Yaponiya xalqaro hamkorlik agentligining qarzidan foydalanib “Qarshi-Termiz temir yoʻl uchastkasini elektrlashtirish” investitsiya loyihasini amalga oshirish chora-tadbirlari toʻgʻrisida (PQ-1712-son)

21.02.2012

Oʻzbekiston Respublikasi Prezidentining

Qarori

Temir yoʻllar tarmogʻini yanada rivojlantirish, yoʻlovchi va yuk tashish samaradorligini oshirish, temir yoʻl transportini elektrlashtirish va zamonaviy texnologiyalarni joriy etish orqali sifatli xizmatlar koʻrsatilishini taʼminlash maqsadida:

1. Quyidagilar:

Yaponiya xalqaro hamkorlik agentligi “Qarshi-Termiz temir yoʻl uchastkasini elektrlashtirish” loyihasini amalga oshirish uchun 10 yillik imtiyozli davr bilan 30 yil muddatga 18 067 million Yaponiya iyenasi (220,6 million AQSH dollari ekvivalentida) miqdorida qarz ajratilayotgani;

loyihani amalga oshirishda Oʻzbekiston Respublikasining ulushi 261,16 million AQSH dollari ekvivalentini tashkil etib, shundan 93,52 million AQSH dollari soliq va bojxona imtiyozlari koʻrinishida, hamda “Oʻzbekiston temir yoʻllari” davlat-aksiyadorlik kompaniyasining 167,64 million AQSH dollariga teng boʻlgan oʻz mablagʻlaridan iboratligi;

loyihani amalga oshirish muddati olti yil (2012 — 2017-yillar) etib belgilanganligi maʼlumot uchun qabul qilinsin.

2. Belgilab qoʻyilsinki:

“Oʻzbekiston temir yoʻllari” davlat-aksiyadorlik kompaniyasi qarz mablagʻlaridan maqsadli va samarali foydalanish, shuningdek loyihani oʻz vaqtida va toʻliq amalga oshirish uchun masʼul ijro etuvchi organ hisoblanadi;

Loyiha doirasida tashqi elektr taʼminoti obyektlarini loyihalashtirish va qurish boʻyicha ijrochi agentlik “Oʻzbekenergo” DAK hisoblanadi. Bunda tashqi elektr taʼminoti obyektlarini loyihalashtirish va qurishni moliyalashtirish “Oʻzbekiston temir yoʻllari” DAJK tomonidan oʻz mablagʻlari va Yaponiya xalqaro hamkorlik agentligining qarzi hisobidan amalga oshiriladi;

Yaponiya xalqaro hamkorlik agentligining qarziga xizmat koʻrsatuvchi moliyaviy agent sifatida Oʻzbekiston Respublikasi Tashqi iqtisodiy faoliyat milliy banki belgilanadi;

Yaponiya xalqaro hamkorlik agentligi qarzini qaytarish, shuningdek u boʻyicha foizlar va vositachilik haqini toʻlash bilan bogʻliq xarajatlar “Oʻzbekiston temir yoʻllari” DAJKning oʻz mablagʻlari hisobidan amalga oshiriladi;

Loyiha doirasida yangidan qurilgan tashqi elektr taʼminoti obyektlari “Oʻzbekiston temir yoʻllari” DAJK tomonidan “Oʻzbekenergo” DAK balansiga bepul oʻtkaziladi.

3. Quyidagilar belgilansin:

Qarshi-Termiz temir yoʻl uchastkasini elektrlashtirish boʻyicha buyurtmachi — “Oʻzbekiston temir yoʻllari” DAJK;

“Oʻzbekiston temir yoʻllari” DAJKning oʻz mablagʻlari hisobidan amalga oshiriladigan elektrlashtirish obyektlari qurilishi boʻyicha loyiha ishlarini bajaruvchi bosh loyihalash tashkilotlari — “Boshtransloyiha” OAJ va “OʻrtaosiyoyenergoTarmoqLoyiha” AJ;

“Oʻzbekiston temir yoʻllari” DAJKning oʻz mablagʻlari hisobidan amalga oshiriladigan elektrlashtirish obyektlari qurilishi boʻyicha bosh pudratchi tashkilotlar — “Oʻzbekiston temir yoʻllari” DAJK va “Oʻzbekenergo” DAK boʻlinmalari.

4. Quyidagilar:

“Qarshi-Termiz temir yoʻl uchastkasini elektrlashtirish” loyihasining texnik-iqtisodiy asosi (asosiy texnik-iqtisodiy koʻrsatkichlari bilan birga) 1-ilovaga muvofiq;

loyihani amalga oshirish doirasida taqdim etiladigan Yaponiya xalqaro hamkorlik agentligi qarzining asosiy qismini qaytarish, foizlar va komissiyalarni toʻlashning prognoz jadvallari 2- va 3-ilovalarga muvofiq tasdiqlansin.

5. Oʻzbekiston Respublikasi Moliya vaziriga Oʻzbekiston Respublikasi Hukumati nomidan quyidagilarni imzolash vakolati berilsin:

Yaponiya xalqaro hamkorlik agentligi bilan ayirboshlash notasi va qarz bitimi;

Oʻzbekiston Respublikasi Tashqi iqtisodiy faoliyat milliy banki va “Oʻzbekiston temir yoʻllari” davlat-aksiyadorlik kompaniyasi bilan Yaponiya xalqaro hamkorlik agentligi qarzidan foydalanish tartibi toʻgʻrisidagi agentlik bitimi.

Oʻzbekiston Respublikasi Adliya vazirligi Oʻzbekiston Respublikasi Hukumati bilan Yaponiya xalqaro hamkorlik agentligi oʻrtasidagi qarz bitimi boʻyicha belgilangan tartibda huquqiy xulosa bersin.

6. “Qarshi — Termiz temir yoʻl uchastkasini elektrlashtirish” loyihasini amalga oshirish doirasida:

Yaponiya xalqaro hamkorlik agentligining qarzi hisobiga xarid qilinadigan tovarlar (ishlar, xizmatlar) va transport vositalari bojxona toʻlovlaridan (bojxona yigʻimlaridan tashqari), qoʻshilgan qiymat soligʻidan, davlat maqsadli jamgʻarmalariga majburiy ajratmalar va yigʻimlardan ozod qilinsin;

yuridik shaxslarning foyda soligʻidan — Oʻzbekiston Respublikasi norezidentlari tomonidan bajarilgan ishlar (koʻrsatilgan xizmatlar)dan olingan daromadlar, shuningdek qarz shartnomasi boʻyicha Yaponiya xalqaro hamkorlik agentligiga toʻlanadigan foiz koʻrinishidagi daromadlar ozod etilsin.

Mazkur imtiyozlarning amal qilishi Oʻzbekiston Respublikasi Vazirlar Mahkamasi tomonidan tasdiqlanadigan roʻyxatlar asosida loyihani amalga oshirish doirasida “Oʻzbekiston temir yoʻllari” AJning mablagʻlari hisobiga xarid qilinadigan tovarlar (ishlar, xizmatlar) va transport vositalariga ham tatbiq etilsin.

Imtiyozlar taqdim etilishi natijasida tejalgan mablagʻlar summasi Oʻzbekiston Respublikasining ushbu loyihani amalga oshirishga qoʻshgan ulushi sifatida belgilansin.

7. Loyiha amalga oshiriladigan hududning murakkab tabiiy-iqlim sharoitlarini hamda ishlarning koʻchma xususiyatini inobatga olgan holda quyidagilar belgilansin:

Qarshi-Termiz temir yoʻl uchastkasini elektrlashtirish loyihasini amalga oshirishda bevosita band boʻlgan barcha toifadagi xodimlar uchun ish haqiga nisbatan koeffitsiyent Qashqadaryo viloyati boʻyicha 1,4 va Surxondaryo viloyati boʻyicha 1,3 miqdorida qoʻllanilsin;

Qarshi-Termiz temir yoʻl uchastkasini elektrlashtirish loyihasini amalga oshirishda bevosita band boʻlgan xodimlarning uch mahal bepul ovqatlanishi yuridik shaxslarning foyda soligʻi, qoʻshilgan qiymat soligʻi va jismoniy shaxslarning daromad soligʻini hisoblashda soliq solish obyekti hisoblanmasin.

8. Oʻzbekiston Respublikasi Tashqi ishlar vazirligi “Oʻzbekiston temir yoʻllari” davlat-aksiyadorlik kompaniyasining soʻrovnomalari asosida mazkur loyihani amalga oshirishda ishtirok etuvchi xorijiy mutaxassislarga kirish vizalarini konsullik va boshqa yigʻimlarni undirmasdan rasmiylashtirishni taʼminlasin.

9. Oʻzbekiston Respublikasi Ichki ishlar vazirligi “Oʻzbekiston temir yoʻllari” davlat-aksiyadorlik kompaniyasining soʻrovnomalari asosida mazkur loyihani amalga oshirishda ishtirok etuvchi xorijiy mutaxassislarga koʻp martalik vizalarni berish va muddatini uzaytirish, shuningdek vaqtinchalik roʻyxatdan oʻtkazish va uning muddatini uzaytirishni taʼminlasin, ularni davlat bojlari va yigʻimlarini toʻlashdan ozod etsin.

10. Qashqadaryo va Surxondaryo viloyatlari hokimliklari mazkur loyihani amalga oshirish doirasida elektrlashtirish obyektlari quriladigan hududdagi yer uchastkalarini oʻz vaqtida ajratish va imoratlarni buzishni belgilangan tartibda taʼminlasinlar.

11. Ushbu qarorning ijrosini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov va Bosh vazir oʻrinbosari B.I. Zakirov zimmasiga yuklatilsin.

Oʻzbekiston Respublikasi Prezidenti I. KARIMOV

Toshkent sh.,

2012-yil 21-fevral,

PQ-1712-son

Oʻzbekiston Respublikasi Prezidentining 2012-yil 21-fevraldagi PQ-1712-son qaroriga 1-ILOVA

“Qarshi-Termiz temir yoʻl uchastkasini elektrlashtirish” loyihasi texnik-iqtisodiy asoslanishining asosiy koʻrsatkichlari

Izohlar:

* Yakuniy qiymat koʻrsatkichlari tovarlarni (ishlarni, xizmatlarni) yetkazib berish boʻyicha tender savdolari natijalariga koʻra aniqlanadi.

Valyutalarning ayirboshlash kursi 2010-yil 9-dekabrda JICA va Oʻzbekiston Respublikasi Hukumati oʻrtasida loyiha boʻyicha muhokama bayonnomasi imzolangan sanada 1 AQSH dollari = 1626 soʻm = 81,9 yapon iyenasi deb qabul qilingan.

Oʻzbekiston Respublikasi Prezidentining 2012-yil 21-fevraldagi PQ-1712-son qaroriga 2-ILOVA

“ Qarshi-Termiz temir yoʻl uchastkasini elektrlashtirish “ loyihasini amalga oshirish doirasida uskunalar, materiallar va xizmatlar yetkazib berish uchun ajratilgan Yaponiya xalqaro hamkorlik agentligi qarzining asosiy qismini qaytarish, foizlar va komissiyalarni toʻlashning prognoz jadvali

Izohlar:

* Toʻlovlar summasi qarz mablagʻlarining amalda oʻzlashtirilishiga qarab aniqlanadi.

** Loyihani amalga oshirish davrida qarz hisobidan majburiyat uchun yillik 0,1% stavka boʻyicha komissiya toʻlovi amalga oshiriladi.

Oʻzbekiston Respublikasi Prezidentining 2012-yil 21-fevraldagi PQ-1712-son qaroriga 3-ILOVA

“Qarshi-Termiz temir yoʻl uchastkasini elektrlashtirish” loyihasini amalga oshirish doirasida maslahat xizmatlari uchun taqdim etiladigan Yaponiya xalqaro hamkorlik agentligining qarzi boʻyicha asosiy qarzni qaytarish, foizlar va komissiyalarni toʻlashning

PROGNOZ JADVALI

Izohlar:

* Toʻlovlar summasi qarz mablagʻlarining amalda oʻzlashtirilishiga qarab aniqlanadi.

** Loyihani amalga oshirish davrida qarz hisobidan majburiyat uchun yillik 0,1% stavka boʻyicha vositachilik haqi toʻlanadi.