39-modda. Qoraqalpogʻiston Respublikasining qishloqlari va ovullarini shaharchalar toifasiga kiritish

Qoraqalpogʻiston Respublikasining qishloqlari va ovullarini shaharchalar toifasiga kiritish Qoraqalpogʻiston Respublikasi Vazirlar Kengashining taklifiga koʻra Qoraqalpogʻiston Respublikasi Joʻqorgʻi Kengesi tomonidan tegishli tumanlar hokimlarining iltimosnomalari asosida amalga oshiriladi.

Tegishli tuman hokimi Qoraqalpogʻiston Respublikasi Vazirlar Kengashiga quyidagi hujjatlarni taqdim etadi:

qishloqni yoki ovulni shaharchalar toifasiga kiritish zarurligi va maqsadga muvofiqligi asoslantirilgan iltimosnoma;

tegishli tuman xalq deputatlari Kengashining qishloqlar va ovullarni shaharchalar toifasiga kiritish masalasiga doir qarori;

tuman hokimi tomonidan tashkil etilgan komissiya xulosasi;

qishloqni yoki ovulni shaharchalar toifasiga kiritish bilan bogʻliq tegishli hisob-kitoblar va xarajatlarni moliyalashtirish manbalari.

Qoraqalpogʻiston Respublikasi Vazirlar Kengashi tegishli tuman hokimining qishloqni yoki ovulni shaharchalar toifasiga kiritish haqidagi iltimosnomasini iltimosnoma kelib tushganidan keyin oʻttiz kun ichida koʻrib chiqadi va uni maʼqullaydi yoki rad etadi.

Tegishli tuman hokimining qishloqni yoki ovulni shaharchalar toifasiga kiritish haqidagi iltimosnomasi maʼqullangan taqdirda, Qoraqalpogʻiston Respublikasi Vazirlar Kengashi qishloqni yoki ovulni shaharchalar toifasiga kiritish haqidagi taklifni oʻn kun ichida tayyorlaydi va ushbu moddaning ikkinchi qismida nazarda tutilgan hujjatlar bilan birga Qoraqalpogʻiston Respublikasi Joʻqorgʻi Kengesiga koʻrib chiqish uchun kiritadi.