxatga olish varagʻi shakllari tayyorlanishini va hududlarga yetkazilishini taʼminlaydi;

Oʻzbekiston Milliy axborot agentligi va Oʻzbekiston Milliy teleradiokompaniyasi bilan birgalikda 2023-yilda aholini roʻyxatga olishni oʻtkazish haqida aholini xabardor qilish ishlarini (shu jumladan, SMS-xabarnoma, audio va video reklama materiallari, nashrlar va boshqalar) muvofiqlashtiradi;

aholini roʻyxatga olish jarayonlari hududiy komissiyalar bilan birgalikda sifatli oʻtkazilishini tashkil etishga koʻmaklashadi;

shaxsga doir maʼlumotlarga ishlov berish tartibini belgilaydi va ularga ishlov berishni amalga oshiradi.

10. Oʻzbekiston Respublikasi Davlat xavfsizlik xizmati, Milliy gvardiya, Mudofaa vazirligi, Ichki ishlar vazirligi, Favqulodda vaziyatlar vazirligi, Tashqi ishlar vazirligi, Sogʻliqni saqlash vazirligi, Xalq taʼlimi vazirligi “Aholini roʻyxatga olish toʻgʻrisida”gi Oʻzbekiston Respublikasi Qonunining 24-moddasida belgilangan aholining ayrim toifalarini roʻyxatga olish ishlarini tashkil etadi.

11. Qoraqalpogʻiston Respublikasi Vazirlar Kengashi, viloyatlar va Toshkent shahar, tumanlar (shaharlar) hokimliklari:

maʼmuriy-hududiy birliklar chegaralarini hisobga olib aholi punktlarida yashovchi aholi sonini koʻrsatgan holda aholi punktlarining toʻliq roʻyxati tuzilishini taʼminlaydi;

hududlarni aholi sonidan kelib chiqib belgilangan tartibda roʻyxatga olish, instruktorlik va hisob uchastkalariga boʻlinishini taʼminlaydi hamda ularning faoliyatini tashkil etadi;

maʼmuriy-hududiy birliklarda koʻchalarning nomlari, uylar va kvartiralarning raqamlari koʻrsatilgan koʻrsatkichlar boʻlishini taʼminlaydi;

jalb etilgan roʻyxatga oluvchi xodimlar tarkibini tasdiqlaydi;

aholini roʻyxatga oluvchi xodimlarni tanlab olish va oʻqitishni tashkil etadi;

aholini roʻyxatga olishni oʻtkazishga jalb etilgan shaxslarning oʻqishi va ishlashi uchun yaroqli boʻlgan mebellar va aloqa vositalari bilan jihozlangan vaqtinchalik binolar yoki xonalar ajratilishini taʼminlaydi;

aholini roʻyxatga olish varagʻi shakllari va boshqa hujjatlarni vaqtinchalik saqlash uchun qoʻriqlanadigan binolar yoki xonalar ajratilishini taʼminlaydi;

zarur transport va aloqa vositalari taqdim etilishini taʼminlaydi;

aholini roʻyxatga olishni sifatli oʻtkazishni taʼminlaydi;

aholini roʻyxatga olish yakuni boʻyicha belgilangan tartibda aholini roʻyxatga olish varagʻi shakllari va tegishli hujjatlarning birlamchi maʼlumotlari elektron bazaga kiritish uchun topshirilishini taʼminlaydi;

aholini roʻyxatga olishni oʻtkazishda xavfsizlikni taʼminlash boʻyicha ishlarning muvofiqlashtirilishini tashkil etadi.

12. Oʻzbekiston Respublikasi Ichki ishlar vazirligi va Milliy gvardiya:

aholini roʻyxatga olishni oʻtkazishga jalb etilgan shaxslarning xavfsizligini;

jinoyatchilik koʻp uchraydigan hududlar va tarbiyasi ogʻir oilalar roʻyxatlari shakllantirilishini;

oʻz xodimlarining roʻyxatga oluvchi xodimlar bilan birgalikda roʻyxatga olish jarayonida ishtirok etishini;

aholini roʻyxatga olishga tayyorgarlik koʻrish va uni oʻtkazish davrida hududlarda tinchlik va osoyishtalikni, jamoat tartibini, fuqarolar xavfsizligini taʼminlaydi.

13. Zarur hollarda aholini roʻyxatga olishga tayyorgarlik koʻrish va uni oʻtkazish doirasidagi ayrim ishlar va tadbirlarni bajarishga koʻmaklashish uchun boshqa vazirliklar, idoralar va tashkilotlar xodimlari qoʻshimcha ravishda jalb etilishi mumkin.

14. Aholini roʻyxatga olishga tayyorgarlik koʻrish va uni oʻtkazish bilan bogʻliq xarajatlarni moliyalashtirish Oʻzbekiston Respublikasi Davlat budjeti mablagʻlari va qonunchilik hujjatlari bilan taqiqlanmagan boshqa mablagʻlar hisobiga amalga oshiriladi.

Moliyalashtirish uchun zarur mablagʻlar hisob-kitoblari Qoʻmita, Oʻzbekiston Respublikasi Moliya vazirligi, Oʻzbekiston Respublikasi Davlat soliq qoʻmitasi huzuridagi Kadastr agentligi, Iqtisodiy taraqqiyot va kambagʻallikni qisqartirish vazirligi va boshqa masʼul idoralar tomonidan tayyorlanadi.

3-bob. Aholini roʻyxatga olishga tayyorgarlik koʻrish

15. Oʻzbekiston Respublikasi Davlat soliq qoʻmitasi huzuridagi Kadastr agentligi aholini roʻyxatga olish ishtirokchilarini 2023-yilda asosiy aholini roʻyxatga olishga tayyorgarlik koʻrish va uni oʻtkazish uchun zarur kartografik materiallar bilan taʼminlaydi.

2023-yilda aholini roʻyxatga olish uchun kartografik materiallar oʻz ichiga quyidagilarni oladi:

Qoraqalpogʻiston Respublikasi, viloyatlar va Toshkent shahrining maʼmuriy-hududiy xaritalari;

tuman va shaharlar maʼmuriy-hududiy xaritalari;

shaharlar, shaharchalar, qishloq aholi punktlari va mahallalarning sxematik rejalari.

16. Aholini roʻyxatga olishni oʻtkazishning tashkiliy rejasi (keyingi oʻrinlarda — tashkiliy reja) hududiy komissiyalar tomonidan tumanlar (shaharlar), Qoraqalpogʻiston Respublikasi, viloyatlar va Toshkent shahri boʻyicha alohida tuziladi.

Roʻyxatga olish uchastkalarining chegaralari har bir roʻyxatga olish uchastkasiga toʻgʻri keladigan yuklamani (qishloq joylarda oʻrtacha 8 750 kishi va shaharlarda oʻrtacha 11 250 kishi) hisobga olgan holda maʼmuriy-hududiy boʻlinish yaxlitligini (tuman yoki shahar darajasida) saqlash sharti bilan belgilanadi.

Roʻyxatga olish uchastkalari har bir instruktorga toʻgʻri keladigan yuklamani (qishloq joylarda oʻrtacha 1 750 kishi va shaharlarda oʻrtacha 2 250 kishi) va aholi punktidagi aholi zichligini hisobga olgan holda instruktorlik uchastkalariga boʻlinadi.

Instruktorlik uchastkalari har bir roʻyxatga oluvchiga toʻgʻri keladigan yuklamadan (qishloq joylarda oʻrtacha 350 kishi va shaharlarda oʻrtacha 450 kishi) kelib chiqib hisob uchastkalariga boʻlinadi.

Hududiy komissiyalar va respublika komissiyasi qaroriga asosan borish qiyin boʻlgan va olis hududlarda hisob uchastkasidagi aholining soni oʻrtacha 250 nafardan iborat boʻlishi mezon sifatida olinadi.

Ayrim hollarda uchastkalarni tuzishda roʻyxatga oluvchiga toʻgʻri keladigan oʻrtacha yuklama belgilangan normalardan kam yoki koʻp boʻlishi mumkin.

Hisob uchastkasi, instruktorlik va roʻyxatga olish uchastkalari sonidan kelib chiqib roʻyxatga olish jarayonlariga vaqtincha jalb etiladigan xodimlar soni aniqlanadi.

Tashkiliy rejani tuzishda koʻzda tutilmagan holatlarni (betoblik, baxtsiz hodisalar, yuklatilgan vazifalarni toʻliq bajarmaslik va boshqalar) hisobga olgan holda hisob uchastkasi, instruktorlik va roʻyxatga olish uchastkalariga vaqtincha jalb etiladigan xodimlar umumiy sonining 10 (oʻn) foizi miqdorida ish haqi toʻlanmagan holda kadrlar zaxirasi shakllantiriladi.

Koʻzda tutilmagan holatlar yuzaga kelganda roʻyxatga olish jarayonlariga zaxiradan jalb etilgan xodimlarga belgilangan tartibda ish haqi toʻlanadi.

17. Tuman va shaharlar boʻyicha tayyorlangan tashkiliy rejalar tuman va shaharlar hokimliklari huzuridagi hududiy komissiyalar tomonidan tasdiqlanadi va Qoraqalpogʻiston Respublikasi, viloyatlar va Toshkent shahar statistika boshqarmalariga taqdim etiladi.

Qoraqalpogʻiston Respublikasi, viloyatlar va Toshkent shahri boʻyicha tayyorlangan tashkiliy rejalar hududiy komissiyalar tomonidan tasdiqlanadi va Qoʻmitaga taqdim etiladi.

Hududlar boʻyicha tuzilgan va tasdiqlangan tashkiliy rejalar umumlashtirilgan holda tasdiqlash uchun respublika komissiyasiga kiritiladi.

18. Roʻyxatga olish ishlarini tashkil etish va oʻtkazilishini muvofiqlashtirish, hududlar darajasida oʻzaro hamkorlikni taʼminlash hududiy komissiyalar tomonidan amalga oshiriladi.

19. Hududiy ichki ishlar organlari tomonidan 2023-yil sentabr oyidan kechiktirmagan holda jinoyatchilik koʻp uchraydigan hududlar va tarbiyasi ogʻir oilalar toʻgʻrisidagi maʼlumotlar hududiy komissiyalarga taqdim etiladi.

Olingan maʼlumotlar roʻyxatga olish va hisob uchastkalari boʻyicha guruhlanadi hamda roʻyxatga oluvchilarni ushbu manzillar toʻgʻrisida xabardor qilish uchun roʻyxatga olish uchastkalari boshligʻi yoki ularning oʻrinbosarlariga taqdim etiladi.

4-bob. Aholini roʻyxatga olishni oʻtkazishga jalb qilingan xodimlar toifalari

20. Aholini roʻyxatga olishni oʻtkazishga quyidagi toifadagi xodimlar jalb qilinadi:

respublika darajasida — respublika komissiyasi tarkibiga kiritilgan vazirlik va idoralar, Qoʻmita markaziy apparati hamda Qoʻmita huzuridagi Kadrlar malakasini oshirish va statistik tadqiqotlar instituti xodimlari;

hududiy darajada — hududiy komissiyalar aʼzolari, hududiy statistika boshqarmalari xodimlari hamda shartnoma asosida vaqtincha jalb etiladigan birlamchi maʼlumotlarni elektron bazaga kiritish markazlari xodimlari;

tumanlar (shaharlar)da — tuman va shahar statistika boʻlimlari xodimlari va shartnoma asosida vaqtincha jalb etiladigan tuman va shahar roʻyxatga olish boʻlimlari hamda roʻyxatga olish uchastkasi, instruktorlik va hisob uchastkalari xodimlari.

Normativ-huquqiy hujjatlar, qoʻllanma va maʼlumotnoma hujjatlarni ishlab chiqishda ishtirok etish, aholini roʻyxatga olishni moliyaviy va moddiy-texnik taʼminlashda hisob-kitoblarni tayyorlash uchun qoʻshimcha ravishda shartnoma asosida mutaxassislar jalb qilinishi mumkin.

21. Qoraqalpogʻiston Respublikasi Vazirlar Kengashi, viloyatlar va Toshkent shahar, tumanlar (shaharlar) hokimliklari aholini roʻyxatga olish uchun jalb etiladigan shaxslarni belgilangan talablar asosida tanlab oladi va roʻyxatini shakllantiradi.

Aholini roʻyxatga olishga tayyorgarlik koʻrish va uni oʻtkazishga jalb etiladigan shaxslar roʻyxati Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari huzuridagi hududiy komissiyalar tomonidan tasdiqlanadi.

22. Aholining ayrim toifalariga nisbatan shaxsga doir maʼlumotlarni yigʻish jarayonlariga vaqtincha jalb etiladigan shaxslar roʻyxati tegishli tashkilotlar rahbarlari tomonidan shakllantiriladi.

23. Roʻyxatga olishga tayyorgarlik koʻrish jarayonida Qoʻmitaning hududiy statistika organlari tomonidan Oʻzbekiston Respublikasi hududi shartli ravishda uy-joy roʻyxatini tuzish uchastkalariga boʻlinadi, bunda uchastka chegaralari oʻrtacha 750 ta uy-joyni qamrab oladi.

Uy-joylar roʻyxatini tuzuvchilar sonini shakllantirishda koʻzda tutilmagan holatlarni (betoblik, baxtsiz hodisalar, yuklatilgan vazifalarni toʻliq bajarmaslik va boshqalar) hisobga olgan holda asosiy tarkibga qoʻshimcha ravishda ish haqi toʻlanmagan holda 5 foiz miqdorida zaxira kadrlar shakllantiriladi.

Har bir uy-joy roʻyxatini tuzish uchastkalariga uy-joy roʻyxatini tuzuvchilar biriktiriladi. Uy-joy roʻyxatini tuzuvchilar faoliyatini tuman roʻyxatga olish boʻlimi boshligʻi nazorat qiladi.

24. Uy-joylar roʻyxatini tuzuvchilar 2022-yil 1-avgustdan 1-sentabrgacha boʻlgan davrda maxsus oʻqitiladi hamda bino va uy-joylar roʻyxatini tuzish uchun jalb etiladi.

Uy-joy roʻyxatini tuzuvchilar oʻz uchastkasini xatlovdan oʻtkazish davomida respondentlar yashaydigan (vaqtincha boʻlib turgan) yoki yashashi mumkin boʻlgan barcha binolar roʻyxatini aniqlaydi, kartografik materiallarni tekshiradi, ularga tegishli belgi qoʻyadi va zarur hollarda oʻzgartirishlar kiritish uchun kadastr idoralariga taqdim etadi.

25. Uy-joy roʻyxatini tuzuvchilarni statistika organlari, uy-joy-kommunal xizmat koʻrsatish tashkilotlari, kadastr idoralari va boshqa tegishli tashkilotlar xodimlari orasidan tanlab olish tuman va shahar hokimliklari tomonidan hududiy statistika organlari bilan birgalikda shartnoma asosida amalga oshiriladi.

26. Roʻyxatga olish, instruktorlik, hisob va statsionar uchastkalar ishini tashkil qilish uchun shartnoma asosida quyidagi xodimlar jalb qilinadi:

2023-yil 25-oktabrdan 1-dekabrgacha — aholidan soʻrov oʻtkazish orqali roʻyxatga olishni amalga oshiruvchi roʻyxatga oluvchi xodim;

2023-yil 10-oktabrdan 12-dekabrgacha — roʻyxatga oluvchilar ishini muvofiqlashtiruvchi instruktor (supervayzer) xodim;

2023-yil 10-oktabrdan 2024-yil 1-yanvargacha — instruktorlar (supervayzerlar) ishini nazorat qiluvchi xodimlar (roʻyxatga olish uchastkasi boshligʻi va uning oʻrinbosari);

2022-yil 1-iyuldan 2024-yil 1-yanvargacha — tuman, shahar miqyosida aholini roʻyxatga olish ishlarini nazorat qiluvchi xodimlar (tuman, shahar aholini roʻyxatga olish boʻlimi boshligʻi va uning oʻrinbosari);

2023-yil 1-yanvardan 2024-yil 1-yanvargacha — tuman, shahar miqyosida aholini roʻyxatga olish ishlarini muvofiqlashtirishni amalga oshiruvchi xodim (roʻyxatga olish boʻlimi bosh mutaxassisi);

2023-yil 1-dekabrdan 2025-yil 1-dekabrgacha — viloyat miqyosida aholini roʻyxatga olishning birlamchi maʼlumotlari elektron bazaga kiritilishini nazorat qilish boʻyicha jalb etilgan xodimlar (birlamchi maʼlumotlarni elektron bazaga kiritish markazi boshligʻi);

2023-yil 1-dekabrdan 2025-yil 1-dekabrgacha — viloyat miqyosida aholini roʻyxatga olish hujjatlarini saqlashni amalga oshiruvchi xodimlar (hujjatlarni saqlash dispetcheri);

2024-yil 1-yanvardan 31-dekabrgacha — viloyat miqyosida aholini roʻyxatga olishning birlamchi maʼlumotlarini elektron bazaga kiritish boʻyicha operatorlar ishini nazorat qiluvchi xodim (operatorlar guruhi boshligʻi);

2024-yil 1-yanvardan 31-dekabrgacha — aholini roʻyxatga olish varagʻi shakllaridagi birlamchi maʼlumotlarni elektron bazaga kirituvchi va uning mantiqiy nazoratini amalga oshiruvchi xodimlar (operatorlar).

27. 2023-yilda aholini roʻyxatga olishga tayyorgarlik koʻrish va uni oʻtkazishga jalb qilingan shaxslar bilan hududiy statistika boshqarmalari:

muddatli mehnat shartnomasi — tuman, shahar miqyosida aholini roʻyxatga olish ishlarini amalga oshirish uchun jalb etilgan roʻyxatga oluvchi xodimlar (tuman (shahar) roʻyxatga olish boʻlimlari boshliqlari va ularning oʻrinbosarlari, bosh mutaxassislar) va birlamchi maʼlumotlarni elektron bazaga kiritish markazi xodimlari (markaz boshliqlari, operatorlar guruhi boshliqlari, operatorlar, hujjatlarni saqlash dispetcherlari) bilan;

fuqarolik-huquqiy tusdagi shartnoma (pudrat shartnomasi) — uy-joy roʻyxatini tuzuvchilar, roʻyxatga oluvchilar, instruktorlar (supervayzerlar), roʻyxatga olish uchastkasi boshligʻi va uning oʻrinbosarlari bilan shartnomalar tuzadi.

28. 2023-yilda aholini roʻyxatga olishga tayyorgarlik koʻrish va uni oʻtkazishga hamda birlamchi maʼlumotlarni elektron bazaga kiritishga jalb qilingan shaxslarning mehnatiga haq toʻlash belgilangan tartibda amalga oshiriladi.

29. Aholini roʻyxatga olishni oʻtkazishga vaqtinchalik jalb qilinadigan xodimlarga Qoʻmita tomonidan tayyorlangan maxsus guvohnoma beriladi.

30. Aholini roʻyxatga olish jarayonlariga vaqtincha jalb etiladigan xodimlarga maxsus guvohnomalar berishga hududiy statistika organlari masʼul hisoblanadi.

31. Aholini roʻyxatga olish ishlariga vaqtincha jalb etiladigan xodimlar oʻqitiladi.

32. Oʻqitish davomida quyidagilar:

aholini roʻyxatga olishning maqsad va vazifalari, roʻyxatga olishga tayyorgarlik koʻrish va uni oʻtkazishni tartibga soluvchi asosiy normativ-huquqiy hujjatlar, roʻyxatga olish hujjatlari tarkibi va uni toʻldirish tartibi, shuningdek, roʻyxatga oluvchi xodimlarning vazifalari, axloq normalarini oʻrgatish boʻyicha mashgʻulotlar;

texnika xavfsizligi boʻyicha mashgʻulotlar;

uy-joy roʻyxatini tuzuvchilar tomonidan shahar, shahar tipidagi aholi punkti, qishloq aholi punktlaridagi uy-joylar va binolar roʻyxatini tuzish boʻyicha amaliy mashgʻulotlar;

respondentlar soʻrovini oʻtkazish, kelib chiqadigan barcha qiyinchiliklarni aniqlashtirish bilan muammoli masalalarni muhokama qilish boʻyicha amaliy mashgʻulotlar;

oʻqitilgan xodimlarning maʼlumotlarni oʻzlashtirganligi boʻyicha nazorat qilish ishlari tashkil etiladi.

33. Roʻyxatga oluvchi xodimlar oʻqitilgandan soʻng maxsus guvohnoma va kiyim (nimcha, sharf, bosh kiyim va boshqalar boʻlishi mumkin), roʻyxatga olish instrumentlari (roʻyxatga olish varagʻi shakllari va boshqa roʻyxatga olish hujjatlari, roʻyxatga olish varagʻi shakllarining zaxira toʻplami va kanselyariya buyumlarini olib yurish uchun sumka) bilan taʼminlanadi.

34. Aholining ayrim toifalarini roʻyxatdan oʻtkazuvchi tashkilotlarning vakolat berilgan xodimlari ham roʻyxatga olish varagʻi shakllari va boshqa roʻyxatga olish hujjatlari hamda kanselyariya buyumlarini olib yurishga moʻljallangan sumka bilan taʼminlanadi.

5-bob. Aholini roʻyxatga olishni oʻtkazish

35. 2023-yilda aholini roʻyxatga olishni oʻtkazishda respondentlar soʻrovi quyidagi muddatlarda tashkil etiladi:

1 — 5-noyabr kunlari — internet jahon axborot tarmogʻi orqali aholini roʻyxatga olish (5 kun);

6 — 10-noyabr kunlari — internet jahon axborot tarmogʻi orqali roʻyxatdan oʻtgan respondentlar va ularning uy manzillari roʻyxatini shakllantirish (5 kun);

11 — 22-noyabr kunlari — aholini roʻyxatga olish varagʻi shakllari asosida uyma-uy yurib aholini roʻyxatga olish (12 kun, fuqarolik-huquqiy tusdagi shartnomaga asosan);

23 — 25-noyabr kunlari — har bir hisob uchastkasidagi uy-joy manzillarining 10 foizini tanlanma ravishda nazorat kuzatuvi asosida oʻrganish (3 kun).

36. Agar respondent yashab turgan xonadonida (joyida) roʻyxatdan oʻtishni istamasa, roʻyxatga oluvchi unga instruktorlik uchastkasiga borib roʻyxatdan oʻtishni taklif etadi va uchastka manzilini beradi.

37. Instruktorlik uchastkalari 2023-yil 1 — 22-noyabr kunlari respublikaning barcha hududlarida faoliyat yuritadi.

38. Roʻyxatga olish uchastkasi xodimlari, instruktorlar va roʻyxatga oluvchilar belgilangan tartibda maxsus guvohnoma, sumka, roʻyxatga olish varagʻi shakllari va kanselyariya buyumlari bilan taʼminlanadi.

39. Roʻyxatga olish davrida instruktorlar (supervayzerlar) roʻyxatga oluvchilar tomonidan soʻrov oʻtkazilgan respondentlar sonini kunlik nazorat qilib boradi.

40. Aholini roʻyxatga olishni oʻtkazishda roʻyxatga oluvchi xodimlar:

soʻrov oʻtkazishdan oldin oʻzini tanishtirishi, respondentga oʻz guvohnomasini koʻrsatishi, tashrif maqsadini tushuntirishi, shuningdek, roʻyxatga olishda ishtirok etishning muhimligi, respondentlarning shaxsga doir maʼlumotlari maxfiyligi taʼminlanishi va soʻrov taxminan qancha vaqt davom etishi toʻgʻrisida maʼlumot berishi;

shaxsga doir maʼlumotlarni yigʻish jarayonida aholini roʻyxatga olish dasturida belgilangan savollar roʻyxatiga rioya etishi, ularning mazmuni buzilishiga yoʻl qoʻymasligi;

roʻyxatga olish varagʻida keltirilgan ketma-ketlik boʻyicha savollar berishi, roʻyxatga olish varagʻida mavjud boʻlmagan savollarni bermasligi;

aholini roʻyxatga olish varagʻi shakllarini toʻldirish boʻyicha yoʻriqnomada keltirilgan tushuntirishlardan tashqari respondentga qulaylik yaratish maqsadida qoʻshimcha ravishda tushuntirishlar berishi;

xushmuomala boʻlishi, boshqa shaxslarning oʻz majburiyatlarini bajarishiga toʻsqinlik qilmasligi yoki ularning hayoti, sogʻligi va mol-mulkiga xavf solmasligi, shuningdek, statistika organlari obroʻsiga putur yetkazadigan harakatlardan saqlanishi;

shaxsga doir maʼlumotlarning maxfiyligini taʼminlashi va ularning mazmunini oshkor qilmasligi;

oʻz vakolatlariga muvofiq ishlarni toʻliq, sifatli va belgilangan muddatlarda bajarishi lozim.

41. Roʻyxatga oluvchilar instruktor (supervayzer), roʻyxatga olish uchastkasi xodimlari koʻrsatmalarini oʻz vaqtida va aniq bajaradi hamda bu borada boshqa roʻyxatga oluvchilar bilan hamkorlikda faoliyat olib borishi mumkin.

Roʻyxatga oluvchilar ish jarayonida yuzaga keladigan muammolar va ularning sabablari boʻyicha instruktorga xabar beradi hamda imkon qadar mustaqil ravishda ushbu muammolarni bartaraf qilish choralarini koʻradi.

Shuningdek, roʻyxatga oluvchilar zarurat tugʻilganda oilaviy ahvoli, sogʻligi va boshqa kutilmagan holatlar haqida instruktorga xabar beradi.

42. Roʻyxatga oluvchilar mustaqil ravishda ish rejasini tuzadi, zarur hollarda instruktor bilan maslahatlashadi, oʻziga biriktirilgan hududdagi barcha binolarni hisobga olgan holda soʻrov oʻtkazish uchun qulay boʻlgan yoʻnalishni belgilab oladi.

Kun rejasini tuzishda roʻyxatga oluvchilar quyidagilarni:

kam vaqt sarf etib, qisqa masofani bosib maksimal miqdorda binolarni aylanib, roʻyxatga olishni oʻtkazishni;

jinoyatchilik koʻp uchraydigan hududlar va tarbiyasi ogʻir oilalar boʻlgan xonadonlarga Milliy gvardiya yoki ichki ishlar organlari xodimlari bilan birgalikda tashrif buyurgan holda zarur xavfsizlik choralarini koʻrishni hisobga oladi.

43. Agar roʻyxatga oluvchilar rejadan sezilarli darajada ortda qolayotgan boʻlsa, instruktorlar (supervayzerlar) ushbu holatning sababini aniqlashtiradi va zarur hollarda zaxira tarkibidan roʻyxatga oluvchilar jalb etilishi yuzasidan qaror qabul qiladi.

44. Roʻyxatga olish varagʻi shakllarini toʻldirish uy xoʻjaligi tarkibini aniqlashdan boshlanadi.

45. Soʻrov davlat tilida oʻtkaziladi. Davlat tilini bilmaydigan respondentlar ona tilida yoki erkin ravishda tanlangan muloqot tilida soʻrovdan oʻtkazilishi mumkin. Bunda roʻyxatga oluvchi xodimlar ushbu hududda yashovchi yoki shu hududning aholisi bilan erkin muloqot qila oladigan shaxslar orasidan tanlanadi.

46. Uy xoʻjaliklari shaxsiy va jamoaviyga boʻlinadi.

Shaxsiy uy xoʻjaliklari tarkibiga turar joy binolari — uylar, kvartiralar, yotoqxonalar, dala hovlilar va boshqa yashash uchun foydalaniladigan binolarda yashovchi shaxslar kiradi.

Jamoaviy uy xoʻjaliklari tarkibiga ijtimoiy va tibbiyot muassasalarida, kazarmalarda, qamoqxonalarda va diniy tashkilotlarda (madrasalarda) doimiy yashovchi shaxslar guruhi kiradi.

Aholining ayrim toifalari yashaydigan muassasalar (tashkilotlar) jamoaviy uy xoʻjaliklari hisoblanadi.

Quyidagi joylarda:

bolalar internatlari, tarbiya muassasalarida;

ijtimoiy muassasalarda;

diniy muassasalarda;

shifoxonalar va boshqa sogʻliqni saqlash tashkilotlarida;

Ayollarni reabilitatsiya qilish va moslashtirish boʻyicha respublika, hududiy va tumanlararo namunali markazlarida;

qamoqda saqlash joylarida, tergov hibsxonasida, axloq tuzatish muassasalarida va maxsus muassasalarda yashovchi (doimiy yoki vaqtincha) shaxslar jamoaviy uy xoʻjaliklarida yashovchilar hisoblanadi.

Ushbu muassasalarda roʻyxatga olish ishlari ularning maʼmuriyatlari tomonidan amalga oshiriladi.

Roʻyxatga oluvchilar oʻziga biriktirilgan hisob uchastkasi hududida joylashgan mehmonxona turidagi muassasalarda roʻyxatga olish ishlarini ushbu muassasaning maʼmuriyati bilan birgalikda amalga oshiradi.

Respondent roʻyxatga olish varagʻidagi savollarga javob berishni rad etgan yoki roʻyxatga olishni oʻtkazish davrida yashash joyida (binoda), kvartirada hech kim boʻlmagan taqdirda, roʻyxatga olish varagʻi shakllari fuqarolarning oʻzini oʻzi boshqarish organlaridagi yoki mahalliy davlat hokimiyati organlaridagi mavjud maʼlumotlar asosida toʻldiriladi.

Agar roʻyxatga oluvchilar oʻz uchastkasida uysizlarga duch kelsa, ularni 4-shakl boʻyicha roʻyxatdan oʻtkazadi va har biri uchun 2-shaklni ham toʻldiradi.

47. Aholi hisobining toʻliqligi va ishonchliligini taʼminlash maqsadida 2023-yil 23 — 25-noyabr kunlari uch kun muddatda tanlanma ravishda nazorat kuzatuvi oʻtkaziladi.

Nazorat kuzatuvi barcha hisob uchastkalari boʻyicha tanlov asosida 10 foizdan kam boʻlmagan qamrov bilan oʻtkaziladi.

Nazorat kuzatuvidan soʻng toʻldirilgan roʻyxatga olish varagʻi shakli roʻyxatga olishni oʻtkazish davrida toʻldirilgan roʻyxatga olish varagʻi shakli bilan solishtiriladi hamda roʻyxatga olish toʻliqligi va roʻyxatga olish varagʻi shakllarini toʻldirish sifati tekshiriladi.

48. Aholini roʻyxatga olishning shaxsga doir maʼlumotlari “Aholini roʻyxatga olish toʻgʻrisida” Oʻzbekiston Respublikasi Qonunining 10-moddasiga muvofiq maxfiy boʻlib, respondentning roziligisiz oshkor etilmaydi va tarqatilmaydi.

Shaxsga doir maʼlumotlarni yigʻish va ularga ishlov berish natijasida shakllantirilgan yigʻma statistik axborot aholini roʻyxatga olishning yakuniy maʼlumotlaridir.

49. Roʻyxatga olish va nazorat kuzatuvi oʻtkazilgandan keyin roʻyxatga olish varagʻi shakllari bilan toʻldirilgan sumkalar quyidagi tartibda topshirilishi kerak:

roʻyxatga oluvchi — roʻyxatga olish ishlari yakunlangandan soʻng bir kun muddatda instruktorga;

instruktor — roʻyxatga oluvchilardan qabul qilib olingandan soʻng uch kun muddatda roʻyxatga olish uchastkasi boshligʻiga;

roʻyxatga olish uchastkasi boshligʻi — instruktorlardan qabul qilib olingandan soʻng besh kun muddatda tuman (shahar) roʻyxatga olish boʻlimi boshligʻiga;

tuman (shahar) roʻyxatga olish boʻlimi boshligʻi — roʻyxatga olish uchastkasi boshliqlaridan qabul qilib olingandan soʻng besh kun muddatda hududiy statistika boshqarmalari huzuridagi birlamchi maʼlumotlarni elektron bazaga kiritish markazlariga topshiradi.

6-bob. Aholini roʻyxatga olishning birlamchi maʼlumotlarini kiritish, qayta ishlash va yakuniy maʼlumotlarni shakllantirish

50. Aholini roʻyxatga olishning birlamchi maʼlumotlarini kiritish va qayta ishlash hududlarda amalga oshiriladi.

Hududiy statistika boshqarmalari huzurida 14 ta birlamchi maʼlumotlarni elektron bazaga kiritish markazi tashkil etiladi. Har bir hududiy markazda tegishli hudud boʻyicha aholini roʻyxatga olishning birlamchi maʼlumotlari elektron bazaga kiritiladi va tahrir qilinadi.

Aholini roʻyxatga olish birlamchi maʼlumotlarini kiritish va qayta ishlash maxsus dasturiy taʼminot asosida hududiy markaz boshliqlari, operatorlar guruhi boshliqlari, hujjatlarni saqlash xodimlari (arxiv xodimi), maʼlumotlarni kiritish va mantiqiy nazorat qilish boʻyicha operatorlarni vaqtincha jalb etish orqali amalga oshiriladi.

Respublika darajasida yakuniy maʼlumotlarni jamlash va tahlil qilish maxsus kompyuter dasturi asosida amalga oshiriladi.

Roʻyxatga olishning birlamchi maʼlumotlarini elektron bazaga kiritish ishlari 2024-yil 31-dekabrgacha amalga oshiriladi.

51. Jahon internet axborot tarmogʻi orqali respondentlar roʻyxatga olish varagʻi shakllarini mustaqil ravishda toʻldirishlari mumkin.

Qoʻmita jahon internet axborot tarmogʻi orqali roʻyxatdan oʻtgan respondentlar va ularning uy manzillari roʻyxatini shakllantiradi hamda hududiy statistika organlariga yuboradi.

52. Birlamchi maʼlumotlarni elektron bazaga kiritish va ularni qayta ishlash boʻyicha nazorat hududiy statistika boshqarmalari tomonidan amalga oshiriladi. Qoʻmita tomonidan muntazam ravishda monitoring ishlari yoʻlga qoʻyilib, muvofiqlashtiriladi.

Shaxsga doir birlamchi maʼlumotlar qayta ishlash jarayonida maxfiylashtiriladi.

53. Zarur hollarda aholini roʻyxatga olish natijalarini tahlil qilishda Oʻzbekiston Respublikasi Vazirlar Mahkamasi huzuridagi Davlat personallashtirish markazi, Adliya vazirligi huzuridagi Davlat xizmatlari agentligi, Ichki ishlar vazirligi, Davlat soliq qoʻmitasi huzuridagi Kadastr agentligi, Budjetdan tashqari Pensiya jamgʻarmasi hamda boshqa tegishli vazirlik va idoralarda mavjud aholi bilan bogʻliq boʻlgan maʼlumotlar bazalaridan foydalaniladi.

7-bob. Aholini roʻyxatga olishning yakuniy maʼlumotlarini shakllantirish va ularni eʼlon qilish

54. Roʻyxatga oluvchi xodimlar tomonidan tayyorlangan yigʻma roʻyxatlar natijalari asosida shahar va qishloqlar (shu jumladan, erkaklar va ayollar) boʻyicha dastlabki maʼlumotlar shahar va qishloq aholisiga ajratilgan holda shakllantiriladi.

Oʻzbekiston Respublikasi, Qoraqalpogʻiston Respublikasi, viloyatlar, Toshkent shahri, tuman va shaharlar boʻyicha aholini roʻyxatga olishning dastlabki maʼlumotlari 2024-yil 1-martga qadar tayyorlanadi.

55. Aholini roʻyxatga olishning yakuniy maʼlumotlari respublika va hududlar boʻyicha belgilangan jadvallar shaklida 2025-yil 1-dekabrgacha shakllantiriladi.

Eʼlon qilingan maʼlumotlardan tashqari qoʻshimcha maʼlumotlar foydalanuvchilarning soʻrovlariga muvofiq shakllantiriladi.

56. Yakuniy natijalar birlamchi maʼlumotlar bazasidan shakllantiriladi.

57. Aholini roʻyxatga olish natijalarini chop etish Qoʻmita va uning hududiy organlari tomonidan 2025-yil 1-dekabrgacha rasmiy bosma nashrlarda, shuningdek, elektron manbalarda, foydalanuvchilarning keng ommasi uchun ommabop nashrlarda, (risolalar, press-relizlar, atlaslar, taqdimot materiallarida va boshqalarda), Qoʻmitaning rasmiy veb-saytida joylashtirish orqali eʼlon qilinadi.

58. Qayta ishlangan qogʻoz koʻrinishidagi aholini roʻyxatga olish varagʻi shakllarini saqlash va yoʻq qilish belgilangan tartibda amalga oshiriladi.

59. Aholini roʻyxatga olishning elektron maʼlumotlar bazasi va boshqa hujjatlarning elektron shakli hamda aholini roʻyxatga olishning yigʻma hujjatlari qayta ishlanganidan soʻng belgilangan tartibda doimiy saqlash uchun Oʻzbekiston Respublikasi Vazirlar Mahkamasi huzuridagi “Oʻzarxiv” agentligiga taqdim etiladi.

8-bob. Aholini roʻyxatga olishni moddiy-texnik va moliyaviy taʼminlash

60. 2023-yilda aholini roʻyxatga olishga tayyorgarlik koʻrish va uni oʻtkazishga jalb etiladigan xodimlar faoliyatini belgilangan meʼyorlar asosida tashkil etish uchun aholini roʻyxatga olishni moddiy-texnika vositalari bilan taʼminlash 2020 — 2025-yillarda Qoʻmita rahbariyati tomonidan tasdiqlangan yillik xarid rejasi asosida amalga oshiriladi.

61. Roʻyxatga oluvchilarning maxsus sumkalari, kanselyariya buyumlari, guvohnomasi, maxsus kiyimlari, fonar kabi tovar-moddiy boyliklar Qoʻmita va uning hududiy organlari tomonidan “Davlat xaridlari toʻgʻrisida”gi Oʻzbekiston Respublikasi Qonuniga muvofiq xarid qilinadi.

62. 2021-yilda (sinov tariqasida) va 2023-yilda aholini roʻyxatga olish varagʻi shakllarini va boshqa aholini roʻyxatga olish hujjatlarini markazlashtirilgan holda chop etish va ularni hududiy statistika organlariga yetkazib berish Qoʻmita tomonidan amalga oshiriladi.

9-bob. 2021-yilda sinov tariqasida aholini roʻyxatga olishni oʻtkazish

63. Sinov tariqasida aholini roʻyxatga olish 2021-yil 1 — 25-noyabr kunlari tanlab olingan hududlarda oʻtkaziladi.

Sinov tariqasida roʻyxatga olishning aniq payti 2021-yil 1-noyabr soat 00:00 etib belgilanadi.

2021-yil 1-noyabr soat 00.00 dan keyin sodir boʻlgan demografik holatlar natijalari roʻyxatga olish varagʻi shakllariga kiritilmaydi.

64. Sinov tariqasida aholini roʻyxatga olish dasturi ushbu qarorning 2-ilovasida keltirilgan savollardan tashkil topadi.

65. Sinov tariqasidagi aholini roʻyxatga olish quyidagi muddatlarda oʻtkaziladi:

1 — 5-noyabr kunlari — internet jahon axborot tarmogʻi orqali aholini roʻyxatga olish (5 kun);

6 — 10-noyabr kunlari — internet jahon axborot tarmogʻi orqali roʻyxatdan oʻtgan respondentlar va ularning uy manzillari roʻyxatini shakllantirish (5 kun);

11 — 22-noyabr kunlari — aholini roʻyxatga olish varagʻi shakllari asosida uyma-uy yurgan holda aholini roʻyxatga olish (12 kun, fuqarolik-huquqiy tusdagi shartnomaga asosan);

23 — 25-noyabr kunlari — har bir hisob uchastkasidagi uy-joy manzillarining 10 foizini tanlanma ravishda nazorat kuzatuvi asosida oʻrganish (3 kun).

66. Sinov tariqasida aholini roʻyxatga olishga tayyorgarlik koʻrish va uni oʻtkazish bilan bogʻliq xarajatlarni moliyalashtirish Oʻzbekiston Respublikasi Davlat budjeti mablagʻlari va qonunchilik hujjatlari bilan taqiqlanmagan boshqa mablagʻlar hisobidan amalga oshiriladi.

67. Roʻyxatga olishni oʻtkazish boshlanishidan oldin hududiy komissiyalar tomonidan sinov oʻtkaziladigan hududlardagi roʻyxatga olish uchastkasi xodimlari, instruktorlar (supervayzerlar) va roʻyxatga oluvchilar belgilangan tartibda maxsus guvohnoma, sumka, roʻyxatga olish varagʻi shakllari va kanselyariya buyumlari bilan taʼminlanadi.

68. Sinov tariqasida aholini roʻyxatga olish boshlanishidan bir oy oldin hududiy komissiyalarga jinoyatchilik koʻp uchraydigan hududlar va tarbiyasi ogʻir oilalar toʻgʻrisidagi maʼlumotlar tegishli hududiy ichki ishlar organlari tomonidan taqdim etiladi.

69. Sinov tariqasida aholini roʻyxatga olishga tayyorgarlik koʻrish va uni oʻtkazishga jalb qilingan shaxslar bilan belgilangan tartibda shartnomalar tuziladi.

70. Oʻzbekiston Respublikasi Davlat xavfsizlik xizmati, Milliy gvardiya, Mudofaa vazirligi, Ichki ishlar vazirligi, Favqulodda vaziyatlar vazirligi, Tashqi ishlar vazirligi, Sogʻliqni saqlash vazirligi, Xalq taʼlimi vazirligi “Aholini roʻyxatga olish toʻgʻrisida”gi Oʻzbekiston Respublikasi Qonunining 24-moddasida belgilangan aholining ayrim toifalarini roʻyxatga olish ishlarini tashkil etadi.

71. Agar respondent yashab turgan xonadonida (joyida) roʻyxatdan oʻtishni istamasa, roʻyxatga oluvchi unga instruktorlik uchastkasiga borib roʻyxatdan oʻtishni taklif etadi va uchastka manzilini beradi.

72. Sinov tariqasida aholini roʻyxatga olishning yakunlari boʻyicha quyidagi ishlar amalga oshiriladi:

roʻyxatga olish dasturi, roʻyxatga olish hujjatlari shakllari, roʻyxatga olishni oʻtkazish usullari, roʻyxatga olishga tayyorgarlik koʻrish va uni oʻtkazish boʻyicha asosiy tadbirlari hamda foydalaniladigan axborot texnologiyalari sinovi natijalari tahlil qilinadi;

sinov natijalariga koʻra 2022-yil 1-iyunga qadar 2023-yilda aholini roʻyxatga olish dasturi, metodik qoʻllanmalar va normativ hujjatlarga tegishli oʻzgartirishlar kiritilishi hamda maʼlumotlarni qayta ishlash usullari va aholini roʻyxatga olish yakunlarini shakllantirish zarurati yuzasidan takliflar ishlab chiqiladi.

73. Sinov tariqasida aholini roʻyxatga olishni oʻtkazish ushbu Nizomning tegishli bandlariga asosan amalga oshiriladi.

Vazirlar Mahkamasining 2020-yil 11-noyabrdagi 710-son qaroriga 2-ILOVA

Oʻzbekiston Respublikasida 2021-yilda sinov tariqasida aholini roʻyxatga olish

DASTURI

Oʻzbekiston Respublikasida 2021-yilda sinov tariqasida aholini roʻyxatga olish jarayonida respondentlarga tegishli shaxsga doir maʼlumotlarni yigʻish amalga oshiriladigan savollar roʻyxati aholini roʻyxatga olish dasturi hisoblanadi.

Aholini roʻyxatga olish dasturi quyidagi savollarni oʻz ichiga oladi:

1. Asosiy demografik koʻrsatkichlarga tegishli savollar:

familiyasi, ismi, otasining ismi;

tugʻilgan sanasi, toʻliq yashagan yoshi;

jinsi;

uy xoʻjaligida birinchi koʻrsatilgan shaxs (oila boshligʻi) bilan qarindoshlik munosabati;

nikoh holati (15 yosh va undan katta shaxslar uchun);

tugʻilgan joyi.

2. Aholining mexanik harakati, migratsiyasiga tegishli savollar:

yashab turgan aholi punktida yashash muddati;

yashab turgan aholi punktiga qayerdan koʻchib kelganligi;

yashab turgan aholi punktiga qachon koʻchib kelganligi;

uzluksiz bir yil davomida boshqa mamlakat hududida yashaganligi;

boshqa mamlakat hududidan qachon koʻchib kelganligi;

boshqa mamlakat hududiga qachon koʻchib ketganligi;

boshqa mamlakatga nima sababdan ketganligi.

3. Aholining milliy xususiyatlari, fuqaroligiga tegishli savollar:

fuqaroligi;

millati (voyaga yetmagan bolalar uchun esa ota-onalari yoki voyaga yetgan yaqin qarindoshlari javoblari asosida belgilanadi);

ona tili;

ona tilidan tashqari suhbatlashadigan tillar.

4. Aholining taʼlim darajasiga tegishli savollar:

taʼlim darajasi;

oʻqishni yoki yozishni bilishi;

ilmiy darajasi mavjudligi;

3 — 6 yosh oraligʻidagi bolalarning maktabgacha taʼlim tashkilotiga borishi;

hozirgi vaqtda taʼlim olishi.

5. Uy xoʻjaligi aʼzolarining iqtisodiy holatiga tegishli savollar:

yashash uchun daromad manbai;

uy xoʻjaligi tasarrufida uzoq foydalaniladigan mulk va buyumlarning mavjudligi;

bir oylik daromad miqdori.

6. Aholining bandligiga tegishli savollar:

asosiy mehnat faoliyati;

ish joyi joylashgan joy;

aholini roʻyxatga olish boshlangan kunga qadar oxirgi bir hafta ichida (aholini roʻyxatga olish tadbiri oʻtkazilayotgan yilning 24 — 31-oktabr kunlari) faoliyat turidan qatʼi nazar ish haqi toʻlanadigan yoki daromad keltiradigan har qanday ish bilan mashgʻul boʻlganligi;

aholini roʻyxatga olish tadbiri oʻtkazilayotgan yilning oktabr oyida ish izlaganligi, taklif etilgan ishga ikki hafta mobaynida kira olish imkoniyati, ishga kirmaslik sababi.

7. Bolalar soniga tegishli savollar:

dunyoga keltirgan farzandlari soni;

tirik tugʻilgan farzandlari soni.

8. Turar joy xususiyatlariga tegishli savollar:

turar joyning toʻliq manzili;

turar joyning mulkchilik shakli;

turar joyning turi;

turar joyning umumiy maydoni, shu turar joydagi yashash xonalari soni, yashash xonalarining maydoni;

turar joyning qurilgan vaqti;

turar joy tashqi devorlarining asosiy materiallari;

turar joydagi mavjud qulayliklar, sanitariya-gigiyenik sharoitlar;

turar joyda yashovchi uy xoʻjaliklari (oilalar) soni va ularning tarkibi (respondentning aholini roʻyxatga olish vaqtida qayerda ekanligi, ushbu turar joyda doimiy, vaqtinchalik yashashi yoki vaqtinchalik yashamasligi, ushbu turar joyda yashamaslik sababi va muddatlari koʻrsatilgan holda).

9. Uy xoʻjaligi aʼzolarining sogʻlom turmush tarzi yuritishlariga tegishli savollar:

sport bilan shugʻullanishi;

sport bilan shugʻullanadigan joy;

sport bilan shugʻullana olmaslik sababi.

10. Oʻzbekiston Respublikasiga vaqtincha kelgan xorijiy davlatlar fuqarolari va fuqaroligi boʻlmagan shaxslar toʻgʻrisidagi shaxsga oid maʼlumotlarni yigʻish boʻyicha savollar roʻyxati:

jinsi;

tugʻilgan sanasi;

fuqaroligi (chet davlat fuqarolari uchun);

doimiy yashaydigan davlati;

Oʻzbekistonga kelish sanasi;

Oʻzbekistonga kelish sababi.

11. Aholining ayrim toifalariga nisbatan beriladigan savollar:

muassasa nomi;

muassasa turi;

ushbu muassasada roʻyxatdan oʻtadigan jami respondentlar soni;

uysizlar va ularning soni;

ushbu muassasadagi respondentlar roʻyxati. Ushbu roʻyxatga tushgan barcha respondentlar uchun shaxsga doir savolnoma toʻldiriladi.

Vazirlar Mahkamasining 2020-yil 11-noyabrdagi 710-son qaroriga 3-ILOVA

Oʻzbekiston Respublikasida 2021-yilda sinov tariqasida aholini roʻyxatga olish varagʻi shakllari roʻyxati

2021-yilda sinov tariqasida aholini roʻyxatga olish dasturi asosida ishlab chiqilgan 2021-yilda sinov tariqasida aholini roʻyxatga olish varagʻi shakllari quyidagilardan iborat:

1-shakl. “Turar joyning xususiyatlari va unda yashovchilar roʻyxati” — 3.1-ilova;

2-shakl. “Shaxsga oid savolnoma” — 3.2-ilova;

3-shakl. “Oʻzbekiston Respublikasiga vaqtincha kelgan chet el fuqarolari uchun savolnoma” — 3.3-ilova;

4-shakl. “Aholining ayrim toifalariga nisbatan shaxsga doir maʼlumotlarni yigʻish boʻyicha savolnoma” — 3.4-ilova;

5-shakl. “Vaqtincha turgan joyi boʻyicha Oʻzbekiston Respublikasi fuqarolari va fuqaroligi boʻlmagan shaxslar uchun nazorat varaqasi” — 3.5-ilova.

Vazirlar Mahkamasining 2020-yil 11-noyabrdagi 710-son qaroriga 3.1-ILOVA

Vazirlar Mahkamasining 2020-yil 11-noyabrdagi 710-son qaroriga 3.2-ILOVA

Vazirlar Mahkamasining 2020-yil 11-noyabrdagi 710-son qaroriga 3.3-ILOVA

Vazirlar Mahkamasining 2020-yil 11-noyabrdagi 710-son qaroriga 3.4-ILOVA

Vazirlar Mahkamasining 2020-yil 11-noyabrdagi 710-son qaroriga 3.5-ILOVA

Vazirlar Mahkamasining 2020-yil 11-noyabrdagi 710-son qaroriga 4-ILOVA

Aholini roʻyxatga olish jarayonlariga jismoniy va yuridik shaxslarni jalb etish va ularga haq toʻlash tartibi toʻgʻrisida

NIZOM

Ushbu Nizom Oʻzbekiston Respublikasida 2023-yilda aholini roʻyxatga olishga (keyingi oʻrinlarda — aholini roʻyxatga olish) tayyorgarlik koʻrish va uni oʻtkazish hamda natijalarini qayta ishlash jarayonlariga jismoniy va yuridik shaxslarni jalb etish va ularga haq toʻlash tartibini belgilaydi.

1-bob. Aholini roʻyxatga olish jarayonlarida tashkil etiladigan boʻlinmalarda vaqtinchalik shtat birliklari

1. Aholini roʻyxatga olish jarayonlarida tashkil etiladigan boʻlinmalarda vaqtinchalik shtat birliklari:

a) tuman (shahar) miqyosida:

tuman (shahar) aholini roʻyxatga olish boʻlimi — boʻlim boshligʻi, boʻlim boshligʻi oʻrinbosari, boʻlim bosh mutaxassisi, uy-joy roʻyxatini tuzuvchi;

roʻyxatga olish uchastkasi — uchastka boshligʻi, uchastka boshligʻining oʻrinbosari;

instruktorlik uchastkasi — instruktor (supervayzer), statsionar roʻyxatga oluvchi;

hisob uchastkasi — roʻyxatga oluvchi.

b) Qoraqalpogʻiston Respublikasi, viloyatlar va Toshkent shahar aholini roʻyxatga olish birlamchi maʼlumotlarini elektron bazaga kiritish markazlarida — markaz boshligʻi, operatorlar guruhi boshligʻi, operator va hujjatlarni saqlash xodimi (arxiv xodimi).

2-bob. Davlat organlari va tashkilotlari xodimlarini, shuningdek, jismoniy va yuridik shaxslarni aholini roʻyxatga olishga jalb etish tartibi

2. Qoraqalpogʻiston Respublikasi, viloyatlar va Toshkent shahrida aholini roʻyxatga olishga tayyorgarlik koʻrish va uni oʻtkazish uchun vaqtincha jalb etiladigan roʻyxatga oluvchi xodimlar (uy-joy roʻyxatini tuzuvchilar, roʻyxatga oluvchilar, statsionar roʻyxatga oluvchilar, instruktorlar (supervayzerlar), roʻyxatga olish uchastkasi boshligʻi va uning oʻrinbosarlari) soni belgilangan tartibda Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari huzuridagi Oʻzbekiston Respublikasida 2023-yilda aholini roʻyxatga olishni oʻtkazishga koʻmaklashish boʻyicha hududiy komissiyalar (keyingi oʻrinlarda — hududiy komissiyalar) tomonidan aniqlanadi.

Roʻyxatga olish ishlariga vaqtincha jalb etiladigan xodimlar soni toʻgʻrisida yakuniy maʼlumotlar sinov tariqasida aholini roʻyxatga olish va uy-joylarni xatlovdan oʻtkazish natijalaridan kelib chiqib shakllantiriladi.

3. Tuman (shahar) aholini roʻyxatga olish boʻlimi va aholini roʻyxatga olish birlamchi maʼlumotlarini elektron bazaga kiritish markazi xodimlari Qoraqalpogʻiston Respublikasi, viloyatlar va Toshkent shahar statistika boshqarmalari (keyingi oʻrinlarda — hududiy statistika boshqarmalari) tomonidan muddatli mehnat shartnomasi yoki fuqarolik-huquqiy tusdagi shartnoma asosida ishga jalb etiladi. Aholini roʻyxatga olish xususiyatlaridan kelib chiqib shartnoma namunalari qoʻmita tomonidan Oʻzbekiston Respublikasi Bandlik va mehnat munosabatlari vazirligi, Adliya vazirligi va Kasaba uyushmalari federatsiyasi bilan kelishgan holda ishlab chiqiladi.

4. Uy-joy roʻyxatini tuzuvchi xodimlar tumanlar va shaharlar hokimliklari tomonidan hududiy statistika organlari bilan birgalikda tanlab olinadi.

5. Jismoniy va yuridik shaxslar hududiy komissiyalar va Qoraqalpogʻiston Respublikasi Vazirlar Kengashi, viloyatlar va Toshkent shahar hamda tuman (shahar) hokimliklari tomonidan aholini roʻyxatga olish jarayonlariga jalb etiladi.

Roʻyxatga olish jarayonlariga vaqtincha jalb etilgan xodimlar (uy-joylar roʻyxatini tuzuvchilar, roʻyxatga olish uchastkasi xodimlari, instruktorlar va roʻyxatga oluvchi xodimlar) bilan hududiy statistika boshqarmalari rahbarlari oʻrtasida fuqarolik-huquqiy tusdagi shartnomalar tuziladi.

6. Aholini roʻyxatga olish birlamchi maʼlumotlarini elektron bazaga kiritish markazi xodimlari statistika boshqarmalari tomonidan tanlov asosida saralab olinadi.

3-bob. Aholini roʻyxatga olishga jalb etilgan shaxslarga qoʻyiladigan talablar

7. Aholini roʻyxatga olish jarayonlariga jalb qilinadigan shaxslar Oʻzbekiston Respublikasi fuqarosi boʻlishi, davlat tilini bilishi, umumiy oʻrta, oʻrta maxsus (kasb-hunar taʼlimi) yoki oliy maʼlumotga ega boʻlishi, muomala layoqatiga ega boʻlishi, aholi bilan muloqotga kirisha oladigan, aniq va tushunarli yoza oladigan hamda tegishli hududda doimiy yashab turgan boʻlishi talab etiladi.

8. Aholini roʻyxatga olish jarayonlariga jalb etiladigan fuqarolarning shaxsini tasdiqlovchi hujjati (pasporti) va STIR (soliq toʻlovchining identifikatsiya raqami) mavjud boʻlishi lozim.

4-bob. Roʻyxatga oluvchi xodimlar mehnatiga haq toʻlash

9. Aholini roʻyxatga olish jarayonlariga jalb etiladigan shaxslarning asosiy ish (oʻqish) joylaridagi lavozimi va oʻrtacha oylik maoshlari (stipendiyalari) saqlab qolinadi.

“Aholini roʻyxatga olish toʻgʻrisida”gi Oʻzbekiston Respublikasi Qonunining 24-moddasiga muvofiq aholining ayrim toifalariga nisbatan shaxsga doir maʼlumotlarni yigʻish tegishli tashkilotlar va muassasalarning vakolat bergan xodimi tomonidan amalga oshiriladi.

Aholining ayrim toifalarini roʻyxatga oluvchi xodimlar oʻrtacha oylik maoshlari saqlanib qolingan holda ishga jalb qilinadi. Roʻyxatga olish ishlarida ishtirok etgan xodimlar faqat oʻz ish joylaridan qoʻshimcha ragʻbatlantirilishi mumkin.

10. Aholini roʻyxatga olishga tayyorgarlik koʻrish va uni oʻtkazish hamda natijalarni qayta ishlashga jalb etiladigan shaxslar mehnatiga haq toʻlash ushbu Nizomga 1-ilovaga, sinov tariqasida aholini roʻyxatga olish jarayonlariga jalb etiladigan shaxslar mehnatiga haq toʻlash 2-ilovaga muvofiq amalga oshiriladi.

11. Agar shartnomada koʻrsatilgan ish muddati tugamasdan avval shartnoma bekor qilinadigan boʻlsa, ish haqini hisoblash haqiqiy ishlangan vaqtga (muddatga) mutanosib ravishda amalga oshiriladi.

12. Aholini roʻyxatga olish jarayonlarida faol ishtirok etgan shaxslar samarali mehnat faoliyatidan kelib chiqib Qoʻmita raisi hamda hududiy komissiyalarning qaroriga asosan mukofot yoki qimmatbaho sovgʻalar bilan taqdirlanishi mumkin.

13. Aholini roʻyxatga olishga jalb qilinadigan shaxslar mehnatiga haq toʻlash budjet mablagʻlari va qonunchilik hujjatlarida taqiqlanmagan boshqa mablagʻlar hisobiga amalga oshiriladi.

14. Aholini roʻyxatga olishga jalb etilgan shaxslar bilan mehnat munosabatlari va fuqarolik-huquqiy munosabatlar Oʻzbekiston Respublikasining Mehnat kodeksi, Oʻzbekiston Respublikasining Fuqarolik kodeksi va boshqa normativ-huquqiy hujjatlar bilan tartibga solinadi.

Aholini roʻyxatga olish jarayonlariga jismoniy va yuridik shaxslarni jalb etish va ularga haq toʻlash tartibi toʻgʻrisidagi nizomga1-ILOVA

Aholini roʻyxatga olishga tayyorgarlik koʻrish va uni oʻtkazish, uning natijalarini qayta ishlashga jalb etiladigan shaxslar mehnatiga haq toʻlash miqdori

Aholini roʻyxatga olish jarayonlariga jismoniy va yuridik shaxslarni jalb etish va ularga haq toʻlash tartibi toʻgʻrisidagi nizomga2-ILOVA

Aholini sinov tariqasida roʻyxatga olish jarayoniga jalb etiladigan shaxslar mehnatiga haq toʻlash miqdori

Vazirlar Mahkamasining 2020-yil 11-noyabrdagi 710-son qaroriga 5-ILOVA

Oʻzbekiston Respublikasida 2023-yilda aholini roʻyxatga olishga tayyorgarlik koʻrish va uni oʻtkazish hamda natijalarini eʼlon qilish boʻyicha

“Yoʻl xarita”si

T/r Tadbirlar nomi Amalga oshirish mexanizmi Amalga oshirish muddatlari Masʼul ijrochilar I. Aholini roʻyxatga olishni oʻtkazish boʻyicha tashkiliy-huquqiy tadbirlar 1. Oʻzbekiston Respublikasida 2023-yilda aholini roʻyxatga olishga tayyorgarlik koʻrish va uni oʻtkazish boʻyicha tashkiliy-metodik hujjatlarni ishlab chiqish. 1. Oʻzbekiston Respublikasida 2023-yilda aholini roʻyxatga olishga tayyorgarlik koʻrish va uni oʻtkazish hamda maʼlumotlarni kiritish va qayta ishlash uchun vaqtinchalik binolarni ajratish boʻyicha qoʻllanma ishlab chiqish. 2020-yil dekabr Davlat statistika qoʻmitasi 2. Aholini roʻyxatga olish varaqlari va boshqa roʻyxatga olish hujjatlari saqlanishi va yoʻq qilinishi tartibi toʻgʻrisidagi nizomni ishlab chiqish. 2021-yil yanvar Davlat statistika qoʻmitasi, “Oʻzarxiv” agentligi 3. Aholini roʻyxatga olishga tayyorgarlik koʻrish va uni oʻtkazish masalalari boʻyicha xodimlarni oʻqitish tartibini ishlab chiqish. 2021-yil aprel Davlat statistika qoʻmitasi 4. Aholini roʻyxatga olish jarayonlariga vaqtincha jalb etiladigan xodimlarning lavozim majburiyatlarini ishlab chiqish. 2021-yil may Davlat statistika qoʻmitasi 5. 2023-yilda Oʻzbekiston Respublikasida aholini roʻyxatga olishning shaxsga doir maʼlumotlariga ishlov berish tartibi toʻgʻrisidagi nizomni ishlab chiqish. 2021-yil iyul Davlat statistika qoʻmitasi 2. Oʻzbekiston Respublikasi Vazirlar Mahkamasining “Oʻzbekiston Respublikasida 2023-yilda aholini roʻyxatga olishning yakuniy maʼlumotlaridan foydalanish tartibi toʻgʻrisidagi nizomni tasdiqlash haqida”gi qarori loyihasini ishlab chiqish. 1. Xalqaro ekspertlar tavsiyalari va xorijiy davlatlar tajribasini oʻrganish. 2022-yil yanvar — mart Davlat statistika qoʻmitasi, Iqtisodiy taraqqiyot va kambagʻallikni qisqartirish vazirligi, Adliya vazirligi, tegishli vazirliklar va idoralar 2. Qaror loyihasini ishlab chiqish va tegishli vazirliklar bilan kelishish. 2022-yil aprel — iyul 3. Qaror loyihasini Vazirlar Mahkamasiga kiritish. 2022-yil avgust II. Aholini roʻyxatga olishga tayyorgarlik koʻrish va uni oʻtkazish 3. Aholini roʻyxatga olish ishtirokchilarini kartografik materiallar (sxematik reja va xaritalar) bilan taʼminlash. 1. Tumanlar boʻyicha 1:25000 va 1:50000 masshtabda sxematik xaritalar tuzish. 2021-yil 1-martga qadar (sinov) Kadastr agentligi, Qoraqalpogʻiston Respublikasi Vazirlar Kengashi, viloyatlar, Toshkent shahar, tuman (shahar) hoki?liklari, hududiy komissiyalar 2. Aholi punktlari boʻyicha 1:2000 masshtabda sxematik rejalar tuzish. 3. Aholisi zich hududlarda hamda maydoni 200000 gektardan kichik hududlarda 1:25000 masshtabda sxematik xaritalar tuziish. 4. 200000 gektardan ortiq maydonga ega boʻlgan tumanlar boʻyicha 1:50000 masshtabda sxematik xaritalar tuzish. 5. Qoraqalpogʻiston Respublikasi, viloyatlar markazlari va viloyatlarga boʻysunuvchi shaharlar, tumanlar markazlari uchun 1:10000 masshtabdagi sxematik xaritalar tuzish. 2022-yil 1-iyunga qadar (asosiy) 4. Aholi punktlaridagi yashovchilar sonini koʻrsatgan holda xonadon va uylar roʻyxatini shakllantirish. 1. Xonadon va uylarni xatlovdan oʻtkazish va roʻyxatini shakllantirish. 2. Shakllantirilgan maʼlumotlarni tahlil qilish. 2021-yil 1-martga qadar (sinov) Qoraqalpogʻiston Respublikasi Vazirlar Kengashi, viloyatlar, Toshkent shahar, tuman (shahar) hokimliklari, Mahalla va nuroniylarni qoʻllab-quvvatlash vazirligi, Kadastr agentligi, Davlat statistika qoʻmitasi 3. Amalga oshirilgan ishlar boʻyicha monitoring ishlarini olib borish. 2023-yil 1-martga qadar (asosiy) 5. Hududlarda aholini roʻyxatga olishni oʻtkazish boʻyicha tashkiliy chora-tadbirlarni amalga oshirish. 1. Aholini roʻyxatga olish, instruktorlik va hisob uchastkalariga boʻlish. 2021-yil 1-iyunga qadar (sinov) 2023-yil 1-iyunga qadar (asosiy) Hududiy komissiyalar, Qoraqalpogʻiston Respublikasi Vazirlar Kengashi, viloyatlar, Toshkent shahar, tuman (shahar) hokimliklari, Davlat statistika qoʻmitasi va uning hududiy organlari, Mahalla va nuroniylarni qoʻllab-quvvatlash vazirligi va uning hududiy organlari 2. Aholini roʻyxatga olish jarayonlariga jalb etiladigan roʻyxatga oluvchi xodimlarni tanlab olish, tarkibini tasdiqlash hamda ularni oʻqitish. 2021-yil 1-noyabrga qadar (sinov) 2023-yil 1-noyabrga qadar (asosiy) 3. Aloqa vositalari bilan jihozlangan binolar bilan taʼminlashni tashkil etish. 2020 — 2024 yillarda 4. Tuman (shahar) roʻyxatga olish boʻlimlarini, roʻyxatga olish va instruktorlik uchastkalarini zarur hollarda transport vositalari bilan taʼminlash. 2020 — 2024 yillarda 5. Aholini roʻyxatga olish jarayonlari sifatli oʻtkazilishini tashkil etish. 2021 — 2023 yillarda 6. Amalga oshirilgan ishlar boʻyicha monitoring ishlarini olib borish. doimiy 6. Aholini roʻyxatga olish varagʻi shakllari va boshqa hujjatlarni nashr ettirish. 1. Aholini roʻyxatga olishning normativ hujjatlarini ishlab chiqish. 2021-yil 1-sentabrga qadar (sinov) Davlat statistika qoʻmitasi 2. Aholini roʻyxatga olish varagʻi shakllari va boshqa hujjatlarni chop etishga tayyorlash. 3. Aholini roʻyxatga olish varagʻi shakllari va boshqa hujjatlarni chop etish. 2023-yil 1-iyunga qadar (asosiy) 7. Aholini roʻyxatga olishga tayyorgarlik koʻrish va uni oʻtkazish uchun jalb etiladigan vaqtinchalik roʻyxatga oluvchi xodimlarni tanlab olish, roʻyxatini shakllantirish va tasdiqlash. 1. Vaqtinchalik roʻyxatga oluvchi xodimlarga qoʻyiladigan talablarni ishlab chiqish. 2021-yil 1-sentabrga qadar (sinov) Qoraqalpogʻiston Respublikasi Vazirlar Kengashi, viloyatlar, Toshkent shahar, tuman (shahar) hokimliklari, hududiy komissiyalar 2. Vaqtinchalik roʻyxatga oluvchi xodimlarni tanlash. 3. Vaqtinchalik roʻyxatga oluvchi xodimlarning roʻyxatini shakllantirish va tasdiqlash. 2023-yil 1-avgustga qadar (asosiy) 8. Aholini roʻyxatga olishni hujjatlar va moddiy-texnik buyumlar bilan taʼminlash. 1. Aholini roʻyxatga olish boʻyicha normativ hujjatlarni ishlab chiqish. 2. Aholini roʻyxatga olishning varagʻi shakllari va boshqa hujjatlarni yetkazib berish. 3. Aholini roʻyxatga olishning maxsus sumkalarini yetkazib berish. 4. Tuman (shahar) roʻyxatga olish boʻlimlari, roʻyxatga olish va instruktorlik uchastkalariga kanselyariya mollari va boshqa jihozlarni yetkazib berish. 2021-yil 1-oktabrga qadar (sinov) 2023-yil 1-sentabrga qadar (asosiy) Davlat statistika qoʻmitasi, Qoraqalpogʻiston Respublikasi Vazirlar Kengashi, viloyatlar, Toshkent shahar, tuman (shahar) hokimliklari 9. Aholini roʻyxatga olishga tayyorgarlik koʻrish va uni oʻtkazish masalalari boʻyicha statistika organlari xodimlarini oʻqitish. 1. Oʻqitishning reja-jadvalini ishlab chiqish. 2. Davlat statistika qoʻmitasi markaziy apparati xodimlarini oʻqitish. 3. Hududiy statistika boshqarmalari xodimlarini oʻqitish. 4. Tuman va shahar statistika boʻlimlari xodimlarini oʻqitish. 2020 — 2023-yillarda Davlat statistika qoʻmitasi, BMT Aholishunoslik jamgʻarmasining Toshkentdagi vakolatxonasi bilan hamkorlikda 10. Aholini roʻyxatga olishga jalb etiladigan vaqtinchalik xodimlarni oʻqitishni tashkil etish. 1. Oʻqitishning reja-jadvalini ishlab chiqish. 2. Tuman shahar aholini roʻyxatga olish boʻlimi xodimlarini oʻqitish. 3. Aholini roʻyxatga olish uchastkalarining xodimlarini oʻqitish. 4. Instruktorlarni oʻqitish. 5. Roʻyxatga oluvchilarni oʻqitish. 2021 — 2023-yillarda Davlat statistika qoʻmitasi, hududiy komissiyalar, Qoraqalpogʻiston Respublikasi Vazirlar Kengashi, viloyatlar, Toshkent shahar, tuman (shahar) hokimliklari 11. Aholini roʻyxatga olishning targʻibot-tashviqot ishlarini tashkil etish. 1.OAV hamda davlat organlarining rasmiy veb-saytlarida turkum maqolalar, koʻrsatuv, eshittirishlar berib borish. 2. Videoroliklar tayyorlash. 3. Ijtimoiy reklamalar tayyorlash. 4. Koʻrgazmali qurollar tayyorlash. 5. Bannerlar tayyorlash. 6. Seminarlar tashkil etish. 7. Tekin SMS-xabarnoma yuborishni tashkil etish va boshqa axborot-targʻibot ishlarini amalga oshirish. 2020 — 2023-yillarda Davlat statistika qoʻmitasi, Oʻzbekiston Milliy teleradiokompaniyasi, Oʻzbekiston Milliy axborot agentligi, hududiy komissiyalar, Qoraqalpogʻiston Respublikasi Vazirlar Kengashi, viloyatlar, Toshkent shahar, tuman (shahar) hokimliklari 12. “Aholi roʻyxatga olish” axborot tizimini ishlab chiqish va joriy qilish. 1. Idoralararo ishchi guruh tuzish. 2. Xalqaro tajribani oʻrganish. 3. “Aholini roʻyxatga olish” axborot tizimini ishlab chiqish. 4. “Aholini roʻyxatga olish” axborot tizimini joriy qilish. 2021-yil 1-oktabrgacha Davlat statistika qoʻmitasi, Axborot texnologiyalari va kommunikatsiyalarini rivojlantirish vazirligi, Personallashtirish markazi, Davlat xizmatlari agentligi, Ichki ishlar vazirligi 13. Aholini roʻyxatga olishni sifatli oʻtkazilishini taʼminlash. 1. Kartografik materiallar sifatli tayyorlanishini nazorat qilish. Doimiy Respublika komissiyasi, Davlat statistika qoʻmitasi, hududiy komissiyalar, Ichki ishlar vazirligi, Favqulodda vaziyatlar vazirligi, Milliy gvardiya, Sogʻliqni saqlash vazirligi, Mahalla va nuroniylarni qoʻllab-quvvatlash vazirligi, Xalq taʼlimi vazirligi, Qoraqalpogʻiston Respublikasi Vazirlar Kengashi, viloyatlar, Toshkent shahar, tuman (shahar) hokimliklari 2. Targʻibot va tashviqot ishlari olib borilishi monitoringi. Doimiy 3. Vaqtincha jalb etiladigan xodimlarni tanlash, oʻqitish va ularning ish yuklamalarini belgilash. Doimiy 4. Amalga oshirilayotgan ishlarning doimiy monitoringini olib borish. Doimiy 2021-yil noyabr (sinov) 5. Roʻyxatga olish belgilangan muddatlarda sifatli oʻtkazilishini taʼminlash. 2023-yil noyabr (asosiy) II. Moddiy-texnik va moliyaviy taʼminot 14. Aholini roʻyxatga olishning xarajatlar smetasini ishlab chiqish va tasdiqlash uchun Vazirlar Mahkamasiga kiritish. Sinov hamda asosiy aholini roʻyxatga olish xarajatlari smetasini quyidagilarni hisobga olgan holda ishlab chiqish: ish haqi xarajatlari; asosiy vositalar va dastur uchun xarajatlar; xodimlarni oʻqitish xarajatlari; xizmat safari xarajatlari; transport ijarasi xarajatlari; normativ va metodik hujjatlarni ishlab chiqish va ularni chop etish xarajatlari; OAVda videoroliklar joylashtirish xarajatlari; kutilmagan va boshqa xarajatlar. 2020 — 2025-yillarda Davlat statistika qoʻmitasi, tegishli vazirliklar va idoralar 15. Aholini roʻyxatga olishni kanselyariya buyumlari, moddiy-texnik vositalari va boshqalar bilan taʼminlash. Davlat xaridlari toʻgʻrisidagi qonun talablari asosida quyidagilarni bajarish; konselyariya buyumlarini sotib olish; moddiy-texnik vositalari va boshqa zarur masulotlarni sotib olish. 2020 — 2025 yillarda Moliya vazirligi, Davlat statistika qoʻmitasi, tegishli vazirliklar va idoralar III. Aholini roʻyxatga olish yakunlari 16. Aholini roʻyxatga olishning dastlabki maʼlumotlarini tayyorlash. 1. Savolnoma shakllari sonidan kelib chiqib har bir hududning aholisi roʻyxatini shakllanttirish. 2. Aholi soni toʻgʻrisidagi jamlangan maʼlumotlarni tahlil qilish. 3. Aholining soni toʻgʻrisidagi dastlabki maʼlumotlarni eʼlon qilish. 2024-yil 1-martga qadar Davlat statistika qoʻmitasi 17. Aholini roʻyxatga olishning elektron maʼlumotlar bazasini shakllantirish. 1. Birlamchi maʼlumotlarni qayta ishlash uchun tayyorlash. 2. Aholini roʻyxatga olish birlamchi maʼlumotlarini kiritish. 3. Aholini roʻyxatga olishning elektron maʼlumotlar bazasini shakllantirish. 2025-yil 1-yanvarga qadar Davlat statistika qoʻmitasi 18. Aholini roʻyxatga olishning respublika va hududlar darajasida yakuniy natijalarini olish. 1. Elektron maʼlumotlar bazasini tahlil qilish. 2. Aholini roʻyxatga olishning yakuniy maʼlumotlar bazasini shakllantirish. 3. Respublika va hududlar darajasida tahliliy maʼlumotlar va jadvallarni tayyorlash. 2025-yil 1-dekabrga qadar Davlat statistika qoʻmitasi 19. Aholini roʻyxatga olishning yakuniy natijalarni eʼlon qilish va hujjatlarni saqlash. 1. Yakuniy maʼlumotlarni eʼlon qilish. 2. Yakuniy maʼlumotlarni rasmiy nashr ettirish va tarqatish. 3. Aholini roʻyxatga olishning dastlabki va yakuniy maʼlumotlarini va boshqa hujjatlarini arxivda saqlashga tayyorlash va topshirish. 2025-yil 1-dekabrga qadar Davlat statistika qoʻmitasi, Oʻzbekiston Milliy axborot agentligi, Oʻzbekiston Milliy teleradiokompaniya, “Oʻzarxiv” agentligi