“LEMKEN” qishloq xoʻjaligi texnikasini ishlab chiqarish boʻyicha qoʻshma korxona tashkil etish toʻgʻrisida (40-son)

15.02.2012

Oʻzbekiston Respublikasi Vazirlar Mahkamasining

qarori

[Koʻchirma]

Oʻzbekiston Respublikasi qishloq xoʻjaligi mashinasozligini modernizatsiya asosida barqaror rivojlantirish, qishloq xoʻjaligi texnikasi boʻyicha yetakchi jahon ishlab chiqaruvchilarini strategik hamkor sifatida jalb etish hamda qishloq xoʻjaligini zamonaviy va yuqori samarali texnika bilan toʻliq taʼminlash maqsadida Vazirlar Mahkamasi qaror qiladi:

1. Quyidagilar:

“Chirchiqqishloqmash” AJ va “LEMKEN GmbH & So. KG” (Germaniya) kompaniyasi oʻrtasida 2011-yil 5-dekabr kuni zamonaviy tuproqni qayta ishlash texnikasi va boshqa turdagi “LEMKEN” qishloq xoʻjaligi texnikalarini ishlab chiqarishga ixtisoslashgan masʼuliyati cheklangan jamiyat shaklidagi “LEMKEN Chirchiq” qoʻshma korxonasini tashkil etish boʻyicha Bitim imzolangani;

“LEMKEN Chirchiq” MCHJning ustav fondi taʼsis yigʻilishi oʻtkazilgan sanada 500 ming yevro miqdorida shakllantirilgani, shundan “Chirchiqqishloqmash” AJ ulushi 70 foiz, “LEMKEN GmbH & Co. KG” ulushi esa 30 foizni tashkil etishi;

“LEMKEN Chirchiq” MCHJ tomonidan ishlab chiqarilishi rejalashtirilgan universal aylanuvchan pluglar, rotatsion boronalar, diskli kultivatorlar va tuproq zichlagichlarni mahalliylashtirish darajasini 50 foizdan oshirish koʻzda tutilgan 2012 — 2014-yillarda bosqichma-bosqich amalga oshiriladigan mahalliylashtirish dasturi kelishilgani;

“LEMKEN GmbH & Co KG” va “LEMKEN Chirchiq” MCHJ oʻrtasida litsenziya berish va texnik yordam koʻrsatish boʻyicha Bitim tuzish yuzasidan erishilgan kelishuvga koʻra, “LEMKEN GmbH & Co KG” kompaniyasi shartnoma imzolangan kundan boshlab 90 kun ichida “LEMKEN Chirchiq” MCHJda ishlab chiqarilishi rejalashtirilgan qishloq xoʻjaligi texnikasiga oid konstruktorlik hujjatlarini taqdim etishi lozimligi maʼlumot uchun qabul qilinsin.

3. “LEMKEN Chirchiq” MCHJ davlat roʻyxatidan oʻtgan kundan boshlab 5 yil muddatga quyidagilarni toʻlashdan ozod etilsin:

barcha soliqlardan, bundan Pensiya jamgʻarmasiga, Respublika yoʻl jamgʻarmasiga va Moliya vazirligi qoshidagi taʼlim hamda tibbiyot muassasalarini rekonstruksiya qilish, kapital taʼmirlash va jihozlash jamgʻarmasiga majburiy toʻlovlar mustasno;

“LEMKEN Chirchiq” MCHJ tomonidan qishloq xoʻjaligi texnikasi ishlab chiqarish uchun olib kelinadigan butlovchi qismlar, detallar, uzellar va materiallar hamda ularga texnik xizmat koʻrsatish uchun ehtiyot qismlar 2012-yilda ilovadagi roʻyxatga asosan, 2013-yildan boshlab esa Vazirlar Mahkamasi tomonidan tasdiqlanadigan roʻyxatga asosan bojxona toʻlovlaridan (bojxona rasmiylashtiruvi uchun yigʻimlar bundan mustasno);

“LEMKEN GmbH & Co. KG” kompaniyasiga toʻlanadigan dividendlar boʻyicha toʻlovchi manbani foyda soligʻidan.

Agar “LEMKEN GmbH & Co. KG” kompaniyasi litsenziya berish va texnik yordam koʻrsatish toʻgʻrisidagi Bitimda belgilangan majburiyatlarini bajarmasa, ushbu soliq va bojxona imtiyozlarining amal qilishi toʻxtatiladi hamda ushbu majburiyatlar bajarilgan kundan boshlab imtiyozlar qayta tiklanadi.

4. Tashqi ishlar vazirligi “LEMKEN Chirchiq” MCHJning soʻroviga koʻra, mazkur qarorga koʻra qoʻshma korxona tashkil etish loyihasini amalga oshirish uchun jalb etiladigan xorijiy mutaxassislar va ularning oila aʼzolariga konsullik va boshqa yigʻimlar undirmasdan kirish vizalarini rasmiylashtirsin.

5. Ichki ishlar vazirligi “LEMKEN Chirchiq” MCHJ soʻrovi boʻyicha qoʻshma korxona tashkil etish loyihasini amalga oshirishda ishtirok etadigan xorijiy mutaxassislar va ularning oila aʼzolariga koʻp martalik vizalar berish va ularning muddatini uzaytirish, vaqtinchalik yashash joyida vaqtincha roʻyxatdan oʻtkazish va uning muddatini uzaytirishni amalga oshirsin, shuningdek, ularni davlat bojini toʻlashdan ozod qilsin.

6. Mehnat va aholini ijtimoiy muhofaza qilish vazirligi qoʻshma korxona tashkil etish loyihasini amalga oshirishda ishtirok etadigan yuqori malakali xorijiy mutaxassislarni jalb etish uchun “LEMKEN Chirchiq” MCHJga ruxsatnomalar bersin.

7. Ushbu qaror ijrosini nazorat qilish Oʻzbekiston Respublikasi Bosh vaziri Sh.M. Mirziyoyev zimmasiga yuklatilsin.

Oʻzbekiston Respublikasi Prezidenti I. KARIMOV

Toshkent sh.,

2012-yil 15-fevral,

40-son

Vazirlar Mahkamasining 2012-yil 15-fevraldagi 40-sonli qaroriga ILOVA

“LEMKEN Chirchiq” MCHJ tomonidan 2012-yilda qishloq xoʻjaligi texnikasi ishlab chiqarish uchun olib kelinadigan butlovchi qismlar, detallar, uzellar va materiallar hamda ularga texnik xizmat koʻrsatish uchun ehtiyot qismlar

ROʻYXATI

Izoh. 2012-yilda bojxona imtiyozlarini qoʻllash uchun “Oʻzbekekspertiza” OAJ va OʻzDITTMning chetdan olib kirilayotgan butlovchi buyumlar, detallar, qismlar, shuningdek, mahsulotlarni ishlab chiqarish va ularga texnik xizmat koʻrsatish uchun materiallar hamda ehtiyot qismlarning muvofiqligiga doir xulosasi asos hisoblanadi.