Respublikada urugʻlik kartoshkasini yetishtirishni yanada rivojlantirish chora-tadbirlari toʻgʻrisida (PQ-3558-son)

23.02.2018

Oʻzbekiston Respublikasi Prezidentining

Qarori

Respublikada sugʻoriladigan yerlardan samarali foydalanish, kartoshkachilikni yanada rivojlantirish, xorijiy ilmiy-tadqiqot institutlari bilan ilmiy hamkorlikni kengaytirish, kartoshka urugʻchiligini rivojlantirish uchun zamonaviy resurs tejovchi texnologiyalarni jalb etish, sifatli urugʻliklarning kafolatlangan hajmi hisobiga ichki bozorda narxlar barqarorligini taʼminlash, kartoshka yetishtirishni koʻpaytirish, shuningdek, respublika aholisining kartoshkaga boʻlgan ehtiyojini qondirish maqsadida:

1. Oʻzbekiston Respublikasi Qishloq xoʻjaligi vazirligi, Oʻzbekiston fermer, dehqon xoʻjaliklari va tomorqa yer egalari kengashi, “Oʻzbekoziqovqatxolding” XK va “Agrover” MCHJ hamda boshqa tadbirkorlik subyektlarining Kartoshka yetishtiruvchilar uyushmasini (keyingi oʻrinlarda — Uyushma) tashkil etish toʻgʻrisidagi taklifi maʼqullansin.

2. Quyidagilar Uyushmaning asosiy vazifalari va faoliyat yoʻnalishlari etib belgilansin:

respublikada xorijiy texnologiyalar asosida mahalliy kartoshka urugʻchiligini rivojlantirish, yuqori mahsuldor kartoshka urugʻlarini yetishtirishni tashkil etish;

kartoshka mahsulotlari va urugʻlari yetishtirishni taʼminlash, ichki bozorni sifatli kartoshka bilan toʻldirish maqsadida bozor konyunkturasini chuqur marketing tadqiqotlari oʻtkazish;

urugʻlik kartoshkani yetishtirishga ixtisoslashgan fermer xoʻjaliklarining yer maydonlariga joylashtirish boʻyicha takliflar tayyorlash hamda tegishli vazirlik va idoralar bilan birgalikda ushbu yoʻnalishda ish olib borish;

navlarning tozaligi va urugʻlik materialining tasdiqlangan standartlar talablariga muvofiqligini taʼminlash maqsadida kartoshka urugʻchiligi hududiy markazlari, ixtisoslashtirilgan urugʻchilik fermer xoʻjaliklari va mulkchilik shaklidan qatʼi nazar, kartoshka urugʻchiligi bilan shugʻullanuvchi boshqa subyektlar faoliyati monitoringini olib borish;

urugʻlik va oziq-ovqat kartoshkasini ekish, yetishtirish va parvarishlash agrotexnikasi, kasallik va zararkunandalarga qarshi kurashish, shuningdek yetishtirilgan hosilni yigʻishtirib olish va saqlash boʻyicha tavsiyalar tayyorlash;

kartoshkachilik sohasida ilmiy yutuqlarni, serhosil navlarni, yetishtirishning zamonaviy texnologiyalarini joriy etish, xorijiy ilmiy-tadqiqot institutlari va xalqaro tashkilotlar bilan aloqalarni yoʻlga qoʻyish, shuningdek, kartoshka yetishtirishga ixtisoslashgan fermerlar malakasini tizimli ravishda oshirishni tashkil etish;

respublikada urugʻlik kartoshka va oziq-ovqat kartoshkasi yetishtirishning prognoz hajmlari boʻyicha takliflar tayyorlash, urugʻlik kartoshka yetishtirish bilan shugʻullanuvchi tashkilotlar va urugʻlik kartoshka yetishtirishga ixtisoslashgan fermer xoʻjaliklari faoliyatini muvofiqlashtirish;

urugʻlik va oziq-ovqat kartoshkasini yetishtirish uchun zarur boʻlgan moliyaviy, yoqilgʻi-energetika, suv va yer resurslari, shuningdek, mineral oʻgʻitlar va oʻsimliklarni himoya qilish vositalari bilan taʼminlash masalalarida koʻmaklashish.

3. Quyidagilar maʼlumot uchun qabul qilinsin:

“Agrover” MCHJ, “Oʻsimliklar texnologiyasi” MCHJ, masʼuliyati cheklangan jamiyat shaklidagi hududiy kartoshkachilik markazlari, shuningdek, kartoshka yetishtiruvchi fermer xoʻjaliklari Uyushma muassislari hisoblanadi;

tashkilotlar, fermer xoʻjaliklari va boshqa xoʻjalik yurituvchi subyektlar shartnoma asosida Uyushmaga mustaqil kirishi va uning tarkibidan chiqishga haqli;

Uyushma faoliyatini moliyalashtirish uning tarkibiga kiruvchi tashkilotlarning ixtiyoriy ajratmalari va qonun hujjatlarida taqiqlanmagan boshqa manbalar hisobiga amalga oshiriladi;

Uyushma quyidagi manzilda joylashtiriladi: Toshkent shahri, Sergeli tumani, Sanoat zonasi, Soʻgʻdiyona koʻchasi, 50-uy.

4. Quyidagilar:

Kartoshka yetishtiruvchilar uyushmasining tashkiliy tuzilmasi 1-ilovaga muvofiq;

kartoshka yetishtiruvchilar uyushmasining boshqaruv xodimlarining cheklangan umumiy soni 20 nafardan iborat ijro etuvchi apparati tuzilmasi 2-ilovaga* muvofiq tasdiqlansin.

* 2-ilova rus tiidagi matnda berilgan.

5. Belgilansinki, Uyushma raisi va uning oʻrinbosarlari taʼsischilarning umumiy yigʻilishi qarori bilan saylanadi va Oʻzbekiston Respublikasi Vazirlar Mahkamasi tomonidan lavozimga tasdiqlanadi.

6. Kartoshka yetishtiruvchilar uyushmasini tashkil etish bilan bogʻliq tashkiliy tadbirlarni muvofiqlashtirish va amalga oshirishga koʻmaklashish boʻyicha ishchi guruh (keyingi oʻrinlarda — Ishchi guruh) 3-ilovaga muvofiq tarkibda tashkil etilsin.

Ishchi guruh (Z.T. Mirzayev):

bir oy muddatda Uyushmaning Ustavi va taʼsis hujjatini ishlab chiqish hamda ularni belgilangan tartibda davlat roʻyxatidan oʻtkazilishini;

Uyushma ijro etuvchi apparatini tasdiqlangan tuzilma va shtatlar jadvaliga muvofiq puxta tanlash asosida yuqori malakali mutaxassislar bilan toʻldirilishini;

respublika mintaqalarida kartoshkachilik markazlari va ixtisoslashtirilgan fermer xoʻjaliklari faoliyatini tashkil etishga amaliy yordam koʻrsatilishini taʼminlasin..

7. Qoraqalpogʻiston Respublikasi Vazirlar Kengashi va viloyatlar hokimliklarining 2018-yilda bugʻdoy oʻrim-yigʻimidan keyin asosiy va boʻshaydigan maydonlarga urugʻlik va oziq-ovqatbop kartoshka yetishtirish uchun joylashtirish toʻgʻrisidagi takliflariga rozilik berilsin.

2018-yil hosili uchun import boʻyicha olib kelinadigan urugʻlik kartoshka hajmlarining tashkilotlar va viloyatlar boʻyicha taqsimlanishi 4-ilovaga muvofiq tasdiqlansin.

Respublika hududlarida ekishni tashkil etish, shuningdek, ichki bozorda narxlar barqarorligini taʼminlash maqsadida olib kirilayotgan urugʻlik kartoshka bojxona toʻlovlaridan (bojxona yigʻimlaridan tashqari) ozod qilinsin.

8. Tijorat banklariga kartoshka yetishtiruvchi fermer xoʻjaliklari hamda 2018-yil hosili uchun urugʻlik kartoshka olib keluvchi jalb etilgan tashkilotlarga imtiyozli stavkalarda kredit mablagʻlari ajratish tavsiya etilsin.

9. Qoraqalpogʻiston Respublikasi Vazirlar Kengashi va viloyatlar hokimliklari:

bir oy muddatda fermer xoʻjaliklari boʻyicha urugʻlik va oziq-ovqat kartoshkasi hajmlarini joylashtirsin;

2018-yil 1-martga qadar urugʻlik kartoshka yetkazib beruvchi xoʻjalik yurituvchi subyektlarga dastlabki toʻlovni taʼminlasin.

10. Belgilansinki:

tuproq-iqlim xususiyatlaridan kelib chiqib, Andijon viloyatining Qoʻrgʻontepa tumani, Qashqadaryo viloyatining Shahrisabz va Kitob tumanlari, Namangan viloyatining Yangiqoʻrgʻon tumani, Samarqand viloyatining Bulungʻur tumani, Jizzax viloyatining Zomin va Baxmal tumanlari, Toshkent viloyatining Boʻstonliq tumani hamda Fargʻona viloyatining Soʻx tumani urugʻlik kartoshka yetishtirishga ixtisoslashgan;

respublikada urugʻlik kartoshka yetishtirish faqat urugʻlik kartoshka yetishtirishga ixtisoslashgan va Uyushmaga aʼzo boʻlgan fermer xoʻjaliklari tomonidan amalga oshiriladi;

urugʻlik kartoshka yetishtirish uchun yer maydonlarini aprobatsiya qilish va urugʻlarning navini aniqlash faqat Uyushma, Qishloq xoʻjaligi ekinlari urugʻlarini sertifikatlash va sifatini nazorat qilish davlat markazi va kartoshkachilik hududiy markazlari tomonidan amalga oshiriladi;

urugʻlik kartoshka yetishtirishga ixtisoslashtirilgan yerlarda qishloq xoʻjaligi ekinlarini joylashtirish Uyushma tarkibiga kiruvchi kartoshkachilik hududiy markazlari bilan kelishilgan holda amalga oshiriladi.

11. Andijon, Qashqadaryo, Namangan, Samarqand, Jizzax, Toshkent va Fargʻona viloyatlari hokimliklari kartoshkachilik markazlarini tashkil etish maqsadida ikki oy muddatda:

Uyushmaga aʼzo boʻlgan xoʻjalik yurituvchi subyektlarga laboratoriyalar, issiqxonalar, sabzavot omborlari, shuningdek, ochiq usulda kartoshka ekish uchun togʻli hududlarda unumdor yerlar qurilishini amalga oshirish uchun zarur maydonlar ajratilishini;

tuproq-iqlim sharoitlari va suv resurslari bilan taʼminlanganlik darajasidan kelib chiqib, togʻli va togʻoldi hududlaridagi yer maydonlarida urugʻlik kartoshka yetishtirishga ixtisoslashgan fermer xoʻjaliklarini tashkil etishni, shuningdek, mavjud fermer xoʻjaliklarini qayta ixtisoslashtirishni; kartoshka yetishtirishga ixtisoslashgan fermer xoʻjaliklarini qayta ixtisoslashtirishni taʼminlasin;

tashkil etilayotgan kartoshkachilik markazlarining joylarda qishloq xoʻjaligiga xizmat koʻrsatuvchi infratuzilma va mavjud muhandislik-kommunikatsiya tarmoqlariga ulanishini taʼminlasin.

12. Oʻzbekiston Respublikasi Qishloq xoʻjaligi vazirligi va “Agrover” MCHJning 2018-yilda tajriba-sinov loyihasi sifatida Toshkent viloyatining Boʻstonliq tumanida urugʻlik va oziq-ovqat kartoshkasi yetishtirishga ixtisoslashgan, Uyushma aʼzolari uchun shartnoma asosida tayyor mahsulot yetishtirishga buyurtmalarni joylashtiradigan, shuningdek, agrotexnika va agrokimyo, logistika, saqlash, qadoqlash va tashish boʻyicha xizmatlar koʻrsatilishini tashkil etadigan “Boʻstonliq kartoshkachilik markazi” MCHJni tashkil etish toʻgʻrisidagi taklifiga rozilik berilsin.

13. Toshkent viloyatining Boʻstonliq tumanini kartoshka yetishtirishga ixtisoslashtirish boʻyicha tajriba loyihasini qisqa muddatlarda amalga oshirish maqsadida:

Toshkent viloyati hokimligi, Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasi bir oy muddatda “Agrover” MCHJning buyurtmanomasi asosida “Boʻstonliq kartoshkachilik markazi” MCHJ hamda fermer xoʻjaliklari va qishloq xoʻjaligi korxonalari faoliyatini tashkil etish uchun Boʻstonliq tumani hududidan kamida 3 000 gektar yer maydonlarini ajratsin;

istisno tariqasida “Boʻstonliq kartoshkachilik markazi” MCHJni tashkil etish boʻyicha qurilish va qurilish-montaj ishlarini loyiha-smeta hujjatlarini ishlab chiqish bilan bir vaqtda amalga oshirishga ruxsat bersin;

Oʻzbekiston Respublikasi Suv xoʻjaligi vazirligi tegishli vazirlik va idoralar bilan birgalikda bir oy muddatda 2018-2019-yillar davrida Toshkent viloyatining Boʻstonliq tumanida kartoshka yetishtirishga ixtisoslashgan yer maydonlarida irrigatsiya, melioratsiya va sugʻorish tizimlarini qurish va rekonstruksiya qilishni tashkil etish boʻyicha takliflarni Oʻzbekiston Respublikasi Vazirlar Mahkamasiga kiritsin.

14. Oʻzbekiston Respublikasi Qishloq xoʻjaligi vazirligi Uyushma bilan birgalikda ikki oy muddatda ichki bozor ehtiyojlarini qondirish maqsadida yuqori mahsuldor kartoshka urugʻlarini yetishtirishni rivojlantirishga qaratilgan 2018 — 2022-yillarda respublikada urugʻchilikni rivojlantirish va kartoshka yetishtirish boʻyicha kompleks chora-tadbirlar dasturini (keyingi oʻrinlarda — Dastur) ishlab chiqsin va tasdiqlash uchun Oʻzbekiston Respublikasi Vazirlar Mahkamasiga kiritsin.

Dastur doirasida respublikada yuqori mahsuldor kartoshka urugʻlarini yetishtirishni rivojlantirish uchun zarur mablagʻlar miqdori va ularni Uyushmaga aʼzo tashkilotlarning oʻz mablagʻlari, toʻgʻridan toʻgʻri investitsiyalar, Oʻzbekiston Respublikasi Tiklanish va taraqqiyot jamgʻarmasi, Qishloq xoʻjaligi korxonalarini tarkibiy oʻzgartirish agentligi, tijorat banklari tomonidan jalb etiladigan kredit mablagʻlari, shuningdek, boshqa manbalar hisobidan moliyalashtirish nazarda tutilsin.

15. Respublikada kartoshkachilik va urugʻchilikni yanada rivojlantirishni qoʻllab-quvvatlash maqsadida Uyushma tarkibida tashkil etiladigan kartoshkachilik markazlari 2022-yil 1-dekabrga qadar:

Oʻzbekiston Respublikasida ishlab chiqarilmaydigan tomchilatib, yomgʻirlatib va sprinklerlatib sugʻorish tizimi asbob-uskunalari, qishloq xoʻjaligi texnikasi va agregatlari, urugʻlik kartoshka, zamonaviy laboratoriya asbob-uskunalari va materiallari, kimyoviy reagentlar, kasalliklar va zararkunandalarga qarshi kimyoviy vositalar, maxsus mineral oʻgʻitlar, shuningdek kartoshkani tashish, qadoqlash, qayta ishlash, saralash uchun issiqxona komplekslari, muzlatgichlar va boshqa omborxonalar qurish uchun asbob-uskunalar, materiallar va qurilish materiallari uchun bojxona toʻlovlaridan (bojxona yigʻimlaridan tashqari) 5-ilovaga muvofiq ozod qilinsin;

yuridik shaxslardan olinadigan foyda soligʻi, kichik korxonalar va mikrofirmalar uchun yagona soliq toʻlovi, shuningdek, davlat maqsadli jamgʻarmalariga majburiy ajratmalar toʻlashdan ozod qilinsin.

16. Belgilansinki, ushbu qarorning 4 va 5-ilovalarida koʻrsatilgan tovarlardan boshqa maqsadlarda foydalanilgan taqdirda imtiyozlar berilishi munosabati bilan toʻlanmagan soliq va bojxona toʻlovlari summasi qonun hujjatlarida nazarda tutilgan moliyaviy sanksiyalar qoʻllanilgan holda Oʻzbekiston Respublikasi Davlat budjetiga undiriladi.

17. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari Z.T. Mirzayev zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2018-yil 23-fevral,

PQ-3558-son

Oʻzbekiston Respublikasi Prezidentining 2018-yil 23-fevraldagi PQ-3558-son qaroriga 1-ILOVA

Kartoshka yetishtiruvchilar uyushmasi

TASHKILIY TUZILMA

* Yangi tashkil etilayotgan tashkilotlar.

Oʻzbekiston Respublikasi Prezidentining 2018-yil 23-fevraldagi PQ-3558-son qaroriga 3-ILOVA

Kartoshka yetishtiruvchilar uyushmasini tashkil etish bilan bogʻliq tashkiliy tadbirlarni muvofiqlashtirish va ularga koʻmaklashish boʻyicha ishchi guruh

TARKIBI

Eslatma. Ishchi guruh aʼzolari boshqa ishga oʻtgan taqdirda uning tarkibiga ushbu lavozimlarga yangidan tayinlangan yoki zimmasiga tegishli funksiyalarni bajarish yuklangan shaxslar kiritiladi.

Oʻzbekiston Respublikasi Prezidentining 2018-yil 23-fevraldagi PQ-3558-son qaroriga 4-ILOVA

* Ekin maydonlari hajmi Oʻzbekiston Respublikasi Prezidentining 15.09.2017-yildagi PQ-3281-son qaroriga muvofiq belgilangan, shu jumladan import boʻyicha olib kelinadigan elita va I reproduksiya urugʻlarini joylashtirish maydonlari hajmi kartoshkachilikka ixtisoslashgan tumanlarda 11,4 ming gektarni tashkil etadi.

Oʻzbekiston Respublikasi Prezidentining 2018-yil 23-fevraldagi PQ-3558-son qaroriga 5-ILOVA

Oʻzbekiston Respublikasida ishlab chiqarilmaydigan tomchilatib, yomgʻirlatib va sprinkler bilan sugʻorish tizimlari asbob-uskunalari, qishloq xoʻjaligi texnikasi va agregatlari, urugʻlik kartoshka, zamonaviy laboratoriya asbob-uskunalari va materiallari, kimyoviy reagentlar, kasalliklar va zararkunandalarga qarshi kimyoviy vositalar, maxsus mineral oʻgʻitlar, shuningdek issiqxona komplekslari, muzlatgichlar va kartoshkani tashish, qayta ishlash, saralash uchun bojxona toʻlovlaridan (bojxona yigʻimlaridan tashqari) ozod qilingan holda olib kiriladigan boshqa omborlar qurish uchun asbob-uskunalar, materiallar va qurilish materiallari

ROʻYXATI*

* Imtiyozlar yangidan tashkil etilayotgan kartoshkachilik markazlariga — Uyushma aʼzolariga Uyushma tomonidan tasdiqlangan loyihalarga muvofiq taqdim etiladi.

** Tovarlarning TIF TN boʻyicha yakuniy kodlari bojxona rasmiylashtiruvi vaqtida aniqlanadi.