Yoshlar bilan ishlash sohasidagi hamkorlik toʻgʻrisida

25.11.2005

Mustaqil Davlatlar Hamdoʻstligiga aʼzo davlatlarning

Shartnomasi

Mustaqil Davlatlar Hamdoʻstligiga aʼzo davlatlar nomidan, bundan keyin Tomonlar deb yuritiluvchi hukumatlar,

doʻstlik munosabatlarini saqlash va chuqurlashtirish omili sifatida yoshlar hamkorligini rivojlantirish uchun qulay shart-sharoitlar yaratish istagini bildirgan holda,

jamiyat taraqqiyotining hozirgi bosqichida yoshlar rolining ortib borayotganligini hisobga olgan holda,

tenglik tamoyillari asosida yoshlarning xalqaro hamkorligini kengaytirish va takomillashtirish hamda shu maqsadda davlat organlari, yoshlar jamoat birlashmalari va yoshlarga oid davlat siyosatini amalga oshirishda ishtirok etuvchi boshqa tashkilotlar (birlashmalar) oʻrtasida keng oʻzaro aloqani oʻrnatish istagini tasdiqlagan holda,

yoshlar bilan ishlash sohasidagi hamkorlik xalqlar oʻrtasidagi oʻzaro tushunish va doʻstlikni mustahkamlashga, umuminsoniy qadriyatlarni tasdiqlashga koʻmaklashishga qaratilgan, deb hisoblagan holda,

quyidagilarni kelishib oldilar:

1-modda

Tomonlar yoshlarga oid davlat siyosatini amalga oshiradigan davlat organlari va jamoatchilik yoshlar tashkilotlari (birlashmalari) orqali yoshlar bilan ishlash sohasidagi hamkorlikni mustahkamlaydi va rivojlantiradi, ularning yoshlar hamkorligini faollashtirishga qaratilgan tashabbuslarini qoʻllab-quvvatlaydi.

2-modda

Tomonlar yoshlar hamkorligida ustuvorliklarni aniqlash va rivojlantirish maqsadida davlat organlari va yoshlar jamoat tashkilotlari (birlashmalari) oʻrtasida muntazam aloqalarni amalga oshirish uchun qulay shart-sharoitlar yaratadi.

3-modda

Ushbu Shartnomani roʻyobga chiqarish maqsadida Tomonlar oʻzaro manfaatdorlikka asoslangan davlatlararo dasturlar va alohida loyihalar ishlab chiqadi va ularni amalga oshiradi.

4-modda

Tomonlar quyidagi yoʻnalishlarda oʻzaro yordam koʻrsatadilar:

yoshlar bilan ishlash sohasida professional kadrlar tayyorlash;

yoshlarga oid davlat siyosatini amalga oshirish va yoshlar tashabbuslarini qoʻllab-quvvatlash bilan shugʻullanuvchi davlat organlari, yoshlar jamoat tashkilotlari va boshqa tashkilot va birlashmalarning ilmiy, maʼlumot-axborot va uslubiy materiallar, ish tajribasi bilan almashish;

yoshlar siyosati va yoshlar hamkorligining turli masalalari boʻyicha hamkorlikdagi tadqiqotlar va tadbirlar oʻtkazish.

5-modda

Tomonlar yoshlar bilan ishlash sohasida statistik va boshqa maʼlumotlar almashishga koʻmaklashadi, shu jumladan:

oʻz davlatlarida yoshlar siyosatini tartibga soluvchi qonun hujjatlari va boshqa meʼyoriy hujjatlar toʻgʻrisida;

yoshlar siyosatini amalga oshirish toʻgʻrisida.

6-modda

Tomonlar xalqaro hamkorlik masalalarida, shu jumladan Tomonlar vakillarining xalqaro yoshlar tashkilotlari faoliyatida ishtirok etishida oʻzaro yordam koʻrsatadilar.

7-modda

Tomonlarning ushbu Shartnomani amalga oshirish doirasidagi hamkorligi ikki tomonlama va koʻp tomonlama shartnomalar asosida amalga oshiriladi.

8-modda

Ushbu Shartnomani amalga oshirish maqsadida Tomonlar Mustaqil Davlatlar Hamdoʻstligiga aʼzo davlatlarning Yoshlar ishlari boʻyicha Kengashini (bundan buyon matnda Kengash deb yuritiladi) tuzadilar. Kengash ushbu Shartnomaning ajralmas qismi boʻlgan Nizomga muvofiq faoliyat yuritadi.

9-modda

Ushbu Shartnomani talqin qilish va amalga oshirish jarayonida nizolar kelib chiqsa, ular Tomonlar oʻrtasida muzokaralar yoki maslahatlashuvlar yoʻli bilan hal qilinadi.

10-modda

Ushbu Shartnoma, uni imzolagan Tomonlar uning kuchga kirishi uchun zarur boʻlgan davlat ichki tartib-qoidalarining bajarilganligi toʻgʻrisida uchinchi yozma xabarnomani depozitariyga topshirgan kundan boshlab kuchga kiradi.

Oʻz ichki tartib-qoidalarini keyinroq amalga oshirgan Tomonlar uchun, Shartnoma tegishli bildirishnoma depozitariyga yuborilgan kundan boshlab kuchga kiradi.

11-modda

Ushbu Shartnomaga Tomonlarning oʻzaro kelishuviga binoan oʻzgartirish va qoʻshimchalar kiritilishi mumkin boʻlib, ular ushbu Shartnomaning 10-moddasida belgilangan tartibda kuchga kiradi va ushbu Shartnomaning ajralmas qismi boʻlgan alohida protokollar bilan rasmiylashtiriladi.

12-modda

Ushbu Shartnoma uning maqsadlari va tamoyillariga sherik boʻlgan va ushbu Shartnomadan kelib chiqadigan majburiyatlarni olishga tayyor boʻlgan boshqa davlatlarning qoʻshilishi uchun ochiqdir. Qoʻshilgan davlat uchun, qoʻshilish haqidagi hujjatlar depozitariyga topshirilgan kundan eʼtiboran Shartnoma kuchga kiradi.

Mustaqil Davlatlar Hamdoʻstligiga aʼzo boʻlmagan davlatlar uchun qoʻshilish barcha Tomonlarning roziligiga koʻra mazkur qoʻshilish toʻgʻrisidagi hujjatlarni depozitariyga topshirish yoʻli bilan amalga oshiriladi. Qoʻshilish, mazkur qoʻshilishga rozilik haqidagi oxirgi xabarnoma depozitariyga topshirilgan kundan boshlab kuchga kirgan hisoblanadi.

13-modda

Ushbu shartnoma kuchga kirgan kundan boshlab 5 yil davomida amal qiladi. Ushbu muddat tugagandan soʻng, Tomonlar boshqacha qaror qilmasa, shartnoma avtomatik ravishda har besh yillik muddatga uzaytiriladi.

14-modda

Tomonlarning har biri ushbu Shartnomadan moʻljaldagi chiqish sanasidan kamida 6 oy oldin depozitariyga yozma xabarnoma yuborish orqali chiqib ketishi mumkin.

2005-yil 25-noyabrda Moskva shahrida rus tilida bitta asl nusxada tuzilgan. Asl nusxasi Mustaqil Davlatlar Hamdoʻstligi Ijroiya Qoʻmitasida saqlanadi, u tasdiqlangan nusxasini ushbu Shartnomani imzolagan har bir davlatga yuboradi.

(imzolar)

Mustaqil Davlatlar Hamdoʻstligiga aʼzo davlatlarning 2005-yil 25-noyabrdagi yoshlar bilan ishlash sohasidagi hamkorlik toʻgʻrisidagi Shartnomasiga ILOVA

Mustaqil Davlatlar Hamdoʻstligiga aʼzo davlatlarning Yoshlar ishlari boʻyicha kengashi toʻgʻrisida

NIZOM

I. Umumiy qoidalar

1.1. Mustaqil Davlatlar Hamdoʻstligiga aʼzo davlatlarning Yoshlar ishlari boʻyicha kengashi (bundan keyin matnda Kengash deb yuritiladi) Mustaqil Davlatlar Hamdoʻstligiga aʼzo davlatlarning Yoshlar bilan ishlash sohasidagi hamkorlik toʻgʻrisidagi Shartnomasini (bundan buyon Shartnoma deb yuritiladi) amalga oshirish uchun tuzilgan.

1.2. Kengash faoliyati MDH Davlat rahbarlari kengashi, Hukumat rahbarlari kengashi, Tashqi ishlar vazirlari kengashi va Iqtisodiy kengash tomonidan qabul qilingan qarorlarning bajarilishini tashkil etish va muvofiqlashtirishga yoʻnaltirilgan.

1.3. Kengash MDHning tarmoqlararo hamkorlik organi boʻlib, yoshlar siyosati sohasidagi oʻzaro hamkorlikni muvofiqlashtirishni taʼminlash uchun moʻljallangan.

1.4. Kengash oʻz faoliyatida Mustaqil Davlatlar Hamdoʻstligining Ustaviga, asosiy xalqaro shartnomalarga, shu jumladan Mustaqil Davlatlar Hamdoʻstligi doirasida amalda boʻlgan shartnomalarga, MDH Davlat rahbarlari kengashiga, Hukumat rahbarlari kengashiga, Tashqi ishlar vazirlari kengashiga, Iqtisodiy kengashga, shuningdek ushbu Nizomga asoslanadi.

Kengash oʻz faoliyatida MDH Hukumat rahbarlari kengashiga hisobdor hisoblanadi.

Kengash ishi toʻgʻrisidagi hisobot MDH Davlat rahbarlari kengashi, Hukumat rahbarlari kengashi, Tashqi ishlar vazirlari kengashi, Iqtisodiy kengash, Hamdoʻstlikka aʼzo davlatlarning doimiy vakillari kengashi, Hamdoʻstlikning ustav va boshqa organlari, shuningdek, MDH Iqtisodiy kengashi huzuridagi Iqtisodiy masalalar boʻyicha komissiya yigʻilishlarida belgilangan tartibda koʻrib chiqiladi.

1.5. Kengash kotibiyatining funksiyalari MDH Ijroiya qoʻmitasining tarkibiy boʻlinmasi bilan birgalikda Kengashga raislik qiluvchi MDHga aʼzo davlatning davlat organiga yuklatiladi.

Kengash kotibiyati rahbari Kengashda raislik qiluvchi davlatning davlat hokimiyati vakili, kotibiyat rahbari oʻrinbosari esa MDH Ijroiya qoʻmitasi vakili hisoblanadi. Kotibiyat Kengash faoliyatining tashkiliy-texnik va axborot taʼminotini amalga oshiradi.

1.6. Kengashning ishchi tili — rus tili.

1.7. Kengash har yili oʻz faoliyati toʻgʻrisidagi axborotni MDH Ijroiya qoʻmitasiga taqdim etadi.

1.8. Kengash oʻz ishini oʻzi ishlab chiqqan va tasdiqlagan rejalar asosida tashkillashtiradi.

II. Kengashning funksiyalari

2. Kengashning funksiyalariga quyidagilar kiradi:

2.1. Ushbu shartnomani amalga oshirish bilan bogʻliq masalalarni koʻrib chiqish.

2.2. Yoshlar bilan ishlash sohasida hamkorlikni rivojlantirish.

2.3. Yoshlar bilan ishlash sohasidagi muammolarni oʻrganish va muhokama qilish hamda ular boʻyicha tavsiyalar ishlab chiqish.

2.4. Yoshlar bilan ishlash sohasida hamkorlik toʻgʻrisidagi koʻp tomonlama hujjatlarni ishlab chiqish, shu jumladan ularni belgilangan tartibda Hamdoʻstlik ustav organlarining koʻrib chiqishi uchun taqdim etish, shuningdek ularning bajarilishiga koʻmaklashish.

2.5. Milliy yoshlar siyosati dasturlarini ishlab chiqish va amalga oshirishda koʻmaklashish.

2.6. Yoshlar bilan ishlash sohasidagi MDHga aʼzo davlatlar, boshqa davlatlar va xalqaro tashkilotlarning tajribasini oʻrganish va umumlashtirish.

2.7. Yoshlar bilan ishlash sohasida mutaxassis kadrlarni tayyorlash, almashish va malakasini oshirish boʻyicha ushbu Shartnomaga aʼzo davlatlar faoliyatiga koʻmaklashish.

III. Kengashni tuzish tartibi

3.1. Kengash Shartnomaga aʼzo davlatlardan har birining ikkitadan ishonchli vakillaridan tuziladi. Shartnomaga aʼzo davlatlarning ishonchli vakillari tegishli davlat hokimiyati organlarining rahbarlari, shuningdek, yoshlarga oid davlat siyosatini amalga oshirishda ishtirok etuvchi yoshlar jamoatchilik va boshqa birlashmalarning (tashkilotlarning) vakillari hisoblanadi.

Kengash aʼzolarining oʻrniga boshqa shaxslar Kengash majlisiga yuborilganda, ularning vakolatlari tasdiqlanishi kerak.

Shartnomaga aʼzo har bir davlat Kengashda bitta ovozga ega.

3.2. Kengash kotibiyati rahbari, shuningdek MDH Ijroiya qoʻmitasining vakili Kengash tarkibiga maslahatchi ovoz huquqi bilan kiradi.

IV. Kengash ishini tashkil etish

4.1. Kengash yigʻilishlari zaruratga qarab, lekin yiliga kamida ikki marta oʻtkaziladi va agar Kengash aʼzolarining kamida uchdan ikki qismi qatnashsa, yigʻilish vakolatli hisoblanadi.

Keyingi yigʻilishning joyi, vaqti va kun tartibi loyihasi Kengash aʼzolarining yigʻilishida oldindan kelishilgan holda belgilanadi.

Kengashning navbatdan tashqari yigʻilishi Kengash aʼzolarining kamida uchdan bir qismining roziligi bilan Kengashning bir yoki bir nechta aʼzolarining tashabbusi bilan oʻtkaziladi.

4.11. Kengash yigʻilishlarida, uning qarori bilan, MDH tarkibiga kirmaydigan, yoshlar bilan ishlash sohasida faoliyat olib borayotgan boshqa davlatlarning vakillari ishtirok etishlari mumkin;

4.2. Kengashga raislik qilish Hamdoʻstlikka aʼzo davlatlar nomlarining rus alifbosi tartibi boʻyicha navbat bilan Shartnomaga aʼzo boʻlgan har bir davlat nomidan uning vakili tomonidan bir yil muddat davomida amalga oshiriladi, ushbu muddat Kengash qarori bilan yana bir yilga uzaytirilishi mumkin.

Kengashning oldingi va keyingi raislari uning hamraislari hisoblanadi. Kengash raisi yoʻqligida uning vazifalari hamraislardan biriga yuklatiladi.

4.3. Kengash qarorlari ushbu masalani muhokama qilishda ishtirok etayotgan Shartnomaga aʼzo davlatlar ishonchli vakillarining uchdan ikki qismi ovozi bilan qabul qilinadi. Zarur hollarda Kengash MDH hukumatlari rahbarlari kengashi koʻrib chiqishi uchun belgilangan tartibda takliflar kiritadi.

Kengash qaroriga rozi boʻlmagan aʼzolar yigʻilish bayonnomasiga kiritiladigan alohida fikr bildirishlari mumkin.

Kengashning har qanday aʼzosi u yoki bu masaladan manfaatdor emasligi haqida bayonot berishi mumkin, mazkur holat qaror qabul qilishga, shuningdek kelajakda uning ushbu qarorga qoʻshilishiga toʻsiq sifatida qaralmasligi lozim.

Qaror rais tomonidan imzolanadigan bayonnoma bilan rasmiylashtiriladi.

Kengash qarorlari tavsiyaviy xaraktyerga ega.

4.4. Kengash komissiyalar va ishchi guruhlar tuzishi mumkin.

4.5. Kengash yigʻilishini oʻtkazishning tashkiliy-texnik taʼminoti MDH Ijroiya qoʻmitasi bilan birgalikda Kengash yigʻilishini oʻtkazadigan MDHga aʼzo davlat hududida yoshlar bilan ishlash sohasidagi davlat organi tomonidan amalga oshiriladi.

4.6. Kengash yigʻilishining kun tartibi yigʻilish ishtirokchilariga yigʻilish boshlanishidan 15 kun oldindan kechiktirmay yuboriladi.

4.7. Hujjatlar loyihalariga yigʻilish davomida kiritilgan taklif va oʻzgartirishlar, qoida tariqasida, yozma ravishda taqdim etiladi va yigʻilish ishtirokchilariga tarqatiladi.

4.8. Kengash yigʻilishlarini oʻtkazishni moliyalashtirish bilan bogʻliq xarajatlar MDHga aʼzo davlatning tegishli davlat organlari tomonidan amalga oshiriladi. Kengash aʼzolari va yigʻilish qatnashchilarini xizmat safariga yuborish xarajatlari MDHga aʼzo davlatlarning yuboruvchi davlat organlari va tashkilotlari tomonidan qoplanadi.

4.9. Kengash qarorlarining asl nusxalari, yigʻilish bayonnomalari va boshqa hujjatlar MDH Ijroiya qoʻmitasida saqlanadi.

Armaniston Respublikasining

QOʻShIMChA ShARTI

7-modda quyidagi tahrirda qabul qilinadi: “Ushbu Shartnomani amalga oshirish uchun Tomonlar oʻzaro ikki tomonlama va koʻp tomonlama shartnomalar tuzishlari mumkin”.

Armaniston Respublikasi Bosh vaziri A. MARGARYaN