Xalqaro savdo obyektlari Respublika kompleksini tashkil etish toʻgʻrisida (433-son)

16.09.1992

Oʻzbekiston Respublikasi Prezidenti huzuridagi Vazirlar Mahkamasining

qarori

Oʻzbekiston Respublikasi Prezidentining “Oʻzbekiston Respublikasi Tashqi iqtisodiy aloqalar vazirligini tashkil etish toʻgʻrisida” 1992-yil 21-fevraldagi Farmoniga, Vazirlar Mahkamasining “Oʻzbekiston Respublikasi Tashqi iqtisodiy aloqalar vazirligi faoliyatini tashkil etish toʻgʻrisida” 1992-yil 26-martdagi 147-son qaroriga muvofiq Vazirlar Mahkamasi qaror qiladi:

1. XXYUK hududi tarkibida:

“OʻZEKSPOMARKAZ” savdo-koʻrgazma-markazi,

“OʻZBIZNESMARKAZ” amaliy hamkorlik markazi boʻlgan Xalqaro savdo obyektlarining respublika kompleksi tashkil etilsin.

2. Xalqaro savdo obyektlarining respublika kompleksi tashkil etilishi munosabati bilan Oʻzbekiston Respublikasi XXYUK tugatilsin.

XXYUK hududi Oʻzbekiston Respublikasi Tashqi iqtisodiy aloqalar vazirligiga foydalanish uchun berilsin va u hududda joylashgan hamda XXYUK hisobida boʻlgan mol-mulk, binolar, inshootlar va muhandislik tarmoqlarining huquqiy vorisi etib belgilansin.

XXYUK (oʻrtoq Lukovskiy) uch kun muddat ichida tugatish komissiyasini tuzsin, XXYUK hududida joylashgan va u yerdagi binolarni ijaraga olgan barcha tashkilotlarni, kreditorlar hamda debitorlarni XXYUKning tugatilishi va shartnomalarning bekor qilinishi toʻgʻrisida xabardor qilsin.

Tashqi iqtisodiy aloqalar vazirligi (oʻrtoq Sultonov) uch kun muddat ichida XXYUK mol-mulkini qabul qilib olish boʻyicha komissiya tuzsin.

Tashqi iqtisodiy aloqalar vazirligi (oʻrtoq Sultonov), XXYUK (oʻrtoq Lukovskiy) bir oy muddat ichida binolar va inshootlarni ularga xizmat koʻrsatish uchun zarur boʻlgan fondlar, limitlar va mablagʻlar bilan birga qabul qilish-topshirishni amalga oshirsinlar.

3. Tashqi iqtisodiy aloqalar vazirligi (oʻrtoq Sultonov) bir oy muddat ichida XXYUKning ishlab turgan pavilyonlari negizida “OʻZEKSPOMARKAZ” savdo-koʻrgazma markazini, Tashqi iqtisodiy aloqalar vazirligining xoʻjalik hisobidagi “Oʻzaxborottex” tashqi iqtisodiy firmasi negizida “OʻZAXBOROTTIJORATMARKAZ” axborot-tijorat markazini tuzishga doir taʼsis hujjatlarini tayyorlasin va tasdiqlasin.

4. Belgilansinki, XXYUK negizida tuzilgan “OʻZEKSPOMARKAZ” savdo-koʻrgazma markazi:

1992-yilda — XXYUKga har yili ajratiladigan limitlar doirasida budjet mablagʻlari hisobiga;

1993-yil yanvardan boshlab manfaatdor vazirliklar, konsernlar va birlashmalarning hissabay qatnashuvlari hisobiga taʼminlanadi.

“OʻZEKSPOMARKAZ” quyidagilarni tashkil etishni taʼminlaydi:

respublika xalq xoʻjaligi tarmoqlaridagi yuqori samarali ilmiy-texnika ishlanmalari natijalarini koʻrsatishni va ularni ishlab chiqarishga joriy etishga koʻmaklashishni, ilmiy tadqiqotlarning ustuvor yoʻnalishlarini, texnikaning eng yaxshi namunalarini va ilgʻor tajribani targʻib qilishni;

eng muhim ilmiy-texnika, iqtisodiy va ijtimoiy muammolar boʻyicha tarmoqlararo, biror mavzuga bagʻishlangan koʻrgazmalar va koʻriklar, yarmarkalar va kimoshdi savdolarini;

xalqaro va xorijiy koʻrgazmalarni, shu jumladan, tijorat asosida, shuningdek, chet elda respublika koʻrgazmalari va yarmarkalarini.

6. Belgilansinki, “OʻZBIZNESMARKAZ” amaliy hamkorlik markazi uchun XXYUK hududida bino va inshootlar tizimi quriladi, ularga quyidagilar joylashtiriladi:

Toshkent xalqaro paxta birjasi;

savdo-vakillik ofislari;

xorijiy banklarning filiallari;

reklama va servis xizmatlari;

xalqaro simpoziumlarni oʻtkazish uchun konferens-zallar;

Tashqi iqtisodiy faoliyat Milliy bankining va tashqi savdo birlashmalarining hamda Tashqi iqtisodiy aloqalar vazirligi firmalarining boʻlinmalari;

birinchi klass mehmonxonalar, restoranlar va kafelar, savdo rastalari.

7. XXYUK hududidagi yangi qurilishni mablagʻ bilan taʼminlash “Turekzimbank” va tashqi iqtisodiy faoliyat Milliy banki kreditlari hisobiga, Vazirlar Mahkamasining 1992-yil 29-avgustdagi 316-f-son farmoyishiga muvofiq, oʻz xarajatlarini oʻzi qoplash shartlari boʻyicha amalga oshiriladi.

8. Xalqaro savdo kompleksi obyektlari qurilishi boʻyicha buyurtmachi etib Tashqi iqtisodiy aloqalar vazirligi, bosh loyihachi etib “TashNIIPIgenplan” belgilansin.

Maʼlumot uchun qabul qilinsinki, Tashqi iqtisodiy aloqalar vazirligi bilan tuzilgan bitimga koʻra obyektlar qurilishi boʻyicha bosh pudratchi etib Turkiyaning “Yuksel Inshaat” qurilish firmasi, subpudratchi tashkilotlar etib “Toshkentboshqurilish” va Oʻzbekiston Respublikasi Montaj va maxsus qurilish ishlari vazirligi belgilandi.

9. Toshkent shahar hokimligi (oʻrtoq Fozilbekov):

ikki hafta muddat ichida ilgari ajratilgan, lekin boshqa idoralar tomonidan oʻzlashtirilmagan maydonlarni jalb qilishni hisobga olgan holda Xalqaro savdo obyektlarining Respublika kompleksini joylashtirish uchun yangi chegaralarni birkitib qoʻysin;

bir oy muddat ichida Tashqi iqtisodiy aloqalar vazirligining Oʻzbekistonda akkreditatsiya qilingan savdo vakolatxonalarining turar joy kompleksi qurilishi uchun Yunusobod tumanidagi Kaymakov va Mirzaahmedov koʻchalari chegaralarida 4—5 gektar yer maydoni ajratsin.

10. “TashNIIPIgenplan” instituti (oʻrtoq Odilxoʻjayev) Turkiyaning “Yuksel Inshaat” firmasi bilan birgalikda xorijiy davlatlarning savdo vakolatxonalari turar joy kompleksi uchun qurilishini 1993-yilda nihoyasiga yetkazishni taʼminlaydigan uning loyiha-smeta hujjatlarini tayyorlasin.

11. Toshkent viloyati hokimligi (oʻrtoq Saydaliyev) XXYUK hududidan gʻisht zavodini koʻchirish uchun Binokorlik materiallari sanoati vazirligiga ikki hafta muddat ichida yer maydoni ajratsin.

Tashqi iqtisodiy aloqalar vazirligi (oʻrtoq Sultonov) Binokorlik materiallari sanoati vazirligiga XXYUK hududidan gʻisht zavodini koʻchirish bilan bogʻliq boʻlgan xarajatlarning qoldiq balans boʻyicha qiymatini yiliga 30 mln donagacha gʻisht ishlab chiqaradigan gʻisht zavodi komplektini import boʻyicha yetkazib bergan holda toʻlasin.

14. Energetika va elektrlashtirish vazirligi (oʻrtoq Toshpoʻlatov), Aloqa vazirligi (oʻrtoq Rahimov) energiya va issiqlik taʼminoti, tashqi muhandislik kommunikatsiyalari qurishda Tashqi iqtisodiy aloqalar vazirligiga amaliy yordam koʻrsatsinlar.

15. Mazkur qarorning bajarilishini nazorat qilish Bosh vazir oʻrinbosari B. S. Hamidov zimmasiga yuklatilsin.

Qarorning qanday amalga oshirilayotgani 1993-yil yanvarda Vazirlar Mahkamasi majmuining majlisida koʻrib chiqilsin.

Vazirlar Mahkamasining Raisi I. KARIMOV

Toshkent sh.,

1992-yil 16-sentabr,

433-son