Kommunal xizmat koʻrsatish sohasiga zamonaviy hisobga olish priborlarini va resurslarni tejovchi texnologiyalarni joriy etish dasturi toʻgʻrisida (61-son)

11.02.2005

Oʻzbekiston Respublikasi Vazirlar Mahkamasining

qarori

Koʻrsatilayotgan kommunal xizmatlarning hajmi va qiymatini yakka tartibda hisobga olish va ular haqini oʻz vaqtida toʻlash mexanizmini joriy etish va unga soʻzsiz rioya etish, kommunal xizmatlarni ishlab chiqarish va aholiga kommunal xizmatlar koʻrsatishda zamonaviy resurslarni tejovchi texnologiyalarni joriy etish asosida kommunal xizmat koʻrsatish tizimini modernizatsiyalash, texnik jihatdan qayta jihozlash maqsadida Vazirlar Mahkamasi qaror qiladi:

1. Aholiga koʻrsatiladigan kommunal xizmatlarni hisobga olishning zamonaviy tizimini joriy etish dasturi tasdiqlansin, unda hisobga olish priborlari oʻrnatishni toʻliq tugallashning quyidagi muddatlari nazarda tutiladi:

tabiiy gazni hisobga olish priborlarini — 2005-yil 1-sentabrgacha, 1-ilovaga* muvofiq;

issiqlik energiyasini hisobga olish priborlarini (koʻp kvartirali uylarga kirish joylarida) — 4-ilovaga* muvofiq 2007-yil 1-yanvargacha tugallash.

* 1-4-ilovalar rus tilidagi matnda berilgan.

Issiqlik bilan taʼminlash manbalarida issiqlikni va tabiiy gazni hisobga olish priborlarini oʻrnatish 2007-yil 1-yanvargacha tugallansin.

2. Oʻzbekiston Respublikasi Iqtisodiyot vazirligi Tashqi iqtisodiy aloqalar agentligi, Oʻzbekiston Respublikasi Moliya vazirligi va “Oʻzkommunxizmat” agentligi bilan birgalikda ikki oy muddatda:

hisobga olish priborlarini oʻrnatish yoʻli bilan aholiga koʻrsatiladigan kommunal xizmatlarni toʻliq hisobga olishni joriy etish dasturini belgilangan muddatlarda amalga oshirish uchun xorijiy investitsiyalarni jalb etish toʻgʻrisida;

hisobga olish priborlarini Oʻzbekiston Respublikasining ularni oʻrnatish va almashtirishga boʻlgan joriy ehtiyojini toʻliq taʼminlaydigan miqdorda keng koʻlamda ishlab chiqarish boʻyicha qoʻshma korxonalar tashkil etish toʻgʻrisida takliflar kiritsin.

3. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari “Oʻzkommunxizmat” agentligi bilan birgalikda bir oy muddatda umuman har qaysi hudud, tumanlar va shaharlar, muayyan koʻp kvartirali uylar boʻyicha kommunal xizmatlarni hisobga olish priborlarini oʻrnatish jadvallari va tadbirlarini ishlab chiqsinlar hamda tasdiqlash uchun Vazirlar Mahkamasiga kiritsinlar.

4. “Oʻzkommunxizmat” agentligi, “Oʻzbekenergo” davlat-aksiyadorlik kompaniyasi Iqtisodiyot vazirligi, Moliya vazirligi, “Oʻzdavneftgazinspeksiya”, “Sanoatkontexnazorat” davlat inspeksiyasi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda ikki oy muddatda energiyani tejaydigan texnologiyalarni joriy etish kompleks dasturini ishlab chiqsinlar va tasdiqlash uchun Vazirlar Mahkamasiga kiritsinlar, dasturda quyidagilar nazarda tutilsin:

bugʻ agregatlarini ishlab chiqarish hamda maʼnaviy eskirgan va iqtisodiy jihatdan tejamsiz bugʻ agregatlarini almashtirish ishlarini 2008-yil 1-yanvargacha tugallash;

eskirgan issiqlik va suv quvurlari tarmoqlarini almashtirish ishlarini 2010-yil 1-yanvargacha boʻlgan muddatda tugallash;

mahalliy sharoitlardan kelib chiqqan holda 2005—2008-yillar mobaynida hamma joyda issiqlik bilan taʼminlashning yopiq sxemasiga yoki markazlashtirilmagan holda (mahalliy sxema boʻyicha) issiqlik bilan taʼminlashga oʻtish.

5. Kommunal xizmat koʻrsatish sohasida xorijiy investitsiyalar va kreditlar hisobiga amalga oshirish nazarda tutilayotgan ustuvor investitsiya loyihalari roʻyxati 5-ilovaga muvofiq maʼqullansin.

6. Oʻzbekiston Respublikasi Adliya vazirligi manfaatdor vazirliklar va idoralar bilan birgalikda bir oy muddatda:

amaldagi qonun hujjatlariga mazkur qarordan kelib chiquvchi oʻzgartirish va qoʻshimchalar toʻgʻrisida Oʻzbekiston Respublikasi Vazirlar Mahkamasiga takliflar kiritsin;

idoraviy normativ hujjatlarning ushbu qarorga muvofiqlashtirilishini taʼminlasin.

7. “Oʻzteleradio” kompaniyasi, Oʻzbekiston matbuot va axborot agentligi “Oʻzkommunxizmat” agentligi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda ommaviy axborot vositalarida ushbu qarorda nazarda tutilgan tadbirlarning amalga oshirilishini muntazam ravishda yoritsinlar.

8. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.H. Toʻxtayev zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2005-yil 11-fevral,

61-son

Vazirlar Mahkamasining 2005-yil 11-fevraldagi 61-son qaroriga 5-ILOVA

Kommunal xizmat koʻrsatish sohasida xorijiy investitsiyalar va kreditlar hisobiga amalga oshirish nazarda tutilgan ustuvor investitsiya loyihalari roʻyxati

* Vazirlar Mahkamasi huzuridagi Xalqaro moliya institutlari, tashkilotlari va donor mamlakatlar bilan hamkorlik qilish, yirik va strategik jihatdan muhim investitsiya loyihalarini amalga oshirish masalalari boʻyicha Idoralararo kengash moliyalashtirish manbalarini belgilagan holda investitsiya loyihalari roʻyxatiga aniqlik kiritish huquqiga ega.

** Jalb etiladigan mablagʻlar summalari va amalga oshirish muddatlari loyihalarning texnik-iqtisodiy asoslashlarini tasdiqlash natijalariga koʻra oʻzgarishi mumkin.