Oʻzbekiston Qizil yarim oy jamiyati toʻgʻrisida (458-son)

05.10.1992

Oʻzbekiston Respublikasi Prezidenti huzuridagi Vazirlar Mahkamasining

qarori

Oʻzbekiston Respublikasi Prezidentining “Oʻzbekiston Qizil Yarim oy jamiyati toʻgʻrisida”gi 1992-yil 28-maydagi Farmoniga muvofiq Vazirlar Mahkamasi qaror qiladi:

1. Noyabr oyining ikkinchi oʻn kunligi Oʻzbekiston Respublikasining barcha hududida Qizil Yarim oy jamiyati Jamgʻarmasiga xayriya toʻplash oʻn kunligi deb eʼlon qilinsin.

Oʻzbekiston Qizil Yarim oy jamiyatining Jamgʻarmasiga mablagʻ toʻplash oʻn kunligini oʻtkazish tartibi toʻgʻrisidagi Nizom ilovaga muvofiq tasdiqlansin.

2. Oʻzbekiston Qizil Yarim oy jamiyati korxonalari va tashkilotlari jamiyatning ustav faoliyatini amalga oshirishga yoʻnaltiriladigan valyuta ajratmalarini oʻtkazishdan ozod etilsin.

3. Respublika fuqarolarini nafaqa bilan taʼminlash haqidagi Oʻzbekiston Respublikasi qonuni qabul qilingunga qadar Qizil Yarim oy jamiyatining mehr-shafqat hamshiralari ish haqi fondidan yetti foiz miqdorda ijtimoiy sugʻurtaga ajratma oʻtkazish belgilansin.

4. Oʻzbekiston Respublikasi Tashqi iqtisodiy aloqalar vazirligi Oʻzbekiston Qizil Yarim oy jamiyatini iqtisodiy aloqalar ishtirokchisi sifatida belgilangan tartibda roʻyxatga olsin hamda imtiyozli shartlar asosida uning tashqi iqtisodiy faoliyatiga har tomonlama yordam koʻrsatsin.

5. Oʻzbekiston Respublikasi Prezidenti huzuridagi Vazirlar Mahkamasining Istiqbolni belgilash va statistika davlat qoʻmitasi Qizil Yarim oy jamiyatiga xalqaro Qizil Xoch va Qizil Yarim oy milliy jamiyatlari Xalqaro Federatsiyasiga har yilgi badalni toʻlash va uning xalqaro faoliyatini amalga oshirish uchun valyuta mablagʻlarini ajratishni nazarda tutsin.

6. Oʻzbekiston Respublikasi Tashqi iqtisodiy faoliyat milliy banki Oʻzbekiston Qizil Yarim oy jamiyati hamda uning korxonalari va tashkilotlari tomonidan tashqi iqtisodiy faoliyatni amalga oshirishda imtiyozli shartlarda xalqaro hisob-kitoblar xizmatlarini koʻrsatsin.

7. “Oʻzshartnomasavdo” Jamiyatga zarur moddiy texnika resurslarini sotib olishda har yili yordam koʻrsatsin.

8. Oʻzbekiston Respublikasi Tashqi ishlar vazirligi, Ichki ishlar vazirligi Qizil Yarim oy jamiyatining xalqaro faoliyati bilan bogʻliq hujjatlarni birinchi navbatda rasmiylashtirishni taʼminlasinlar.

9. “Oʻzbekiston havo yoʻllari” milliy aviakompaniyasi, Oʻrta Osiyo temir yoʻli boshqarmasi, Oʻzbekiston Respublikasi Avtomobil transporti vazirligi, Aloqa vazirligi, Respublika bojxona qoʻmitasi tabiiy ofatlar va shu kabi boshqa ekstremal vaziyatlar roʻy bergan paytlarda Jamiyat yuklarini va uning vakillarini birinchi navbatda tashilishini taʼminlasinlar.

10. “Oʻzbekiston havo yoʻllari” milliy aviakompaniyasiga Oʻrta Osiyo temir yoʻli boshqarmasiga, Chet el turizmi Toshkent va viloyatlar boʻlimlariga Qizil Xoch va Qizil Yarim oy jamiyatlari xalqaro tashkilotlarining vakillariga Oʻzbekiston mehmonxonalarida yashaganlik avia va temir yoʻl biletlarini sotib olganlik uchun soʻmlarda haq toʻlashga ruxsat berilsin.

11. Qoraqalpogʻiston Respublikasi Vazirlar Kengashi, Toshkent shahar, Oʻzbekiston Respublikasi viloyatlari va nohiyalari hokimliklari:

ikki oy muddat ichida Oʻzbekiston Qizil Yarim oy jamiyati organlari va muassasalarini tegishli ravishda xizmat xonalari bilan taʼminlash masalasini hal etsinlar;

Qizil Yarim oy jamiyati patronajida boʻlgan keksa yoshdagi fuqarolarning boshqa joyga koʻchishi yoki vafoti tufayli boʻshaydigan uy-joy fondini jamiyat xomiyligida boʻlganlarga berish masalasi koʻrib chiqilsin.

12. Oʻzbekiston Qizil Yarim oy jamiyati zimmasiga Oʻzbekiston Respublikasi tashqarisidagi Oʻzbekiston Respublikasi bolalari — fuqarolariga vasiylik qilish, ularni farzandlikka olish va tarbiyasini tashkil etishni nazorat qilish vazifasi yuklatilsin.

Oʻzbekiston Respublikasi Bosh vaziri A. MUTALOV

Toshkent sh.,

1992-yil 5-oktabr,

458-son

Vazirlar Mahkamasining 1992-yil 5-oktabrdagi 458 son qaroriga ILOVA

Qizil Yarim oy jamiyati jamgʻarmasiga mablagʻ toʻplash aksiyasini oʻtkazish tartibi toʻgʻrisida

NIZOM

1. Oʻzbekiston Respublikasining barcha hududida har yili noyabr oyining ikkinchi oʻn kunligida Oʻzbekiston Qizil Yarim oy jamiyati hisobiga mablagʻ toʻplash oʻn kunligi eʼlon qilinadi.

2. Qoraqalpogʻiston Respublikasida, Oʻzbekistonning viloyatlarida, shaharlarida va nohiyalarida hokimlar boshchiligida tashkiliy qoʻmitalar tuziladi.

3. Oʻzbekiston Respublikasi ommaviy axborot vositalari Qizil Xoch va Qizil Yarim oy xalqaro harakatini reklama qilish kompaniyasini oʻtkazadilar.

4. Oʻzbekiston Respublikasining korxonalari, jamoa, davlat xoʻjaliklari, birjalari, banklari, qoʻshma korxonalari, savdo uylari, boshqa birlashmalari, tashkilotlari va xususiy shaxslari chet ellik yuridik va jismoniy shaxslar mablagʻ toʻplash xayriya kompaniyasida qatnashadilar.

5. Respublika Mudofaa vazirligi va Ichki ishlar vazirligi shaxsiy sostav oʻrtasida Oʻzbekiston Qizil Yarim oy jamiyati hisobiga shaxsiy badal topshirish va mablagʻ toʻplash yuzasidan tushuntirish ishlarini olib boradilar.

6. Moliya vazirligi, “Oʻzbeksavdo” davlat aksionerlik uyushmasi, Oʻzbekbirlashuv Oʻzbekiston Qizil Yarim oy jamiyatiga pul-buyum lotereyalarini kimoshdi savdolarini, oldi-sotdilarni, yarmarkalarni va boshqa xildagi xayriya aksiyalarini oʻtkazishda yordam koʻrsatadilar.

7. Vazirliklar va idoralar mablagʻ toʻplash davrida Oʻzbekiston Qizil Yarim oy jamiyatiga xayriya chiptalarini tarqatishda yordam koʻrsatadilar.

8. Davlat matbuot qoʻmitasi Oʻzbekiston Qizil Yarim oy jamiyati Markaziy qoʻmitasiga xayriya aksiyasini targʻibot etishga qaratilgan nashriy-matbaa mahsulotlarini chiqarishda yordam koʻrsatadi.

9. Madaniy-tomosha tadbirlarini amalga oshiruvchi tashkilotlar, Madaniyat ishlari vazirligi, Davlat jismoniy tarbiya va sport qoʻmitasi, “Oʻzdavkinokompaniya” oʻn kunlik davomida xayriya konsertlarini teatr tomoshalarni sport tadbirlarini va hokazolarni tashkil etadilar va ulardan tushgan mablagʻ Oʻzbekiston Qizil Yarim oy jamiyati hisobiga oʻtaziladi.

10. Oʻzbekiston Qizil Yarim oy jamiyati xayriya aksiyalarini oʻtkazish tartibini ishlab chiqadi.

Oʻzbekiston Qizil Yarim oy jamiyati Markaziy qoʻmitasining hisob-kitob schyoti quyidagicha: Sanoat-qurilish bankining Toshkent shahar Yunusobod nohiyasi boʻlimidagi hisob-kitob schyoti 000700378, MFO 172682304.

Tashqi iqtisodiy faoliyat milliy bankidagi valyuta schyoti — 700000001.