21-modda. Narkologik kasalliklarga chalingan shaxslarni davolash

Narkologik kasalliklarga chalingan shaxslarni ambulatoriya yoki statsionar sharoitlarda davolashni oʻtkazishga doir tibbiy koʻrsatmalar va qarshi koʻrsatmalar Oʻzbekiston Respublikasi Sogʻliqni saqlash vazirligi tomonidan belgilanadi.

Narkologik kasalliklarga chalingan shaxslarni majburiy davolash mazkur Qonunning 5-bobida nazarda tutilgan tartibda amalga oshiriladi.

Narkologik yordamga muhtoj boʻlmagan shaxslarning narkologiya muassasasiga asossiz ravishda yotqizilishiga yoʻl qoʻyilmaydi.

Narkologik kasalliklarga chalingan shaxslarni davolash uchun Oʻzbekiston Respublikasi Sogʻliqni saqlash vazirligi tomonidan ruxsat etilgan tibbiy vositalar va usullardan foydalaniladi.

Tibbiy vositalar va usullardan faqat davolash maqsadida foydalanilishi kerak hamda ular narkologik kasalliklarga chalingan shaxslarni jazolash vositasi sifatida xizmat qilishi mumkin emas.

Davolash narkologik kasallikka chalingan shaxsning oʻziga xos shaxsiy xususiyatlari va ehtiyojlari hisobga olinadigan yakka tartibdagi rejaga asoslanadi, bu reja ushbu shaxsning oʻzi yoki uning qonuniy vakili bilan muhokama qilinadi.

Qoʻllaniladigan tashxis qoʻyish va davolash usullari, shu jumladan psixoterapevtik texnologiyalar haqidagi maʼlumotlar kasallik tarixiga yoki ambulatoriya kartasiga kiritiladi.

Narkologik kasalliklarga chalingan shaxslar boshqa davolash-profilaktika muassasalarida boʻlgan taqdirda, ular maslahat tarzidagi narkologik yordam bilan taʼminlanadi.

Narkologiya muassasasida statsionar davolanishda boʻlgan shaxslarga, zarurat boʻlganda, boshqa mutaxassislarning maslahat berishi taʼminlanadi.

Narkologiya muassasasida statsionar davolanishda boʻlgan shaxslarda boshqa ixtisoslikdagi davolash-profilaktika muassasalarida koʻrsatiladigan shoshilinch tibbiy yordamni talab etadigan holatlar aniqlangan taqdirda, ular tez tibbiy yordam xizmati orqali zudlik bilan tegishli davolash-profilaktika muassasalariga oʻtkaziladi.