Oʻzbekiston davlat qishloq xoʻjaligi va avtomobil mashinasozligi konserni va “DEU Korporeyshn” korporatsiyasi tomonidan avtomobillar ishlab chiqaruvchi “OʻzDEUAVTO” qoʻshma korxonasi tashkil etilishi toʻgʻrisida (509-son)

05.11.1992

Oʻzbekiston Respublikasi Prezidenti huzuridagi Vazirlar Mahkamasining

qarori

Oʻzbekiston Respublikasi bilan Koreya Respublikasi oʻrtasida iqtisodiy hamkorlik toʻgʻrisidagi davlatlararo bitimga muvofiq hamda Oʻzbekistonda avtomobilsozlikni barpo etish va rivojlantirish maqsadida, Oʻzbekiston davlat qishloq xoʻjaligi va avtomobil mashinasozligi konserni bilan “DEU korporeyshn” korporatsiyasi oʻrtasida tuzilgan bitimni eʼtiborga olib, Vazirlar Mahkamasi qaror qiladi:

1. Oʻzbekiston qishloq xoʻjaligi va avtomobil mashinasozligi konserni 3 oy muddat ichida:

“OʻzDEUAVTO” qoʻshma korxonasini barpo etish boʻyicha taʼsis hujjatlarini tayyorlashni va belgilangan tartibda uni davlat roʻyxatidan oʻtkazishni nihoyasiga yetkazsin;

respublikada avtomobilsozlikni rivojlantirish tamoyili boʻyicha takliflarni tayyorlasin hamda ularni koʻrib chiqish uchun Istiqbolni belgilash va statistika davlat qoʻmitasiga kiritsin.

2. “Oʻzshartnomasavdo”, Istiqbolni belgilash va statistika Davlat qoʻmitasi “OʻzDEUAVTO” qoʻshma korxonasi obyektlarini qurish, qayta qurish masalalariga, unga zarur qurilish materiallari, shu jumladan, limitlangan boshqa materiallar ajratishga birinchi navbatda bajariladigan vazifalar sifatida qarasinlar.

3. Qoʻshma korxonaning bosh loyihalovchisi etib “Oʻzogʻirsanoat” ijara korxonasi, bosh pudratchisi qilib Oʻzbekiston Respublikasi Qurilish vazirligi belgilansin.

4. “OʻzDEUAVTO” qoʻshma korxonasi taʼsischilarining tomonlardan har birining 100 mln AQSH dollari miqdoridagi badallaridan iborat boʻlgan 200 mln AQSH dollari miqdoridagi Ustav fondini tashkil etish toʻgʻrisidagi bitimi maʼqullansin.

5. Oʻzbekiston Respublikasi Moliya vazirligi, Markaziy banki va Tashqi iqtisodiy faoliyat milliy banki “OʻzDEUAVTO” qoʻshma korxonasiga:

a) Ustav fondini tashkil etish uchun kelishilgan muddatlarda 100 mln AQSH dollari miqdorida invalyuta mablagʻlari;

b) qurilishni, qayta qurishni va texnika bilan qayta jihozlashni amalga oshirish, shuningdek, materiallar, asbob-uskunalar sotib olish, mutaxassislarni oʻqitish va boshqa vazifalar uchun imtiyozli shartlarda, shu jumladan, koʻpi bilan 8 foizli, jami 2 milliard soʻmgacha miqdorda kredit ajratishni taʼminlasinlar.

6. “OʻzDEUAVTO” qoʻshma korxonasi qurilish, tayyorgarlik va ishlab chiqarishni oʻzlashtirish davrida hamda mahsulot ishlab chiqarila boshlangandan eʼtiboran 5 yil mobaynida Oʻzbekiston hududida amalda boʻlgan soliqlarning barcha turlaridan ozod qilinsin.

7. “OʻzDEUAVTO” qoʻshma korxonasiga quyidagi huquqlar berilsin:

xorijiy boshqaruv va texnik xodimlarni mehnatiga Amerika dollari bilan haq toʻlagan holda ulardan daromad soligʻini olmasdan, bu toʻlovlarni chet elga oʻtkazish soligʻi va Oʻzbekiston Respublikasi qonunchiligida nazarda tutilgan boshqa soliqlarni undirmasdan ishga taklif etish;

investitsiyalar va zayomlarni joylashtirish uchun banklarda valyuta hisoblarini ochish, AQSH dollarida hisob-kitob aʼmollarini amalga oshirish, shuningdek, eksport faoliyati natijasida olingan invalyutadagi daromaddan foydalanish;

asosiy fondlar, dastgohlar, asbob-uskunalar, dvigatellar, transmissiyalar, detallar, maxsus va yordamchi asboblarni avtomobillar ishlab chiqarish uchun zarur boʻlgan miqdorda chet mamlakatlardan boj va soliqlar toʻlamasdan keltirish;

boshqaruv va texnika xizmati koʻrsatish hamda texnikaviy yordam berish toʻgʻrisidagi bitimlarga muvofiq amalga oshiriladigan har qanday toʻlovlarni, shu jumladan “DEU korporeyshn” korporatsiyasi aksiyalarini sotishdan tushgan daromadlarni soliqlar toʻlamasdan AQSH dollariga oʻtkazish;

mahalliy valyutani, shu jumladan, soʻmni Oʻzbekiston Respublikasi Tashqi iqtisodiy faoliyat milliy banki tomonidan qabul qilingan rasmiy kurs boʻyicha AQSH dollariga almashtirish;

“OʻzDEUAVTO” qoʻshma korxonasi mahsulotlarini sotishdan tushgan daromadlarga Oʻzbekiston Respublikasi Hukumatining koʻmagida paxta tolasi, mineral oʻgʻitlar, qishloq xoʻjaligi mahsulotlari, rangli metallarni sotib olish va ularni belgilangan tartibda eksport qilish.

8. Belgilab qoʻyilsinki, ushbu qarorning 6 va 7-bandlarida koʻzda tutilgan soliq boʻyicha va boshqa imtiyozlar “OʻzDEUAVTO” qoʻshma korxonasi uchun detallar, uzellar, butlovchi buyumlar ishlab chiqaradigan va yetkazib beradigan respublika korxonalariga hamda oʻzbek yuridik shaxslari bilan Oʻzbekiston Respublikasida qoʻshma korxonalar tashkil etadigan boshqa investorlarga ham tatbiq etiladi.

9. Istiqbolni belgilash va statistika davlat qoʻmitasi qoʻshma korxonada kam litrajli avtomobillarni ishlab chiqarishni tashkil qilish boʻyicha ishlarni Oʻzbekiston Respublikasi investitsiya dasturiga kiritsin.

10. Oʻzbekiston Respublikasi Moliya vazirligi, Oʻzbekiston Respublikasi Vazirlar Mahkamasi huzuridagi davlat soliq bosh boshqarmasi qoʻshma korxonaning ishga tushirilish paytidan boshlab respublikaga boshqa mamlakatlardan, shu jumladan MDH mamlakatlaridan, agar boshqa bitimlar bilan oʻzgacha hol nazarda tutilmagan boʻlsa, shunday avtomobillar olib kelinishiga soliq undirishni yoʻlga qoʻyish boʻyicha takliflar kiritsinlar, shuningdek kompaniya ishlab chiqaradigan avtomobillarni Oʻzbekiston Respublikasi hududida oʻz savdo tarmogʻi orqali erkin almashtiriladigan valyutaga sotishga ruxsat etilsin.

11. Oʻrta Osiyo Temir yoʻl boshqarmasi Rossiya Federatsiyasi Temir yoʻl vazirligi bilan yuklarni yetkazib berish tartibini va ularning hajmini kelishib olsin hamda ularni “OʻzDEUAVTO” qoʻshma korxonasining talabnomasiga binoan amalga oshirsin.

12. Toshkent shahar hokimligi:

“OʻzDEUAVTO” qoʻshma korxonasining vakillik ofisi uchun bino ajratsin yoki uni qurish uchun yer maydoni belgilasin;

“OʻzDEUAVTO” qoʻshma korxonasi bilan birgalikda, mavjud maydonlardan foydalangan holda, maxsus avtosalon tashkil etish masalasini hal qilsin.

13. Oʻzbekiston Respublikasi Tashqi iqtisodiy aloqalar vazirligi va Davlat bojxona qoʻmitasi Asaka pritseplar zavodi hududida omborxona tashkil etish va joylashtirish masalasini hal qilsinlar.

14. Andijon viloyati hokimligi:

amaldagi meʼyorlarga muvofiq ravishda janubiy koreyalik mutaxassislarning oilalariga uzoq muddat istiqomat qilishlari uchun sharoitlar yaratib bersin;

Oʻzbekiston Respublikasi fuqarolarining “OʻzDEUAVTO” qoʻshma korxonasida muqobil xizmatni oʻtashlari boʻyicha shartnomalar tuzishni taʼminlasin.

15. Oʻzbekiston Respublikasi Oliy va oʻrta maxsus taʼlim vazirligi “OʻzDEUAVTO” qoʻshma korxonasining talablariga binoan quyidagilarni taʼminlasin:

oliy oʻquv yurtini tugatishgandan keyin “OʻzDEUAVTO” qoʻshma korxonasini uning talabnomasi boʻyicha butlash uchun maxsus moʻljallangan 2—Z-kurslarning iqtidorli talabalaridan 1993-yildan boshlab oʻquv guruhlarini tuzishni;

1992-yildan boshlab “OʻzDEUAVTO” qoʻshma korxonasi mutaxassislarini ingliz va koreys tiliga tezkorlik bilan oʻrgatish kurslari tashkil etishni, shuningdek, ingliz tilini puxta egallagan bitiruvchi — tarjimonlarni “OʻzDEUAVTO” qoʻshma korxonasiga ishga yuborishni amalga oshirishni;

16. “OʻzDEUAVTO” qoʻshma korxonasining talabnomasiga muvofiq:

“Oʻzbekiston havo yoʻllari” milliy aviakompaniyasi “DEU korporeyshn” korporatsiyasi korxonalarida oʻqitish va tajriba orttirish uchun yuboriladigan mutaxassislarni tashish maqsadida “Toshkent—Seul—Toshkent” qatnov yoʻli boʻyicha kelishilgan qatnovlarni tashkil etsin;

Aloqa vazirligi “Toshkent—Seul”, “Asaka—Seul”, “Toshkent—Asaka” aloqa yoʻllari boʻyicha, kelishilgan holda, toʻgʻridan toʻgʻri telefon va teleks aloqalarini oʻrnatsin.

17. “DEU korporeyshn” korporatsiyasining qoʻshma korxona ishlari boʻyicha kelayotgan mutaxassislariga Oʻzbekiston hududida yashash va transportda yurish uchun soʻmlar boʻyicha hisob-kitob qilish huquqi berilsin.

18. Mazkur qarorning bajarilishini nazorat qilish Bosh vazirning oʻrinbosari oʻrtoq B. S. Hamidov zimmasiga yuklatilsin.

Vazirlar Mahkamasining Raisi I. KARIMOV

Toshkent sh.,

1992-yil 5-noyabr,

509-son