“Paxtasanoat ilmiy markazi” aksiyadorlik jamiyati faoliyatini tubdan takomillashtirish chora-tadbirlari toʻgʻrisida (PQ-3559-son)

23.02.2018

Oʻzbekiston Respublikasi Prezidentining

Qarori

Paxta tozalash sanoati oldida turgan vazifalar uning samaradorligini sifat jihatidan oshirish, ishlab chiqarish quvvatlarini innovatsion yangilash, texnik va texnologik modernizatsiya qilish, tarmoq raqobatbardoshligini mustahkamlash, zamonaviy paxtachilik va toʻqimachilik klasterlarini yaratish, ilgʻor texnologiyalarni keng joriy etish zarurati bilan belgilanadi va shundan kelib chiqadi.

Mahalliy paxta mahsulotlarining raqobatbardoshligini taʼminlashga qaratilgan sanoat ishlab chiqarish quvvatlarini modernizatsiya qilish va texnologik yangilash jarayonlarining samaradorligi bevosita fan-texnika taraqqiyotining ilgʻor yutuqlari, innovatsion ishlanmalar va yuqori texnologiyali “nou-xau”larni faol oʻzlashtirishga bogʻliq.

Paxta tozalash sanoatiga innovatsion texnologiyalarni joriy etish, idoralararo ilmiy-tadqiqot va tajriba-konstruktorlik ishlarini muvofiqlashtirish, xalqaro ilmiy-texnikaviy hamkorlik dasturlarida ishtirok etishni taʼminlash va soha xodimlarining malakasini oshirishni tashkil etish masalalari “Oʻzpaxtasanoat” aksiyadorlik jamiyati (keyingi oʻrinlarda — “Oʻzpaxtasanoat” AJ) tarkibiga kiruvchi “Paxtasanoat ilmiy markazi” aksiyadorlik jamiyati (keyingi oʻrinlarda — “Paxtasanoat ilmiy markazi” AJ) vakolatiga kiradi.

“Paxtasanoat ilmiy markazi” AJning koʻp yillik faoliyati davomida sohada qoʻllaniladigan asosiy texnologiyalar va laboratoriya jihozlari ishlab chiqilib, paxta tozalash korxonalari faoliyati uchun zarur ishlab chiqarish va normativ-metodik asoslar shakllantirildi.

Shu bilan birga, “Paxtasanoat Ilmiy markazi” AJdagi ishlarning holatini oʻrganish natijalari koʻplab hal etilmagan muammo va kamchiliklar toʻplanib qolganligini koʻrsatib, uning faoliyatini tubdan takomillashtirish zarurligini koʻrsatadi:

birinchidan, ilmiy tadqiqot ishlarida foydalaniladigan laboratoriya va nazorat-oʻlchov vositalarining asosiy qismi oʻtgan asrning 60-70 yillarida xarid qilingan boʻlib, zamonaviy talablar va xalqaro standartlarga javob bermaydi;

ikkinchidan, ishlab chiqarish boʻlinmalarining texnologik asbob-uskunalari va mashinalari 50 yildan ortiq faoliyat yuritib kelgan, maʼnaviy va jismonan eskirgan, texnik imkoniyatlari uskunalarning yuqori texnologiyali va murakkab eksperimental modellarini ishlab chiqarishga imkon bermaydi;

uchinchidan, muhim ilmiy yoʻnalishlarni amalga oshirishda turgʻunlik kuzatilmoqda, malakali ilmiy kadrlar chiqib ketmoqda. Moliyalashtirishdagi tizimli muammolar, moddiy-texnika resurslarining taqchilligi, toʻlaqonli ilmiy tadqiqotlar olib borish uchun shart-sharoitlarning yetarli emasligi keyingi yillarda muhim ilmiy natijalarning yoʻqligiga, yangi texnik yechimlar va ishlanmalarning yetarlicha tezkorlik bilan joriy etilmaganiga olib keldi;

toʻrtinchidan, ixtisoslashgan tashkilotlar bilan idoralararo hamkorlik darajasi pastligicha qolmoqda; innovatsion texnologiyalar va qurilmalarni yaratish sohasida xalqaro ilmiy markazlar bilan hamkorlikda ish deyarli yoʻq;

beshinchidan, kadrlar malakasini oshirishning amaldagi tizimi eskirgan taʼlim standartlari va usullariga, “Paxtasanoat Ilmiy markazi” AJ oʻquv-axborot resurs markazlari ishini tashkil etishga yondashuvlarga asoslanadi, soha xodimlarini ishdan toʻxtovsiz interfaol oʻqitish imkoniyatlarini cheklaydi.

“Paxtasanoat ilmiy markazi” AJ faoliyatini tubdan takomillashtirish, ilmiy salohiyatidan samarali foydalanish uchun zarur shart-sharoitlarni yaratish, mahalliy paxta mahsulotlari sifati va raqobatbardoshligini oshirish, shuningdek, Oʻzbekiston Respublikasi Prezidentining 2017-yil 28-noyabrdagi “Paxtachilik tarmogʻini boshqarish tizimini tubdan takomillashtirish chora-tadbirlari toʻgʻrisida”gi PQ-3408-son qarori ijrosini samarali taʼminlash maqsadida:

1. “Paxtasanoat Ilmiy Markazi” AJ faoliyatining asosiy yoʻnalishlari etib quyidagilar belgilansin:

tarmoqni rivojlantirishning dolzarb ilmiy muammolarini hal etish, respublika paxta tozalash sanoatida yagona davlat ilmiy-texnika siyosatini ishlab chiqish va amalga oshirishda ishtirok etish;

paxta xomashyosini birlamchi qayta ishlash va ekish chigitini tayyorlashni takomillashtirish sohasida ilmiy-texnikaviy va innovatsion faoliyatni amalga oshirish;

respublikada ilmiy, loyiha-konstruktorlik va taʼlim tashkilotlari tomonidan amalga oshirilayotgan ilmiy-tadqiqot va tajriba-konstruktorlik ishlarini muvofiqlashtirish;

yetakchi xorijiy ilmiy-tadqiqot institutlari bilan hamkorlikda innovatsiyalar va texnologiyalar transferi markazlarini tashkil etish, innovatsion texnologiyalar va qurilmalarni yaratish sohasida xorijiy hamkorlar bilan birgalikdagi ishlarni kengaytirish;

paxta tozalash sanoatida mahalliy ilm-fanni talab qiluvchi, yuqori mahsuldor va raqobatbardosh texnologik asbob-uskunalarni yaratish va joriy etish doirasida ilmiy-tadqiqot va tajriba-konstruktorlik, tajriba-konstruktorlik ishlarini amalga oshirish, ilmiy tadqiqotlardan tayyor ilmiy-texnika mahsulotigacha boʻlgan toʻliq innovatsion siklni amalga oshirishni taʼminlash;

tegishli oʻquv kurslari va seminarlar oʻtkazish orqali soha mutaxassislarini qayta tayyorlash va ularning malakasini oshirishni tashkil etish.

2. “Oʻzpaxtasanoat” AJ tomonidan ishlab chiqilgan:

“Paxtasanoat Ilmiy Markazi” AJ tashkiliy tuzilmasi 1-ilovaga* muvofiq;

“Paxtasanoat Ilmiy markazi” AJ ijro apparati tuzilmasi 2-ilovaga* muvofiq tasdiqlansin.

3. Quyidagilar:

2018 — 2020-yillarda Oʻzbekiston Respublikasida paxta xomashyosini birlamchi qayta ishlash texnikasi va texnologiyasini rivojlantirish boʻyicha tadbirlar dasturi (keyingi oʻrinlarda — Dastur) 3-ilovaga* muvofiq;

Tajriba paxta tozalash zavodlarida ishlab chiqarilgan paxta tolasining ustama toʻlovidan ulgurji roʻyxat narxigacha boʻlgan mablagʻlarni shakllantirish va ulardan foydalanish tartibi toʻgʻrisidagi nizom 4-ilovaga* muvofiq tasdiqlansin.

* 1 — 4-ilovalar rus tilidagi matnda berilgan.

Tasdiqlangan Dasturni amalga oshirish boʻyicha ishlarni muvofiqlashtirish “Oʻzpaxtasanoat” AJga, uni amalga oshirish boʻyicha asosiy tashkilotning vakolatlari va funksiyalari hamda ixtisoslashtirilgan tashkilotlar bilan oʻzaro hamkorlik qilish “Paxtasanoat ilmiy markazi” AJ zimmasiga yuklansin.

4. “Paxtasanoat Ilmiy markazi” AJ faoliyatini moliyalashtirish manbalari sifatida mazkur qaror bilan tasdiqlangan Dasturni amalga oshirish uchun paxta tozalash tajriba korxonalari tomonidan ishlab chiqarilgan paxta tolasining ulgurji narxiga (QQSsiz) 5 foizli ustama mablagʻlari, xoʻjalik faoliyatidan olingan mablagʻlar, Oʻzbekiston Respublikasining Innovatsion rivojlanish vazirligining grantlari, kadrlar tayyorlash jamgʻarmasi mablagʻlari, shuningdek qonunchilik hujjatlarida taqiqlanmagan boshqa manbalar belgilansin.

5. Oʻzbekiston Respublikasi Innovatsion rivojlanish vazirligi mazkur qaror bilan tasdiqlangan Dasturning ustuvor yoʻnalishlarini amalga oshirishni jadallashtirishga, Dasturda belgilangan fundamental, amaliy va innovatsion loyihalarni, keng koʻlamli idoralararo ishlarni belgilangan tartibda tanlov asosida tanlash orqali davlat ilmiy-texnika dasturlariga bosqichma-bosqich kiritilishini taʼminlashga har tomonlama koʻmaklashsin.

6. Mazkur qarorning ijrosini nazorat qilish Oʻzbekiston Respublikasi Bosh vazirining oʻrinbosari — “Oʻzagrotexsanoatxolding” AJ boshqaruvi raisi N.S. Otajonov va “Oʻzpaxtasanoat” AJ boshqaruvi raisi A.I. Maqsudov zimmasiga yuklatilsin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2018-yil 23-fevral,

PQ-3559-son