Qishloq xoʻjaligiga ishlab chiqarish-texnika xizmati koʻrsatish sohasida shartnomaviy munosabatlarni rivojlantirish chora-tadbirlari toʻgʻrisida (95-son)

24.03.1995

Oʻzbekiston Respublikasi Vazirlar Mahkamasining

qarori

Mavjud qishloq xoʻjaligi texnikasi parkidan oqilona foydalanish, uni ishlatish xarajatlarini qisqartirish hamda qishloq xoʻjaligidagi mexanizatsiyalashgan ishlarni bajarishning shartnomaviy shakllari tizimiga oʻtish maqsadida Vazirlar Mahkamasi qaror qiladi:

1. Oʻzbekiston Respublikasi Qishloq xoʻjaligi vazirligi, “Oʻzqishloqxoʻjaliktaʼminottuzatish” davlat-kooperativ qoʻmitasi, Qoraqalpogʻiston Respublikasi Vazirlar Kengashi va viloyatlar hokimliklarining 1995—1999-yillar mobaynida “Oʻzqishloqxoʻjaliktaʼminottuzatish” davlat-kooperativ qoʻmitasining tuman boʻlinmalari negizida yerlarni tayyorlash, qishloq xoʻjaligi ekinlariga ishlov berish va hosilni yigʻib-terib olishga doir mexanizatsiyalashgan ishlarni xoʻjaliklar bilan shartnomalar boʻyicha bajaruvchi mashina-traktor parklarini 1, 2-ilovalarga* muvofiq tashkil etish toʻgʻrisidagi takliflari qabul qilinsin.

* 1-2-ilovalar berilmaydi.

“Oʻzqishloqxoʻjaliktaʼminottuzatish” davlat-kooperativ qoʻmitasiga, xoʻjaliklardan keyinchalik sotib olish huquqi bilan, mashina va mexanizmlarni ijaraga olish yuzasidan ular bilan shartnomalar tuzishiga ruxsat etilsin.

2. “Oʻzqishloqxoʻjaliktaʼminottuzatish” davlat-kooperativ qoʻmitasi Oʻzbekiston Respublikasi Qishloq xoʻjaligi vazirligi, “Oʻzdehqonchiliksanoatbank” va Adliya vazirligi bilan birgalikda bir oy muddatda quyidagilarni ishlab chiqsin va tasdiqlasin:

mashina-traktor parklarini tashkil etish va ularning faoliyat koʻrsatishi toʻgʻrisida vaqtinchalik nizom;

bajarilgan mexanizatsiya ishlari uchun xoʻjaliklarning hisob-kitob qilishlari tartibi.

3. Qishloq xoʻjaligi vazirligi belgilangan tartibda har yili, mashina-traktor parklari tashkil etilishiga qarab, “Oʻzqishloqxoʻjaliktaʼminottuzatish” davlat-kooperativ qoʻmitasiga shartnomalarda nazarda tutilgan hajmlarda dala ishlarini bajarish uchun yonilgʻi-moylash materiallariga limitlar bersin.

4. Qishloq xoʻjaligi vazirligi, “Oʻzqishloqxoʻjaliktaʼminottuzatish” davlat-kooperativ qoʻmitasi 1995-yil yakunlari boʻyicha mashina-traktor parklarini tashkil etish va ularning faoliyat koʻrsatishlari natijalarini umumlashtirsinlar va ularni takomillashtirish yuzasidan Vazirlar Mahkamasiga tegishli takliflar kiritsinlar.

5. Mazkur qarorning bajarilishini nazorat qilish Bosh vazirning birinchi oʻrinbosari I.H. Joʻrabekov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1995-yil 24-mart,

95-son