Markaziy osiyo xalqlari madaniyati assambleyasi xalqaro jamoatchilik harakatini rivojlantirish jamgʻarmasini qoʻllab-quvvatlash toʻgʻrisida (407-son)

21.11.1996

Oʻzbekiston Respublikasi Vazirlar Mahkamasining

qarori

Markaziy Osiyo davlatlari va xalqlari oʻrtasida madaniyat, maʼrifat, til, ilm-fan va maʼnaviy qadriyatlarga asoslangan oʻzaro hamkorlikning tobora rivojlanib borayotgani hamda ushbu mintaqa ziyolilari va keng jamoatchilikning murojaatlarini inobatga olib, xalqlarimiz oʻrtasidagi qadimiy doʻstlik va maʼnaviy birlikni yanada mustahkamlash maqsadida Vazirlar Mahkamasi qaror qiladi:

1. Markaziy Osiyo xalqlari madaniyati Assambleyasi xalqaro jamoatchilik harakatining xalqlarimizning mushtarak boy anʼanaviy merosini avaylab-asrashga, adabiyot, sanʼat, ilm-fan sohasida erishgan yutuqlarini dunyoga tanitish, bu sohada yangi imkoniyatlarni izlab topish va targʻibot ishlarini takomillashtirishga qaratilgan faoliyat dasturi maʼqullansin.

2. Markaziy Osiyo xalqlari madaniyati Assambleyasi xalqaro jamoatchilik harakatini yanada rivojlantirish maqsadida Toshkent shahrida uning Jamgʻarmasi tuzilgani va Nizomi Oʻzbekiston Respublikasi Adliya vazirligida roʻyxatdan oʻtgani inobatga olinsin.

3. Jamgʻarmaning asosiy maqsadi va vazifalari:

Assambleya dasturini amalga oshirishga, moddiy-texnika bazasini mustahkamlashga mintaqa va boshqa mamlakatlardagi sarmoyadorlarni jalb qilish, oʻz Nizomi doirasida ishlab chiqarish, tashqi iqtisodiy faoliyat, tijorat, turizm va noshirlik ishlari bilan shugʻullanish;

Markaziy Osiyo xalqlarining tarixiy birligi gʻoyasini ulugʻlash, ilmiy, madaniy-maʼrifiy aloqalarini takomillashtirish, tinchlik va osoyishta hayot yoʻlida doʻstlik, hamjihatlik, hamkorlik rishtalarini yanada mustahkamlash;

buyuk ajdodlarimizning asrlar mobaynida yaratilgan va noyob maʼnaviy mulkimizga aylangan merosi — mushtarak milliy va umuminsoniy qadriyatlarni avaylab asrash, boyitish, mustaqillik manfaatlari yoʻlida keng targʻib qilish;

yosh avlodning mushtarak anʼanalarga hurmat va sadoqat, istiqlol tufayli qayta uygʻongan oʻzlikni anglash, milliy gʻurur, mehr-oqibat, yaqin qoʻshnichilik va birodarlik tuygʻularini yurak-yurakdan his etishi, mintaqada tinchlik va osoyishtalik bunyodkorlari, porloq istiqbol ijodkorlari boʻlib kamol topishi uchun saʼy-harakat koʻrsatish;

muntazam ravishda madaniyat, adabiyot, sanʼat, folklor, milliy hunarmandchilik, bolalar ijodi kabi sohalar boʻyicha xalqaro festivallar, anjumanlar, koʻrik-tanlovlar oʻtkazish, Assambleyaning turli mukofot va sovrinlarini joriy etish, shu orqali ijod ahli va ziyolilarni shonli tarixi, byetimsol buguni, yorqin kelajagi bir boʻlgan qon-qardosh xalqlarning azaliy va abadiy hamkorligini ulugʻlovchi badiiy barkamol, yuksak insonparvarlik ruhidagi oʻlmas asarlar yaratishga ilhomlantirishdan iborat ekanligi eʼtiborga olinsin.

4. Jamgʻarmaning taʼsischilari va homiylari, turli tashkilotlar, korxonalar va jamoatchilikning uni moddiy-maʼnaviy jihatdan qoʻllab-quvvatlash haqidagi takliflari maʼqullansin.

6. Oʻzbekiston Respublikasi Moliya vazirligi (B. Hamidov) Jamgʻarmaga Vazirlar Mahkamasi zaxirasidan 10 (oʻn) million soʻm mablagʻ ajratsin.

8. Toshkent shahar hokimligi (K.Toʻlaganov) bir oy muddatda Markaziy Osiyo xalqlari madaniyati Assambleyasi xalqaro jamoatchilik harakatining qarorgohi hamda Jamgʻarma uchun alohida bino ajratsin.

9. Ommaviy axborot vositalariga Jamgʻarma faoliyatini muntazam yoritib borish tavsiya etilsin.

10. Ushbu qarorning bajarilishini nazorat qilish Bosh vazir oʻrinbosari A. Azizxoʻjayev zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1996-yil 21-noyabr,

407-son